Nahum 2 - Ohiatonhseratokénti

Nahotkaronhniátshera Ne Kanatatsénhskwa

¹ Ne tehanitsatharohkwáhtha tahiatiatónhti. Sewatenhnikónhraren ne tsi kakahkwénhtaien ne tsi wathenhénrote; sewatenhnikónhraren ne tsi iohathátie; iasehwaʼtakosenhthánion ne tesehwaʼtewehiárakwas; ietsihiataró꞉rok ratikwé꞉kon ne tionkweʼtashón꞉as ronhterí꞉ios tánon sewathateweienénhtan nahisewaʼterí꞉io.

² Asè꞉ken ne Roiá꞉ner shokwatakwenhátie ne raotʼkweniensthátshera ne Jacob, tánon ó꞉ni naotkweniensthátshera ne Israel, kwáh kíʼ tsi nitsiotónh꞉ne nohénton ne ronwaʼtí꞉shons sahonwatinenhskwenháton tánon wahatikaronhniánion tsi ionathón꞉ton ne watenenharísehres.)

³ Ne teioniatastháhkwa ne rahonkweʼtashón꞉as raoná꞉wenk onekwénhtara niwashokó꞉tens; ne raonhkweʼtashón꞉as ronhterí꞉ios kanekwenhtarahóntsi ronatseronhniáton. Ne tekastarathétons ne karístatsis wáts꞉tanion ne raotisehreshón꞉as notiónhkwas konhtíriios tsi nateiokará꞉hiat ne wenhniserá꞉te ronhtateweienénhtas niasakonatiaʼtónhti; né koshá꞉tens tsi kónhne kwáh teiotinonhniakwenhátie tsi nateiotisterí꞉hens

⁴ Notiónkwas kwáh iáh othé꞉non tsatekahiatoréton tsi natehionaréh꞉ron ne kanatakónhsons, tekonteratánions ne kanatakwení꞉ioke; né tsi rónhnes kwáh né꞉ne iekenhtonkóhare, thóh natehotíka tsi ní꞉ioht ne tahonhninekárahwe.

⁵ Iasakonónh꞉ke ne rahonkweʼtashón꞉as ne ratishenhnowá꞉nens; ratihiatsénenhs tsi ohén꞉ton nontahónhne; ne ratinenhréhtha tsi watenhénrote iathontskén꞉ni, tánon teioniatastakó꞉wa wahatinió꞉ten né꞉ne tahiotáste ne karonhtowá꞉nen tewasonhtaríhtha.

⁶ Ne kaniataratátie ne kaniá꞉ton wahatinhotón꞉ko, nonkweshón꞉as ne thóh ratì꞉teron tsi ronónshote ne ronhnontí꞉io rotihiatisónhkwa tsi nihotì꞉terons.

⁷ Wakonhwasehronhniáshon ne ionontí꞉io kwáh thontakonhwanónhtonhse tánon wakonwanó꞉ton, nahonhatserashón꞉as ne tionaʼthonwí꞉sens tekonsénhtos, ionón꞉sehna tsi ní꞉ioht norí꞉te tánon kontatetskwenenhiahákons.

⁸ Ne kanatowaʼkénke ne Nineveh kwáh tsi ní꞉ioht ne tehioniatonhkwahrí꞉hon nonkweshón꞉a tsi wahehiá꞉kenhne. “Tesehwátan Tesehwátan!” tehiakohenré꞉tha— ók iáh kiʼ ónhka tetsakók꞉ton.

⁹ “Sehwanenhskwenháton ne kawistará꞉kens, sewanenhskwenháton nowistanó꞉rons! Iáh tsehiotókthe ne kakwahséhtsheras! Iawetatsá꞉nis káien ne kanorón꞉son ne kwáh tsiknahoʼténhsons!”

¹⁰ Enwatsesatón꞉ke, enkarihwaiésa, tánon enwatkarón꞉ni! Enhiakoteronhiénhten tánon thenhiakosiníshonkwe, akwé꞉kon enhonteshatstenhserókten, ratikwé꞉kon thenhonskenhnenhnatónhten!

¹¹ Kaʼnón꞉we nihionatsionwá꞉ien ne kénreks, ne tsi ionatsionwá꞉ien ne kénreks owiraʼshón꞉as, tsi nón꞉we nihonteriotaienthákwa ne kénreks, tsi nón꞉we nihatì꞉teron ne kénreks owiraʼshón꞉as, kwáh kíʼ iáh ónhka thatahonwaʼtinikónhraren?

¹² Ne kénreks wahariotaratiónkoh ses nenhatawéntʼtho tánon ensakowararahtiónkwahse ne ronaténhro ó꞉ni nakohioʼokónha; kwáh kí; thenthawaʼrá꞉rahte ne tsi rotionwaʼien ók kíʼ nón꞉wa ne Ninevah akwé꞉kon iotón꞉ni nahoshatsténhsera.

¹³ Satkátos ken, tsi kwáh konhiatkónhten, ráton ne Roiá꞉ner Roshatstenhserowá꞉nen, tánon kwáh enkatsáhate ne shasehreshón꞉as notiónkwahs nek ne ientioienkwahró꞉take, tánon nasareʼkó꞉wa kwáh enhiakowénhtho ne ken nithotiiónhsas kénreks; kwáh entsiá꞉ke ne thénhnen ahisawaraiénthake nohontsà꞉ke, tánon ne rahotiwenhnaʼshón꞉as ne iesarihwakareniénhni kwáh kíʼ iáh nonhwén꞉ton tahonsahonwatiwenhnáronke.