Luke 18 - Ohiatonhseratokénti

Satekon-aton iaȣenre teioteriȣasonterakȣen Oriȣatokenti tsini hoiaton Roiatatokenti Luc.

¹ Sekon, are oia tonsasakoriȣakentonkȣen, ȣasakonatonnihtakȣe tsi teiotonȣentsiohon ne tiotkon aiakoterennaientake, tosa taieȣishenheie;

² Ȣahenron: Saiatat naha ne tehaiatoretha nehne iah othenon tehostsanis ne Niio iah oni onka tesakokonniensta nonkȣesonha.

³ Ok neh sakanata, enskat ne ioterehons kanakerekȣe, niateȣenniserake ronenrotanireskȣe nahariȣakȣarisiase tsi teioriȣarheon.

⁴ Kariȣes tsinahe iah othenon oriȣa teronnis: khare kati onen ȣahanontonnion nok ȣahenron ne raȣerientakon: saeto sane nehne tsi iah tehitsanis ne Niio iah oni othenon tekhekonniensta nonkȣeokon:

⁵ Kenh ki kaien kehiken iotereons teȣakenikonrharanis, onen ki nah enkeriȣakȣarisien, kati oni ken onhiorane tiotkon onȣe tenȣakaterientakariaton.

⁶ Ȣahenron kati ne Roianer: akȣa otokenhon seȣataonsatat: tsini haton ne tehaiatoretatseraksenskȣa.

⁷ Nok ne Niio, iah onteken tataontasakonnhe ne sakoiatarakȣen tiotkon onȣe iatehotihenretha raonhake, ethoneh ne sane roniskohe nahatreȣate ne rononha raotiriȣake.

⁸ Ȣakȣarori, iah tehoniskohe tsi tentesakonnhe. Kenh oni kaien, nonen tentre nʼOnkȣe Roienha iseȣere ken enhatsenri ne teȣetakon tsi ionȣentsiate?

⁹ Kenh oni nontahaierate tsi ȣathariȣakentonȣe, neh notiake tsi akaonhaa ki ok iakoianere nok iah othenon notiake.

¹⁰ Teniiase ȣahenron ȣahiaterennaienna Ononsatokentike, saiatat Pharisian, nok nesaiatat rakarotasions nehne.

¹¹ Ihrate ne Pharisian nok raton tsi roterennaien: O Niio! tekonnonȣeratons tsi iah eh tekiatoten nii tsiniiot notiake nonkȣesonha, ratinenskȣas, iah tethotiriȣaieri, ratinakȣaiesen, tsi oni niiot ne kenh rakarotasions.

¹² Tekeni teȣakontontietha tsioiaiaksera, nok akȣekon kkariaks noierihaton tsini ȣakien.

¹³ Nok ne rakarotasions otasetonke tontahatonstsoten akȣekon iah teȣatarakestskȣenhatie, nok raton tsi roterennaien: O Niio! Takitenr ȣakeriȣaneren.

¹⁴ Oriȣiio tsi kȣarori: neh kehiken shotiatokeȣenhatie tsi shotentionhatie nok iah ne saiatat: aseken onka iontatharatasts ehtake niienhentsion; nok onka ehtake iontatonni enhiontharatate.

¹⁵ Otiake oni eh iesakotiiatatastskȣe eksaokonha neok oni ne iasakoiatosere; ȣahotisȣaten ne raotiokȣa tsi ȣaontkatho, nok ȣasakotinnhese neh niiesakotiiatenhaskȣe.

¹⁶ Nok tanon ne Iesos iasakohnonke nehne nok ȣahenron: tosa iestsiiotasts karo aontaiente neksaokonha, tosa oni iestsinnhes: aseken neh akoȣenk ne Niio raonakerasera ne tsiontatieren.

¹⁷ Oriȣiio tsi kȣarori, nonka iah tenhaienasere tsiniiot neksaa ne Niio raonakerasera, iah ki tiiahataȣeiate.

¹⁸ Saiatat rasennoȣanen ȣahenron tsi ȣahoriȣanontonse: Saianer ise ne tisariȣaieri! Oh nenkiere ne Karonhiake akatsennonni?

¹⁹ Iesos tahenron: oh neh niiotieren tsi saton tisariȣaieri? Iah onka nakoren tetiakoriȣaieri neok enskat nehne Niio.

²⁰ Saterientare tsinahoten ne kontiriȣakȣeniios: tosa seriȣanerak ne kentesera; tosa sherio; tosa senensko; tosa sheianoȣenten; shekonnienst ne iesaienha.

²¹ Tontahenron; shontonkenikonrote ok nehne oni hakȣekon shiȣakeriȣaieritonhatie.

²² Iesos Sahaȣannaronke neh nikaȣennoten, ȣahenron: sekon ki tsioriȣat tisatoktani: satenninon tsinisaien, nok sheiakhonhas ne iakotent, onen tokenske entisastsokoȣatseraientane Karonhiake; nok tontase oni tenesek.

²³ Ȣahonikonraksen tanon tsini kaȣennoten ȣahaȣennaronke sotsisekenh rokȣastsehne.

²⁴ Nok ne Iesos ȣahattoke tsi ȣahonikonraksen, ȣahenron: oriȣiio tsi ȣentore ne Karonhiake aiontaȣeiate ne iakokȣastse.

²⁵ Sekon senha ȣatiesen nʼOniakȣaher taontohestste tsi teiohontakaronte ne ienikhonkȣa, tsiniiot ne rokȣastse Karonhiake ahataȣeiate.

²⁶ Tsiniiakon ȣahonronke ȣahiron: onka kati nehkenhakȣa enhieniakenne?

²⁷ Tontahenron: tsinahoten ne iah taiekȣeni nonkȣe, onhakȣeni ne Niio.

²⁸ Tier tahatati: ok kati nii nakȣekon ionkȣateȣenteton nok kȣateranentaktenni?

²⁹ Tontahenron: oriȣiio tsi kȣarori tsi iah teȣatestsenrionhe oni nenskat ne roteȣenteton, raononsa, raoȣatsire, tehatennontere, ok ne ens rone, sakoienhokonha ne Niio raonakerasera ahorionniatsera.

³⁰ Ne iah senha ihsinonȣe taonsahaienasere kentho tsi ionȣentsiate, nok nisinonkati enkahaȣite, enhronnheke onȣe.

³¹ Ethone ne Iesos ȣasakoiatotarho ne tekeni iaȣenre Nihatikȣekonne, nok ȣasakaȣenhase: kehiken nonȣa Jerusalem ȣeteȣe, onen akȣekon enkanane tsinihotiiaton ne Rotitokensehakȣe nonkȣe Roienha raiatatake.

³² Aseken onhonȣateȣentete tsinonkati nionkȣetaksenokon; ok tenhonȣaieron, enhonȣakenrenseronni, nok enhonȣanistskeroseraȣe rakonsake.

³³ Nok tsi nenhonȣasokȣaȣessonsi ethone enhonȣario; nok tanon asen-aton nenȣata enshatonnhete.

³⁴ Iah tanon othenon tehotinikonraientaon; eh oni niiore tsi ronateriȣasetennine neh nikarihoten akȣa ki iah othenon tehotinikonraientaskȣe tsinahoten ratonhakȣe.

³⁵ Onen toha siiahraȣe ne Jeriko, teharonȣekon ohahakta renstskȣahere tehastsarites.

³⁶ Ȣahattoke kati tsi kentiokoȣanenhatie ihien, ȣahariȣanonton oh niiotierenhatie.

³⁷ Nok ȣahonȣarori tsi Iesos Nazaretronon rotoheststonhatie.

³⁸ Nensok ȣathohenrete, ȣahenron: Iesos Taȣit Iaienha! Takitenr.

³⁹ Ȣahonȣannhese nohenton ihien, nok tanon ne raonha tahakȣisronne tsi tehohenreta raton: Taȣit Iaienha! Askitenre.

⁴⁰ Ȣathatane kati ne Iesos, iahatennhane iahonȣennonke, nok nonen eh sathatane ȣahoriȣanontonse.

⁴¹ Ȣahenron: oh nahoten saskaneks? Tontahenron: Seȣenniio! Akkenheke.

⁴² Tontahenron ne Iesos: eh niiaȣenn skenhek: neh Sesatsiente tsi tisetakȣen.

⁴³ Nok oksaok ȣahaken; nok ȣahosere ne Iesos tehononȣeronnionne ne Niio: Nok nonkȣeokon ne ȣaontkatto ȣattonȣanonȣeron oni nehne ne Niio.