Luke 17 - Ohiatonhseratokénti

Tsiatak-aton iaȣenre teioteriȣasonterakȣen Oriȣatokenti tsini hoiaton Roiatatokenti Luc.

¹ ETHONE ne Iesos ȣasakaȣenhase ne raotiokȣa: iatekakonte nehne tsi tenhiontateriȣaientaten; nok rotentasere onka enshakoriȣaientaten.

² Senha ioianere tsi katheta ȣatenenhiarakȣa ahonȣanenhianiionthase nok kaniatarhen iahonȣaiatonti, tsiniiot nasakoriȣaientaten enskat nʼeksaokonha.

³ Seȣatatenikonrarak kati: tokat tetsiatennontere enhianikonraksate, hestsiatteten; tokat enshatatreȣate, sasanikonrhen ki oni nise.

⁴ Tokat tsiatak niioriȣake seȣennisera aianikonraksate, nok ok oni khe niioriȣake tahontare nok aiarori ahenron: skatateriȣastani, sasanikonrhen.

⁵ Ethone ne Ratikȣekonne ȣahonȣenhase ne Roianer: Takȣaiestas ne teȣetakon.

⁶ Nok ne Roianer tahenron: arahona tsini kanenha notsinekȣar nikatsinetaroten niȣa aeseȣaientake ne teȣetakȣen: Iah othenon tehken aeseȣenhase kehiken kerhite: ȣatenaharostsi nok kaniatarake iekaniotann; nok enseȣaȣennarakȣe.

⁷ Onka oni tsinitsion ahonnhatseraientake kenȣentatie ahoioteke ok ne ens katsenen asakononnatieseke, nok iahoken tontare oksaok ahaȣenhase: atekkȣaratserakta iset nok tesastskahon.

⁸ Toka kenh ahaȣenhase: Takekhonnien, sateniionten, nok takekkȣaerhas tsiniiore ienȣakatane oni onȣakehniatanaȣen; Ethone onen nise tensastskaon ensnekira oni?

⁹ Neh kenh enhatonnrakȣate ne kenh kannhatsera tsi eh nahaiere tsiniiot tsi ronȣannhaon? ikere iah onte.

¹⁰ Eh kati oni nise niiot, nonen enseȣariȣaierite tsi neniestsinnhaon, seȣenron: iah othenon teiakȣatonron; aseken neki ok nonkȣaiotensera ionkȣaiotenhon.

¹¹ Nok nonen Jerusalem siiahaȣenonhatie tsitehontonȣentsiakhenhatie ne Samari tanon ne Galile niiahare.

¹² Onen thoha siiaraȣe ionatakȣenrare, oieri nihati rotiststaȣis ȣathonterane, ihnon kati ok tontahatitane.

¹³ Nok ȣathotihenrete, nok ȣahonniron: Iesos, Saianer! askȣentenre.

¹⁴ Nok nonen sasakoken, ȣasakaȣenhase: ȣaseȣe, Ratitsihenstatsine iahasene. Nok tsniiore niiahonenonhatie eh sahatiieȣentane.

¹⁵ Nok saiatat, akȣa neok ȣahattoke sahaieȣentane, sahakete tehononȣeronnionne ne Niio tsinihaȣenna raȣennotatie;

¹⁶ Nok rasitakta ne Iesos sahatiskȣentaron tehononȣeratons. Samaritan tohiken nakaiatoten.

¹⁷ Ethone ne Iesos tahatati, ȣahenron: Iah kenh toshotiieȣentaon noieri nihati, kah kati niiehonenon ne tioton sekon nihati?

¹⁸ Neok kenh kehiken nok thihate tontahononȣeratonne ne Niio.

¹⁹ Ethone ȣahaȣenhase; testann, nok sasatenti; neh sesatsiente tsi tisetakon.

²⁰ Onen oni Pharisian ȣahonȣariȣanontonse, katke enȣaȣe ne Niio raonakerasera, tontasakoȣennaȣeron, ȣahenron: iah nah sotsi ok ihnon, taontontrori nonen enȣaȣe ne Niio raonakerasera.

²¹ Iah oni naha taiahiron: Kenh ȣahi ihres; ok ne ens kenh ȣahi itres. Aseken nonȣa teseȣaiatokensson ihȣes ne Niio raonakerasera.

²² Ȣasakaȣenhase oni ne raotiokȣa: ienȣatenniseriheȣe tsinonȣe nenseȣaskaneke naeseȣatkatho enskat oni nonkȣe Roienha raȣennisera; nok iah ki tanon teseȣatkathosere.

²³ Nok enhietsirori enhiahiron: kentho ihres; tokas oni kenh nonkati itres. Tosa ki tanon eh niiahasene, tosa oni ietsinonteratieson.

²⁴ Aseken tsiniiot nateȣanennekaraȣe, tekaronhiiakta tsi kahniararha, eh kati oni nehne nenhiaȣenne nonen tentre nonkȣe Roienha.

²⁵ Niarekȣe ki tanon eso enharonhiaken, enhonȣateȣentete oni ne kenh kaȣatsirate.

²⁶ Tsiki niiaȣenhon Noë sihotenniseratenion; eh kati oni nehne nenhiaȣenne nonkȣe Roienha enhotenniserateke.

²⁷ Teiakostskaonkȣe oni ienekirhakȣe, iakohniakskȣe oni teiontateniaktennihakȣe tsiniiore iahataȣeiate ne Noë rahohonȣakon; nok tonhnohton akȣekon oni ȣahakorio.

²⁸ Eh oni niiaȣenhon sihotenniseratenion ne Lot: teiakostskaonkȣe, ienekirhakȣe, iehninonskȣe, iontenninonskȣe, ieienthoskȣe, nok iontenonsonnianionskȣe.

²⁹ Nok tanon nonen sontahaiakenne ne Lot tsi kanataien ne Sodom; Otsire iontenatentasta tekaieston ȣahokennore akȣekon ȣahakorio.

³⁰ Etho kati oni nehne nenhiaȣenne nonen ienȣatenniseriheȣe nonkȣe Roienha raȣennisera.

³¹ Neh nonȣe teȣenniserate, onka kanonsake enharatake, nok ne raoȣenssonha kanonskon tkakeron, tosa tethastsnent naonsahakoha; nok ne kahetakon ienhreseke, tosa shakoha tsinahoten tkaieri ne kanonskon.

³² Saseȣeiarann tsini ioiataȣenhon ne Lot ronekenha.

³³ Onka enhaskennha tsi ronnhe, enhotonse; nok nʼenhateȣentete hensronnhete.

³⁴ Ȣakȣarori neh nonȣe teȣasontate teniiase enhninastseke skanaktatne: saiatat enhonȣaiena, nok enhonȣatkaȣe ne saiatat.

³⁵ Tekeniiase tsionathonȣisen enskatne enkenithetake: skaiatat enkonȣaiena nok enkonȣatkaȣe ne skaiatat.

³⁶ Teniiasse kaehtakon enneseke, saiatat enhonȣaiena, enshonȣatkaȣe ne saiatat.

³⁷ Tontahonȣaȣennaȣeron ȣahonniron: kah ne kenh nonȣe Saianer eh nenhiaȣenne? Tontahenron: akȣa tsi ok nonȣe nenhioiataststokotonke nonkȣe kenha eh oni nonȣe nenkontkennisa nʼAkȣeksokon.