Matthew 19 - Ohiatonhseratokénti

Tiotonhatont iaȣenre Teioteriȣasonterakȣen.

¹ Nonen saharihokten ne Iesos, ehren sarete ne Galilene isih niiahare tsi teȣatonȣentsiakhenhatie ne Judeʼ isih nonkȣati ne Jourdain.

² Kentiokoȣanen ȣahonȣasere, eh oni nonȣe sasakotsientanion ne iakononȣaktanionni.

³ Ethone oni ȣahonȣaiatorenne ne Pharisian ronȣanikonrotakohe ȣahonniron: enȣaton ken nonȣa ne ronkȣe aonsahateȣentete ne rone tsiok nahoten aontakarionniate?

⁴ Tontasakoȣennaȣeron, ȣahenron: iah kenh teseȣaȣennanote tsini kaiaton ne sontahatasaȣen sasakoieronnistste, roskenraketa oni tsiothonȣisen ȣasakoiatonni.

⁵ Nok ȣahenron: neh enkarionniate ne ronkȣe ensakotsiakȣarisi ne ronȣaienha nok enhateranentakten ne rone, nok enskat ienshiaton?

⁶ Ne e ȣaonni iah tatesniiase, akȣa tanon ok sahotiȣara. Tsikati nahoten Niio tehokhen, tosa ronkȣe teshakhasi.

⁷ Tontahonniron: oh kati niiotieren tsi eh nihoieren ne Moïs tsi raȣen! enkonȣaiatonseron ne tetsiontekhasiatha, nok enshatekȣate ne rone?

⁸ Tontasakoȣennaȣeron ȣahenron: ne ȣahi tsiniseȣeriasaksen, neh ȣaonni ne Moïs hetsiseȣariȣaȣi naonseseȣatekȣate ne seȣaniakon, nok iah ki eh tetiotonne ne tiotierenton,

⁹ Katon nii: onkakiok enshatekȣate ne rone, nok oia enshoniake, enhariȣanerake ne Kentesera, kaȣenniio ki iah kentesera teniostonthe, oni onkakiok enshatateniakten ne skonȣatekȣaton enhariȣanerake oni neneh.

¹⁰ Ȣahonniron ne raotiokȣa: toka nonȣa eh nihoteriȣaienni ne ronkȣe tsinonkȣati ne rone, senha ki ioianere tosa roniak.

¹¹ Tontahenron: iah ki neneh akȣekon teiakokȣenion, neok tanon tsiniiakon ne iontataȣi.

¹² Aseken otiake ok iah sihoniakon sarennakerate; nok otiake onkȣe eh nihonȣatiriȣisahnni; nok otiake Karonhiake ahorionniat tsi eh nihonatateriȣisahani, onka enhakȣeni nahonikonraientane, ronikonraientann.

¹³ Ethone are onen etho ȣahontatiatheȣe eksaokonha, neh ok oni niasakoiena, nok ne raotiokȣa ok tiiesesakotirektakȣe.

¹⁴ Sahenron ne Iesos: Karo itient neksaokonha, tosa oni ietsiiotasts; Aseken neh tiakonakte ne Karonhiakon tsiniiakon tsiontatieren.

¹⁵ Ȣatesakonisnonsaronnionhase, nok sahatenti.

¹⁶ Saiatat eh ȣahoketote, ȣahenron: Saianer! ise ne tisariȣaieri! oh nakiere tsi aontakeriȣaierite onen akataȣeiate Karonhiakon iaonsakonnhekeonȣe?

¹⁷ Tontahoȣennaȣeron: oh niiotieren tsi saton, tisariȣaieri? Niio seok thoriȣaieri; Kenh kaien nasataȣeiate Karonhiakon, seriȣaierit tsini kariȣataton.

¹⁸ Tontahenron: Kah nikaien? Nok ne Iesos tontahoȣennaȣeron: Tosa sherio nʼonkȣe; Tosa saststeristne kentesera; tosa senensko: tosa sheionnoȣenten.

¹⁹ Shekonnienst ne iesaienha; nok, shenoronkȣak nonkȣe tsinise nisatatenoronkȣa.

²⁰ Tontahenron ne ranekenteron: ok teȣakeriȣenhaȣiton neh nikarihotens sontonkateiarontie; nahoten kati sekon teȣakatoktanis?

²¹ Tontahenron ne Iesos: toka nonȣa aserheke akȣa aesaianerek, ȣas, satenninon tsinahoten saien, shetenrat nʼiakotent, nok entisatsokoȣatseraientane Karonhiake; ethone tontase nok takser.

²² Nonen sahaȣennaronke ne kenh ranekenteronha neh nikaȣennoten, tahaniarenne nok ȣahonikonraksen ne tsi rokȣatsene.

²³ Ethone ne Iesos ȣasakaȣenhaȣe ne raotiokȣa: oriȣiio tsi kȣarori, tsi tonkaniotane nahataȣeiate ne Karonhiakon ne Rotsokoȣa.

²⁴ Sekon sakȣarori: tsi senha ȣatiesen nʼoniakȣaer taontohestste tsi teȣaontakaronte ienikhonkȣa tsiniiot ne rotsokoȣa ahataȣeiate karonhiakon.

²⁵ Ȣahotinerako ne raotiokȣa tsinahoten ȣahonronke nok ȣahonniron: onka kati nekenhen enhieniakenne?

²⁶ Ȣasakotkatho ne Iesos nok ȣahenron: ethoneneh tsinonkȣati nonkȣene iah othenon taonton; nok ki tsinonkȣati ne Niio, oriȣakȣekon thiienȣaton.

²⁷ Ethone Tier tahatati ȣahenron: oh kati nii nenhionkȣaiataȣen ii noriȣakȣekon ionkȣateȣenteton nok kenh kȣanonteraties?

²⁸ Tontahenron ne Iesos: oriȣiio tsi kȣarori, ise kehiken ne takȣanonteraties tsinonȣe nase tsiontons, nekati nʼonen onkȣe Roienha raonistskȣarane oni raoiatanerakȣatserakon enhenstskȣarake etho oni nise enseȣenstskȣaronnionke seȣanistskȣaratseratson tenhietsiiatoretake ne tekeni iaȣenre nihotitarake nʼIsraerronon.

²⁹ Nok onka kiok enhoteȣenteton, kanonsa, tehatennontere, iatennosenha roniha ronistenha, ok neʼsʼenʼs rone, sakoienhokonha toka onȣentsia nii akeriȣake oni aksennakon, teȣenniaȣe isinonȣe tsi nenshaiena, nok enhoientane nonronnheke onȣe onȣesentserakon.

³⁰ Kentiokoȣanen tanon ne iehente ohnaken entsiakaonniate, nok nʼonaken ihien neh entsiehente.