Nahum 3 - Ohiatonhseratokénti

Nakarihwentʼthonke Ónenh Thó꞉wah Ehnahiá꞉wenhne Tánon Iáh Tháhonton Ne Tatáste

¹ Iothentásehre ne tehionekwenhshó꞉hare kanatowanénhke, kwáh í꞉ken tsi kanikonhrá꞉tha, titkahé꞉re ká꞉nenhskwen— iáh tsehiotót꞉te ne kanenhskwátsera!

² Iokwí꞉rahkarehre tánon iokakwenhtakaré꞉re, ionatsakarón꞉tionhatse kosáhtens tánon ehné꞉ken iekakwát꞉tos notiónkwah kásehres!

³ Tánon ne rotishathénhtien tsi nisakonathó꞉rion ne koshá꞉tens, tsi natehiokará꞉iat ne rahonasareʼkó꞉wa ó꞉ni tsi nateiostharát꞉te ne raonasíkwahras, iohiatasthokotátse ne ronenhé꞉ion, iothonhiotátse nawenheiónhtas, iáh tsehiotót꞉te tsi natewehionhonthó꞉taron— né thonashítsias nawehé꞉hiontas!

⁴ Tiorì꞉wa tsi iáh tewaʼséhton tsi tsatehiorahtiéton ne tsiothakwahkaréni nakahiató꞉ten, tehiorenhkénhniat tánon titʼkáhere ne tewatkónston ne iakorió꞉tha, iakonikonrathénhnis nonkweshón꞉has ne tsi tsatehiorahtiéton, tánon tehiakorenhkénhnies nonkweshón꞉has ne tsi niwatenhénhnaras,

⁵ Kwáh kíʼ konhiát꞉konhte, ráton ne Roiá꞉ner ne Roshatstenhserowanenhkó꞉wa, Kwáh kíʼ enkonré꞉waʼte ní꞉se, Nineveh! Kwáh kíʼ enkonnós꞉tonhni tánon enkerí꞉hon nonkweshón꞉ha naiesáken enhontkátho akwé꞉kon tsi ní꞉iohterihwaʼtseren ne tierón꞉ke.

⁶ Kwáh kíʼ ononwénhsehra enkonhióhiake tánon enkonhníh꞉tseron, tánon óhta enkonhiónhni.

⁷ Tánon ratikwé꞉kon nenhiesáken kwáh iáh karì꞉wa taiesónhni tánon enhonhní꞉ron, “Akwé꞉kon ne tsi kanón꞉sotons ne Nineveh karihwentʼthó꞉sehron; ónhka káti akonwát꞉tsionhnionhse?” Í꞉i ne Watiá꞉ner, iáh ónhka tekhehiatatʼtsénhries nakonhwaʼnikonhranirá꞉te?

⁸ Ninevah, iáh sénha tesaianereh tsi ní꞉ioht ne Thebes, né꞉ne kanatakwení꞉ioke ne Egypt? Ahonha ó꞉ni ioniatará꞉ien nahontahione kwáh tsi ní꞉ioht ne waʼtenhenró꞉te, ne Nile né tehiotiá꞉thaton.

⁹ Né Ethiopia né nahoshatsténhsera í꞉ken, Egypt ó꞉ni iáh tsehiotót꞉te nahoshatsténhsera; Put tánon ne Libya né konwasniénonskwe.

¹⁰ Nek kíʼ sá꞉ka nonkweshón꞉ha ne Thebes iahonhwaʼtiiathénhawe waʼhonwatinakerahkwáhthe, kwáh tsi níkons tekahiosakéron ne kanathatátse ne sakotiiohokónhas tsi waʼhonwaʼtinonhwenhserá꞉rio tsi nió꞉re ienhonhnihé꞉ie. Né sakotihenthénhse rahononhkweʼtashón꞉has iahonwatiiathénhawe orón꞉kwahsa tehatinénhsteren, tánon ne sakotiienenhenhátse wahá꞉tiwasthotionhko tsi nahonwaʼtihiatarakwenhá꞉ton ne ratisenhnowá꞉nens.

¹¹ Í꞉se ó꞉ni Ninevah kwáh ensanekáthane, kwáh thensashí꞉norokʼkhon enséhsake nasehiataséhthen ne ieshá꞉sons.

¹² Akwé꞉kon ne tsi satenhenró꞉tons thóh ní꞉ioht kwáh né꞉ne tsionionwarontonhakó꞉wa keríhtons ne nenhtewaʼtsérenhte enwaʼhiári— tó꞉ka tenhierontakarénhron enwaʼienhne kwáh kíʼ iensashá꞉karó꞉kate.

¹³ Sekenhénhion ne shonkweʼtashón꞉has ronhterí꞉ios: konhnón꞉kwe teshón꞉tserens. Ne tsi iothenhenrenhtón꞉nions ne sonhontsá꞉kes tsatekanón꞉hontion rononháke ne ieshá꞉sons; ótsire enkarihwaʼthonhte ne tsi tekaristharenhwánion tsi sathenhenrakarónhtons.

¹⁴ Satneká꞉ien sathateweienénhtan nó꞉nenh ne iesásons teiesanatánake, sní꞉ratʼton ne tsi sathenhenró꞉tons; Tesehnawasthawénhre satenenhionhniánion, satesehrónhni ne kanawastahóntsi, seweienénhtat noneró꞉kwáh ne sateienhionhniátha!

¹⁵ Iáh tewáts꞉teristha onhnasátiere kwáh kíʼ ó꞉ni enshá꞉tsatatʼtsa tsi ensí꞉heie, khés tsi waʼterí꞉io nón꞉we nenhsí꞉heie. Kwáh ensá꞉tonhte tsi ní꞉ioht ne tsistá꞉rare rotihé꞉tentʼton tsi nihonatekwí꞉son ne kaienthótsera. Wesenhtsiokowaʼna tsi ní꞉ioht ne tsistá꞉rare!

¹⁶ Weshonkwetakathénhne ne ronthenhninonserót꞉tha sénha ronatiohkowá꞉nenh tsi ní꞉ioht ne tsi iotsistohkwahrónhnion tsi karonhiá꞉te. Ók ónenh kaktseohnénon, tsi ní꞉ioht ne tsistá꞉rare tehontenerahonktsakwahríhte tánon tenhatíthen.

¹⁷ Né teonanénhraien shonkweʼtashónhas thóh nihonatsióhkwah tsi ní꞉ioht ne tsistá꞉rare, tánon ne sanhatseraó꞉kons tsi sanontiiotserá꞉ien thóh nihió꞉honwaʼrahre tsi ní꞉ioht ne tsistá꞉rare tsi waʼtenhénraien nón꞉we nihonatenakʼtónhni nó꞉nenh iahonhniserános— ók nó꞉nenh entkarakwí꞉nekenhne tenhsatíthen; iáh ónhka teiakoterénhtare kaniehoné꞉non.

¹⁸ Né rakoraʼkó꞉wa ne Assyria nón꞉we, ne iesakó꞉rasons ronenhé꞉ion, tánon ne shonkweʼtashónhas ne ratisenhnowánenhs kwáh tsi nén꞉we enhkénhake tsi ronenhé꞉ion! Né shonkweʼtashónhas tsi ionontahrónhnions nón꞉we iatehonwanareniá꞉ton, tánon iáh ónhka tahonsahonwaʼtiiataró꞉roke.

¹⁹ Kwáh iáh tekanonhkwahtserá꞉ien tsi nisatkarewathánion, tsi nisatkarewá꞉ton iáh tehió꞉ien naiesatsiénte. Ratikwé꞉kon nenhatirihwaʼrón꞉ke tsi nisaiatawénhen tenhieshá꞉saroke tsi nenhontsienhnónhni. Asè꞉ken ónhka ken nonwénhton tsakoniakénʼen ne iáh tsehiotʼot꞉te tsi nisehniakáts꞉te?