Micah 5 - Ohiatonhseratokénti

¹ Ó꞉nen shewanitsiokwahró꞉rok í꞉se ne sewaterí꞉ios; tekanenríhson nahontaionkhiiatsatón꞉ti; kániah wahonwaʼiente ne rarihwéntha Nisraeró꞉nonke ranó꞉kwahke nón꞉we.

² O ní꞉se, O Bethlehem ne Ephrathah, í꞉se ne kwáh kenk nitesewentará꞉sas ne Judah, tionhà꞉ke nón꞉we nenthaiá꞉kenhne éntre akonhá꞉ke rahónha enhatkóraste Israeronónke, ne tsi tahawatsirathátie né꞉ne owatsiratsthénha, né꞉ne wahón꞉nise tkénne.

³ Ne Káti aorì꞉wa kwáh kí enshakotsakwarísi tsi nió꞉re ienkáhewe ne nó꞉nen tsi niká꞉ien ne ioroniáken enhiowiraién꞉taʼne; ethò꞉ne ne ronátiaʼkes ne raowá꞉tsires ienshón꞉ne niatahonsahontiéste nonkweshón꞉as Nisraeró꞉nonke.

⁴ Tánon kwáh thóh tenhá꞉tane ensakonón꞉te thóh raoshatstenhserá꞉kon ne Roiá꞉ner, ó꞉ni rasoiatanerakwahtserá꞉kon ne Roiá꞉ner Raoní꞉io. Tánon enhiorihwí꞉ioke tsi enhonhnón꞉nheke, asè꞉ken nón꞉wa kwáh í꞉ken tsi enhasennowá꞉nenke né꞉ne kwáh tsi iehiotonhontioʼtaní꞉hon nió꞉re ienkanihá꞉rane;

⁵ tánon kwáh rahónha khók ne skén꞉non enkénhake. Nó꞉nen ne Assyriaró꞉nons enhionkhihionhontsó꞉renhne tánon ahatiratatséson nontionhontsá꞉kes, tsi ionkwanonshó꞉tons kwáh kí enhiakirihón꞉ten tsá꞉ta nihatikoraserá꞉kes niahonwanatsatón꞉ti tánon sha꞉tekon nihá꞉ti nasakotihéntenhse.

⁶ Kwáh ne enhontkóraste ne tsi ionhontsá꞉ien ne Assyria ashareʼkó꞉wa enhónste, tánon ne tsi iohontsá꞉ien ne Nimrod kwáh kíʼ enhonsarenhá꞉wake; rohnónha entionhkhiniá꞉kenhte tsi nokwáh ne Assyriaró꞉nons nó꞉nen otionhontsá꞉ke nenhtónhne tánon nó꞉nen niahatirá꞉tane tsi ionkwateristhatátie.

⁷ Ethò꞉ne ne niatehonathaténhron ne Jacob, kwáh kí raotinenrí꞉hen enhenteróntake, kwáh thóh nenhatiiatothénhake tsi ní꞉ioht ne iohawé꞉ien né꞉ne Roiá꞉ner tesakoteniethénhni, tsi ní꞉ioht ne iotsatará꞉ties nohontá꞉kes, ne ne iáh tehoterá꞉rats ne rónkwe iáh ó꞉ni tehiakoteráhrats nonkweshón꞉as.

⁸ Tánon ne ronhnonhontsakeró꞉nons niatehonataténron ne Jacob, kwáh kí raotinenrí꞉hen enhenterón꞉take, thóh nenhiotónhake tsi ní꞉ioht ne kénreks raotinenrí꞉hen í꞉res ne kontitshé꞉nens ne karakónhas, thóh nenhiotón꞉hake tsi ní꞉ioht ne ken nithoiónha kénreks thóh í꞉res tsi kontì꞉teron ne teiotinaʼkarontón꞉ʼa. Nó꞉nen ienhatáweiaʼte, iathensakonitionkwáhkwe tánon wasakohiataratiónko, né꞉ne iahónka tetkonhwaʼtiné꞉hon.

⁹ Kwáh enietsitsanakétskwate eʼneken ne tsi tesewatatʼtions, tánon ratikwé꞉kon ne ieshá꞉shons kwáh kí enhonwanáhtonte.

¹⁰ Ne thóh enwenhniserá꞉teke, rá꞉ton ne Roiá꞉ner, kwáh enkhehiá꞉tonte ne satsenenhó꞉konhs koshá꞉tens tsi nón꞉we ní꞉sewes tánon kwáh enkerihwaʼtonhte ne sarereshón꞉as ohtiónkwas.

¹¹ Tánon Kwáh enkenatatontánion ne sahnatowá꞉nens ne shonhontsà꞉ke tánon ehʼtá꞉ke enwakatiéserons ne tsi sathenhenró꞉tons ne tesanatanát꞉tons.

¹² Tánon Kwáh enkhehiatón꞉te ne tehontierón꞉nions ne shatiánakes, tánon iáh tahonhshonhsonkweʼtaiénthake ne tehontserón꞉nions;

¹³ Kwáh enkatón꞉te ne sahiatonhniʼshón꞉as tánon ne satenawaható꞉tons, tánon ní꞉se kwáh iáh tathahonshasatʼtsá꞉kete tsi nihioiothén꞉en ne shatiánakes.

¹⁴ Tánon enkontiónkos ne kanió꞉tons Asherah. Tánon enkátonhte ne sanatowá꞉nens.

¹⁵ Tánon thóh kanhakwahtserá꞉kons tánon aterhiatitkontserá꞉kon kwáh ne enkaterihwathentiá꞉te ne karewathá꞉tshera rononhà꞉ke ne ronhnonhontsakeró꞉nons ne iáh tehontewenhnaráhkwa.