Matthew 6 - Ohiatonhseratokénti

Iaiak-haton Nateioteriȣasonterakȣen.

¹ Seȣanikonrarak tosa ȣene kenhak nonhietsitenre ne iakotent, nʼaionttokanion; aseken iahki othenon tatatsiseȣariȣaserakȣase ne Etsiseȣaniha Karonhiake tenteron.

² Tosa kati seȣateȣennoton nʼonen enhiotsitenre; tsinihatiierha ne Kaianeren ronatkonȣaroron ratirihoȣanatha tsi ronterennaientakȣanionkȣa oni tsi tekanatokenhaton ne tahonȣatirensaron nʼonkȣeokon Oriȣiiotsi kȣarori akȣa iehatiiatentatha.

³ Kenh tanon nasiere nʼashetenre, tosa ȣattok ne sesonekȣati tsiniȣatierha ne tsi Seȣeientetakon.

⁴ Tosa senestonhak tsi satanitenron; nok ne ianiha nʼiah othenon tehotrenhostenni, ȣene enhronni tsi tenshiariȣaserakȣase.

⁵ Nok nʼonen ensaterennaien; tosa shenakeren ne kaianeren rona tkonȣarorokton, ratinonȣe nahatitake nʼonen ronaterennaien, aontonkȣeneste oni tsi tekanatokenhaton ahonȣatiken nonkȣesonha. Oriȣiio tsi kȣarori tsi iah othenon teshotirhare nʼonakenke.

⁶ Nok tanon nise nensaterennaien satatennhoton sanonskon, teiakanerese ne Ianiha tsi saterennaien; nok ne Ianiha ne tiotkon teiakanere tsi oni nonȣe niiotaseton, ȣene enronni nʼonen henhiatonraseronse.

⁷ Nok oni nʼonen saterennaien, tosa ok neh tontasatasafhak tsinihatiierha ne iah tethonetakon; aseken ronnere neh ensonkȣentenrate tsi ȣeso enhiakȣatati.

⁸ Tosa kati ietsinakeren: Roterientare se ne Etsiseȣaniha tsinahoten teseȣatonȣentsioni ohenton natsiseȣariȣanontonse.

⁹ Kenh kati nenseȣaiere nenseȣaterennaien: Takȣaienha ne Karonhiake tesiteron! aiesasennaien!

¹⁰ Aiesaȣenniiostake! aiesaȣennarakȣake nonȣentsiake tsinitiot ne Karonhiake tiesaȣennarakȣa.

¹¹ Takȣanont ne kenh ȣente iakionnhekȣen niateȣenniserake.

¹² Sasanikonrhen ne ionkȣariȣaneren tsi niiot nii tsionkȣanikonrhens nothenon ionkhinikonraksata.

¹³ Nok tosa aionkȣasenni ne kariȣaneron; ehren tanon takȣariȣakȣiten ne iotaksens, aseken ise ne tsiniienhenȣe ensenakereke, kasastensera oni Kanentonsera iah takariȣentane. Amen!

¹⁴ Aseken nentsiseȣanikonrhen tsinikon iotsinikonraksaton nonkȣe, enshonikonrhen ki oni nise tsinikon hetsiseȣanikonraksaton ne Etsiseȣaniha Karonhiake thenteron.

¹⁵ Nok tanon niah tentsiseȣanikonrhensere, iah ki oni ne raonha taonsahonikonrhen tsinitsiseȣanikonraksata.

¹⁶ Nok nenseȣentontiete, tosa tenseȣatkonsastaren tsinihatiierha ne Kaianeren ronatkonȣaroron, nʼia-taonsahatiierkenhaʼsʼ akȣekon aionttok tsi ronentontieton. Oriȣiio tsi kȣarori tsi iehatiiatentatha.

¹⁷ Nok tanon nise, satkonsohare, satoka oni nʼonen sentontietane.

¹⁸ Ne tosa aionttok, nok tanon ne Ianiha akȣekon tehakanere, raonhaa teiakanere tsi nonnisataseton, ȣene enronni nʼonen tenhiariȣaserakȣase.

¹⁹ Tosa seȣarorok nonȣentsia ahotsokoȣatsera, otsinonȣa, oskenra oni entiatekȣisa, ne oni ne sakonasetha rotinikonrotakȣas ratinenskȣas oni,

²⁰ Neh tanon seȣatateroroks Karonhiake tiostsokoȣatsera, nʼiah othenon tekontiierha notsinonȣasonha, iah oni ne ratinenskȣas.

²¹ Aseken tsinonȣe nikaien ne seȣatsokoȣatsera etho ki oni nonȣe iekaien ne seȣeri.

²² Okara ȣahi aosȣathesera nʼoieronta; toka nonȣa iah othenon teiohre ne skarake tsiatakȣekon teiosȣathe.

²³ Neh kati ne iah tentioriȣaierike ne sakara, tsiatakȣekon kitentiokarasheke; toka kati nonȣa neh saien ne tetiokaras, oh kati onte akȣa niiatenhiaȣenne tsinonȣe tetiokaraskoȣa.

²⁴ Iah taonton onka tekeni taokosȣetseraientake; aseken tokat saiatatenhosȣen, onhononȣene ne saiatat; ok neʼsʼenʼs ne saiatat enhokonnienste, enhokenron ki ne saiatat, iahkati oni nise taonton ne sataietsiiotense, ne Niio tanon notkonseraksen.

²⁵ Nese ȣaonni kȣarori, katon: Tosa teseȣaterientarak tsi tsionnhe, tsinahoten enseȣake, tsi oni nahoten enseȣanekira; tsioni niȣaststane seȣaieronke, nahoten aeseȣatseronniate: iahken senha atonnhest tekanoron tsiniiot natennatsera, nok oni ne ieieronke tsiniiot ne iontseronniatha,

²⁶ Teseȣaiatoret notsitenhokonha; iah tekontiienthos, iah oni tekontiientȣakȣas, iah oni othenon tekonteȣeientons ne kanonsoharakeson; nok sane sakonontens nʼEtsiseȣaniha Karonhiake thenteron. Iah onteken senha ise tetsiseȣanoronkȣa tsiniiot nʼononha?

²⁷ Onka oni tsinitsion hahakȣeni ne tsi tiotkon tahotatenikonrharake seȣasita nahatatneniestste?

²⁸ Nahoten oni ahoriȣake toseȣatatonikonrhare natakȣennia ahoriȣake? Teseȣaiatoret tsiniiot tsi konteiarons nʼahontesonha: iah teiotiiote iah oni etkontiseriies;

²⁹ Nok sane Kȣarori, roiatanerakȣatonnesane ne Salomon, nok iah nonȣenton tiiehero tsi ratseronniskȣe tsiniiot nʼononha.

³⁰ Iah onteken senha ise tatsiseȣaseronni tsiniiot nʼohontesonha, nonȣa iohniote, nok nʼenhiorhenne kakiok nonȣe ienȣation, O Kanoron ki onte oni tsi seȣanikonrasto?

³¹ Tosa kati tonseseȣanikonrharak, nʼaeseȣaton-heke: nahoten naha enhiakȣake? ok neʼsʼ, nahoten enteȣanekira? tokaʼsʼ oniken nahoten enteȣatseronniate?

³² Ethoʼkʼ sek nehne niiot tsi ronnesaks ne iah tehotiianere: roterientarese ne Karonhiake Tetsiseȣaniha tsi eh niiot tsi teseȣatonȣentsioni.

³³ Neh tanon taseȣatierent seȣesak ne Niio rahonakerasera, nok ne kenh iohaȣiton aksekon nehne ok tentkonne.

³⁴ Tosa kati tonseseȣennikonrharak toh naiaȣenne tsi enhiorhenne; aseken enkene nenhiorhenne tsi nateiotonȣentsiohon; seȣenniseratson se ȣahi niiokȣeniatsera.