Malachi 4 - Ohiatonhseratokénti

Ne Wenhniserowá꞉nen Ne Roiá꞉ner Rawenhnísera

¹ Satkáhtho, nenhnísera tá꞉we, iotékha tsi ní꞉ioht ne iontenaʼtarontáhkhwa, nó꞉nen ratikwé꞉kon ne rontatkowanáhtha tánon ratikwé꞉kon ne karihwahétkenʼs rotiióʼtens kwáh kawá꞉ʼeh enhón꞉ton; nenhnísera ne én꞉wawe kwáh kiʼ eniakotiaʼtátsaʼahte, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs, ká꞉tiʼ kwáh iáh tshiaʼtaonsahonwanèn꞉rahse nohté꞉ra khehs nʼonhateshón꞉ʼa.

² Ók kiʼ ní꞉se ne tsi nítson ne sewakweniénhstha nakhsèn꞉na ne karáhkwa ne karihwakwarihshiónhtshera kwáh entkarahkwínekenʼne, ne ne iakotsèn꞉tha enkará꞉tie kanerahontshá꞉keʼs. Ní꞉se kwáh iensewaiá꞉kenʼne tensewaniʼtsonhkwahkwánion tsi ní꞉ioht ne tiohnhónskwaron owí꞉ra ieioiakén꞉ʼen ne tsi tekatáhstha.

³ Tánon enietshiratatiéhshon ne iakonkweʼtahétkenʼs, aseʼkénh waʼkenhrontákwen ronatón꞉ʼon tsi kéntskaron ne sewahsiʼtó꞉konʼs, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs.

⁴ Sewehiá꞉rak ne raorihonnienníhtshera nakehnhá꞉tshera Mahís, ne kaianerènhseraʼs ó꞉ni ne karihwatáhtsheraʼs tsi nithiiá꞉wi ne Horeb nón꞉we ne nonkweʼtakwé꞉kon NʼIsraelró꞉nonʼs raotirihwá꞉ke.

⁵ Sewatenʼnikón꞉raren, kwáh enthiiaténniehte ní꞉se sewarihwá꞉ke ne rotokénhse Elijah nohén꞉ton ne wenhniserowá꞉nen tánon teiaonhniseranón꞉iani rawenhnísera ne Roiá꞉ner á꞉onwe.

⁶ Kwáh ensehshakaweriahsahserón꞉ni rotiwiraièn꞉tonʼs tsi nokwá ne shakotiioʼokón꞉ahs neh non, ne shá꞉ka ne shakotiioʼokón꞉ahs tsi nonkwáh ne ronwatiioʼokón꞉ʼahs, ne ká꞉ti ne tóhsa aón꞉take ne átienhte nohóntsa ne kahrewahtáhtshera.