Matthew 8 - Ohiatonhseratokénti

Satekon-haton nateioteriȣasonterakȣen.

¹ Nok kentiokoȣanen ronȣanonteratiene satontahanontastsnente.

² Saiatat eh raiataratie ne roststaȣis, iathotontsothase ne Iesos, nok ȣahenron: Saianer! akȣase ok tasanonton nasere shitsient.

³ Nok ne Iesos iahonisnonsaerhase, nok ȣahenron: eh nontonkenikonraȣen, satsioȣentann. Akȣa oksaok sahaiegentane.

⁴ Ȣahenron ne Iesos: Senikonrarak tosa onka sherori; ȣas tanon rahotihenton ratitsihenstatsi seriȣaierit tsini horiȣataton ne Moïs aiaȣens neh ȣene ahononhnien.

⁵ Nok nonen siiaharaȣe ne Capernaiimke, rasennoȣanen ȣahoiatorenne ronitentasehatie.

⁶ Nok ratonne: Saianer! Saiatat, nakennhatsera raȣennitaronni nok ȣeso oni tsi roronhiakan.

⁷ Tahenron ne Iesos: ehienke, nok enhshitsiente.

⁸ Tontahenron ne rasennoȣanen: Saianer! iah se teȣakerihonte nʼiasataȣeiate nakenonskon; enskat ok tanon aontasatati, nok enshaieȣentane.

⁹ Aseken nii neok nonkȣene ȣakaterihonte, sekon kis ȣatons nakheienhase nakonkȣeta, ȣas, nensok ȣare; tihaiatate, kats, tare; nok nakennhatsera kenh natsier, oksaok eh nenhaiere.

¹⁰ Ȣahonerako ne Iesos tsiniiot tsi ȣaharonke, ȣasakaȣenhase ne ronȣanonteratiene: Oriȣiio tsi kȣarori, tsi iah teȣatkathon nʼisraerrononke neh nikoȣanen teȣetakȣen.

¹¹ Nese ȣaonni katon kentiokoȣanen, tsi tkarakȣinekens oni tsi Iateȣatsothos nentienseron, nok enskatne ienhatikȣekon kanakeraserakon ne karonhiakon, Abraham, Isaak, Jacob.

¹² Nok nakȣa Niio sakoienhokonha astste tsi oni nonȣe tetiokaras ienhiontatiatonti, eh nonȣe natenhionsenthoseke oni tenhionnokaraniehonheke.

¹³ Ethone onen ȣahaȣenhase ne rasennoȣanen: ȣas, nok etho nenhiaȣenne tsiniiot tsi tisetakon. Eh oni nikahaȣi tontahaieȣentane ne rahonnhatsera.

¹⁴ Onen nonȣa ne Iesos iaharaȣe tsi thononsote ne tier, kanaktake kaiationni ne tier ronȣennhonsa iotonkȣarhos iononȣaktani.

¹⁵ Neok nathanisnonsaerhase; oksaok sontkestsko nok ȣatiakosniene.

¹⁶ Nok nonen Siiokarahane, kentiokoȣanen ehȣaontatiataktate notkon iakohnatiennine, Akȣekon Sasakoiatinekenȣe, Akȣekon oni niionsasakotsiente tsiniiakon iakohnonȣaktanihakȣe;

¹⁷ Neh naontakaierite tsinihaȣen ne Rotokense hakȣe Isaï, tsi raȣen: ȣathatatekȣon akȣekon oni ionsahahaȣe nonkȣannraokonkenha.

¹⁸ Sahattoke ne Iesos tsi kentiokoȣanen ȣahonȣaiatorenne, ȣahariȣanonton ne tahatiiaiahke.

¹⁹ Saiatat ne raiatons ȣahoiatorenne, ȣahenron: Saianer! tiotkon enkonhnonteratieseke tsi ok oni nonȣe niienhense.

²⁰ Tontahenron ne Iesos: Iohnatsonhionton naha ne Tsistso, nok kontsinakonni notsitenhokonha; Nok ne Niio Roienha akȣekon iah tehoien natkonsera.

²¹ Tihaiatate ȣahenron nehneh: Saianer! takaterharat niare Shiiatatahannha ne rakenikenha.

²² Tontahenron ne Iesos; kasts taknonteratie, iontatiatata nakaȣenheionta.

²³ Ok ronȣanonteratietane ne raotiokȣa tsi Iahatita.

²⁴ Iokontatie takaȣeroten akȣa ikenh kaȣeroȣanen, skanorons hahatihonhiohne; rotas sane ne Iesos.

²⁵ Akta niiahonne ne raotiokȣa nok ȣahonȣaiete, ronton; Saianer! takȣaiatakennha ȣatiakȣenheie.

²⁶ Tontasakaȣenhase; nahoten Seȣaterontha nise-ȣerientaha? Ethone tontahatane, ȣahatarhase noȣeron oni tsi kaniatare; nok oksaok tonsakaȣeriiake.

²⁷ Ȣahakohnerakȣenhaton ne teiekaneronhnion nok ȣahahironhnion; Onkah nah kehiken, akȣekon noȣeron oni tsi kaniatare roȣennarakȣa?

²⁸ Nok nonen sihaonrarho skaionhati, Gersenian raotinakeraserakon, teniiase notkonseraksen ronatienni taiatotasi tsi ioshonȣenion iathonȣaterate; iah onka tetsiontoheststakȣe neh nonȣe tsi natehohnatehnonhianitonne.

²⁹ Nok ȣathotihenrete, ȣaniron: nahoten taseniente, Iesos Niio Iaienha? taskenironhiakentane ken tsi kenh nontase, areko sane tiieiohe?

³⁰ Iah ihnon teken, kȣiskȣis iohnentiokoȣanen tkonneskȣe tehiohnastskaontieskȣe.

³¹ Ronȣanekennihakȣe kati nohnatkonseraksen, ȣakonniron: tokat enseskȣaiatinekenȣe, astion ki arahona kenhiken tkonnes kȣiskȣis niiaonsaiakȣe.

³² Ȣasakaȣenhase, ȣasene: tontakontiiakenne, nok eh niiakonne; nensok ne kȣiskȣis ȣakonteko kaniatarake iakontiatonti akȣekon oni etho ȣakonniheie.

³³ Ȣahonteko ne kȣiskȣis sakotinonnhakȣe; kanatakon niionsahonne iahontrori tsinahaȣenne, oni ne teniiase Otkon rohnatiennine niiatatake.

³⁴ Kanatakȣekon ȣaheiakenne ȣathonȣateratana ne Iesos: nok nonen sahonȣaken, ȣahonȣaneken ne ehren aonsarete tsinihonatonȣentsia.