Luke 9 - Ohiatonhseratokénti

Tioton-aton teioteriȣasonterakȣen Oriȣatokenti tsini hoiaton Roiatatokenti Luc.

¹ Ethone onen ne Iesos ȣasakoiatarako ne tekeni iaȣenre Nihatikȣekonne nok ȣasakokȣeniatseron nasakotikȣeni nonatkonseraksen, oni naonsasakotitsiente niakononȣaktani.

² Iasakotori asakotirionniennira ne Niio raonakerasera, nok aonsasakotitsiente niakononȣaktanionnis.

³ Ȣasakaȣenhase oni: tosa othenon iaseȣaha tsi seȣatentionhe, iah natennists, kaiare, kanatarok, iah oni noȣista; tosa oni tekeni teseȣatiataȣitseraientak.

⁴ Nok nonen kah kiok nonȣe ienhietsiiataȣeiaten, etho seȣenterontak tsiniiore tentiseȣatenti netho nonȣe.

⁵ Kakioknonȣe iah tenhietsiiateȣeientonne, saseȣarasitokef nonen tentiseȣaiakenne neh nonȣe nikanataien, neh tohiken enhotiriȣentakȣe.

⁶ Eh kati nehne nahatiiere, ȣahontenti, ok tiiathonreni tsi ienakerenion, oni tsi iohnatakȣenraron, Sakotirionniennihatie oni sesakotitsientonhatie niakohnonȣaktani.

⁷ Ethone oni onen ne Herod rakora ȣahariȣaronke tsini haieranionskȣe ne Iesos; nok iah teȣatons nahonikonratokenne, aseken otiake, ionton: San Shotonnheton.

⁸ Nok notiake ionton: Eli isro: nok sekon otiake iontonhakȣe; nehne thonatierenton thotitokensehakȣe shotonnheton.

⁹ Ethone ne Herod ȣahenron: ȣakatennhaon ronȣaniariakon ne San: Onka kati ne kenh nonȣa kehiken neh nihaierha tsiniiot tsi karonkas? raskanekskȣe nahoken.

¹⁰ Nonen sonsahonneȣe ne raotiokȣa akȣekon sahonȣarori tsi nahatiieranion, nok ne Iesos ȣasakoiatatiskȣate ihsi niiahonne Kanatakta ne Bethsaïda,

¹¹ Sahakotokense nonkȣeokon, ȣahonȣatisere; iahonȣatiiatastsenri, ȣasakerionnien ne Niio raoriȣasonha nok sasakotsientanion ne ionskanekskȣe naonsaionton.

¹² Nok nonen siiateȣastsothohsere, ȣahonniron ne tekeni iaȣenre Ratikȣekonne: Sasheiatori kehiken kentiokȣaien, tsi tkanataienton oni tsi tiakononsoton niiaonsaien eh iaonsaionnonȣete oni iataonsaionstskaon, iahse ȣahi othenon taieriȣatsenri tsinonȣe niteȣes.

¹³ Tontasakoȣennaȣeron ne Iesos, nok ȣahenron: Ise iestsinonth: tontahonniron: Serenkene ȣisk ok nitsionkȣanataraien tanon tekentsiake: tohka kati aiakȣaninonra ne kanenrakȣekon aiakhinonte.

¹⁴ Neh nahoten ne ȣisk niȣenniaȣehetserasen niionkȣetake. Ethone ȣasakaȣenhase ne raotiokȣa, ȣahenron: iestsirori, ȣiskson niionkȣetassenhatie tsi ionnitiokȣarorokhon.

¹⁵ Oksaok eh nahatiiere ȣahatinenraseronni.

¹⁶ Ethone ȣatrakȣe ne ȣisk nikanatarake oni ne tekentsiake, Karonhiake iahatkatto, ȣahaiatateriste, iasakaon ne raotiokȣa niaonsasakotiiakhonhase nonkȣeokon.

¹⁷ Akȣekon ȣationstskaon ȣahakotane oni; tanon tekeni iaȣenre niȣatherake ȣakanane ne iotatenronhokonha.

¹⁸ Nok nonen raonhaa siionsonton nahaterennaien; etho oni nehne ratiteron ne raotiokȣa, ȣasakoriȣanontonse, ȣahenron: Onka ionkonnis nonkȣeokon?

¹⁹ Tontahonniron: otiake ki ionton, San, otiake oni, Eli, sekon otiake ionton, nehne thonatierenton thotitokensehakȣe saiatat Shotonnheton.

²⁰ Ethone kati are onen tontahenron: nok nise, Onka iseȣere nII? Tier tahatati, ȣahenron: ise ne Keristos Niio Iaienha.

²¹ Ȣasakotiaȣenrastse tanon nahontrori.

²² Sekon are sahenron: Iatekakonte tsi eso enharonhiaken nonkȣe Roienha, enhonȣateȣentete ne ronaterihonton, ratitsihenstatsi okon oni ne ratiiatons; ienkaheȣe oni henhonȣariote, nok ki tanon Asen-aton nenȣata enshatatonnhete.

²³ Ok oni akȣekon thisakaȣennihakȣe: onkakiok enhienrheke rinonteratie, akȣaniare iontatateȣentet nakaonhatserakon, iontketat nakoiasa tsi ȣentatenion, nok ionkianenhaf.

²⁴ Aseken nenhienonstate tsi iakonnhe enhiahiheie; nok nenhionkateȣentetase tsi iakonnhe neh enhiakonnheke.

²⁵ Oh nahoten enrastste ne ronkȣe nonȣentsiakȣekon tahatentsa, nok ok raonha, tahatateriio ahatatatonte oni?

²⁶ Aseken onka enhionkatehase, ok ne ens nakeȣenna, enshotehase ki oni nehne nonkȣe Roienha nonen tentre rahotiiatanerakȣatserakon ne Roniha oni ne raotironhiakeronon okon.

²⁷ Oriȣiio tsi kȣaroris, tsi ratiiatare nonȣa ne kentho ne iah tahonniheie ohenton nahontkatto ne Niio raoiatanerakȣatsera.

²⁸ Satekon nonta neh sithaȣen, onontoharake ȣahaterennaienna iasakoiatenhaȣe ne Tier, Sak tanon San.

²⁹ Tsini kariȣes roterennaien eh ȣathatteni, nok ȣakenrakenne ne raotseronniat eh nahaȣenne tsiniiot tsi ioronhrote.

³⁰ Nok teniiasse ȣathatitharen neh ne Moïs tanon Eli.

³¹ Akȣa oni ihken tsi rotiiatanerakȣat, neh rotitharakȣen tsi nenhiaȣenne tsi ienrenheie Jerusalemke.

³² Kenh kaien ne Tier oni ne rontenrotiene eh nahotiiataȣen tsiniiot nakȣa ihken iakoserentaras; nok nonen sonsahatiie iah tiiaieriȣaheȣe tsini hoiatanerakȣat tsi sahonȣaken eh oni nehne niiot ne teniiasse.

³³ Akȣa onen sateshontekhasionhe, onen tahatati ne Tier, ȣahenron: Saianer! ioianere ne kentho aheteȣenterontake: Asen kati niteȣatatoseroten enskat ise saȣenk, enskat Moïs, tanon enskat Eli: iah tehottoken tsi nahoten Sahenron.

³⁴ Sekon ok nihotharatie, eh iotsikeraratie nok taiakorhoroke, onen senha ȣahotiteronne.

³⁵ Etho otsikerakon takaȣenninekenne ȣakenron; Neh kehiken ne Riienha Rinoronkȣa onȣe: Hetsiseȣaȣennarakȣak.

³⁶ Akȣa neok ȣaknȣennentane raonhaa sonton ne Iesos. Akȣekon ok ȣahatiriȣasete iah oni onka tesakotirori nethone tsiniiot tsi ronatkatton.

³⁷ Tsi ȣahorhenne onen satontahonontastsnentonhatie iotiokȣatsanit ȣathonȣaterate.

³⁸ Saiatat tsi ni kentiokȣa tontahohenrete, ȣahenron: Seȣenniio! ȣakonneken hatsitenre ne Riienha neok oni enskat Ȣakeȣiraien.

³⁹ Nok otkon rohienas, ok ens tontaiaȣentsi ȣathohenrete; ehtake henhoiatisereson, entkaȣaststotonnion rasakon. Akȣa ens serenkeneha tenshonikonrote nonen enhaiatentane.

⁴⁰ Khenekenni ne sentiokȣa naonȣatsiente iah ki tehotikȣenion.

⁴¹ Tontahenron ne Iesos: kanoron ki oni ne iakotennoȣentastskon oni niakaȣeriasaksen! Toh nekenh akȣa nenȣe enteȣakȣekonhatieseke ok oni tenȣakeron iaȣeronhatien: karo nontastsiatenhaf ne hetsienha.

⁴² Akȣa neok iahatenti, ok naha notkon ȣahoiena neh oni ihken ne iatiotiete; nok tanon ne Iesos ȣahatteten notkon, nok sahotsiente sahoȣiron oni ne roniha.

⁴³ Akȣekon ok ȣahakohnerako tsini kasastenseriio ne Niio raosaststensera. Nok tsi akȣekon ok iakoriȣanerakȣaskȣe tsini haierhakȣe ne Iesos, ȣasakaȣenhase ne raotiokȣa ȣahenron:

⁴⁴ Seȣataonsatat tanon kehiken nikaȣennotens: Aseken ienȣatenniseriheȣe nenhonȣaiena nonkȣe Roienha oni enhonȣatsiakȣarisi rahotisnonke ne ronnonkȣe.

⁴⁵ Iah tehotinikonraientaon nahoten akȣa kenton neh nikaȣennoten, nok tehotinonhianikskȣe ne tahontahonȣariȣanontonse.

⁴⁶ Onen nonȣa neh ȣahatitharakȣe oni ȣaonskennha onka senha akaiatanoronke.

⁴⁷ Nok tanon ne Iesos sakohnikonraienteritsion tsinithonnontonnions ne raoneriane, iahoiatatihentho raksaha nok raiatakta ȣathotaste.

⁴⁸ Ethone tasakaȣenhase: Onkakiok tenhonȣarhoton kehiken raksaha, iiki tenhakarhoton; nok oni onka tenhionkarhoton tenhonȣarhoton ki ne takatennieton; aseken neh nakȣa kenh nitraha tsinitsion, neh enkaiatanoronke.

⁴⁹ San tahatati, ȣahenron: Saianer iakhiken nise sasennakon skonȣanatekȣata nonatkonseraksen; iakhinnhese kati, netsi iah teteȣes.

⁵⁰ Tontahenron ne Iesos; tosa iestsinnhes: Aseken ne iah toionkhiriȣasȣase, ionkhiriȣaȣase ki.

⁵¹ Nok nonen thoha siiakaheȣe naonsahatenti tsi ionȣentsiate, akȣa tahaterientasa ne Jerusalem niiahre.

⁵² Ohenton iasakotori ȣahatiriȣaienna oni niahatinonsaseronni; ȣahontenti nok Samaritan thotinatakȣenrare eh iahontaȣeiate.

⁵³ Iah tanon thatethonȣarhoton netsi Jerusalem niiahaȣenonhatiene.

⁵⁴ Sahontkatto ne raotiokȣa, Sak tanon San ȣaniron: Saianer! Asathontate kenh neh naiakȣaiere tsini hoieren ne Eli, karonhiake naontontsirine nok aiakoȣentho?

⁵⁵ Tontahatkarhateni ne Iesos nok ȣasakotteten, ȣahenron: iah ki oni tateseȣaiatoreta tsiniiot tsi ieseȣaȣenninekens.

⁵⁶ Aseken iah neh tehaniente nonkȣe Roienha nahario nonkȣe akotonnhests, neh tanon nahaiatakennha. Akte kati niionsahonne.

⁵⁷ Nok tsi ronatentionhatie saiatat eh ȣahoketote, nok Sahenron: Seȣenniio! enkonnonteratieseke tsi ok oni nonȣe niienhense.

⁵⁸ Tontahoȣennaȣeron, ȣahenron: Ionatsonhionton naha ne tsistso, nok kontsinakonni notsitenhokonha; nok nonkȣe Roienha, akȣekon nehne iah tehoien nahoten ahatkonserakȣe.

⁵⁹ Nok tihaiatate, ȣahaȣenhase: Taknonteratie. Nok ne kenh kaien tahenron: Takenaktothas ki niare ahiiatatahannha ne rakenikenha.

⁶⁰ Tontahenron ne Iesos: eh kaientak naȣenheionta neh iontatiatata nakaȣenheionta, nok ki nise ȣas serioȣanatana ne Niio raonakerasera.

⁶¹ Sekon are tihaiatate ȣahenron: Seȣenniio! enkonnonteratieseke; askenaktothase ki niare akeriȣaseronni tsi nahoten ȣakien.

⁶² Nok tanon ne Iesos tontahenron: Tsini iakon nonaken iatetsiekanere nonen iakotarakarhathonhatie, iah teiakotateȣeiennentaon tsi nonkati ne Niio raonakerasera.