Nehemiah 11 - Ohiatonhseratokénti

Nonkweó꞉kons Tsi Niiá꞉kon ne Jerusalem Ratinákeres

¹ Tánon ne sakotihenténhse nonkwehó꞉kons thóh ratinákere Jerusalem; tánon ne ronátiaʼkes nonkwehó꞉kons washakotiiatarakwenhá꞉ton tionkwè꞉ta ne oié꞉ri nihiá꞉kon entesakotiiaténhawe ne thóh ahieterónhtake Jerusalem, né꞉ne kanatowanénhke ne iotokénhti, ók ne tióhton nihá꞉ti ne iatoʼnathaténhre thóh ne enhatiʼterónhtake nó꞉ia kanatahién꞉tons.

² Tánon nonkwehó꞉kons washakotiiataté꞉riste ne ronhnón꞉kwe, né꞉ne tsi nihá꞉ti ne wahón꞉nere thóh ahatiʼterónhtake Jerusalem.

³ Tánon ne kí꞉ken ne sakotihenténhse ne thóh ratinákere Jerusalem; ók ne kanatowanénhke ne Judah, ne tionkweʼtáktions thóh ne ratì꞉teron ne ronónha rahononhontsà꞉kes thóh tsi raotinatowanénhkes: Israel, ne ratiʼtsihénstatsis, tánon ne Levites, tánon nononsatokentikówane ratináskwas, tánon ne raotinekenteronhtsherashón꞉as ne Solomon raonhá꞉tsheras.

⁴ Tánon otià꞉kes ne sakoioʼokón꞉as ne Judah tánon notià꞉kes ne sakoioʼokón꞉as Benjamin thóh ratinákere Jerusalem. Ne sakoioʼokón꞉as ne Judah né꞉ne: Atanaiah, né꞉ne roʼiénha ne Uzziah, né꞉ne roʼní꞉ha ne Zechariah, né꞉ne roʼní꞉ha ne Amariah, né꞉ne roʼiénha ne Shephatiah, né꞉ne roʼiénha ne Mahalalel ne sakoioʼokón꞉as ne Perez.

⁵ Maaseiah, né꞉ne roʼní꞉ha ne Baruch tánon ne roʼní꞉ha ne Colhozeh. Né꞉ne roʼiénha ne Adaiah, né꞉ne roʼiénha ne Joiarib, né꞉ne roʼiénha ne Zechariah, né꞉ne roʼiénha ne Shilohró꞉non.

⁶ Ratikwé꞉kon ne sakoioʼokón꞉as ne Perez, thóh ratinákerehkwe Jerusalem né꞉ne kaié꞉ri tewenhniáwe tánon iáh-iak niwáhsen-shaʼté꞉kon nihá꞉ti ronhnón꞉kwe né꞉ne rontatsinástha.

⁷ Tánon ne kí꞉ken sakoioʼokón꞉as ne Benjamin: Sallu, né꞉ne roʼní꞉ha ne Meshullam, né꞉ne roʼní꞉ha ne Joed, né꞉ne roʼní꞉ha ne Pedaiah, né꞉ne roʼní꞉ha ne Kolaiah, né꞉ne roʼní꞉ha ne Maaseiah, né꞉ne roʼní꞉ha ne Ithiel, né꞉ne roʼní꞉ha ne Jeshaiah.

⁸ Tánon ne shonwanonhterátie né꞉ne Gabbai, Sallai, né꞉ne tióhton tewenhniáwe tewáhsen shaʼté꞉kon nihá꞉tikwe.

⁹ Tánon ne Joel, né꞉ne roʼní꞉ha ne Zichri, né꞉ne sakotenikonrá꞉wiskwe ne ronón꞉ha, tánon ne Judah, né꞉ne roʼní꞉ha ne Hassenuah raónha ne tekeníhaton ieháthakwe tsi nihoterihónthakwe ne kanatowanénhke.

¹⁰ Ne Ratiʼtsihénstatsis, Jedaiah, né꞉ne roʼiénha ne Joiarib, Jachin.

¹¹ Ne Seraiah, né꞉ne roʼiénha ne Hilkiah, né꞉ne roʼiénha ne Meshullam, né꞉ne roʼiénha ne Zadok, né꞉ne roʼiénha ne Meraioth, né꞉ne roʼiénha ne Ahitub, né꞉ne rakó꞉rakwe tsi ronón꞉shote Ní꞉io.

¹² Tánon ne ronthatekenʼokón꞉as, ronón꞉ha ne rotiiò꞉tenskwe ne tsi kanónshote né꞉ne shaʼté꞉kon tewenhniáwe tánon tewáhsen-tékeni nihá꞉tikwe; tánon ne Adaiah, né꞉ne roʼiénha ne Jehoram, né꞉ne roʼiénha ne Pelaliah, né꞉ne roʼiénha ne Amzi, né꞉ne roʼiénha ne Zechariah, né꞉ne roʼiénha ne Pashhur, né꞉ne roʼiénha ne Malchijah.

¹³ Tánon ne ronthatekenʼokón꞉as, ne sakotihenténhse ne kaní꞉sehras, né꞉ne tékeni tewenhniá꞉we tánon kaié꞉ri niwáhsen tékeni nihá꞉tikwe; tánon ne Amashsai, né꞉ne roʼiénha ne Azarel. Né꞉ne roʼiénha ne Ahzai, né꞉ne roʼiénha ne Meshillemoth, né꞉ne roʼiénha ne Immer.

¹⁴ Tánon ne ronhthatekénhas, né꞉ne ratishátstes ronhnón꞉we ne rotatstsinástha, né꞉ne énska tewenhniáwe tánon tewáhsen shaʼté꞉kon nihá꞉tikwe; tánon ne sakotenikonrá꞉wiskwe né꞉ne Zabdiel, né꞉ne roʼní꞉ha ne Haggedolim.

¹⁵ Tánon tsi nithonè꞉non ne Levites: né꞉ne Shemaiah, né꞉ne roʼiénha ne Hasshub, né꞉ne roʼiénha ne Azrikam, né꞉ne roʼiénha ne Hashabiah, né꞉ne roʼiénha ne Bunni.

¹⁶ Tánon ne Shabbethai ó꞉ni ne Jozabad, ne shakotihenténhse ne Levites, ronón꞉ha né꞉ne sakonateʼnikonhrá꞉wiskwe átste nokwá꞉ti ne tsi ronón꞉shote ne Ní꞉io.

¹⁷ Tánon ne Mattaniah, né꞉ne roʼiénha ne Mica, né꞉ne roní꞉ha ne Zabdi, né꞉ne roní꞉ha ne Asaph, né꞉ne saiá꞉ta sakohentenhséhakwe tsi tehontenonwerá꞉tons naterenhnaientáhtshera, tánon ne Bakbukiah, raónha tekení꞉haton nié꞉rate tsi nonhonthatekénhas, tánon ne Abda, né꞉ne roʼiénha ne Shammua, né꞉ne roʼiénha ne Galal, né꞉ne roʼní꞉ha ne Jeduthun.

¹⁸ Ratikwé꞉kon ne Levites thóh ratinákerehkwe ne ionatatokenhtí꞉ke né꞉ne tékeni tewenhniáwe tánon shaʼté꞉kon niwáhsen kaié꞉ri nihá꞉tikwe.

¹⁹ Tánon ne tehontenhenranonhnáhkwe né꞉ne Akkub, Talmon, tánon ne rontatekéhas ronón꞉ha ne ratinón꞉nahkwe tsi iotenhenrakaróntons, né꞉ne énska tewenhniáwe tánon tsá꞉ta niwáhsen tékeni nihá꞉tikwe.

²⁰ Tánon ne ronátiaʼkes nʼIsraerʼró꞉nons, ne ratiʼtsihénstatsis ó꞉ni ne Levites, ronón꞉ha ratiʼterónhtakwe akwé꞉kon ne tsi kanatowá꞉nens ne Judah, satihiatátʼtions thóh ratì꞉teron raonatená꞉takes.

²¹ Tánon nononsatokentikó꞉wane ratináskwas thóh ne nón꞉we nihatinakérehkwe ne Ophel; tánon Ziha tánon ne Gishpa ronón꞉ha nenhné꞉e è꞉neken sakonatohesténhni ne ononsatokentikó꞉wa ratináskwas.

²² Tánon na sakohenténhse ne Levites ne Jerusalem nón꞉we ne꞉ne Uzzi, né꞉ne roʼní꞉ha ne Bani, né꞉ne roʼiénha ne Hashabiah, né꞉ne roʼiénha ne Mattaniah, né꞉ne roʼiénha ne Mica, né꞉ne raonekenteronhtseraʼshón꞉as ne Asaph, ronón꞉ha ne tehatirihwákwakwe nohén꞉ton ne kahioʼténhseras tsi ronón꞉shote ne Ní꞉io.

²³ Tiorì꞉wa tsi rotinontí꞉ios sakotinhá꞉hon, né꞉tho akakweienhnenhtáhonke ne kákhwas ne raotirihwà꞉ke ne tehatirihwákwas niatewenhniserá꞉ke.

²⁴ Tánon Ne Pethahiah, né꞉ne roʼiénha ne Meshezabel, ne sakohioʼokón꞉as ne Zerah, né꞉ne roʼní꞉ha ne Judah, ne shakothatsiáse ne rontinontí꞉ios norihwakwé꞉kons akorihwashón꞉as nonhkweshón꞉as.

Nonkweó꞉kons ne Atʼtesons Tkanatowá꞉nens oni Kanataiéntons

²⁵ Tánon ne kanatakonró꞉nons ó꞉ni ne raotihetahshón꞉as, otià꞉kes ne sakoioʼokón꞉as ne Judah thóh ratinákeres Kiriath Arba tánon aksteshóns tsi kanakerahserá꞉iens, tánon thóh nón꞉we Dibon tánon nastáhshons tsi kanakerahserá꞉iens tánon thóh nón꞉we ne Jekabzeel tánon naonatashón꞉as.

²⁶ Tánon thóh nón꞉we Jeshua, tánon thóh nón꞉we Moladah, tánon thóh nón꞉we Bethpelet,

²⁷ tánon thóh nón꞉we Hazar-Shual, tánon thóh nón꞉we Beersheba tánon natstéhsons ne tsi kanakerahserá꞉ien,

²⁸ Tánon thóh nón꞉we Ziklag, tánon thóh nón꞉we Mekonah tánon natstésons tsi kanakerahserá꞉ien,

²⁹ Tánon thóh nón꞉we En-Rimmon, tánon thóh nón꞉we Zorah, tánon thóh nón꞉we Jarmuth,

³⁰ Ne Zanoah, Adullam tánon nahonathaʼsónhas, Lachish tánon nahohetaʼshón꞉as, Azekah tánon ne atstésons ne tsi kanakerahserá꞉ien. Tánon wahontatoserotónhnion thóh thontáhsawen Beersheba tsi niió꞉re ne Ahonráhkwakon ne Hinnom.

³¹ Tánon ne rahoksatashón꞉as ne Benjamin thóh nithoné꞉non Geba, thóh wahonthatì꞉teron Michmash, tánon Aija ó꞉ni Bethel ó꞉ni natstéhsons nokwá꞉ti naonahkerahserá꞉kons,

³² Anathoth, Nob, Ananiah,

³³ Hazor, Ramah, Gittaim,

³⁴ Hadid, Zeboim, Neballat,

³⁵ Lod, tánon ne Ono, tánon ne Ahonráhkwakon ne tsi Rotihiothenserarenhnáhon.

³⁶ Tánon ne Levites thóh tehonwatihiakón꞉ni ne Judah tánon ne Benjamin.