Luke 1 - Ohiatonhseratokénti

Tiotasaȣakȣen Oriȣatokenti tsinihoiatonne Roiatatokenti. Luc.

¹ Ronentiokoȣanen onen ronatenienten nakȣa ahontahatiierite tsi ahatiiaton neh aontroriheke tsinahotenson noriȣiio ionkȣaterientare.

² Tsikiniiot tsi ionkhirori nakȣa rononha ronatkathon oni sakonatatiskȣe nʼOȣenna.

³ Ne kati oni nii ahoriȣa ȣakere ioianere se onte, Kien Theophil nakonhiatonse akȣa akakȣatakȣen tsi onen akȣekon ȣakatkense tsiniiot tsi tiotasaȣe oni tsi ieiotokte.

⁴ Eh naontaȣe akȣa otokenhon aseriȣaienterihake tsinahoten saterihonte.

⁵ Herod Shihonontiio ne Jude nonȣe, Saiatat ne Ratsihenstatsi Sakari ronȣaiasts, Abia raȣatsiratatie; nok ne rone Aaron neneh raȣatsiratatie Arisaȣe Konȣaiasts.

⁶ Nok rotiianerekȣe rahohenton ne Niio, oriȣakȣekon oni rotiriȣaieritonhatiene tsini ȣatenienten oni tsini kariȣataton ne Roianer raoriȣasonha, iah tehotinnhiseraien.

⁷ Nok iah tehotiȣiraientakȣe, aseken iah teȣateȣetonskȣe nʼArisaȣe, onen onitetsiaron sihotikstenha.

⁸ Khare kati are onen ne Sakari roiotaties tsini hoiotenseroten ne Ratitsihenstatsi rahohenton ne Niio.

⁹ Tsini hotiianerenseroten ne ratitsihenstatsi, rahonha ȣathoiatonko niahataȣeiate nok ahatienkȣaronniate raononskon ne Roianer.

¹⁰ Nok nonkȣeokon astste ens neneh nakannhohati iakoterennaien nonen ionkaheȣe tsini iontienkȣaronniatha.

¹¹ Niio Raoronhiakeronon etho ȣahoken, akta tsi oni Kaȣeientetakȣen tsi iontienkȣaronniatakȣa eh ihrate.

¹² Tahontonneke ne Sakari tsi ȣahoken nok ȣahoteronhienten,

¹³ Nok tanon ne Raronhiakeronon Sahenron: tosa sateronn, Sakari; aseken ne saterennaient onen ieioh raohenton ne Niio; nok ne teseniteron Arisaȣe roskenrakete enhioȣiraientane, nok San enhtsenatonkȣe.

¹⁴ Nok koȣanen ensatonnharakȣe, oni kentiokoȣanen enhiontonnharonnion tsi henrennakerate.

¹⁵ Aseken henhaiatanoronke rahohenton ne Roianer, nok iah thahanekirhake notsitsia iah oni nʼiako-nonȣaratonta; nok tsi enthatiatata ne ronistenha Kaiatakon entnikȣekhene ne Rotkon Roiatatokenti,

¹⁶ Nok kentiokoȣanen nʼIsraerronon sakotiienhokonha ensesakohaharate nok entsiontatreȣate tsinonkȣatti Raotiianer oni RaoNiio.

¹⁷ Aseken raonha enhahente, Elie raonikonra nok raokȣeniat enhoieratonhatie, aonsasakaȣeriasaseronni nakokstenhokonha tsinonkȣati nontationokonha, nok nʼionkȣetaksen tsinonkati ne Kaianeren, aotiokȣaseronnien ne Roianer ne tokenske iakotateȣeiennentaon.

¹⁸ Ethone ne Sakari tontahoȣennaȣeron ne Raronhiakeronon, ȣahenron: nahoten enkienterestakȣe tsi eh nenhiaȣenne? Aseken onen akekstenha, onen oni eso iahoserakȣen ne ȣakeniakon.

¹⁹ Nok ne Raronhiakeronon Tontahenron: II ne Kabriel rahohenton ne Niio ihkete, nok neh tionkatoriatakȣen ne tahetenitharen, oni nakonrori neh nikariȣiios.

²⁰ Nok onȣa enȣatasaȣen iah taonsasatatiheke, iah oni taonsasatati tsiniiore ienkonneȣe neh nikarihotens; netsi iah tetisetakȣen nakeȣenna, ehse sane niiaȣensere nonen ienȣatenniseriheȣe.

²¹ Onen neneh nonkȣeokon etho iakorhare, nok iakohnorakȣas tsini honiskȣas.

²² Nok nonen sontahaiakenne iah tehokȣenion nasakotatike neok ne tehanisnonsaieronnionhatonskȣe, oksaok ȣahenre nonkȣesonha, ȣathotieronnionse kati ȣahi tsini Kariȣes iehenteron.

²³ Akȣa neok sontenniseroheststanion ne raȣennisera nnhohioten tsini hoterionte, sahatenti.

²⁴ Kenh naheha onakenke, Onen nʼArisaȣe oia nakaiatotenne, ȣisk niȣennitake nikariȣes iotaseton, nok ȣatonhakȣe.

²⁵ Tiakariȣakenniate, etho kenh nontahaierate ne Roianer tsi tontahakeiarane oni naonsahaksennaseronni nonkȣene.

²⁶ Iaiak-aton niȣennitake, onen are ne Raronhiakeronon Kabriel tontahotori ne Niio Galilene Kanatakon ne Nazareth Konȣanatonkȣa.

²⁷ Tsi nonȣe tkenterontakȣe ne Kaiatase onen sikariȣison enhotiniake ne ronkȣe ronȣanatonkȣa Sose Taȣit raȣatsiratatie; nok ne Kaiatase Onȣari konȣaiastskȣe.

²⁸ Nok nonen siiahataȣeiate ne Raronhiakeronon tsinonȣe nikenterontakȣe, ȣahenron: ȣatkonnonȣeraton ise ne iesaȣi ne Kaianeren Senikȣekon ne Roianer: sonhaa iesaiatanoronston tsiniiakon ne tsiakothonȣisen.

²⁹ Nok nonen sahoken eso tsi ȣatiotonharenron ne tsini kaȣennoten tahatati; nok ok aonikonrakon tatkaiatorete nahoten onte kenton tsiniiot tsi ȣathanonȣeraton.

³⁰ Nok ne Raronhiakeronon ȣarenhase: tosa sateronn Onȣari: Aseken saien ne Kaiataterisera raohenton ne Niio.

³¹ Onen kati nonȣa oia nensiatotenne, nok roskenrakete nensaȣiraientane nok Iesos hentsenatonkȣe.

³² Henhaiatanoronke nok henhonȣanatonkȣake Enekentsi Roienha; Nok ne Roianer Niio henhonistskȣaratseron ne Roniha Taȣit rahonistskȣara.

³³ Nok enhonontiioke tsiniienhenȣe tsi henhaȣatsiratatie ne Jacob; nok iah nonȣenton tiiaontokten ne rahonakerasera.

³⁴ Ethone nʼOnȣari tontahoȣennaȣeron ne Raronhiakeronon ȣakenron: oh nenhiaȣenne nʼetho naiaȣen iah tehiienteri ne roskenrakete?

³⁵ Nok ne Raronhiakeronon tontahaȣennaȣeron ȣahenron: Rotkon Roiatatokenti enhiaiatorenne, nok nʼEnekentsi nahosastensera onsarakȣaȣerhoste; ne se ȣaonni oȣiratokenti ki nensaȣiraientane, enhonȣanatonkȣake Niio Roienha.

³⁶ Onen oni nonȣa ne tsiaraseha Arisaȣe okoȣanatake oia nakaiatotenne; nok onen neh iaiak-aton niiotennitaratie ne iah teȣateȣetons konȣanatonkȣakȣe.

³⁷ Aseken iah ki othenon tahonoronse ne Niio.

³⁸ Ethone nʼOnȣari ȣakenron: kenh kiteron raonnhatsera ne Roianer: etho niȣakiataȣen tsini saton! nok ne Raronhiakeronon ehren sarete.

³⁹ Eh oni nonȣe siȣenniseratenion ȣatiosterihen nʼOnȣari ontenti ȣakanontiiakon tsi ionontenion tsiniiore iaonȣe tsinonȣe enskat tkanataien ne Juda.

⁴⁰ Nok Sakari raononskon iaontaȣeiate, nok ȣationonȣeraton nʼArisaȣe.

⁴¹ Akȣa neok sahosennaronke nʼArisaȣe tsi ȣationonȣeraton nʼOnȣari, tontaharathenionko ne raksaha kaiatakon, nok nʼArisaȣe ȣakaiatihne ne Rotkon Roiatatokenti rahonikonriiotsera.

⁴² Nok ȣatiohenrete, nok ȣakenron: Sonhaa iesaiatateriston tsiniiakon ne tsiakothonȣisen, nok Kaiatateriston ne ioteiarontie tsiatakon.

⁴³ Etho oni kenh niiore tsi onkaterasȣiioste tsi tonkatkensere ne Rakianer ronistenha?

⁴⁴ Aseken, akȣa neok sakonȣennaronke ȣateskenonȣeron, ok naha ne raksaha atonnharak tahahorianeron kiatakon.

⁴⁵ Iotaskasts ne tiaȣetakon: Aseken tsinikon konȣarori ne Roianerne tioientakon akȣekon etho nenhiaȣenseron.

⁴⁶ Ethone onen nʼOnȣari ȣakenron: Rosennaien ne Raȣenniio nakenikonra;

⁴⁷ Nok raonhake ok ȣakatonnhahere tsinonkati ne Niio neh oni sakeskontakohe.

⁴⁸ Neh tsini hakkonnienston atatkenronniatserakon; nese ȣaonni onhiontonheke tsinenȣe: enhiontonheke iotsennonni.

⁴⁹ Ne tsini hakiatanoronston ne Rosastenseroȣanen, nok Rosennatokentikoȣa.

⁵⁰ Nok ne Raotanitenrasera enȣatatie tsi nenȣe enhieȣatsiratatie ne ronȣatsanise.

⁵¹ Ȣene raonniaton ne rahosastensera: Akȣekon roriȣarision tsini hontennikonraientonskȣe ne ratinaies.

⁵² Sesakostskȣarakȣen ne ratisennoȣanens, nok neh sakosennoȣanaton nʼiontatkenronnis.

⁵³ Sakotatenni ne iontonkariakskȣe; kententetserakon sesakotorion ne iakotsokoȣa-kenhne.

⁵⁴ Ȣahoiatanonstate Israerraonnhatsera, naonsareiarane rahotanitenrat.

⁵⁵ Tsikiniioh tsi sakorharaststenni nonkȣanisera, neh tohiken Abraham nok oni tsinonkati ne sakoienhokonha tsinenȣe.

⁵⁶ Thoha asen niȣennitake iohnariskonhon nok onen tontontenti.

⁵⁷ Kkhare onen iakaheȣe naioȣiraientane nʼArisaȣe, roskenraketa ȣarennakerate.

⁵⁸ Akȣekon ok ne tehonnonsanekhaon oni ne rontatenonkȣe konȣatonnharanihakȣe tsini hentenron ne Raȣenniio.

⁵⁹ Nok nonen siiakaheȣe nahonȣaȣarakȣetare ne raksaa, Sakari ronȣanatonkȣanene tsiki nihosennoten ne roniha.

⁶⁰ Nok tanon takenron ne ronistenha, Iahten: San enhonȣaiastsheke.

⁶¹ Tontahonniron: iah onka eh teiosennoten tsinis ȣatsira.

⁶² Ethone ȣahonȣariȣanontonse ne roniha, asakotokaten nahoten enhonȣanatonkȣe.

⁶³ Nok ne Sakari Oststenra ȣahariȣanonton, eh ȣahaiaton; San enhonȣaiastsheke akȣekon ok ȣahakohnerakȣenhaton,

⁶⁴ Ethone onen sontnerensi ne raȣennason, nok ȣathononȣeronnion ne Niio.

⁶⁵ Taiontonnekhon ne tehonnonsanekhanion, nok ȣateȣateriȣareni tsi ionontenion akȣa ȣationȣontsiaȣerho tsinikanakerasera ne Jude.

⁶⁶ Tsiniiakon ionronkas, iontonhakȣe nakaȣerientakon: Oh onte akȣa niiatonhiaȣenne tohiken raksaa? Nok nikȣekonhatiene ne Niio rahosaststensera.

⁶⁷ Onen ne Sakari, roniha ȣahaiatine ne Rotkon Roiatatokenti rahonikonriiotserat, iahariȣaken, ȣahenron:

⁶⁸ Tahonȣanonȣeraton ne Roianer Israerronon Rao-Niio, ne tsi sasakaȣeiarane nok sasakohnerensi ne raotiokȣa,

⁶⁹ Oni tsi ȣasontion enskat ne rosastenseroȣanen nasakoiatakennha Taȣit raȣatsirakon ȣahaiakenne.

⁷⁰ Tsi ki niiot tsi ronatati ne Rotitokensehakȣe, ne tiotkon tahatinakeratie.

⁷¹ Tsi ensesonkȣanerensi tsi ionkhinaskonni ne ionkhisȣens.

⁷² Ne ȣene aonton ne raotanitenrasera nonkȣaniserake nok aiakeiarastakȣake tsini horiȣatokenti.

⁷³ Eh niiot tsi roriȣanirati otsiteȣanikenha Abraham.

⁷⁴ Tsi, ensesonkȣanerensi tsi ionkhinaskȣaien ne ionkhikenrenseronnis, nok ensesontion ne Skennen tatsiteȣasennaien.

⁷⁵ Raoriȣatokentitserakon raoteriȣakȣarisiontserakon oni tsini tionnhes.

⁷⁶ Nok nise seksaa, Niio roȣennenhaȣe enhiesanatonkȣake, aseken hentsenteste ne Roianer nok hentsiahahaseronnien.

⁷⁷ Naserionnien ne raotiokȣa tsinaieiere ne karonhiake aiontsennonni tsi aonsaiakoterakeȣase nakoriȣaneraaksera.

⁷⁸ Akȣa rahotanitenraserakon ne Sonkȣa-Niio, eh oni takaientakȣe tsi ȣasonkȣatkense ne Eneken tkarakȣinekensta.

⁷⁹ Aontonseke taonsaiakosȣathene nasatakon oni kariȣaneraakserakon iakonnhetie nok eh nonkȣati aonsasonkȣasarine tsinonkati ne Skennen.

⁸⁰ Nok ne raksaa roteiarontie, oni ronikonroȣannhaonhatie; nok karhakon ranakerekȣe tsiniiore iaontenniseriheȣe Onkȣene ahrete.