Nehemiah 1 - Ohiatonhseratokénti

Nehemiah Né꞉ne Teonikonrare Ne Jerusalem

¹ Ne kí꞉ken ne raowenhnashón꞉ahs ne Nehemiah, ne roiénha ne Hacaliah. Thóh tsi niwenhnitárakwe ne Chislev, néne tewáhsen shiʼioseratátse, tsi ná꞉he tho kanatakwení꞉ioke iekeskwe nene Susa.

² Hanani, néne saiáta natiatatekénha, tánon thó꞉kara niháti ne ronhnónkwe ne Judahró꞉non tahón꞉ne; tánon wakheriwanón꞉tonhse nahò꞉ten iorì꞉wase tsi nihá꞉ti ne shonathéntion tsi ronwanahnakerakwahtónhne tánon tsi nokwáh ne Jerusalem.

³ Tánon wahonkénhase, “Tsi nihá꞉ti ne ieteshonathaténron tsi ronwatiiatinekénhen tánon thóh ratì꞉teron ne tsi kanakerahserá꞉ien ne ne kowá꞉nen tsi watkanikónraren tánon atehénsera. Ne tsi tewashón꞉thote nosténra ne tehiokwahtaséhton ne Jerusalem ne tsi tehiorí꞉hon tánon ne tsi iotenhenrentónhnion ioté꞉ken.”

⁴ Tánon nó꞉nenh shonkaʼthóntene kí꞉ken owenhnashón꞉ahs wakátsien tánon watkaséntʼto tánon wakaktiónhnion tó꞉ka nón꞉ta nikarí꞉wes; tánon onkwentón꞉tiete tánon wakaterén꞉naien raohénton ne Rawenni꞉io tsi karonhiá꞉te.

⁵ Waʼkí꞉ron, “O Saiá꞉ner, rahónha ne Rawenni꞉io ne tsi karonhiá꞉te, teotenonhiatí꞉ton tánon roshatstenhserowanenʼkó꞉wa Rawenni꞉io, Rahónha rateweién꞉tons naterihwaseronhniá꞉tshera ne kenténron tsi nihiá꞉kon ne ronwanorónhkwa tánon iontewenhnaráhkwa ne raorihwatátʼtshera.

⁶ Sherí꞉hon ne sahonthá꞉ke nahontenhnikónraren tánon tesatkakwahríhsi, né꞉tho nahón꞉ton ní꞉se ahisatónhtene ne raoterén꞉naient ne sanhá꞉tshera. Né꞉tho nahónton akaterén꞉naien sahénton né꞉ne tsi niwenhní꞉seres tánon tsi niwashón꞉tes, ne raotirihwà꞉ke na ratitsaokón꞉has ne Israerró꞉nonhke né꞉ne sanhá꞉tshera í꞉ken, tánon nakakró꞉ri ne raotirihwaneraháktsheras ne ratitsaokón꞉has Nisraeró꞉nonke ne tsi nihionkwahrihwanéren ne tionhá꞉ke; tetsá꞉ron ní꞉i tánon natwá꞉tsire tsi ionkwahrihwanéren.

⁷ Thóh nihionkwahtshéren ne karihwahetkénhsera tsi nokwáh ní꞉se; tánon iáh tehionkwatienawáston ne karihwatatʼtsheras khehs ne kahianerénhsera khéhs ne kahiatorehtháhtshera ne ní꞉se tsi nitsró꞉rih ne Mahís, ne sanhá꞉tsera.

⁸ Serhiá꞉rak, tsi nikonhianiténtase, nowenhnashón꞉as tsi nitsró꞉ri ne sanhá꞉tshera Mahís, satón꞉nions, ‘Tó꞉ka iáh tesarihwató꞉ken Kwáh ki tekonhiaréniate tsi ratinakeréhnion nonkwehó꞉kons.

⁹ Ók tó꞉ka akonhá꞉ke nathétese tánon ensenónsthate nakatsawenhráhtsheras tánon thóh nenhséren, é꞉thoʼne kíʼ iawerohátien shé꞉kon ne taiesarehniátonke ne tsi iehioteronhiáte, kwáh ki skátne tsi ensekhehiaʼtaró꞉roke, tánon thóh nienkhehiaʼthénhawe ne tsi tewatenataièn ne wakeráhkwen tsi nón꞉we nakaiénhtake natsénhna.’

¹⁰ Ronónha ne sanhatsherashónhas í꞉ken tánon shonkweʼtashón꞉as tsi niká꞉ien ne sheshehiathákwen thóh ne shatstenhserowá꞉nenke tánon ne kaʼshátste satiá꞉nake.

¹¹ Natsiá꞉ner, áhion ne sahón꞉take ne watenhnikónhraren thóh ne raoterén꞉naien ne sanhá꞉tshera tánon ne raonaterén꞉naient ne sanhatsheraʼshón꞉as, ne rononweshá꞉tha tsi nihatikweniénstha ne sashén꞉na; tánon tátion ne sanhátshera nahohianerásten nón꞉wa wenhniserá꞉te entié꞉na ne kenténrat tsi néntewe ronontiiò꞉ke.” Ne thoʼsikahawikwe í꞉i ne ne ketʼsenháskwe ne tehiontnekontháhkwa raotse ne ronnontí꞉io.