Micah 4 - Ohiatonhseratokénti

Nonkweshón꞉as Kwáh Tsiknonhwéshon Rahonhà꞉ke Ne Roiá꞉ner Nienhénnien

¹ Tsi nienhwathenniserókten ne tsi ionontá꞉here ne raononsatokentikó꞉wane ne Roiá꞉ner thóh nón꞉we nenhkarihwanirátonke tsi né꞉e ahonhá꞉a tiotenontáte í꞉ken, kwáh enhiakotohétsthen akwé꞉kon nó꞉ia ionontahrón꞉nions, Nonkweshón꞉as thóh nón꞉we ienhiakowáheste rahonhà꞉ke,

² tánon kwáh iakotiohkowá꞉nen éntsien tánon enhiaié꞉ron: “Káts, ánion ietewanón꞉taran tsi thotenonhtáhere ne Roiá꞉ner, tsi thonónhtsote ne Raoní꞉io ne Jacob; ne kíʼ nahónton nashón꞉kwah rihónhnien tsi nihaweiennó꞉ten, né káti nahónton thóh nón꞉we naitewathénhti tsi rohathátse.” Asè꞉ken Zion nón꞉we nénhtewe ne raoianerénhseras, tánon Jerusalem nón꞉we ne Roiá꞉ner nihatá꞉tis.

³ Kwáh rahónha tesakohiatórete tsi natehóntere ne iakotiohkowá꞉nen onkweshón꞉as. Ensakotewenhnaiéntonwe ne ratiʼshátstes nonkweshón꞉as nahí꞉nonh nió꞉re í꞉tken; né enhononhniate ne raonasareʼkó꞉wa ne ietarakarathós꞉tha aotsiweiónhtha, tánon ne raonahshí꞉kwahras iontkwirhiá꞉tha né꞉e enhononhniáte; nonkweshón꞉as iáh ó꞉nen thatahonsahónhnekwe ne raonasareʼkó꞉wa niasakonatsatónhti nonkweshón꞉as, iáh ó꞉ni ó꞉nenh thahonsahontéweienste naterihió꞉seras.

⁴ Ók ratikwé꞉kon aonenhró꞉kon enhóntien tsi watenenharí꞉seres tánon ne tionnionwarontonhakó꞉wa, tánon iáh ónhka tahonwatiʼterón꞉kwen; asè꞉ken né꞉ne Roiá꞉ner Sakoronhiakeró꞉nons kí꞉ken rothatí꞉hon.

⁵ Asè꞉ken onkweʼtakwé꞉kon tsi tehiontekhaháhkwa, satihiatátions thóh raotisenhnákon ne raotinihioʼó꞉kons, ók kíʼ nonkwahtsákes thóh nón꞉we nenhtewahténhti thóh raosenhnákon ne Roiá꞉ner ónhkwah Ní꞉io né꞉ne tsi nénhwe enkénhake.

⁶ Ne é꞉tho entewenhniserá꞉teke, rá꞉ton ne Roiá꞉ner, kwáh enkheiaʼtaró꞉roke tsi niká꞉ien ne iontsinokátha, tánon ensekheiaʼtaró꞉roke tsi niiá꞉kon ne teiakorénion, tánon tsi niiá꞉kon ne khekarewá꞉ton.

⁷ Tánon ne iontsinokhátha ne enkheionniáte ne iatahonathátere tánon ne teiakorenion enhonatiokowanenhke tánon enhatishátsteke. Tánon ne Roiá꞉ner kwáh kíʼ ensakonontí꞉ioke ne tsi tionónhte ne Zion ne nón꞉wa tánon né꞉ne tsi nén꞉we enkénhake.

⁸ Tánon í꞉se, O ohniká꞉ta í꞉ken tsi kentióhkwaien, tsi ionontá꞉here ne nakoién꞉ha í꞉ken ne Zion, shonháke kwáh nón꞉we enté꞉we, nohén꞉ton tkanakerahseraién꞉takwe kwáh éntewe, ne ahoiatakwenihiósera nakoién꞉ha Jerusalem.

⁹ Nón꞉wa onhnontié꞉ren tsi nisawénhte tsi teshasénhtos? Iáh ken ne ronnontí꞉io tehèn꞉teron ne shonhà꞉ke? Ne iateʼnikonrá꞉wis wahaiatháton ken, káti watisawehestá꞉nion ne wesaié꞉na tsi ní꞉ioht ne iónkwe iowiraientásehre?

¹⁰ Kwáh saronhiakénhak tánon shonhséhnak, O akoién꞉ha Zion, kwáh tsi ní꞉ioht ne iónkwe ioronhiá꞉ke tsi iowiraientásere asè꞉ken ó꞉nenh kwáh ienshiákenʼne ne kanatowanénhke kahentà꞉ke nienhénse; ní꞉se kwáh tsi nió꞉re Babylon nienhéseh. Thóh nón꞉we ne Roiá꞉ner nenhshiaiatáko thensehsakoshotarísi ne ieshá꞉sons.

¹¹ Ó꞉nenh kwáh ohontsakwé꞉kon ronatsataróhron niaiesatsatón꞉ti, rontónhnions, “Ánion tewahsenhnát꞉sat, tánon ánion tethewatkaróhten ne Zion.”

¹² Ók iáh kíʼ tehonaterièn꞉tare tsi nihonikonró꞉then ne Roiá꞉ner; iáh teotinikonraiéntas tsi nishakoteʼnikonrá꞉wis; ne tiorì꞉wa tsi sakohiataró꞉ron nonkweshón꞉as tsi ní꞉ioht ne kaʼthokwahnerénkʼkons ne tsi iewahektákwa kenská꞉ron.

¹³ Téstan tánon tesasakwaserón꞉kwat, O akoién꞉ha ne Zion, asè꞉ken ne enkonhniá꞉te ne tsi tesanakáronhte karístatsi nahiotónhake; tánon ne tsi tesatsinenrentónte kwé꞉nis nenhné꞉e nenhiotónhake; tánon kwáh iakotiohkowá꞉nen ensenonwenhserá꞉rio nonkweshón꞉as ken nenknenshónnaske, tánon kwáh enteshá꞉we akwé꞉kon kí꞉ken nahorihoténhsons rahonhà꞉ke ne Roiá꞉ner tánon ensethátse ne raotikwahséhtsheras rahonhà꞉ke ne Roiá꞉ner ohontsakwé꞉kon í꞉ken.