Matthew 18 - Ohiatonhseratokénti

Satekon haton iaȣenre teioteriȣasonterakȣen.

¹ Akȣa neok iononteratietane, ȣaonȣaiatorenne ne raotiokȣa, rontonne: Onka enthonȣakoȣanen nonen Karonhiake?

² Nok ne Iesos, raksaa iahononke, rahotinenrihen ȣathotaste.

³ Nok ȣahenron: oriȣiio tsi kȣarori, tokat iah tatenseȣatonnhatenionhe, iah oni eh tentsiseȣaiatotensere tsiniiot nʼeksaokonha iah ki taeseȣataȣeiate ne karonhiake.

⁴ Nese ȣahonni onkakiok enhanitente tsiniiot kehiken raksaa, neh tohiken takoȣanen ne Karonhiake.

⁵ Nok onka kiok enhoteȣeienton neh nihateksata ii aksennakon, akȣa ii rakateȣeientons.

⁶ Kenh tanon kaien ne sakoriȣaientatennis neh niieksatotens nehne tiakaȣetakon naksennakon; senha ioianere ne kanenioȣanen aonȣanenhianiionthase nok kaniatarake iaonȣaiatonti.

⁷ Iakotontestennire nonkȣeokon ne kariȣaientatennisera; etho neneh tsi tenhiontateriȣaieniatenniheke; nok ki rotentasere ne ronkȣe nensakoriȣaientaten.

⁸ Nene toka sasnonsa ok neʼsʼne sasita sariȣaientatenni, stoskar, nok ihnon iasatieseron: aseken senha ioianere, asastsinokatane, skati oni asenentsontatie iasataȣeiate ne Karonhiake, tsiniiot ne tetsiaron tasasitontake oni tasenenstsontonke nok otsirake iaiesaiatonti.

⁹ Tokat oni sakara sariȣaientatonni stako nok ihnon iasati, aseken senha ioianere onsti akenhatie iasataȣeiate karonhiahkon; tsiniiot ne tetsiaron taskaratake nok tsi tiotekhaonȣe asatetsirate.

¹⁰ Seȣanikonrarak, tosa ietsikenron ne niieksatasa, aseken ȣakȣarori: kehiken raotironhiakeronon, tiotkon onȣe tehonȣakonsakanere ne Rakeniha karonhiake thenteron.

¹¹ Aseken nʼonkȣe Roienha ne saskennhasere tsi nahoten ioieshaonne.

¹² Oh niiot nise tsi teseȣaiatoreta? ne ronkȣe enskat teȣenniaȣe ronaskȣaien teiotinakarontonha, nok enskat aontiataton, iah onte kenh ok eh tasakotsiakȣarisi, ne tiotonniȣasen tioton oni iaȣenre, nok onontoharakeson niiare ahaiatisakha ne iotiatatonhon?

¹³ Nok nentiotokentane enshaiatatsenri, oriȣiio tsi kȣarori tsi senha neh enhatonnharen, tsinihotonnhahere tsi tesakokanere ne tioton nikontiiatasen tioton oni iaȣenre iah teionatiatatonhon.

¹⁴ Etho kati oni neneh nithonikonroten ne Etsiseȣaniha Karonhiake thenteron, ne tosa oni enskat aieiesha nekonh niiakasa.

¹⁵ Tokat tsiatatekenha enhianikonraksate, ȣas, hestsre tsiaron otasetonke, tokat enhiataonsatatse tensetsenikonratsa ki.

¹⁶ Nok nʼiah tenhiataonsatathe, teionkȣetake satonkȣetaȣentat noriȣiio akenhake, tsi nenhonathonteke ne teniiase, ok nʼesʼnasen.

¹⁷ Tokat iah othenon oriȣa tasakaonni, kentiokȣa srori; nok nesekon iah tenhataonsatatire ne kentiokȣa, satennikonranentasi tosa oni serhek roriȣiioston kenh.

¹⁸ Akȣa oriȣiio tsi kȣarori, tsinahoten enseȣanerenke nonȣentsiake entkaneren ne Karonhiake, oni tsinahoten enseȣanerension entkanerension ki oni ne Karonhiake.

¹⁹ Ȣakȣarori oni, ieiohe ne teniiase skariȣat enhnonni tsinikon enhniriȣanonton akȣekon entesakaon ne Rakeniha Karonhiake thenteron.

²⁰ Aseken tsinonȣe nihonatkonnison teniiase ok neʼsʼ nasen nihati, eh se kiatare.

²¹ Ethone Tier ȣahoteranentakten, nok ȣahenron: Saianer! toh niioriȣake enshinikonrhense nenhakonikonraksate nonkiatatekenha? tsiatak onteken niioriȣake?

²² Tontahenron ne Iesos: iah takonrori nakiron tsiatak niioriȣake; tsi tanon nikon ne tsiatak niioriȣake ne tsiatak niȣasen.

²³ Ne ȣaonni ne testiatieren ne Karonhiake Tkanakeraseraien tsiniiot ne Ronontiio, ȣasakokontseratironten ne raonnhatsera okon.

²⁴ Nonen Shontahatasaȣen ȣahakontseraseronni: saiatat eh ȣathonȣataste neh nʼoieri niȣenniaȣehetserasen Talent, rotkarotakȣe.

²⁵ Nok tsi iah othenon tehoien nahakariakte: ȣahatennhane naonȣatenninon, oni ne rone, nok oni ne sakoienhokonha nok neh aontkariakte tsinikon rotkarote.

²⁶ Nok ne rannhatsera ȣathatontsotonnion rasitakta ne Roianer ronitentase, raton: Saianer! asaterharate nok akȣekon enkonkariakse.

²⁷ Ȣahonikonkararen ne Roianer nok sahotkaȣe akȣekon oni ȣahaiatonko tsinihotkarotakȣe.

²⁸ Akȣa tanon neok tsi ionsakaiakenne ne kenh rannhatsera, eh ȣatiaterane enskat ne ronatenro enskatne oni rotiiote, enskat teȣenniaȣe kȣenis rokarotani: ok sihakontatie iathohonriake ratonne: takkariaks onen tsinikon konkarotani.

²⁹ Kenhkaion ne ronatenro rotentsihon ȣathatontsotonnion raton: saterharat nok enkonkariakse.

³⁰ Iah tanon othenon tehotaonsataton okeken ȣahatennhane ȣahonȣannhoton tsiniiore iahakarokten.

³¹ Oriȣiio onte tsi ȣahotinikonraksen ne ronatiake tsiniiot tsi ȣahontkatho; eh kati saonnete nok oriȣakȣekon saonȣarori ne Roianer tsi nahaȣenne.

³² Oksaok ne Roianer ionsahatennhane ionsaonȣennonke nok ȣahaȣenhase: sennhatseraksenskȣa akȣekon nii konhiaȣi tsinikon satkarotakȣe aseken ȣaskenekon.

³³ Iah katiken taioianerenhon natsitenron ne tsiatenro tsiniiot tsi kontenron nii?

³⁴ Ȣahonakkȣen ne Roianer, nok ratiriton ȣasakonaskon tsiniiore ienhakarokten tsini hotkarote.

³⁵ Etho oni nene nentsiseȣaierase ne Rakeniha Karonhiake thenteron, nʼiah seȣeriasakȣekon tataonseseȣatatenikonrhensere tsi nateseȣatatenikonraksata ne seȣatatekenokonha.