Luke 19 - Ohiatonhseratokénti

Tioton-aton iaȣenre teioteriȣasonterakȣen Oriȣatokenti tsini hoiaton Roiatatokenti Luc.

¹ KANATAKONSON niiahare ne Iesos siiahatenatorenne ne Jeriko.

² Saiatat ne rakarotasions eh nonȣe nihanakerekȣe Zaché ronȣaiastskȣe eso tsi rokȣastsene.

³ Raskanekskȣe ahoken ahoienterhane oni ne Iesos, nok iah teȣatonskȣe sotsi kentiokoȣanen tanon neraonha sotsi nihanenhiesha.

⁴ Nehkati ȣaonni ohenton niiahatakhe, tiohiontaststokote eh iaharathen nok ȣahatnenhioharakȣe, aontonseke ahoken nonen eh nonȣe nenhre.

⁵ Nok nonen eh nonȣe Sharaȣe ne Iesos, ȣahatarakestsko nok Sahoken, ȣahaȣenhase: Zaché iosnorenn tasastsnent aseken sanonskon nonȣa enkataȣeiate.

⁶ Ȣathosterihen oni rotsennonnihatie tsi tontahastsnente neh tsi ȣahotaȣeiaten.

⁷ Akȣekon ok oia nontakotierase nok iontonnionskȣe; tsi nonȣe iah tetionkȣetaieri nahataȣeiate.

⁸ Nok ne Zaché eh ȣathatane rahohenton ne Roianer ȣahenron: Saianer asennon nenkheion tsiniȣakien ne iakotent: nok kaneka nakhekaronnihke kaieri natentiaseren tsi enskien.

⁹ Ȣahenron ne Iesos: Onȣa kenhȣenniserate ontaȣeiate nʼatanitenresera ne kentho nonȣe nikanonsote, aseken kehiken Abraham oni nehne roienha ȣahaton.

¹⁰ Aseken nonkȣe Roienha neh sresakhe oni raskennhasere tsinahoten iohtonhon.

¹¹ Tsinikariȣes iakotaonsatekȣe neh nikarihoten, Iesos iahatasonteron nok iathariȣakentonȣe, netsi onen akta ihre ne Jerusalem oni tsi roterientare tsi onen thoha ȣene aonton ne Niio raoiatanerakȣatsera.

¹² Ȣahenron kati: Saiatat ne ronkȣe neh ne raȣatsiranoron ratentionhe ihnon ȣare ȣahatkorastane, nok ki oksaok tentre.

¹³ Iasakohnonke kati oieri nihati neraonnhatsera, oieri nikaȣistake tasakahon, nok ȣahenron: Seȣeiaron kehiken tsiniiore tentke.

¹⁴ Kenh kaien ne thatinakere ronȣasȣanskȣe, nese ȣaonni iaonȣateriȣanietase ronȣarorihatie, rontonne: iah tateionkȣatonȣentsioni ne raonha kehiken asonkȣaststeriste.

¹⁵ Ne kati nonen sonsaraȣe, onen oni siiehotiatakȣeniioston ne tkanakeraseraien, ȣahatennhane ionsa honȣatinonke ne kannhatsera ne sakotakȣenniaienni ne raoȣista, ahotokens toh nikonhatie tehonatenstson tsi rotikarhateniaton,

¹⁶ Ne rahente eh ȣathatane nok ȣahenron: Saianer! Oieri niieiotihenthon ne saȣista.

¹⁷ Tontahenron: etho, ioianere tsi sennhastseriio; nekati tsi sariȣatoken tsi nonȣe kenh niioriȣaha, Oieri nikanatake ȣakonhiatakȣeniioste.

¹⁸ Thihaiatate ihsre, ȣahenron: Saianer I ȣisk niieiotihenthon ne saȣista.

¹⁹ Ȣahaȣenhase oni nehne: ȣisk ki nikanatake enhsiatakȣeniioke.

²⁰ Onen ne saiatat ihsre, ȣahenron nehne: Saianer, kenh sekhaȣi ne saȣista kanokȣakȣenonni.

²¹ Aseken kontsanikon, ȣakaterientare tsini seniakastste; tesekȣa tsinahoten ne iah tesatakȣenniaien, nok tsienthokȣas tsinonȣe nʼiah tesaienthon.

²² Nok tontahaȣenhase: Sennhatseraksenskȣa! Saȣenna tenkonhiatoreiakȣe; Saterientare tsi keniakastste, tekehkȣa tsinonȣe niah othenon teȣakatakȣenniaien, kienthokȣas tsinonȣe iah teȣakienthon.

²³ Nahoten kati ahoriȣa tsi iah ne bankne tiiesaionton nakȣista, tsi naonsonka iaonsonkkȣen nok oni tsinikon aioteiaronke.

²⁴ Onen kati ȣasakonnhane neh ratiteron ȣahenron: Satsiseȣakkȣa noȣista nok neh ionsatsitsion noieri nihoien.

²⁵ Nok taonniron: Saianer! Onen oieri nihoȣistaien.

²⁶ Eh kati niiot ȣakȣarori: tsi nenhiakoientake ne skastson sekon entsiontaton nok niah othenon tehoien sekon oni nehne enhotiȣakkȣa tsinikonha enhoientake.

²⁷ Nok kenh kaien ne ionksȣens oni iah tehonathontaton akheiaststeriston karo nontaietsiiatenhaf nok akkenton ietsiiaȣentho.

²⁸ Nonen saharihokten, onen are tonsahathahakȣe tiotkon tsi Jerusalem niiahaȣenonhatie.

²⁹ Nok nonen akta shire ne Bethphagé oni ne Betani, onontakta ne Olivier, teniiase ne raotiokȣa iasakotori.

³⁰ Ȣahenron: eh iahasene kehiken tkanataien; nok nonen ientsiataȣeiate kanatakon enseniken kenseri ȣassaronte neh nʼareko nonȣenton teiakosatenston; Seninerensi nok taseniiatenhaf.

³¹ Nok tokat onka kiok enhietsiriȣanontonse ohnontieren tsi ȣeseninerensi: Enseniron: Roianer ki tehotonȣentsioni.

³² Oksaok ȣaiatenti, nok akȣekon eh niiot tsi ȣaiatkatho tsiniiot tsi tesakorori.

³³ Akȣa kati onen ninerensions, ȣahonniron neraotitsenen: oh nontieren tsi ȣeseninerensi?

³⁴ Tontaniron: Roianer ki tehotonȣentsioni.

³⁵ Ȣakonhȣaiatheȣe kati tsi renteron ne Iesos, nok raonatseronniat ȣakonȣarase eh tahonȣenstskȣaren ne Iesos.

³⁶ Nok ok eh nihotistskarontie tsini hose.

³⁷ Nok nonen saonneȣe tsi ionontenton nʼolivier, kentiokȣakȣekon ne raotiokȣa ȣahontonnharonnion, ȣathotihenrete tsi ȣathonȣanonȣeronnion ne Niio tsinikon ronatkathon ne ioriȣanerakȣatenion.

³⁸ Rontonnionne: Tahonȣanonȣeraton ne Ronontiio tare Raosennakon ne Raȣenniio! Skennen kenhak karonhiakon, nok ahonȣanenton Ehnekentsi!

³⁹ Otiake neh ratiiataratie ne Pharisian ȣahonniron: Saianer! Sheiarist ne sentiokȣa.

⁴⁰ Iesos tontahenron: ahontkaȣe ne rononha, Onenhiaki tenhiotihenrete.

⁴¹ Nok onen akta shire, ȣahatkatho tsi kanataien, akȣa ȣathasentho, ȣahenron:

⁴² Aiaȣens kenhas oni nise, arahona oni onȣa kenh ȣenniserate aesariȣaientereon, tsini karihotens tsi oni nonȣe aontakaientakȣe asetsenri ne skennen! Iah ki oh taonsaiaȣenne onense tesateronȣekon.

⁴³ Aseken ienȣatenniseriheȣe ne tenhiesanatannhake ne iesasȣens, oni enhiesannhotonnion.

⁴⁴ Nok enhiesanatarisi, ensakohnaȣentho seienhokonha niseke ienakere; Nok iah oni tahonenre nenskat oni takanenhiaserake, ne tsi iah tesenniseraientereon tsi iataȣeiatennine ne Niio.

⁴⁵ Nok Ononsatokentikoȣane iahataȣeiate, ok saok tahatasaȣen tontasakoiatinekenȣe neiontenninonskȣe oni ne iehninonskȣe.

⁴⁶ Ȣasakaȣenhase: Kaiaton tsi ionterennaientakȣa nakenonsa; nok nise ienenskȣatha seȣatatenonsonniatenni.

⁴⁷ Nok niateȣenniserake etho sakorionniennihakȣe; nok ne ratitsihenstatsiokon, ratiiatons, oni ne ronaterionton ratiriȣisakskȣe oh nahatiiere nahonȣario.

⁴⁸ Iah tanon othenon tehatiriȣastsenrieskȣe nahostonte; aseken akȣekon ok nonkȣeokon ronȣaȣennanoronkȣakȣe.