Nehemiah 3 - Ohiatonhseratokénti

Sononhnihátse tsi Tewasóntote ne Jerusalem

¹ Tánon ne Eliashib né꞉ne ratsihentowá꞉nen thontahá꞉tane skátne ne ronatiá꞉kes ratitsihénstatsis, tánon sahonhnón꞉ni ne watenhenranihionthákwa ne teiotinakarontónha konwanatónkwa. Wakonwatonhnaheráse tánon sahontenhenranihiónten; wakonwatonnáherase kwáh tsi niió꞉re ne tsitkanikátote nénska tewenhniáwe iotʼiaton tánon tsi niió꞉re ne tsitkanikátote ne Hananel.

² Ne ronhnón꞉kwe ne Jericho kwáh thók rahiatákʼta wahotiiò꞉ten; tánon ne Zaccur, né꞉ne ró꞉ienha Imri, thóh rahiatákʼta roiótekwe.

³ Ne raonekenterontserashón꞉as ne Hassenaah sarónhni ne tsi iotenhenrakáronte ne kéntionk konwanatónkwa. Wahatíkeron ne tewaterontarenótstakwah tánon sahatikwatakwenháton ne watenonhanihionthakwas ó꞉ni ne kanonware꞉sonhas tanon ne tewakrenʼosthákwas.

⁴ Ne raʼtiiatákʼta, ne Meremoth ne roiénha neʼne Uriah né꞉ne ieshoní꞉ha ne Hakkoz, ne sahatisheronhniánion. Tánon ne raʼhiatatʼta, ne Meshullam, ne roʼiénha ne Berechiah, né꞉ne ieshoní꞉ha ne Meshezabel, sahatisheronhniá꞉nion. Tánon ne rahiatákʼta, ne Zadok, né꞉ne roʼiénha ne Baana, sahaseronhniánion.

⁵ Ne rahiatákʼta neʼne Tekoaró꞉nons sahaseronhniánion, ók neh ratisennowá꞉nens kwáh iáh tetʼthonahnénsare ne raohiothénseras ne Shakoianere.

⁶ Ne Joiada né꞉ne roʼiénha ne Paseah, tánon ne Meshullam né꞉ne ró꞉ienha ne Besodeiah sahatiserón꞉nianion ne iotenhenrakáion; wahatikéron ne tewaterontarenwákwas tánon wahatinhohanihiontónhnion tánon wahatikwathakwenháton ne watenientʼtaróstha tánon wathatiristanrenwánion.

⁷ Ne raʼtiiatákʼta Melatiah né꞉ne Gibeonró꞉non tánon Jadon né꞉ne Meronothró꞉non, ne ronhnónkwe ne Gibeonró꞉nons tánon ne Mizpahró꞉nons sahatiseronhniánion; ók thóh ratihiató꞉ron raohianerenserákon ne rakó꞉ra níse nakaniataráti ténteron.

⁸ Ne raʼhiatatʼta, Uzziel, né roʼiénha ne Harhaiah, né꞉ne rohió꞉tens nowistanoron í꞉ken, sahakwahtakwenhaton; ne raʼhiatatʼta, Hananiah, ne roʼníha ne iontsatakonhonsthákwa rónhnis sahakwatakwenháton. Tánon sahatiseronhniánion ne Jerusalem kwáh tsi niió꞉re ne tethewashontakáron konwanatónhkwa.

⁹ Ne ratihiátat tónhties, Rephaiah, ne roʼníha né꞉ne Hur, raónha rakorákwe ne satekanatíhen ne Jerusalem, sahakwatakwenháton.

¹⁰ Ne rahiatákta Jedaiah né꞉ne roʼníha ne Harumaph, sahakwatakwenháton ne rahononsát꞉tha; ne rahiatákta Hattush né꞉ne roʼníha ne Hashabneiah sahakwahtakwenhá꞉ton.

¹¹ Malchijah né꞉ne roʼníha ne Harim, tánon Hasshub, né꞉ne roʼníha ne Pahath Moab sahatikwatakwenhá꞉ton nó꞉ia í꞉ken tánon ne kanikató꞉tonʼs ne iontenatarontháhkwa.

¹² Ne rahiatákta Shallum né꞉ne roʼníha ne Hallohesh, rahónha ne rakorákwe ashén꞉non ne kanatowanénke Jerusalem, sahakwatakwenhá꞉ton, skátne ne sakohioʼó꞉kons tsonattonwí꞉sen.

¹³ Hanun tánon ne thóh nón꞉we nihatinákere Zanoah sahatikwatakwenháton ne ahonráhkwakon iotenhenrakáronte. Sahonhnonhniánion tánon sahatinowanihiontónhnion, wahatikwatakwenhá꞉ton ne watenhotónkwas; tánon wathatiristharenwánion; tánon sahatikwathakwenhá꞉ton wísk tewenhniáwe niwathatserá꞉kon ní꞉ions nashón꞉ta, né꞉ne konwanaʼtónhkwa ó꞉ta iotenhenrakáronte.

¹⁴ Malchijah né꞉ne roʼní꞉has ne Rechab, rahónha ne rakó꞉ra ne kanatowakénke ne Beth-Haccherem, rahónha ne sahakwatáko ne tsi iotenhenrakáron ne ota; sarónhni tánon wahanowanihiontónhnion tánon wahakwahtakwenhá꞉ton ne wateniéntat rósthas tánon ne tewateristhenráhkwah.

¹⁵ Tánon ne Shallum né꞉ne roʼníha ne Colhozeh, rahónha ne rakó꞉ra í꞉ken ne kanatowanénhke Mizpah, sahasehrón꞉ni ne tsi watnekí꞉ne iotenhenrakáronte; rahónha sahrónhni tánon waharó꞉roke tánon wahanhowanihiotónhnion tánon wahakwathakwenhá꞉ton ne watenienʼtarósthas tanon ne tewateristarenkwákwas. Kwáh ó꞉ni sahakwahtakwenhá꞉ton nasontakéhsons ne tsi watnekaientákwas ne Shelah tsi niió꞉re ne ronnontí꞉io thotetháien tánon kwáh tsi niió꞉re ne tsi ierastentháhkwa tsi nieiawé꞉non ne tsit kaná꞉taien ne Táwit.

¹⁶ Ne Nehemiah né꞉ne roʼiénha ne Azbuk, rahónha ne rakó꞉raʼkwe ne asénhnon tsi niiokwénrahre ne Bethzur, rahónha sahakwahtáko nó꞉ia nashóntha kwáh tsi nió꞉re ne Táwit raotsatónhkwah ítken, tánon kwáh tsi niió꞉re ne ronhnónkwe rotíson ne watnekaientáhkwah tánon ne ronterí꞉ios tsi rotinónshote.

Ne Levites Ronónha Rotiʼioténhen nasontà꞉ke

¹⁷ Ne noia ne Levites sahatikwatakwenhá꞉ton; ne Rehum né꞉ne roʼiénha ne Bani, rahónha ne sahakwatakwenhá꞉ton; noia neʼne Hashabiah né꞉ne rakó꞉ra í꞉ken ashén꞉non tsi iokwenhrahre ne Keilah, rahónha sahakwatakwenhá꞉ton ne tsi iokwenhrahre tsi nón꞉we nihanakere.

¹⁸ Noia neʼne ronthatekenʼahs sahatikwatakwenhá꞉ton; Binnui né꞉ne roʼiénha ne Henadad, rahónha ne rakó꞉ra í꞉ken ne áhsen non tsi niwatenaskwah ne Keilah.

¹⁹ Noia ne Ezer né꞉ne roʼiénha ne Jeshua, rahónha ne rakó꞉ra ne Mizpah, rahónha ne sahakwatakwenhá꞉ton ne óia asontasonhas ne ákte nokwá꞉ti íken tsi iehionontaʼrahon ne tsi nón꞉we nihonteweientónhkwa ne ionteriiostháhkwas ne tsi nieiawenonh tsitʼkaiosaien.

²⁰ Noia ne ne Baruch né꞉ne roʼiénha ne Zabbai rahónha ne sahakwatakwenhá꞉ton nó꞉ia asontasonhas thóh tiotáhsawe tsi tekaiosáien kwáh tsi niió꞉re tsi iehatawehiatáhkwah ne tsi roʼnónshote ne Eliashib né꞉ne ratsihenstowá꞉nen í꞉ken.

²¹ Noia neʼne Meremoth, né꞉ne roʼiénha ne Uriah, né꞉ne roʼiénha ne Hakkoz, rahónha ne sahakwahtháko nó꞉ia asontas thoʼtiotasawe tsi rotenonhkaronhte ne tsi ronónhshote ne Eliashib.

Ratitsihenstátsis Ronónha Rotiioténhen nasontà꞉ke

²² Noia neʼne ratitsihénstatsi, sahatikwahtakwenhaton nasontasonhas.

²³ Ne ronátsakes, Benjamin tánon ne Hasshub, sanikwahtáko teiotihaha tsi rotinónshote; ne ronatsakes, Azariah, né꞉ne roʼiénha ne Maaseiah né꞉ne roʼiénha ne Ananiah rahónha ne sahakwatá꞉ko nákta tsi ronónshote.

²⁴ Nó꞉ia né꞉ne Binnui, né꞉ne roʼiénha ne Henadad, rahónha ne sahakwahtakwénhaion nasontasónhas thoʼtontashawen tsi rononshó꞉te ne Azariah né꞉ne kwáh tsi nió꞉re tetkaiosaiensʼs.

²⁵ Palal né꞉ne roʼiénha ne Uzai, rahónha ne sahakwatáko ne teiotihaha tsi tekaiósaien tánon ne tsi kanikatóte, né꞉ne tsi iehioniasakétote ne tiotʼte ne tsi ronónshote ne ronhnontí꞉io né꞉ne atenhenrákon tsi ratì꞉teron ne ratinónhne. Noia ne ne Pedaiah, né꞉ne roʼiénha ne Parosh,

²⁶ tánon ononsatokentikó꞉wa ratináskwa thóh nón꞉we Ophel nihatinákere, sahatikwahtakwenhá꞉ton kwáh tsi niió꞉re ne onékanos tiotenhenrakáronhte né꞉ne tsit karahkwí꞉nekens nokwá꞉ti tánon tsi niió꞉re tsi iehioniasakétote ne tsi kanikatóte.

Akorénhsons Shononhnihátse

²⁷ Noia né꞉ne, Tekoaró꞉nons ronónha sahatikwahtáko nó꞉ia asontasonhas ne ne teiotihaha, ne kowánen í꞉ken tsi iehioniasakétote, kwáh tsi niió꞉re ne tsitkanikatóte ne Ophel.

²⁸ Né꞉ne é꞉neken ne Koshá꞉tens tsi iotenhenráronhte, ne ratiʼtsihénstatsi roʼhónha sahatikwahtáko, satihiatatʼtions ne ronónha raotinonsashón꞉as.

²⁹ Noia neʼne Zadok, né꞉ne roʼiénha ne Immer rahónha ne sahakwahtáko ne teiotihaha tsi ronónshote; tánon ne ó꞉ia Shemaiah né꞉ne roʼiénha ne Shecaniah, rahónha ne ranikónrahre ne tsitkarakwí꞉nekens iotenhenrakaronhte rahónha sahakwahtáko.

³⁰ Noia neʼne Hananiah né꞉ne roʼiénha ne Shelemiah, tánon ne Hanun, rahónha ne iahiákhaton nié꞉rate ne Zalaph sakohiohokónhas, rahónha ne sahakwatá꞉ko noia asontasónhas. Noia neʼne Meshullam, né꞉ne roʼiénha ne Berechiah rahónha ne sahakwahtáko noia asontasonhas ne tsi nonwe ratsientháhkwa.

³¹ Ne noia neʼne Malchijah, ne roʼiénha né꞉ne rohiò꞉tens nowistanó꞉ronhas, rahónha ne sahakwatáko kwáh tsi niió꞉re tsi totinónshote nononsatokentí꞉ko ratináskwas, tánon ne rontkerons rononháne sahatikwahtáko ne tsi iotenhenrakáronte ne rarahtakweni꞉io, kwáh tsi niió꞉re ne é꞉neken tionaktáien ne tsi tekaiosaien.

³² Tánon tsi naʼtetiátere ne é꞉neken ionáktaien ne tsi tekahiósaien ne teiotinakarontónha iotenhenrakáronte, tsi nihá꞉ti né꞉ne rotiiò꞉tens nowistanó꞉ronshas tánon ne rontkérons ronónha ne sahatikwahtakwenhá꞉ton.