Matthew 7 - Ohiatonhseratokénti

Tsiatak-haton nateioteriȣasonterakȣen.

¹ Tosa tesheiatoret nenserheke tosa taiesaiatorete.

² Aseken, ok eh nentsiesaierase tsinensheierase; oni tsi ontsiehsatenienthase nensheiatenienthase

³ Oh nah oni niiaȣens tsi sattokas onaonskeri rokarisenne tsiatatekenha, iah nise tesattokas ok iateiohnaharohare sakarisen,

⁴ Ok neʼsʼ nasiron: niare tanon tiatateken skohkosakarisen onahonskeri; nok nise nikaronta ne sakarisen.

⁵ Onkȣetaksenskȣa! neh niare sasoko nise sakarisen, ethone ensaterientisake oh nasiere aonsasoko ne tsiatatekenha rokarisen onaonskeri.

⁶ Tosa erhar ietsiiatiens noriȣatokentison, tosa oni ne kȣiskȣis ietsiiatiens ne seȣanekorha; iotteront ne takonskȣaseronkȣate nok aietsiiatakari.

⁷ Seȣariȣanonton nok enhietsiion; Seȣesak nok enseȣatsenri; seȣannhontishon nok enhietsinnhotonkȣase.

⁸ Aseken ronȣaȣis ne rariȣanontons; ratsienries ne resaks; ronȣannhontonkȣenni ne rannhohaiaks.

⁹ Onka nah neh nonȣa nʼonenhia ahontahaon ne roienha ne kanatarok ahoriȣanontonse.

¹⁰ Nok ne kentsionk enhariȣanonton oniare ontekenh henthaon?

¹¹ Tokat nonȣa ise ne tsionkȣetaksenhokonha eh niiore tsi seȣakȣenion nʼioianere aontaietsiion ne ietsiienhokonha; okkati onte akȣat niiot ne Karonhiake Tetsiseȣaniha tsi entesakaon tsiniiakon ronȣariȣanontonni I

¹² Tsini tesaskaneks naiesaierase ne tkariȣaieri, etho oni nise naseieras; aseken eh nikaianerenseroten eh oni nihotirihoten ne Rotitokensehakȣe.

¹³ Tatsiataȣeiat tsinonkati nikannhohaha; aseken ne Kannhohoȣanen oni teiohahakaron oneson iakoiatenhaȣitha; Kentiokoȣanen oni neh nitiens,

¹⁴ Aseken nikannhohaha niiohaha oni ne Karonhiake iakoiatenhaȣitha; kenh oni niiakonha ne ietsenries.

¹⁵ Seȣatatenikonrarak kati, enhietsiiatorenne ne rotitokensetseraksens, teiotinakarontonha enhohnatiatontakȣenhatie, nese naoskon Okȣaho oni tsini hatinenskȣas.

¹⁶ Ratiȣeiennake kati entietsiienterestakȣe. Kanenharaniiontha kenhnaha nohiktake, Katen ȣison honionȣarake aonhianiionthake?

¹⁷ Nese ȣahi ne karontiio ȣahiio ki ne ȣaianiiontha; tsikiniiot ne karontaksen ȣaiaksenki ȣaianiiontha.

¹⁸ Iah nonȣenton ȣaiaksen tiiaonhianiionten ne karontiio; tsikiniiot ne karontaksen, iah ki teȣaianiiontha ne ȣahiio.

¹⁹ Tsinikarontake nʼiah teȣaianiiontha ne ȣahiio, enkaiakon nok otsirake enȣation.

²⁰ Ratiȣeiennake kati ok entiseȣaientereste.

²¹ Tsiniiakon ne ionkennis: Seȣenniio! Seȣenniio! iah tehontaȣeiatane ne Karonhiake; neok tanon ne ronikonraieriton ne kakeniha karonhiakon thenteron.

²² Kentiokoȣanen enhionkenhase nʼethone teȣenniserate: Seȣenniio! Seȣenniio! iah kenh naha ise tesasennakon tsi ionkȣatokensehakȣe? iah oni kenh ise tesasennakon tetsiakhiiatekȣatanion nʼonatkonse-raksens? iah oni ken ise tesasennakon niatekon ioriȣanerakȣatenion tsiniionkȣaieranion?

²³ Ethone tanon nii onen tentekheienhase; iah nonȣenton tetkȣaienterine ehren kati iseȣet tsi nonȣe nikiteron, ise ne seȣariȣaneraakskonkoȣa.

²⁴ Onkakiok rothonte tsinahoten katon, nok enhateȣeienton, neh tenthiiatenientenste ne ronkȣe oststenrake rotenonsonni;

²⁵ Enhiokennore, nok etho tenhiohnonke nenkanaȣaronnionne, tenhioȣeratase oni, iah othenon taiaȣenne aseken ioniron tsi kentskȣahere.

²⁶ Nok tanon nonȣa ne rothonte tsinahoten katon nok iah tahateȣeienton, neh tenthiiatenientenste, ne iah tehonikonra onesaronkȣake rotenonsonni.

²⁷ Nok nentiokennore, etho tenhiononko nʼoneka, tentioȣeratase oni, enkanonsienenne akȣa ihken ionerakȣat tsi enȣatkenrenseronni.

²⁸ Akȣa ihken ionerakȣat tsi ȣahakohnorakȣenhaton tsinihoianerenseriio nonen sasakotatiasi,

²⁹ Aseken eh ki nitiotte tsi sakotatis tsinihosaststensera, nok iah tsinihatiierha ne ratiiatons.