Luke 2 - Ohiatonhseratokénti

Tekeni-aton Teioteriȣasonterakȣen Noriȣatokenti tsini hoiaton Roiatatokenti. Luc.

¹ EH NONȢE siȣenniseratenion ȣaharihoȣanate n Cesar-August nʼakȣekon nonkȣeokon aiontatsennaren.

² Nok nonen siiakaheȣe neh naiaȣenne, Cyrenius rakora kenhne ne Syri nonȣe.

³ Akȣekon kati tsiontatsennaraneskȣe tsinonȣe Tiakotonnishen.

⁴ Tahatenti kati oni neneh ne Sose tsi tkanataien ne Nazareth Galilene, tsi tkanataien ne Bethlehem niiahare, neh tsi ethononȣe thonatonnisentakȣe ne Taȣit raȣatsiratatie.

⁵ Nenskatne aonȣatisennaren nʼOnȣari, neseken kariȣisonhonne enhotiniake, onen oni oia nikaiatoten.

⁶ Tsinikariȣes etho ienes onen iakaheȣe naioȣiraientane.

⁷ ȣarennakerate ne roienha neh oni ne takoȣanen, oniataraasonha ȣattoȣaȣenhekte nok tsi kontekȣaientakȣa ne katsenen ȣahoiationnite, aseken iah tehotinaktatsenrion tsi iosȣenkarentonnion.

⁸ Iah ihnon tehken eh nonȣe, katsenen sakohnaststerista astste ronnonȣestskȣe nok asontakȣekon sakotinonnaties ne raotitsenenhokon.

⁹ Ok taontierentsi kenh ȣahoketote Raronhiakeronon, akȣa oni ȣathotiȣannhake ne Niio raosȣathetsera, nok ȣathonatonharenron.

¹⁰ Nok tanon ne Raronhiakeronon, ȣasakaȣenhase: Tosa seȣateronn: Aseken nonȣa neh kȣaroriane ne koȣanen aeseȣatonnharen, ok neh sakat tsinonkati nonkȣetakȣekon.

¹¹ Ne tsi onȣa konh ȣenniserate, Taȣit raonatakon etsiseȣennakerati ne Sesakoskontakohe ne oni ne Keristos, Roianer.

¹² Nok kenh kaien ȣatenientenstakȣen, neh oni entsiseȣaienterestakȣe꞉ nonen entsiseȣaiatatsenri neraksaa oniataraasonha tehaȣaȣenhekston, nok Katsenen tsi kontekkȣatahasta raiationni.

¹³ Nok ok eh iakaniionten rotitiokȣatsanit ratironhiakeronon Karonhiake tahatiientakȣe tehonȣanonȣeronnions ne Niio, ronton:

¹⁴ Ahonȣasennaien ne Niio Karonhiake! Skennen Kenhak nonȣentsiake! niakonikonriio nonkȣe.

¹⁵ Nok nonen Karonhiake siionsahonne ne Ratironhiakeronon, ȣahonniron ne katsenen sakonasterista: Enhnioh Bethlehem niiore niieheteȣe, teȣatkensera tsini tiaȣenhon tsioni nahoten ȣasonkȣatokaten ne Raȣenniio.

¹⁶ Kasterihenke kati eh ȣahonnete, nok iasakotiiatatsenri nʼOnȣari tanon ne Sose nok oni ne raksaa tsi kontekkȣatahasta raiationni.

¹⁷ Nok nonen Sahonȣaken, neh sahatitharakȣe tsiniiot tsi tonȣatirori ne raksaa raiatatake.

¹⁸ Tsiniiakon ȣahonronke, ȣahakonerakȣenhaton tsi nahoten ronton nekatsenen sakonaststerista.

¹⁹ Nok nʼOnȣari akȣa neneh neok ne ioteȣeientontie aonikonrakon oni seȣatateiarakȣennihakȣe.

²⁰ Nok sahontenti ne katsenen sakonaststerista, ronȣanentons oni tehonȣanonȣeronnionne ne Niio: tsi eh nahaȣenne tsi ȣahonronke tsi oni ȣaontkatto tsiniiot tsi ronȣatirori.

²¹ Nok nonen siiakaheȣe ne satekon nonta, onen senhonȣaȣarakȣetare ne raksaa, ethone Iesos ȣahonȣanatonkȣe, neneh Raronhiakeronon thosennaȣi areko sihaiatat ronistenha kaiatakon.

²² Nok nonen siiakaheȣe naonsontaȣeiate nʼOnonsatokentike nʼOnȣari nakanane tsini hoianerenserison ne Moïs, Jerusalem niiahonȣaiatenhaȣe rahohenton ne Roianer,

²³ Tsini kaianerenseroten ne Roianer raoianerensera: nenteȣatierente roskenrakete eniakoȣiraientane Akȣa Raȣenniio enhoȣenniioste.

²⁴ Neh ens oni nahenane tsini kaiatonkȣe ne Roianer raoianerenserakon; ȣakonȣanatkaȣe ens tsioianat Orite, ok ne ens neh noȣira.

²⁵ Saiatat ne ronkȣe Jerusalem ranakerekȣe, Simeon ronȣaiastskȣe, neh kehiken nethoriȣaieri oni rosennaiens ne Niio; rorharekȣe oni neneh nahoken nʼakonikonriiotsera nʼIsraerroronon; akȣa oni nikȣekonhatiene ne Ronikonratokenti.

²⁶ Nok rotokatennihne ne Rotkon Roiatatokenti, tsi iah tarenheie ohenton nahoken ne Keristos, Roianer.

²⁷ Akȣa kati taiotokentane onen are Ononsatokentike ȣarete, onen etho ronȣaiatenhaȣi ne Raksaa Iesos nanihnane tsini kaianerenseroten ne raonha raiatatake.

²⁸ Ȣahokitarro, ȣathononȣeronnion ne Niio, nok ȣahenron:

²⁹ Onen nonȣa Seȣenniio! Skennen tenkiheie tsiniskerharaststenni.

³⁰ Aseken ontkatto ne kkarake ne Etsienha sesetenratane.

³¹ Neh oni enskat ne Sakȣatakȣen akohenton akotiokȣakȣekon nonkȣeokon.

³² Ne taiakosȣathetakȣe nonkȣeokon, nok Akonentonsera akenhake ne sentiokȣa Israerronon.

³³ Nok ne Sose oni ne ronistenha rotinerakohon tsiniiontonhakȣe ne raksaa raiatatake.

³⁴ Nok ne Simeon ȣasakoiatateriste, nok ȣarenhase nʼOnȣari, ronistenha: Kehiken raksaa, kentiokoȣanen nenhiontkaronniate, kentiokoȣanen oni nenhiontsennonniate nʼIsraerronon, nok oni tenhiontennikonratihatanionkȣe nonkȣeokon.

³⁵ Nok ienkaheȣe neh nenhiaȣenne tsiniiot nʼassarekoȣa taeseriasaȣeheste, nonen enhiontennikonrotasionko ne ionkȣetaksens.

³⁶ Anen oni iotokense etho kanakerekȣe, Phanuel sakoienha, Aser raȣatsiratatie, onen siiokstenha, tsiatak niioserake teniiasene ne ioniakonhonne,

³⁷ Onen neh nahoten satekon niioserasen nok kaieri tsinahe siiotereons; Ononsatokentike titkanakerekȣe, aȣentakon aterennaientatserakon oni tsi rosennaiens ne Niio.

³⁸ Eh oni noneh onȣe, ȣathononȣeronnion oni neneh ne Raȣenniio, nok ȣahakororianion ne raonha rahoriȣake tsiniiakon ne iakorharekȣe aonsaiontnerensi ne Jerusalem ronon.

³⁹ Nok nonen saniriȣaierite tsini hoianerenseroten ne Roianer, Galilene niionsane tsi thonatenataien, ne Nazareth.

⁴⁰ Nok ne raksaa roteiarontie, ronikonroȣannhaonhatie oni, raiati nattokhatsera; nikȣekonhatie oni ne Niio raotanitenron.

⁴¹ Niateioserake, tsini Shatonnhethe, Jerusalem iesnethakȣe ne ronȣaienha.

⁴² Nok onen tekeni iaȣenre satehaoseriiakon, onen are ne roniha oni ne ronistenha Jerusalem ȣanete tsini hotirennhaonne nonen ȣentanoronsere.

⁴³ Nok nonen sahententane, saiatenti, ok eh iehenteron ne Iesos Jerusalemke, iah othenon tehonattoken ne ronȣaienha.

⁴⁴ Ȣanere nenehe ethokinaha ȣahaiataratie tsi saiotonkȣetakatatie; seȣennisera niiore niiahane ronȣaiatisakonhatie tsinon nisakotinonkȣe oni ne tehontatienteris.

⁴⁵ Nok iah kaneka tehonȣaiatatsenrion, saiakehte kati Jerusalem niionsane sahonȣaiatisakha.

⁴⁶ Asen nonta onakenke niionsahonȣaiatatsenri ononsatokentike, rahotinenrihen ne ratiianerenseronni sakotaonsate nok tetessakoriȣanontonnis.

⁴⁷ Nok tsini iakon niakothontekȣe, iakonerakȣaskȣe tsini hattokha, oni tsi tetessakoȣennaȣerons.

⁴⁸ Nok ȣahotinerako nonen sonsaonȣakon, nok ne ronistenha ȣakenron; oh niiotieren kien tsi eh nasiere? Kenh nii ionkeninikonraksenseres keniiatisakonhaties.

⁴⁹ Tontasakoȣennaȣeron, ȣahenron: oh nehne nahoten takeniiatisakta? iah kenh nah tetsiaterientare tsi teiotonȣentsiohon nakaststeriste ne Rakeniha rahoriȣasonha?

⁵⁰ Nok ki iah tehotinikonraientaon tsinahoten ȣahenton tsiniiot tsi tahatati.

⁵¹ Onen kati sahonne, Nazareth ionsahonneȣe; Sakoȣennarakȣakȣe. Kenh kaien ne ronistenha akȣekon taioteȣeientontie aȣerientakon tsinikon tsi oni nikaȣennotens ȣaronkas.

⁵² Nok ne Iesos attokhatserakon tsi roteiarontie, nok ateriȣakȣarisiontserakon rahohenton ne Niio oni nonkȣeokon.