Luke 7 - Ohiatonhseratokénti

Tsiatakaton teioteriȣasonterakȣen nʼOriȣatokenti tsini hoiaton Roiatatokenti Luc.

¹ NONEN saharihokten ne Iesos tsi sakotatihakȣe nonkȣeokon, Kapernaiimke iahataȣeiate.

² Ethononȣe saiatat onen shirenheions nehne rasennoȣanen raonnhatsera eso oni tsi ronoronkȣakȣe.

³ Nok sahosennaronke! Iesos ne rasennoȣanen, iasakotori ne ronaterionte, ahonȣanekennira ahathontatseke aontare nok ahonsahotsiente ne raonnhatsera nakȣa ronoronkȣa.

⁴ Iahonneȣe nehne tsi itres ne Iesos, ȣahonȣennitentase, ronton oriȣiio tsi tehotentson nahonȣaȣennarakȣe tsiniiot tsi rariȣanontons.

⁵ Aseken rontonhakȣe sakohnoronkȣa nontionkȣeta, sonkȣanonsisahani oni tsi ionterennaientakȣa.

⁶ Oksaok kati ionsahonnete ne Iesos: Onen iah ihnon tehken sishonne tsinonȣe nihononsote iasakotori ne rontenroson, ȣathonȣateratana nok ahonniron: Saianer! tosa ihsinonȣe natesatatȣishenheiat: aseken iah teȣakerionte nasataȣeiate nakenonskon.

⁷ Neh seȣaonni iah teȣakeron ȣakerionte onteken nii akonhiatisakha; enskat ok tanon aontasatati nok enshaieȣentane nakennhatsera.

⁸ Aseken nii neok ne konkȣe, ȣakaterionte, ȣakonkȣetaien ne ronteriios; saiatat ens ȣahinnhane enkiron ȣas, ehse ȣare; tihaiatate: kasts, tare se; nok nakennhatsera; kenh natsier, ehse nenhaiere.

⁹ Ȣahonerako ne Iesos tsinikaȣennoten ȣaharonke; nok ȣathatkarhateni kanenrakon nahatierate, nok ȣahenron: Oriȣiio tsi kȣarori, tsi iah kaneka teȣakatkatton neh naontaiakaȣetakon nʼIsraerrononke tsiniiot ne kenh kaien.

¹⁰ Nonen sonsahonneȣe ne iehonȣanatorionne, shoieȣentaonkoȣa ne rannhatsera rononȣaktanihakȣe.

¹¹ Nok tsi ȣahorhenne Iesos iaharaȣe tsi tkanataien Naim Konȣaiasts; kentiokoȣanen nonkȣesonha, otiake oni ne raotiokȣa ronȣanonteratie.

¹² Onen thoha shiiahanatarane, eh ȣathonterane ratirontotserenhaȣi ȣahonȣaiatatahannhe, iotereons neok oni enskat ioȣiraientakȣe ne kenh ranekenteronkenha, Kentiokoȣanen kati netho ienakere konȣariskontonhatie.

¹³ Ȣahonikonranonȣake ne Roianer tsiniiot tsi ȣahatkatto, ȣarenhase: tosa tesasentho.

¹⁴ Nok akta niiahare kenh oni niiahaiere tsi karontotseraratie; nok ȣathatitane neratirontotserenhaȣi, nok ȣahenron: Senekenteron II ȣakonrori, Satkestsko.

¹⁵ Tahatkestsko nok ȣahatien rahorontotserakon, sahatati oni, nok ne Iesos sahaȣiron ne ronistenha.

¹⁶ Akȣekon ok taiontonneke nok tehonȣanonȣeronnionskȣe ne Niio; iontonhakȣe: oriȣiio tsi raiatanoronkoȣa nahoketote nonkȣentiokȣakon; nok ȣasakotenre ne Niio ne raotiokȣa.

¹⁷ Kanakeraserakȣekon ne, Jude oni naktatiesonha ienakerenion akȣekon ȣaheriȣaronkanion tsinahaȣenne ne ioriȣanerakȣat.

¹⁸ San oriȣakȣekon sahonȣarori ne raotiokȣa neh nikarihotens.

¹⁹ Nok ne San teniiase ȣasakoiatarako tsini hotiokȣa: nok iasakotori tsi itres ne Iesos, nahonȣariȣanontonse, ahniron: ise ken ne tare, katen sekon oia enshakȣarhareke?

²⁰ Iahaneȣe tsi itres ne Iesos, ȣaniron: San sontiatorihatie tsi ȣakeniiatorenne, nakeniriȣanontonse: ise ken ne tare katen sekon oia ensessakȣarhareke?

²¹ Akȣa are taiotokentane ethononȣe kentiokoȣanen sasakotsentanion niatekannrake iakohnonȣaktanitha, sasakoiatinekenȣe Onatkonseraksen, nok otiake tonsasakokakȣarisi ne teieronȣekonne.

²² Ethone ne Iesos tontasakoȣennaȣeron, ȣahenron: ȣasene satsiseniroriana ne San tsinahoten ȣetsiatkatto tsi oni nahoten ȣetsiaronke: tsiekens ne teieronȣekonne, tsiontenties ne iah tehienskȣe, tsieieȣentas ne iakoststaȣis, tsionronkas ne teionhontakȣekon tsiontonnhests ne iakaȣenheion, nok Kariȣiio iontataronkatennis ne iakotent.

²³ Nok iakotaskat nonka iah tonhiakotateriȣaientatenni nii akeriȣake.

²⁴ Nok nonen Sonsaiatonti ne San Sakonnhaonhatiene, ethone ne Iesos ȣasakoriȣanontonse nonkȣeokon ne San raiatatake, ȣahenron: oh nahoten seȣatkenseronnonne ne Karhakon? neh kenh tsi teȣatkȣirakarenrons tsi iahote?

²⁵ Oh kati nekenh nahoten seȣatkenseronnonne? Neh kenh ne rokȣenniatsanit? Rotinontiiosson ȣahi rahotinonskon ieteron neh niiot tsi iontseronnis oni natonȣesentserakon iakonnhetie.

²⁶ Oh kati nekenh nahoten? Rotokense kenh? Nehe, oriȣiio oni tsi Kȣarori tsi senha isihnonȣe tsinihaiatanoron tsiniiot ne Rotokense.

²⁷ Nese ȣahi roton tsi ȣaton tsi kaiaton: iahiiatori ne rakeȣennenhaȣe neh enhiahentete nok enhiahahaseronnien.

²⁸ Aseken ȣakȣarori tsiniiakon ne tsionathonȣisen iakohnateȣeton iah tehaiatare enskat nahotokenseheke ne senha ahaiatanoronke tsiniiot ne San; Nok sane nʼakȣa kenh nitraha ne Rakeniha raonakeraserakon rotoheststenni ne San.

²⁹ Tsiniiakon nonkȣesonha oni ne ratikarotasions, ne San Sakonekȣaheston ȣathontenonȣeraton tsinonkati ne Niio, neh tsi ȣahonronke neh nikaȣennoten.

³⁰ Kenh kaien ne Pharisian oni ne ratiianerenseronni sahontatkȣase ne Niio raotanitenrat ne tsi iah tehonathontaton raonha asakonekȣaheston.

³¹ Ethone ne Roianer Sahenron: Onka onte taonhsakheierontaren ne kenh kaȣatsirate? oh oni nahoten tetsiontieren?

³² Akȣa neh sesakotiieren ratiksaokonha tsi iontkerontakȣa ratistskȣaronnion, nok tehotihenretha tehontatennis oni: Ionkȣahonraȣaton nok iah tateseȣanonniakȣen; Ioterennaststarat ȣakȣaterennothase nok iah tateseȣasenthon.

³³ Aseken ne San, iah tatehostskaonties ne kanatarok, iah oni tohonekirenhaties notsitsia; nok seȣaton: Ronessonronontseraien.

³⁴ Onkȣe Roienha ȣaraȣe, tehostskaonties ronekirenhaties: nok seȣaton: Neh kehiken ne sakhoȣane oni tsionekakaȣe, ratikarotasions oni onkȣetaksenokonha rontenro.

³⁵ Nok tanon nattokhatsera ȣene iotonhon tsinonkati ne Sakoienhokonha.

³⁶ Saiatat ne Pharisian ȣahohonkaron tahastskahonna rahononskon, eh kati Sarete nok iahataȣeiate tsi rononsote ne Pharisian nok atekkȣaratserakta ȣahanistskȣaren.

³⁷ Eh oni nonȣe kanatakon kanakerekȣe Skaiatat tsiothonȣisen nehne iah tetionkȣetaieri, akȣa neok ȣakariȣaronke tsi neh netho Pharisian raononskon iatehostskaon ne Iesos, eh ȣahete katsetenhaȣi kananonhatie ne ȣenhieniio oni ȣenhienakon.

³⁸ Teȣasenthosere, rashonne tontontonstsoten, nok neh naokaseri ȣahositoharete tanon aononkȣis tetkarakeȣatha, nok neʼsʼ enʼsʼ tontahahokaȣe ne ȣenhieniio.

³⁹ Sahatkato ne Pharisian rotenniote, ȣahenron ne raȣerientakon: toka nonȣa ahotokenseheke kehiken oriȣiio ki tsi ahoterientarake, oh niionkȣetoten nekenh tsiothonȣisen roiatoseronkȣas; nese ȣahi nononȣa ne iah teionttokha.

⁴⁰ Nok ne Iesos tahatati ȣahenron: Simon, ȣakeriȣaien othenonsonha akonriȣanontonse. Nok tahenron: Saianer! Satati.

⁴¹ Saiatat ne ratenninonskoȣa, teniiasse sakokarotani; Saiatat ȣisk teȣenniaȣe nikakȣenistake nok ne saiatat ȣisk neh ne niȣasen.

⁴² Nok tanon tenitsiaron iah othenon tehotiien nanikariakte, tetsiaron kati ȣasakaon. Satrori kati onen kah onte nikaien ne teniiase Senha enhonoronkȣe?

⁴³ Simon tahatati, nok ȣahenron: Neh ki ne eso roȣi. Tontahenron ne Iesos: Akȣa tasierite tsi ȣatesiatorete.

⁴⁴ Ethone onen tonsahatkarhateni tsinonkati ken teron ne tsiothonȣisen, nok ȣahaȣenhase ne Simon: Iskens ȣahi kehiken tsiothonȣisen? Sanonskon ȣakataȣeiaton nok iah tesknekarani naonkarasitohareton; nok tanon naonha aokaseri ȣakasitanaȣentakȣa nok aononkȣis skarakeȣatha.

⁴⁵ Iah tateskenoronkȣanion; nok naonha tsinahe teȣakataȣeiaton iah teȣatorissens tekanoronkȣaniontons ne kasitake.

⁴⁶ Iah teskoka naȣenhieniiohake; nok naonha neh nakȣa ȣenhienakon ȣakasitokasta.

⁴⁷ Neh ȣaonni ȣakonrori, tsi akȣekon sonterakeȣe saeto sane eso ioriȣaneren: Aseken eso ki tsi ȣakanonȣene: aseken ne kenhniioriȣaha ronȣentenron kenh ki niioriȣaha tsi ensakononȣene.

⁴⁸ Ethone ȣarenhase ne tsiothonȣisen: Sonterakeȣe ne sariȣaneraaksera.

⁴⁹ Nok tsinihati ne tohontonsts, ȣahonniron ne raoneriane: Oh nehne nakaiatoten onka oni kehiken sarakeȣas ne kariȣaneren.

⁵⁰ Sekon sarenhase: neh tsi tisetakȣen neh ȣesaiatakennha; ȣas kati nok skennen tsi sasatenti.