Luke 11 - Ohiatonhseratokénti

Enskat-aton iaȣenre teioteriȣasonterakȣen Noriȣatokenti tsini hoiaton Roiatatokenti Luc.

¹ ONEN are raonhaa ionsonton, ȣahaterennaien, nok nonen Sahaterennaientako Saiatat ne raotiokȣa ȣahoriȣanontonse ȣahenron: Seȣenniiio! takȣari onnien tsi naiakȣaiere naiakȣaterennaien, tsi nihoieren ne San tsi Sakorionnienni ne raotiokȣa.

² Tontahariȣaserako, ȣahenron: Enseȣenron nenseȣaterennaien: Takȣaienha karonhiake tesiteron! Aiesasennaien! Aiesaȣenniiostake! Aiesanikonraierite nonȣentsiake tsiniiot ne Karonhiake tiesanikonraieriton!

³ Takȣanont ne kenh ȣente ne iakionnhekȣen.

⁴ Nok sasanikonrhen tsi niionkȣariȣaneren: Aseken tsionkȣanikonrhens oni nii tsiniionkhinikonraksatha nonkȣe. Nok tosa askȣaiatatkaȣe ne kariȣak senke ehren tanon askȣariȣakȣiten ne iotaksen.

⁵ Sekon tontahenron: Onka kiok tsinitsion ahotenrohsentake asonthen niiahonnhoharane nok ahenron: Orie takenatarani asen nikanatarake.

⁶ Aseken onkiatenro ȣahakenonsorenne, nok iah othenon teȣakien nahoten ahinonte.

⁷ Nok ahontahenron ne kanonskon thenteron: tosa othenon tontakenikonrharen aseken onen ȣakatennhoton, onen oni kheienne ne kheienhokonha iah kati taonton ne taontakatkestsko nok aontakonhion?

⁸ Kȣarori, tsi iah tataontahatkestsko nok aontahaon netsi ronatenro; nok sane tenthatkestsko netsi tehonikonrharani nok enthaon tsinikon tehotonȣentsioni.

⁹ Neh kati ahoriȣa kȣarori, katon: Seȣariȣanonton, nok enhiestshiion; Seȣesak, nok enseȣatsenri; Seȣannhohaiak, nok enhiestsinnhotonkȣase.

¹⁰ Aseken, tiontataȣis ne ieriȣanontons, ietsenries ne iakesaks; nok enhonȣannhotonkȣase ne rannhohaiaks.

¹¹ Onka oni tsinitsion ahoȣiraientake, kanatarok ahoriȣanontonse ne roniha, ohnenhia ontekenh enthaon? ok ne ens oniare aontahaon nonen kentsionk enhariȣanonton.

¹² Takȣarere ontekenh aontahaon ne Onnhonsa ahariȣanonton?

¹³ Etho kati taeseȣaiatorete, seȣaȣeiente ise ne tsionkȣetaksens neioianere tsi naietsiiatierase ne ietsiienhokonha, toh kati onte senha nonshakaon ne Etsiseȣaniha Karonhiake thenteron ne raonikonratokenti onkaresson ronȣariȣanontonnis?

¹⁴ Ethone are enskat Sahaiatinekenȣe notkon iah teȣatati: nok tanon akȣa neok sonsakaiakenne notkon oknaha Sahatati ne rotiennine; ȣahakonerakȣenhaton.

¹⁵ Otiake are sane ȣahiron: Beelzebul ȣahi nehne konȣakoȣanen notkonseraksen ahosennakon raieratha tsi sesakoiatinekens nonatkonsson.

¹⁶ Otiake neok ne ronȣatenientensehakȣe, ȣaonȣariȣanontonse ioriȣanerakȣat, karonhiakeka.

¹⁷ Nok tanon tsi roterientaratsion tsinihotinikonraȣens, ȣahenron: tsini kanakeraserake ne iah skariȣat tehken enhiakaonȣentsiaiesha; oni tsini kaȣatsirake ne iah skanikonrat tehken enȣatȣatsiraton.

¹⁸ Tokat nonȣa notkonseraksen ok raonhake tehoriȣatironte, oh kati niiot tsi enȣahteke ne raonakerasera? Seȣatonse ȣahi Beelzebul ȣakienaȣase tsi sekheiatekȣatha nonatkonseraksen.

¹⁹ Tokat nonȣa Beelzebul aonkienaȣaseheke, onka kati nehne ronȣatiienaȣase ne ietsiienhokonha? nese ȣaonni ok rononha tenhiestsiiatorete.

²⁰ Nok tanon tokat Niio raosnonke tkaientakȣa tsi sekheiatekȣatha nonatkonsson, Oriȣiio kati ȣahi tsi onen seȣaiatorenhon ne Niio raonakerasera.

²¹ Ronaktiio ne ronkȣe ne rosaststenseraien, akȣekon skennen tikaien tsini hoien.

²² Nok tanon nahononsorenne ne rosaststenserakennion, ȣahokȣa tsini hatatiatakennhastakȣe, nok akȣekon ienhaaȣe tsini hoientakȣe.

²³ Iah sahonkeniriȣat tehken ne iah tehakeriȣaȣase; nok ne iah enskatne teiakoniroroks ratiesatha.

²⁴ Katke nonshonȣaiatinekenȣe notkon tsi sakotiennine nonkȣe, eh niienhenre tsi iohnenniokoton raȣesakonhaties nahaonrishentane; nok nenhoioha, enhenron: tsi teȣakenonsote ienske, tsi oni nonȣe tesakiakenhon.

²⁵ Saraȣe, Skanonsaseronni, tsionheȣanion oni.

²⁶ Oksaok sahakete, nok, sasakononksa tsiatak nikontkonserake senha ratinessonronon tsiniiot ne raonha, nok sahontaȣeiate eh oni sahontenaktonni; ne kati ahoriȣa onen senha henhentarahekte tohiken ronkȣe tsnitiotonne ne tiotierenton.

²⁷ Arek ok tiiehoteȣennokte, skaiatat tsiothonȣisen tontahiohenrete nok ȣakenron: iakotaskasts ne ieiatakon tsiatatakȣe, oni ne iesataronte!

²⁸ Tontahenron: neh tanon naha iakotaskasts niakotaonsate ne Niio raoȣenna nok ronȣaȣennarakȣa.

²⁹ Nok tsi akȣekon ok akta iakaȣenontonhatie, ethone are onen ȣahenron: kehiken kaȣatsirate kaȣatsiraksenskȣa: kariȣanontons ioriȣanerakȣat, iah ki tanon onte eh teiaȣensere, neok enȣatkatho tsiniiaȣenhon ne Jonas Rotokensehakȣe raiatatake.

³⁰ Aseken ne Jonas rahonateniententsera iotonhon ne Ninifronon; eh kati oni nonȣa nenhiaȣenne nonkȣe Roienha tsinonkati nekenh kaȣatsirate.

³¹ Entieronon konȣakorakoȣa, tentkatane nok enhiakoriȣaiakse oni enhiakoriȣente nonȣa kenh kaȣatsirate: aseken naonhaȣaonȣentsiokten naonronke ne Salomon rahottokhatsera, senha nonȣa raiatanoron ne kenh ihres tsiniiot ne Salomon.

³² Ninifronon tenthatitane nonen tenhiontatiatoretane ensakotiriȣaiakse nok ensakotiriȣente nekenh nonȣa kaȣatsirate: aseken ne rononha shonatatreȣaton sasakotati ne Jonas, nok senha nonȣa raiatanoron nekenh ihres tsiniiot ne Jonas.

³³ Iah ȣahi nehne onka tekahaserotha neok saok iaonsete tsinonȣe tiotaseton, ok ne ens okȣirokon, iehaserotakȣake ȣahi enhienioten naontkatho tsi teiosȣatte tsini iakon tiontaȣeiatha.

³⁴ Okara ȣahi aosȣathetsera noieronta. Toka skariio tsiatakȣekon ki tenhiosȣatheke, nok tanon nenskaraksenhake tsiatakȣekon ki tentiokarasseke.

³⁵ Senikonrarak kati tosa tetiokarasek ne sahasera.

³⁶ Toka nonȣa tsiatakȣekon teiosȣathe, iah oni kaneka teiotasatare, akȣa ki akȣekon tiiatensasȣatheke, tsi kis ens niiot ne kahasera tesasȣathetennis.

³⁷ Sekon ok sihotare, saiatat Pharisian, ȣahoonkaron nentie, eh ȣarete ne Iesos, nok atekkȣaratserakta ȣahanistskȣaren.

³⁸ Ȣahonekheren ne Pharisian tsi iah tehotsiohare ohenton ne tahastskaon.

³⁹ Nok tanon ne Roianer, tontahenron: ionerakȣat ki oni nise Pharisian neseȣaiatoten tsi astste ok nonkati Seȣanohares ne seȣastsesonha, seȣakerassonha oni; nok ne seȣeriane titkahere ne kanenskȣen, oni ȣanontonniontseraksen.

⁴⁰ Teseȣanonȣaraȣenrie! Onka roson ne eneken, iah kenh oni raonha tehoson ne nakon?

⁴¹ Ashetenrate tanon niare tsini saien, ethone onen oriȣakȣekon ensaianereke.

⁴² Seȣententasere ise Pharisian! Akȣa nehne ieseȣakariaks tsi seȣaienthokȣas, oni tsi tekanatokenhaton nok oni nohontessonha; nok seȣentorha ne taeseȣasniene ne Niio raoriȣasonha nese tanon aonteseȣatierenton nok ethone ne kenh kaien.

⁴³ Seȣentent Pharisian! neok tsionȣesata nohenton iaeseȣenstskȣarake nononsatokentike nok taietsinonȣeratonseke nonkȣeokon tsi ionkȣene.

⁴⁴ Seȣententasere, seȣaiatons oni Pharisian tsionkȣetaksenskȣa! akȣa neh tetsiseȣatieren tsiniiot nonen iah othenon tetsioken tsi ieiatat, nese ȣaonni iah ki othenon teietokata neh ierataties.

⁴⁵ Ethone oni otiake ne sakotirionnienni taontati, ȣahonniron: Seȣenniio! Takȣasentenni oni nii tsinaten saton.

⁴⁶ Tontasakoȣennaȣeron, ȣahenron: Seȣententasere oni nise kaianerensera iotsirionnienni! Aseken iokste iestsiketas nonkȣesonha, nok nise iah teseȣakȣenies neok oni ne kenh niiaheseȣaiere.

⁴⁷ Seȣententasere! Aseken tsiestshiiatatahas ne Rotitokenseakȣe ne ietsiniokonkenha sakotirio.

⁴⁸ Oriȣiio tsi ȣene tsionnis tsi seȣariȣanonȣes tsini hotiieranion ne ietsiniokonkenha aseken nerononha sakotirio nok nise ase tsi tsionnis tsi ratiiatatarion.

⁴⁹ Nese ahoriȣa ȣaton ne Niio raottokhatsera: ienkheiatennietase Rotitokense; nok entesakonaȣentho, ensakotisereson oni.

⁵⁰ Niaonteriȣiheȣe, neh nonȣa ne kenh kaȣatsirate ahonateriȣaienhase tsinikon rotinekȣensinekenhon ne Rotitokensehakȣe tsinahe tiontonȣentsiatasaȣe.

⁵¹ Abel raonekȣensa enteȣatasaȣen tsiniiore ne Zakari raonekȣensa, neh nakȣa akta tsi iontienkȣaronniatakȣa ononsatokentike ronȣario: Tokenske tsi kȣaroris tsi rononha enhonteriȣaketate nonȣa kenh kaȣatsirate.

⁵² Seȣententasere, ise Kaianerensera ietsirionnienni! Seȣatiatakȣeniioston nʼattokhatsera aonnhotonkȣa; iah se sane nise tiieseȣataȣeiaton; neok naiestsinnhese ne iaiontaȣeiate onka ienrhakȣe iakataȣeiate.

⁵³ Sekon ok neh sihotarakȣenhatie, ȣathonȣatkenniaienthoten ne Pharisian tanon ne Sakotirionnienni niateioriȣake ȣahonȣariȣanontonnionhase.

⁵⁴ Neok ne teonȣaskotanis, rotirharekȣe neh nahontahatiierate othenon ahonȣariȣannhontako nah onatessenniiose ahonȣariȣarhoste.