Micah 7 - Ohiatonhseratokénti

¹ Tsi nonkithenstéthen! Asè꞉ken thóh nontiatá꞉wen tsi ní꞉ioht ne ónhkak, nó꞉nen iotkenhnohétston ne kahikshón꞉as akwé꞉kon wahiákwen, nó꞉nen nonénhare akwé꞉kon tkaró꞉ron, iáh teshatitsénries nahiorhiokwentónhnionke nahón꞉neke; ne tsi kónhne ne tiotierénhton ahiohiá꞉rihke ne tionionwarontonhakó꞉wa ne ne kahianónwaks.

² Ne rotirihwató꞉ken kwáh rotiiathatónhon ne tsi ionwenhtsá꞉te, tánon iáh ónhka tsiatetsakotaténhron nahontakarihwaié꞉rihke; ratikwé꞉kon ratiiatión꞉ni ne rotiráhre nonekwénhsa, tánon tehonthatórats tsi nihontaharaién꞉tons.

³ Ne ronhtsánakes ne iorenhnàhon ne wahétken tsi nahóntiere; ne ronaterihón꞉tons tánon ne ratirihwénhthas ratirihwanón꞉tons ne khahó꞉tenk ahonwatikáriakse, tánon ne thonatsénhnates ronónha rontá꞉tis nahotkaronhniátshera ne raonatónhnhets; káti tehatisehrí꞉ies ne kaiáneren.

⁴ Ne kwáh thotiiánere thóh nihatiiató꞉ten tsi ní꞉ioht nonionwá꞉ra, ne kwáh thotirihwató꞉ken tsi ne ní꞉ioht nohíkta wathenhenronhniáton. Nenhní꞉sehra ne raotirewathátshera ón꞉we; nón꞉wa ó꞉nen tiehotirihwaié꞉was.

⁵ Tó꞉sa taʼtsétat ne tsaténhro; kwáh tó꞉sa othé꞉nen sehniahesénhak ne sehnorónhkwa; sathenhnikónhraren ne tsitsaká꞉ronte tsi nahó꞉ten enshí꞉ron nahónha tho kaiatión꞉ni tsi shiktsáke;

⁶ asè꞉ken ranekénhteron tsi nenhoié꞉rase ne roʼní꞉ha enhokénron, ne kaiá꞉tase tetká꞉tane niahiakotiatónti nonisténha; ók ne sáhka ne tiatastsáfa; ne ieshá꞉sons né꞉ne kwáh í꞉se sawá꞉tsire.

⁷ Ók kíʼ ní꞉i, kwáh kíʼ iatenhikanérake ne Roiá꞉ner, kwáh kíʼ enhihiateráhrate ne Roiá꞉ner, rahónha natiatakená꞉tshera í꞉ken; náhke Ní꞉io enhakaʼthón꞉tehne.

⁸ Tó꞉sa sewatonhná꞉re tsi takwátʼkonte; nó꞉nen entsatienénhne, kwáh kíʼ thensét꞉thane; nó꞉nen tsi tetiò꞉karas nón꞉we nenhkátsien, ne Roiá꞉ner kwáh kíʼ rahónha thenhatswathénhten.

⁹ Ó꞉nenk tsi enkatakátstate ne raonakwáhtshera ne Roiá꞉ner, tiorì꞉wa tsi wakerihwáneren tsi nokwáh ne rahónha, tsi nió꞉re rahónha tenhakerihwakénhase nakerihwaʼshón꞉as tánon enharihwénhte. Kwáh tsi teioswáthe nienhatiathénhawe; kwáh kʼi enkatkáto ne raorihwakwarihshióntshera.

¹⁰ Ethò꞉ne kʼi ne ióntswens enhontká꞉to, tánon atehénsera entioró꞉roke tsi niká꞉ien ne wakén꞉ni, “Kaʼní꞉res ne Roiá꞉ner Saní꞉io í꞉ken?” Ne kahráke enwatká꞉to tsi nenkonwashén꞉ni; ó꞉nenh kiʼ thenkonwaskwáhseron kwáh tsi ní꞉ioht nonawástha ne tsi tekanatokenhá꞉tons.

¹¹ Nenwenhniserá꞉te nahonsaionní꞉hake ne sahsontashón꞉as; ne thóh enwenhniserá꞉teke ne tsi karisthá꞉tatse ieká꞉reke.

¹² Ne thóh enwenhniserá꞉teke kwáh eniontiató꞉renhne Assyria nón꞉we néntewe tánon ne tsík kanatowá꞉nens ne Egypt nón꞉we néntewe tánon Egypt iesewatáhsawen tsi nió꞉re ne tsitʼkaniataratátie, kaniatarakeʼkowatʼtions entewatáhsawen tánon ne tsi ionontahrón꞉nions.

¹³ Ók ne tsi ionwenhtsá꞉te kwáh karihwaiesáhtshera enkénhake, ne ne ratinákere enhatirihón꞉ni; asè꞉ken ne naokarhiá꞉tshera tsi nihatiweienó꞉tens.

¹⁴ Sehiathenhnikónhraren ne shonkweʼtashón꞉as né꞉ne sathénhnits í꞉satst, ne teiotinakarontón꞉a í꞉se shatsenenhó꞉kons í꞉ken, tsi ohnonhatsí꞉wak khók kontinákere ne kará꞉kons thóh sahtekahentí꞉hen tsi ionwenhtsá꞉ien; Sehrí꞉hon thóh iateiontská꞉hon ne Bashan tánon ne Gilead, ne tsi nihiotón꞉ne ne wahón꞉nise tkénhne.

¹⁵ Ne tsi nitewenhniserá꞉teʼkwe nó꞉nen shatonthashiá꞉kenhne ne tsi tionhontsá꞉ien ne Egypt, kwáh enhinatónhase ne iorihwanerakwaténions.

¹⁶ Ne ronhnonhontsakeró꞉nons kwáh enhontkáto tánon enhontéhen kwáh raotishatstenhserakwé꞉kon; kwáh thenhontatsanarónnion tsi ratisakaróntons; tenhonhontákweke.

¹⁷ Kwáh enhatikanón꞉ton nokénra tsi ní꞉ioht nó꞉niare; kwáh tsi ní꞉ioht nonhontsá꞉ke kontésehres; entkontiiá꞉kenhne tsi ionattionhionton; kwáh enhotiiatíshionkwe raohén꞉ton ne Roiá꞉ner Onkwaní꞉io, kwáh enhotiʼterónhne í꞉se enserihón꞉ni.

¹⁸ Ónhka ne Ní꞉io akénhake thóh nahahiatoténhake tsi ní꞉se ní꞉ioht, sehsenikónrenhse ne karihwaneraháktsheras tánon tehatkarohestháhkwa ne ratiriwanón꞉we ne iatahonathaténronke ne raonkweʼtashón꞉as? Iáh tehatienawástha ne raonhakwáhtshera ne iahokonhtakwénhake, tiorì꞉wa tsi ne rawerientí꞉iostha tsi renéstha natanitenhrátshera.

¹⁹ Kwáh kíʼ shé꞉kon tentre tánon ensheshonkwenténhre; kwáh kíʼ enharatatiéson nonkwahrihwaneraháktshera. Akwé꞉kon isehienhóti nonkwahrihwaneraháktsheras tsi nón꞉we ne kwáh tionó꞉tes kaniatarakeʼkowáhne.

²⁰ Kwáh enthétion norihwihioʼón꞉we ne Jacob tánon kenténrat ne Abraham, kwáh tsi nisehrihwanirá꞉ti ne iakisoʼthonkonhkén꞉en ne wahón꞉nise tsi ná꞉he tkenʼne.