Matthew 20 - Ohiatonhseratokénti

Teȣasen-haton Teioteriȣasonterakȣen.

¹ Aseken neh testiatieren ne Karonhiake tsiniiot ne saiatat ne ronkȣe orhonketsi ȣahaiakenne ȣahannhatseri sakha.

² Nok nonen sahotiteriȣaseronnisa skaȣista enhonatkariakse ne seȣennisera, ethone iasakotori tsi thotenenharhare.

³ Sekon are sahaiakenne asen siioȣistahehatie, ȣasakoken kanathen ratitaraien iah othenon tehontierha.

⁴ Ȣasakaȣenhase: ȣaseȣe seȣaiotensera oni nise tsi teȣakatenenharhare, nok enkȣakariakse tsi satekena.

⁵ Eh neneh ȣahonnete. Sekon are sahaiakenne iaiak oni ne tioton siioȣistahe ok are etho nonsahaiere.

⁶ Onen enskat iaȣenre siioȣistahe sekon are sahaiakenne, ȣasakoken are nʼiah othenon tehontierha, nok ȣasakaȣenhase: oh niiotieren kenȣentatieson kenh nonȣe niseȣenstskȣahere nok iah othenon teseȣatierha?

⁷ Tontahonniron iah ki onka teionkhinnhas. Tontahenron ȣaseȣe oni nise tsi teȣakatenenharhare seȣaiotensera nok enseȣatkariakse tsi satekena.

⁸ Nok siiokarasneha ȣasakaȣenhase ne rahonnhatsera: ionsaietsinonk nok ietsikariaks tsinikon tehonatentson; neh taietsiiatierent nʼonaken roti, onaken rononniat ne ratihentene.

⁹ Skaȣistatson tahonȣennon nʼonaken nihoti,

¹⁰ Neh ȣahonni isihnon nihotirharekȣe nahohnatkariakse ne ratihentene; Skaȣistatson ki oni neneh tahonȣennon;

¹¹ Ȣahatiiena kineneh nok ki tanon ȣahonȣenratonnionhase ne raiatakȣeniio.

¹² Ronton: ok sateskȣakariakse nenskat ok ȣakaȣistaheke ȣahotiioten tsiniiot nii ne kenȣentatie ionkȣaiatote tsi iorakȣatarihen.

¹³ Ne ok ne ȣahenron tsi tontasakoriȣaserakȣase: Iah othenon teȣatenro tekȣakaronnis; iah kenh teionkȣateriȣaseronni tsi skaȣista enseȣatkariakse?

¹⁴ Seȣaiena ne tsiaȣenk nok satsiatenti, Kenonȣes nii neh oni neneh nakhekariakse ne kenh kaieri tsiki nise niiot.

¹⁵ Kanekhere ȣahi entkanonton tsini ienhenkhaȣe tsi nahoten ȣakien? ohia ken nitisatierase tsi teȣakeriȣaieri?

¹⁶ Etho kati oni neneh nenhiaȣenne, neh entsiehente nʼonaken iako, nok onaken entsiakaonniate ne iehentene; aseken kentiokoȣanen iontathonkaraȣi kenh ki tanon niiakonha iontatiatarakȣen.

¹⁷ Jerusalem siiahonenontonhatie, eh ȣasakotiatatiskȣate ne tekeni iaȣenre nihati nok ȣahenron:

¹⁸ Kenh ihken Jerusalem ȣeteȣe onen enthonȣaiena nʼOnkȣe Roienha enhonȣatirihon ne ratitsihenstoȣanens oni ne ratiiatons, nok enhonȣariȣenteenhonȣario.

¹⁹ Enhonȣanatsiakȣarision ne ionkȣetaksen nahonȣatentoriate, enhonȣasokȣaȣesson nok enhonȣaiasakestsko; nok ki tanon asenhaton nenȣata enshatonnhete.

²⁰ Ethone eh onȣe ne Zebedé rotinistenha, ȣatho tonstsothase nok ȣahoneken ne tanitharen.

²¹ Ȣarenhase; nahoten isere? tontakenron, asathon tatseke ne kenh ines keienhokonha, saiatat tsi seȣeientetakon ahenstskȣarake nok ne saiatat sesenekȣatinonen ienseseȣe saiatanerakȣatserakon.

²² Tontahenron ne Iesos: iah tetsiaterientare tsi nahoten seniriȣanontons. Ensenikȣeni kenh aeseninekira tsi niiot tsi knekirane? tontaniron enhiakenikȣeni.

²³ Tontasakaȣenhase: Tokenske ki neneh enseninekira tsiniiot tsi knekirane: nok kenh kaien tsinahoten seniriȣanontons, iah neneh ii tekheiaȣis, akȣa neneh raonhatsiȣa Rakeniha roteriȣaienni neh nonȣe niioriȣake.

²⁴ Oriȣiio tsi ȣahotinakȣen noieri nihati tsinahoten ȣahonronke ne iatatekenhaa rahotiriȣake.

²⁵ Nok tanon ne Iesos iasakononke nok ȣasakaȣenhase: Seȣaterientare ȣahi tsi sakotiȣenniioʼ nʼonkȣe ne Ratikorasson, oni ne Ratisennasson.

²⁶ Tosa kati nise eh naseȣaier: ok eken aeseȣatatennhatseronnien nonka enrerheke aionkkoȣanen.

²⁷ Nok oni nenrerheke entkanontonseke, seȣatatenaskonnien oni neneh.

²⁸ Tsi ki niiot, nʼOnkȣe Roienha, iah neh tehaniente nahonȣakonnienste; asakokonnienste tanon, nok oni kentiokoȣanen asakaȣenheiase.

²⁹ Kentiokoȣanen ȣahonȣasere nonen sonsahatenti ne Jeriko nonȣe.

³⁰ Teniiase tenironȣekon tnistskȣahere ohhaakta, ȣaniriȣaronke tsi Iesos rotoheststonhatie, ȣathotihenrete, ȣaniron: Seȣenniio, David iaienha takenitenr.

³¹ Nok nʼonkȣeokon ȣahonȣanariste tsi tohotihenretha; nok ne rononha ok eken senha taiakȣisronne tsi iaton: Seȣenniio, David iaienha takenitenr.

³² Ȣattatane ne Iesos nok iasakohnonke, ȣahenron: ohnahoten tetsiatonȣentsioni?

³³ Taniron: Seȣenniio! Aiakenikenseke.

³⁴ Ȣasakotenre ne Iesos tsi ȣasakoken, kenhniiahaiere nikarake nok oksaok ȣaniken; nok ȣahonȣasere.