Matthew 22 - Ohiatonhseratokénti

Teȣasen nok tekeni aton iaȣenre teioteriȣasonterakȣen.

¹ Sekon are ne Iesos tontahatati oni ȣathariȣaken tonkȣe tsi ȣahenron.

² Neh testiatieren ne Karonhiake tkanakeraseraien tsiniiot nʼOnontiio-koȣa ȣahatennioten ȣahoniake enskat ne Roienha.

³ Iasakotori ne raonnhatsera nasakotinonksa ne iontathonkaraȣi; iah tanon onka tetiotention.

⁴ Tihatite sekon ionsasakotori; ȣahenron: ietsirori ne khehonkaraȣi tsi onen kaȣeiennentaon kakkȣahere; akȣekon konȣatirio ne kheiaresenstonne, onen kati kaȣeiennentaon karo kasene nok seȣatekkonni.

⁵ Iah othenon oriȣa tethononni, ok eken eh niiaonne tsinonȣe thotiriȣaien.

⁶ Otiake ȣasakotiiena ne kannhatsera ȣasakotikonrenseronni oni ȣasakohnaȣentho.

⁷ Ȣahonakkȣen nʼOnontiio-koȣa Sahariȣaronke, iasakotori raosotarha ȣasakonaȣentho ne rontaȣenthos, nok ȣasakohnatenatentaȣe.

⁸ Nok sasakaȣenhasoe ne kannhatsera: Atskȣi! onen ȣahi kaȣeiennentaon Kakkȣahere; nok ki tanon iah tehotirihontakȣe ne ronȣatihonkaraȣine.

⁹ Ȣasene kati tsi teiohaokenseron nok akȣekon ietsihonkaron tsiniiakon enhietsiken.

¹⁰ Ok tiiathonreni tsi iohatenion ȣasakotiiataroroke tsiniiakon ȣasakotiiatatsenri, tionkȣetaieri nok oni ne ionkȣetaksen akȣaki ȣakanonsine tsi kakkȣahere.

¹¹ Nok nonen sisakotkensere ne Ronontiio-koȣa tsiniiakon iakotekkȣahere; saiatat ȣahoken nʼiah tehotseronniaton ne iontenniotakȣa.

¹² Ȣahaȣenhase: ohniiotieren kiatateken tisataȣeiaton ne kentho iahse tesatseronniaton ne iontekkȣarakȣa? iah othenon tehokȣenion naontahotatike.

¹³ Ethone ȣasakaȣenhase ne kannhatsera: hetsiseȣanerenk nok tsi tetiokaras iatsiseȣaiatonti, etho nonȣe natenhionsenthoseke oni tenhionnokaraniehonheke.

¹⁴ Aseken kentiokoȣanen iehiontatinonkon nok ki kenh niiakonha iontatiatarakȣen.

¹⁵ Ethone akte sahonnete ne Pharisian, ȣahatitsienhaien oh nahatiiere nahoȣennannhike.

¹⁶ Iasakonatori kati ne raohnonkȣeta, ȣahonniron: Seȣenniio! ionkȣaterientare tsi tisariȣaieri, oriȣiio oni tsi neh sherihonnienni ne Niio raoriȣasonha, iah oni tatesonkȣetaiestasions: Aseken iah ki neh teskahenhions tsiniieiatotens.

¹⁷ Askȣarori kati tsinise nisanikonroten: ioteriȣison kenh naiekariake tsini hotenienten ne Cesar, tokat kenh iah?

¹⁸ Nok tanon ne Iesos roterientaratsion tsini hotinikonroten ȣasakaȣenhase: Tsionkȣetaksenskȣa! ohniiotieren tsi iseȣere asakȣanikonrotako?

¹⁹ Takȣanatonhas tsinahoten iekariakta. Skaȣista ȣahonȣanatonhase.

²⁰ Nok Sahenron: onka raiatare, rasennare oni?

²¹ Tontahonniron; Cesar. Tontasakaȣenhase: hatsitsion ki ȣahi tsinikon raoȣenk ne Cesar: nok Niio tsinikon Niio raoȣenk.

²² Ȣahotinerako tsi nasakoierase, nok sahontenti.

²³ Ok neh sahennisera ȣahonȣaiatorenne ne Sadusean neneh ronton iah tetsiontonnhests nonkȣe; ȣahonȣariȣanontonse.

²⁴ Ȣahonniron; Seȣenniio! Raȣen ne Moïs: onkakiok areko tenhoȣiraientake enrenheie, neh ne teiatennontere shotiniak nʼiotereons nahotȣatsironnien ne Rotsikenha.

²⁵ Kenh kati niiaȣenhon: tsiatak natehontennontere; ȣahoniake ne thakoȣanen nok iah tehoȣiraientaon tsiniiore iarenheie; neh kati ne rokenha sahotiniake.

²⁶ Etho oni neh nahaȣenne ne tekenihaton oni nasenhaton tsiniiore ne tsiatakhaton.

²⁷ Nok onaken ȣahaonniate ne tsiothonȣisen, ȣakenheie.

²⁸ Ne kati ȣahi nonen entsiontonnhete kah nikaien ne tsiatak nihati enrohneke ne kenh tsiothonȣisen? akȣekon se ȣahi niiehotiniakon.

²⁹ Nok tanon ne Iesos ȣahenron; tsi tontasakoȣennaȣeron: seȣaiatatons netsi iah othenon teseȣaȣennaienteri ne Kaiatonseratokenti, iah oni ne Niio raokȣeniatsera.

³⁰ Aseken iah tetsiakoniaks ne Karonhiake, etho tanon nitsieiatoten tsiniiot ne Niio raoronhiakerononokon.

³¹ Nok kenh kaien tsi tsiontonnhests niakoȣentaon, iah kenh teseȣaȣennanote tsinahoten rotonhon ne Niio tsi raȣen.

³² Ii Rao-Niio nʼAbraham, Isaak oni ne Jacob? Iah kati ȣahi teshako-Niio ne Niio niakoȣentaon, neh tanon Ronȣa-Niio nʼiakonnhe.

³³ Ȣahakohnerakȣenhaton nonkȣeokon tsini horiȣakȣarision tsinahaiere tsi tontasakoȣennaȣeron.

³⁴ Sahatiriȣaronke ne Pharisian tsi sakoskȣekon ne Sadusean ȣahontkennisa.

³⁵ Saiatat tsinihati Sakorihonnienni ne Kaianerensera, neh ȣahoriȣanontonse ȣahenron tsi ȣathonikonraseren.

³⁶ Saianer! Kah nikaien Kariȣakȣeniio tsinikonionkȣatenientense ne Kaianerenseratokenti?

³⁷ Tontahenron ne Iesos: Sanikonrakȣekon satonnhetserakȣekon seriasakȣekon oni tsi entsenonȣehake ne Niio Raȣeniio tsi Sonnhe.

³⁸ Neneh tiotierenton neh oni tkakoȣanen.

³⁹ Nok testiatieren ne tekenihaton: Enshenonȣehake akȣekon nonkȣe tsi nise nisatatenonȣes.

⁴⁰ Ethononȣe akȣekon nikaien oni niioteroron tsini ȣaton ne Kaianerenseratokenti oni ne Rotitokenseakȣe.

⁴¹ Nok tsi etho ronatkennison ne Pharisian, ȣasakoriȣanontonse ne Iesos.

⁴² ȣahenron: Onka nise iseȣere Ronȣaienha ne Keristos? Tahonniron, David.

⁴³ Tontahenron: Oh kati naha niiotieren tsi raȣen ne David Sahonikonrata ne Kanikonra, ronatonkȣa Raoianer tsi raton:

⁴⁴ Roianer raȣenni ne Rakianer tsi keȣeientetakon satien tsiniiore ienkheiarasitokeȣate ne iesasȣens.

⁴⁵ Oh kati nekenh naiaȣenne ne Roienha akenhake raton se Rakeȣenniio?

⁴⁶ Iah onka oni ne tsioȣennat tetiotati, iah oni sekon noiah tetsiotenienten aonsahonȣariȣanontonse ne karo takahaȣite.