Malachi 1 - Ohiatonhseratokénti

¹ Karihowanatáhtshera. Ne ne raowén꞉na ne Roiá꞉ner nakonwahronká꞉ten ne Israel tsi nithonwá꞉wi ne Malachi.

Israel Ohén꞉ton Waʼotohetstáhkwen Ne Edom

² Konnonronhkwá꞉ʼon, rá꞉ton ne Roiá꞉ner. Ók ní꞉se sá꞉ton, “Oh ní꞉ioht tsi takenoronhkhwá꞉ʼon?” Iáh kenh ne Esau Jacob tehiatateʼkén꞉ʼa? rá꞉ton ne Roiá꞉ner. Ne kiʼk shá꞉ka rinoronhkhwá꞉ʼon ne Jacob

³ ók riiatahkwahswèn꞉ʼen ne Esau; ne wakonniá꞉ton ne tsi rotenontahrónnion kanakerahserá꞉ien ohontsóhskon akénhake tanon tsi nihoiená꞉ʼon nonhóntsa iaonhwentsathenhá꞉ke ne ienwá꞉ton ne ne kahentakeha erhar raotirihwá꞉ke.

⁴ Tókaʼ ne Edom wá꞉ton, “Teionkwanitshahtarokwá꞉ʼon ók shé꞉kon kiʼ entsitewatenonhsonniánion ne iorihwentá꞉seronʼs,” ne Sakoiá꞉ner ne ratironhiaʼkehró꞉nonʼs ratónnions: Aón꞉ton naonsahontenonhsón꞉ni, ók kwáh kiʼ enskenonhsarihshión꞉ko, ne ienhonwatiná꞉tonhkweʼ ne karihwaneraʼáktshera kanakeraserá꞉ien, ne ne nonkwehshón꞉ʼahs ne Roiá꞉ner shakonaʼkhwá꞉se tsi nén꞉we enkénhake.

⁵ Tánon kwáh í꞉se tsonkweʼtatshón꞉ʼahs enhontkáhtho kí꞉ken, kwáh kiʼ ensewèn꞉ron, “Iekaníhare ieiotehétston ne tsi karistatátie ne Israel, tsi naʼtehotenonhianíhton ne Roiá꞉ner!”

Ioʼtaraʼéhston Tsi Ratitióhkwaien Ne Ratitsihènhstatsiʼs

⁶ Ne raksá꞉ʼa rokweniènhstha ne roʼníha, tánon ne rahnhá꞉tshera rokweniènhstha ne raiaʼtakweʼní꞉io. Tókaʼ kaʼníhsera ní꞉ʼi í꞉ken, káʼne kakwenienhstáhtshera tsi ní꞉ʼi naʼtewakatèn꞉tshon? Rá꞉ton ne Sakoiá꞉ner ne ratironhiaʼkehró꞉nonʼs ne tsonhá꞉ke, Oh sewatsihènhstatsiʼs, Í꞉se wesewakèn꞉ron nakhsèn꞉na. Sewá꞉ton, “Oh ní꞉ioht tsi waʼakwakèn꞉ron ne sahsèn꞉na?”

⁷ Ne tsi iahesewá꞉ren ne teiokhwáʼtson ne tsi ktsenhahráhkhwa. Tánon sewá꞉ton, “Oh ní꞉ioht tsi teionkwenʼtsónhston?” Ne tsi sewanonhtónnions nétho Roiá꞉ner raotekhwahráhne aón꞉ton naiontkèn꞉raʼte.

⁸ Nó꞉nen ne ièntstatshe ne Roiá꞉ner ne katshé꞉nen ne iáh teká꞉ken ne ahsateʼskón꞉ten, iáh kenh tekarihwáksen nétho? Tánon nó꞉nen ne entéhshiehste ne kontshinoʼkáhtha tánon ne iotinonhwáktani, iáh kenh tekarihwáksen nétho? Sateʼnién꞉ten ne iahá꞉tstats ne sakó꞉ra; ahawerienʼtí꞉io ónhte kenh ne sonhá꞉ke khehs naiʼnéhsten kaiaʼtateríhtshera? rá꞉ton ne Sakoiá꞉ner ne ratironhiaʼkehró꞉nonʼs.

⁹ Tánon ó꞉nen saní꞉tenht ne raoiaʼtateríhtshera ne Rawenni꞉io, ne nahón꞉ton ahotanitén꞉ronke nontionhá꞉ke. Kwáh í꞉se sewahtsaʼnà꞉keʼs tesewatathawíhten kí꞉ken. Kwáh kenh ahré꞉nehsteʼ ne kaiaʼtateríhtshera ne tsik ónhka akénhake? Rá꞉ton ne Sakoiá꞉ner ne ratironhiaʼkehró꞉nonʼs.

¹⁰ Weh, ónhka naionská꞉neke naienientháhrho ne tsi kahnhoká꞉ronte tánon aionté꞉kaʼte ne tsi ktsenhahráhkhwa ne iáh oh thé꞉non tshiaʼtákene? Iáh tewakerienʼtiióhstha ne tsonhá꞉ke, Rá꞉ton ne Sakoiá꞉ner ne ratironhiaʼkehró꞉nonʼs. Tánon kwáh iáh thatié꞉na naontesewá꞉iehste ne sewahtsaʼnà꞉ke naontá꞉we.

¹¹ Aseʼkénh kwáh tsi nentkarahkwínekenʼne tsi nienhskaráhkwenʼne tsi tshennowá꞉nen ne tsi ienakerénion ne ronnonhontsaʼkehró꞉nonʼs, tánon kwáh tsik nonwé꞉sonʼs tsi enieienʼkwarotónnion nakhsèn꞉nakon, aseʼkènh nakhsèn꞉na tsi kahsennowá꞉nen í꞉ken ne tsi ratinakerénionʼs ne ronnonhontsaʼkehró꞉nonʼs, Rá꞉ton ne Sakoiá꞉ner ne ratironhiaʼkehró꞉nonʼs.

¹² Ók í꞉se iáh tesewakweniènhston tsi wesewén꞉ron ne Roiá꞉ner raotekhwá꞉ra tánon ne kahikshón꞉ʼa tsi tekenʼtsónhston; iaʼkaníhane ne kákhwa iáh tekakweniènhston.

¹³ “Tsi naʼteiohwihshenhé꞉iaʼt kí꞉ken,” ní꞉se sewá꞉ton, tánon í꞉se takatehswáhtha, Rá꞉ton ne Sakoiá꞉ner ne ratironhiaʼkehró꞉nonʼs. Ne táhshawe tsi nahó꞉ten ne iotkarewáhton khehs ne watshinoʼkáhtha khehs ne iononhwáktani, tánon ne kí꞉ken táhshawe naontáhshiehste! Kwáh kenh ne atié꞉na ne sahtsaʼnà꞉ke naontá꞉we? Rá꞉ton ne Sakoiá꞉ner ne ratironhiaʼkehró꞉nonʼs.

¹⁴ Ók ronorónhsten ne raʼnikonhrhá꞉tha ne rá꞉tsiʼn ronáhskwaien tánon enhahrhá꞉ratsteʼ nahatenáhskon, tánon eʼthó sá꞉ne ne enhotʼskónthahse ne Roiá꞉ner nahó꞉ten ne iáh tshiekaiaʼtaié꞉ri; Aseʼkénh Í꞉i ne Kenontiiohtsherowá꞉nen í꞉ken, Rá꞉ton ne Sakoiá꞉ner ne ratironhiaʼkehró꞉nonʼs, tánon nakhsèn꞉na kwáh tsi niaʼteionkwé꞉tákeʼs tsi ratikweniènhstha.