Micah 6 - Ohiatonhseratokénti

¹ Sewaʼtahón꞉satat tsi nahó꞉ten ne Roiá꞉ner rá꞉tons: Tesewaʼtan, sewaʼnikonraiéntat ne sewarihwaʼshón꞉a ohén꞉ton ne tsi ionontahrón꞉nions, tánon sewarí꞉hon ne tsi ionhniarónh꞉nion ionatónhteh ne sawén꞉na.

² Sewatahónsatat, í꞉se ne tsi ionontahrón꞉nions, ne tehorihwakenhá꞉ton ne Roiá꞉ner, tánon ne iorihwaní꞉ron í꞉ken tsi kenskwáhere ne tsi ionwenhtsá꞉te; asè꞉ken ne Roiá꞉ner ne tehotirihwakenhá꞉ton ne rahonkweʼtashón꞉as, tánon kwáh thenhatirihwakénha nʼIsraerʼró꞉nons.

³ “O akonkweʼtashón꞉as, onhnikwahié꞉rase? Onh nahó꞉ten tsi natakwahwiseheiáton? Teskwahrihwaʼserákwas!

⁴ Asè꞉ken tetkwahiathénha ne tsi tiohontsá꞉ien ne Egypt, tánon skwahiathákwen ne tsi kanónhshote ne iakonaskón꞉nis; tánon iekheiateniéton sahén꞉ton ne ne Mahís, Aaron, tánon ne Miriam.

⁵ O akonkweʼtashón꞉as, sasewehiáran ó꞉nen tsi nahó꞉ten ne Ronhnontí꞉io Balak ne Moab sakotenikonrá꞉wi, tsi nahó꞉ten ne Balaam ne roiénha ne Beor waʼthorihwaʼserá꞉kwahse, tánon tsi nitsawénhen ne Shittim tsi nió꞉re ne Gilgal, ne nahónton ahisewahterienʼtá꞉rahne ne iakonónstats rahoiaʼtaterí꞉tsheras ne Roiá꞉ner.”

⁶ “Onhnahó꞉ten iahihawí꞉then raohénton ne Roiá꞉ner, tánon takattsákete raohénton ne Roiá꞉ner ne eʼnekénstsi? Raohénton onhtéken niáke ne ne katshé꞉nen nahihiatsathatsáhate, ne ne énska tehaosehrihià꞉kon tionhnónskwahron owí꞉ra?

⁷ Kwáh onhtéken ne Roiá꞉ner ahawerienhtí꞉ioste ne thó꞉ka tewenhniawehetsheráhsen niháti teotikakaronhtón꞉a ratítsinn, né oié꞉ri tewenhniawehetseráhsen nakónhake kaniataratátie iorésen? Né onhtéken aontatiéste ne thakowá꞉nen rièn꞉ʼa ne aorihwà꞉ke nakerihwanerahák꞉tsheras, ne naoshatsténhsera ne tsi kónnhe asè꞉ken ne nahorihwaneraháktsheras nakatónnhets?”

⁸ Eʼtsisewahró꞉ri, O tiónkwe, tsi nahó꞉ten ne ioiá꞉nere í꞉ken. Tánon tsi thóh kiniiot ne Roiá꞉ner tsi sewarihwanonhtón꞉nis: Ne sewahiò꞉ten ne tkarihwaié꞉ri, tánon ne iorihwató꞉ken kanoronhkwáhtshera, tánon tsi tesewatekhá꞉hakwe sewanitentón꞉hak rahonhà꞉ke ne Ní꞉io.

⁹ Né raowén꞉na ne Roiá꞉ner iatehawénhnaras ne kanatowanénhke (tánon ne ionteʼnikonratókha ehiekwénienste ne raoshén꞉na): Sewathahónsatat, O kentióhkwa tánon ne thóh sewanákere ne kanatowanénhke!

¹⁰ Shé꞉kon ontè꞉ken ken ne kanorónsons ne karihwahetkénhseras iotaténron ne tsi kanónshote ne ronhnonkweʼtahétkens, tánon ne iekontseriharáhkwa ne rónstha nahatinikonráhte?

¹¹ Akkwé꞉ni ken nahonsakhetakwahríhsi ne wahetkénskwa rónstha iekontseriharáhkwa tánon ne káiare ratihá꞉wis nahatinikónrahte tsi nahiósteke?

¹² Ne raotikwahtsénions kwáh titkáhere ne iáh othé꞉nen teioianerés; ne skátne sewanakerénion rotinó꞉wenhs, ne nawenhná꞉sons ne kanikonrá꞉tha ne tsi ratisaká꞉rontes.

¹³ Né káti aorì꞉wa ó꞉nenk tewakatáhsawen nakonrewáte ne wakonionniá꞉te ne iáh othé꞉non tasherihwasthátonke ne iorihón꞉ni ne sarihwaneraháktsheras.

¹⁴ Kwáh tenhsatskáhon ók iáh kíʼ tahisáthan, tánon natonkarhiá꞉kon kwáh ienkashá꞉hate ne tiatá꞉kon; tánon tsi nahó꞉ten nasateweién꞉ton, ók iáh kí takanonstátonke, tánon tsi nahó꞉ten nasenonsthá꞉te, kwáh kí asárake ienkatiaʼkwaríhsi.

¹⁵ Kwáh ensénhtho, ók iáh kí tahkanoráhri; thensahiárihte ne iakeniewáhtha, ók iáh kíʼ ne thasateienároh; thensaiárihte ne onénhare, ók iáh kí tasnekí꞉ra ne onenharákeri.

¹⁶ Asè꞉ken ne sateweiénton ne raoianerénhseras ne Omri tánon akwé꞉kon tsi nikahiothenseróhthens ne raonónskon káien ne Ahab, iaskóntakwe ne waʼtsere tsi nihatiweienó꞉tens. Né kíʼ aorì꞉wa kwáh kíʼ karihwaieshá꞉tshera enkonionniáte, tánon ne skátne sewanákeres ne enhieshón꞉niate taiesahtienhónhase; káti í꞉se ensatkéthate ne kakenronhniá꞉tshera nakonkweʼtashón꞉as raotirihwà꞉ke.