Matthew 24 - Ohiatonhseratokénti

Teȣasen kaieri aton iaȣenre teioteriȣasonterakȣen.

¹ Nok onen sishoiakenhonhatie, onen oni sishotentionhatie ne Iesos, ȣahonȣateranentakten ne raotiokȣa, nahonȣarori ahakahenhion tsiniiot tsi kanonsonni.

² Nok ȣahenron ne Iesos; Akȣa ȣahikenh seȣatkathos tsiniiotanion? Oriȣiio tsi kȣarori, tsi iah oni nenskat nonȣa tatekanenhiasere taiotatenron ne iah takarision.

³ Olivier tsi tiononte iahatien, rahonhake tsiȣahonȣateranentakten ne raotiokȣa, ȣahonniron: Askȣarori tanon katke ienkaeȣe neh naiaȣenne, ohoni nahoten enkaieronniststakȣen nonen tentese, nehoni nonen enseȣatonȣentsiarisi?

⁴ Tontaȣakoȣennaȣeron ne Iesos, ȣahenron: Seȣatatenikonrarak tosa onka aiotsinikonrakarhatho,

⁵ Aseken kentiokoȣanen enthonne nenhionksennenhaȣi rontonne: ii ne Keristos, nok kentiokoȣanen ensakotinikenrenhaȣe.

⁶ Enseȣariȣaronkanion iakoteriio, oni ionteriiosere, tosa tanon seȣateronhienten: Aseken iatekakonte neneh tsi eh nenhiaȣenne; iah ki tanon, areko oni neh teken ne tsi iotokte.

⁷ Aseken tenhotiriȣarheseron ne tehontonȣentsianekhaon tsinonkȣati ne raotisastensera: nok enhiontonkariakon, enkannratarineseron nok tenhiaonȣentsishonkȣanion.

⁸ Akȣa sane neneh neok tsi tiotasaȣakȣen naieronhiakentakȣe.

⁹ Ethone oni onen enhietsiiena, enhietsironhiakente, enhietsirio, akȣekon ok oni nonkȣe enhietsisȣatakȣe nʼaksenna.

¹⁰ Kentiokoȣanen neh nonȣe nenhotiriȣanoron, tenhiontastsȣenseron, tenhiontatatenninonnion oni.

¹¹ Kentiokoȣanen oni ehnonȣe nenhotiketote ne Rotitokensetseraksen nok kentiokoȣanen ensakotinikonrakarhatho.

¹² Nok tsi natenȣareni ne kariȣaiesatsera, kentiokoȣanen nentsiakoȣistoten nakotanitenrat.

¹³ Nok tanon onka iatenharionkote neh enhaniakenne.

¹⁴ Nehoni kehiken Oriȣatokenti Karonhiake nitioteriȣinon Onȣentsiakȣekon enkarihoȣanaton, ȣene aiakaonniaten nonkȣeokon; ethone onen enȣaȣe tsi iotokte.

¹⁵ Ne kati nonen enseȣatkatho ne kariȣaiesatatsera neneh iakohnikonraksatakȣa, tsiniiot tsi rotrori ne Rotokensehakȣe Daniel, enkariȣataton nʼonaktato-kentike, (ratennikonraren onka roȣennanotha netho Rotokense.)

¹⁶ Ethone tsi ionontenion enhiontekȣasentakȣe ne Judéronon.

¹⁷ Nok oni ne kanonsake ieharates tosa tethastsnent naonsahakoha tsiok oni nahoten akenhake ne raononskon.

¹⁸ Nok oni ne kaehtake iehres tosa sahket naonsahakoha ne raotseronniat.

¹⁹ Iotitentasere ne tsionathonȣisen noiah nenkontiiatoten neh nonȣe teȣenniserate oni nenkonststaronthake.

²⁰ Seȣaterennaien kati ne tosa koserake, tosa oni aȣentatokentike akenhak nʼonen enseȣateko

²¹ Aseken ionikonraksentseratsanit tsinenhiaȣenne nethone, neki enskat nareko nonȣenton eh tetiaȣenhon tsinahe tiotonȣentsiatasaȣe tsiniiore nonȣa, iah oni noiah eh tiiaonsaiaȣenne.

²² Neh oni ne iah taontahaȣenniserokeri neh niȣenniserotens iah onka tahioniakenhon; neh tanon ne iontatiatarakȣen akoriȣake, enȣenniserokeri noh niȣenniserotens.

²³ Neh kati nenhiesarori nethone enhiahiron: kenh renteron ne Keristos, ok neʼsʼens: kenh nonkati, tosa tasetak.

²⁴ Aseken enhatinakerenne nethone ne Keristos enhontatonni, Oni ne Rotitokense, ioriȣanerakȣatenion, teiotieronnionhaton oni tsi nenhatiieranion, aontonseke oni asakotinikonrotako ne iontatiatarakȣen.

²⁵ Onen kati ȣahi nonȣa tahonenne takȣarori.

²⁶ Neh kati nenhiesarori nenhiaihron: Karhakon thenteron: tsi iateiotennhontaȣenhe thenteron; tosa tasetak.

²⁷ Akȣa tanon tsiniiot nateȣanennekaraȣe, tsi tkarakȣinekens takahientakȣe nok tsi iateȣastsothos iakaniharho ȣahokentane; eh nenhiaȣenne nonententre nʼOnkȣe Roienha.

²⁸ Aseken tsi nonȣe nenhioiataststokotonke nʼiakoȣentaon ethononȣe natenkontentasente nʼAkȣeks.

²⁹ Akȣa neok enȣatenniserohestste neh niȣenniserotens, onȣaterakȣaton, iah oni tataonsnkasȣathete nasonrekha, entkaniserenne ne karonhiake tiotsistokȣaronnion nok tenhiotihentonȣe nahosastensera tsi Tkaronhiate.

³⁰ Ethone onen ontkaieronnine karonhiake nʼOnkȣe Roienha raotenientensera, ethone oni oni akaon ȣentsiakȣekon nonkȣe enhiakaonsenanion enhiontatonstskȣenaiaakhonseke, enhonȣaken oni nʼOnkȣe Roienha tare tsi taiotsikeraronniontie karonhiakeson, enthokȣeniatseroȣanenhatie enthoiatanerakȣatonhatie oni.

³¹ Nok entesakotori ne raoronhiakorononokon, neok nenthatihonraȣate tsi ensakotiiataroroke ne Sakoiataȣen tetsiaronkȣen tsi ieiotonȣentsiokta nihon.

³² Kenh kati kaien taseȣatonnakerat kehiken Tsiohnionȣarontonhake tekariȣakentonkȣen: Akȣa neok enkaranaȣen oni enkaskȣeionten, ok naha neh enseȣaienteristakȣe tsi onen toha taiokennhonti.

³³ Eh kati oni noneh nenhiaȣenne nonen enseȣatkathoseron kehiken nikarihotens, seȣerhek onen kkheto tare nʼOnkȣe Roienha, akȣa oni onen kannhohakta irate.

³⁴ Oriȣiio tsi kȣarori, nonȣa kenh kaȣatsirate iah teȣatohests tane ohenton neh naiaȣenne.

³⁵ Karonhia Onȣentsia entiatohestste, kenh kaien nakeȣenna iah neneh nonȣenton tiiaontohestste.

³⁶ Kenh kaien tsinonȣe niȣenniseronte, tsi oni niioȣistahe iah onka teioterientare, iah oni ne Raoronhiakeronon, raonhatsiȣa ok roterientare ne Rakeniha.

³⁷ Tsiki tanon niiotonne sihotenniseratenion ne Noè, eh oni neneh nenhiaȣenne nohnen tentre nʼonkȣe Roienha.

³⁸ Aseken, tsiniiotonne ohenton sahonnotonkoȣa, skennen tatehonastskaonkȣe, ratinekirhakȣe oni, rotiniakonskȣe, tsikiniiore iahatita ne Noè raohonȣakon.

³⁹ Nok iah othenon tehonnerhakȣe enȣennoton ken, tsiki niiore onen iahonnoton akȣekon oni iahakoiatenhaȣe; Etho kati oni neneh nenhiaȣenne nʼonen tentre nʼOnkȣe Roienha.

⁴⁰ Teniiase kaehtakon enhnesseke: Saiatat enhonȣaiena nok enhonȣatkenrate ne Saiatat.

⁴¹ Tekeniiase enkenithetake tsi iethetakȣa; Skaiatat enkonȣaiena, enkonȣatkenrate ne Skaiatat.

⁴² Seȣatennikonraren kati: iah se ȣahi teseȣaterientare toh nenkahaȣi tentre ne Etsiseȣaianer.

⁴³ Seȣariȣaienterihak tanon kehiken, Onka kiok ne ronkȣe ahontahoterientarake tsi nenȣatasontine ahononsorensere ne Sakosehta ahatieȣatense naha, nok iah tarere iaȣeronhatie teionkenonsariten.

⁴⁴ Neh kati oni nise ȣaonni Seȣatateȣeiennentahonhak: Aseken tsi nonȣe ne iah teseȣarhare nenraȣe nʼOnkȣe Roienha.

⁴⁵ Kah nihenteron nonȣa tohiken ne rannhatseriio roriȣatoken oni, nene Roianer rorihonte nasakoststeriste ne raonnhatseraokon, neoni nasakohnonte tsi nonȣe nateiotonȣentsiohon?

⁴⁶ Rotaskat netho rannhatsera neh nenhoierenhatie tsi roiotatie nonen ensraȣe ne Roianer!

⁴⁷ Oriȣiio tsi kȣarori, tsi akȣekon enhorihonten tsi nihoien.

⁴⁸ Kenh kahien tokat kannhatseraksen, enhenron ne raonikon rakon: roniskȣas ki oni naontare nʼAkianer!

⁴⁹ Nok ok eken asakokenrenseronni asakoȣentho oni ne Satehatinnhatsera, nok keken neh enskatne enhontonȣesen ne tsionekakaȣe.

⁵⁰ Tohiken Rannhatsera Raoianer eh nonȣe niȣenniserate nensraȣe, tsi oni niioȣistahe nʼiah othenon tenhorhareke.

⁵¹ Nok ehren enhoiatenhaȣite, neh oni iatensha koieste nakonȣarasonha: etho nonȣe natenhiosenthoseron oni tenhionnokaraniehonheke.