Leviticus 8 - Ohiatonhseratokénti

Tsi Ronhwatiʼrihwaniráhti Ne Aaron Tánon Ne Raoʼnekenteronhtseraʼsónhas

¹ Ne Roiá꞉ner wahawénhase ne Mahís,

² “Iatsiaténhaf ne Aaron ó꞉ni ne rahonekenteronʼtshersónhas ne tsi iehionthawehiatákwah natohsehrákon tsi nónhwe nikíteron tánon tsátkaf ne ratiʼtsihénsthatsis rahonatʼtierónhniat, ne ionhthatsiatokástha kénhie, ne tsionónskwahron rátsinn owíra né꞉ne karihwáneren ahorihwáke tsi iahontkáwenhke, ne tenihiáse teiotinakaronhtónha tenítsinn, tánon náthere ne iáh tewatʼthenkwáhton kanatá꞉ro íkenre.

³ Ethòne kanenrahkwékon ne tsi ienákere iashé꞉nonht né thóh nónhwe nahionhteróroʼke.”

⁴ Ne Mahís thóh nahá꞉iere tsi kíʼ nahorihónten ne Roiá꞉ner, tánon nó꞉nen ne iená꞉kere shaʼhontkenhnísa,

⁵ washakawénhase, “Tsi nónhwa ónen nénhtiere ne tsi nahó꞉ten ne Roiá꞉ner rakeríhonte.”

⁶ Ne Mahís thashakohiaténhaʼwe ne Aaron ó꞉ni ne rahonekenteronhtserasónhas ohénton niahónhne tánon washakahónhnien norihwakáion tsi ní꞉ioht tsi ahontháwen.

⁷ Wahósten ne nakontié꞉iens tánon ne wakóses ne Aaron tánon wahohiathánaʼke. Tánon wahósten ó꞉ni naʼtenihióntha tánon thóh wahawánerenhke ne kwáh wakenhí꞉io atsathánaʼke tsi wahohiathánaʼke.

⁸ Wahósten ne tehatetskweʼnaʼnákʼtha tánon thóh wahathárion ne owistanoronhsónhas né꞉ne Urim tánon ne Thummim né꞉ne tehakaraientákwas.

⁹ Wahósten ó꞉ni naʼtenonwaranák꞉tha ne ranontsíne, tánon nohénton íken thóh waharanénhtatʼthe nowistanó꞉ron atʼniótha, né꞉ne iotokénti wenéstha tsi nihiakoterihwaiénhni; kwáh kíʼ ne Roiá꞉ner tsi nihoríhonʼte.

¹⁰ Ethòne ne Mahís wátraʼkwe ne shaʼkoterenhnaienhnítha kénhie tánon waʼtatsthaʼtharokwahthánion natohsehráke tsi nónhwe nihénteron ne Roiá꞉ner tánon ó꞉ni akwékon tsi nahoténsons ne thóh atohsehrákons káiens, tánon thóh kíʼ kén ní꞉ioht tsi wahotonhnahéraʼse ne Roiá꞉ner.

¹¹ Kénk níkon iaháhaʼwe ne kénhie tánon wathastsʼtharokwahthánion tsáta nihiorihwáke ne ientsienharákwahke tánon ne tsi niwatsthasónhas tánon ó꞉ni ne hiontsioharetákwah akéra tánon ne tsitkárathe, né nahónton nahotonhnahéraʼse ne Roiá꞉ner.

¹² Káti wahorihwaníratʼtse ne Aaron tsi tahá꞉weronh ne sakoienarós꞉tha kénhie ne ranonhtsíne.

¹³ Ethòne, ne Mahís ohénton niashaʼkohiaténhaʼwe ne shaʼkohiohokónhas ne Aaron tánon washaʼkohiáthawiʼthe ne nakontié꞉iens atsatháwi, tánon washaʼkohiathanák꞉kon, tánon thashaʼkononhwaróroʼke, kwáh kíʼ tsi nihotenhnáhon ne Roiá꞉ner.

¹⁴ Ethòne ne Mahís tahohiaténhaʼwe ne tsionónskwahron rátsinn owíra né꞉ne kariwáneren aorihwáke, tánon ne Aaron ó꞉ni ne sakohiohokónhas ranonhtsíne wathonwanisnonhsáren.

¹⁵ Ne Mahís wahononwarhiákon tánon ostónha iaháhaʼwe nonekwénhsa, tánon rasnonsáke wárasʼthe tsi wahanekwenhsarósehron ne tsi ioshón꞉tons ne tsi tekahiosakérons ne ientsienharákwahke, né nahónton naʼkonwatonhnahéraʼse. Ethòne tsitkáraʼte ne ietsienharákwa iahá꞉weron ne iotenekwenhshathaténron, Thóh kíʼ ní꞉ioht tsi wahatonhnahéraʼse tánon tsi wahanohárethe.

¹⁶ Ne Mahís akwékon waharónhko ne iorèsenhs ne kahiáthakons, ó꞉ni ne kwáh tewenhtwenhsí꞉io, tánon nostsésehris ne iorèsenhs ioranenhtátkons, tánon ietsienharáhkwahke wahát꞉tsahaʼthe.

¹⁷ Iaháhaʼwe ne iothatenronhonkón꞉a ne rátsinn, kará꞉tse ne kané꞉honk, owáron, tánon nokarósthas, tánon iahátsahaʼte ástste ne tsi nónhwe nihonatenáthaien, kwáh kíʼ tsi nihorihwíson ne Roiá꞉ner.

¹⁸ Ethòne ne Mahís iahohiaténhaʼwe ne teiotinakaronhtónha rátsinn né nahoteskónhten, tánon ne Aaron ó꞉ni ne shaʼkohiohokónhas wathonwanisnónh꞉saren ranonhtsí꞉ne.

¹⁹ Ne Mahís wahononhwarhiákon tánon iahonekwenhsónhti akwékon ne kaiéri níkons nakʼthóntsies ne ietsienharákwahke.

^20-21 Wahó꞉tsoʼwe ne teiotinakaronhtónha rátsinn, wahanohaʼrénion tsi nihioterihwatséren ne rahiathakónhson ó꞉ni noná꞉ken nahosinátis, tánon ietsienharákwahke wahát꞉tsahaʼte nonónh꞉tsi, ne iorèsenhs, tánon rahiathakwékon ne teiotinakaronhtónha rátsinn, kwáh kíʼ tsi nihorihwíson ne Roiá꞉ner. Kí꞉ken watéskonte ne tkaiesthánions né꞉ne ká꞉khwas aorihwáke, tánon tsi tewenhserateníhons né rawerientiʼiosthákwah ne Roiá꞉ner.

²² Ethòne ne Mahís tahohiaténhaʼwe ne tekeníhaton ne teiotinakaronhtónha rátsinn, né nènʼne tsi enhowatirihwaníratʼtse ne ratiʼtsihénsthatsis aorihwáke, tánon ne Aaron ó꞉ni ne sakohiohokónhas wathonwanisnonhsáren ne ranonhtsíne.

²³ Ne Mahís wahonhnonwarhiákon tánon ostónha iaháhaʼwe nonekwénhsa tánon ethàʼke ne tsi rothahón꞉thaʼte ne Aaron nónhwe nahá꞉ro, ó꞉ni rawehionkáraʼke né saweientheʼthákwen, tánon ne rahiakwiró꞉wanenhke ne saweientethákwen nahashiʼtáti.

²⁴ Ethóhʼne tashakohiaténhaʼwe ne Aaron sakohiohokónhas tánon washakonekwenhsaʼró꞉sehron netháke né tsi iehonathaʼhonthaténions né sní꞉weientethákwen, né niwehionkarákes ne sniweienthethákwen, tánon ne iahiakwiró꞉wanenhke ne sniweienthethákwen ne iashí꞉thakes. Ne Mahís ethóhʼne ónen iahonekwenhsónhti akwékon ne kaiéri níkons skatísonhs ne ietsienharáhkwahke.

²⁵ Wátrakwe ne iorèsen, ne iohthashaʼrésen, akwékon ne iorèsenhs iororóks꞉ton tsi nihioteriwátsere ne kahiátakons, ne kwáh tkatwenhsí꞉io, ostsésehris ne iorésen ioranénthakon, tánon nonàken nahasináti ne saweientheʼthákwen.

²⁶ Ethòne énska wahanataraʼtá꞉ko natherákon né꞉ne iáh watʼthenkwáhtha thaʼtekaiéston rahohénton ne Roiá꞉ner wahá꞉ien, skanátara né꞉ne teweienaiéston tsi kanatarónhni, tánon énska orawístha, tánon thóh é꞉neken taharónhnion ne iorèsenhs ó꞉ni nonàken ne skaweientethákwen oshína.

²⁷ Ethòne ne Mahís akwékon kí꞉ken ká꞉khwas ronhtsanákes waharón꞉nion né꞉ne Aaron tánon ne sakohiohokónhas, tánon iahatítaʼte né꞉ne katokénston athaʼtawítshera tsi tahónhion ne Roiá꞉ner.

²⁸ Ethòne ne Mahís sashakhó꞉kwa ne ká꞉khwas tánon ietsienharákwahke wahát꞉tsahaʼte, é꞉neken thóh thaharónhnion ne tsi watéskonte, né꞉ne tsi wahonwatiʼrihwaní꞉ratʼtse aorihwáke. Né kí꞉ken ne ká꞉khwa aorihwáke tsi iahóntkaʼwe, tánon tsi tewenhseratiníhons ne wahawerienhtí꞉iosʼthe ne Roiá꞉ner.

²⁹ Ethóhʼne ne Mahís waharáko noskwéna tánon tsi iaháthaʼte né꞉ne katokénston athatawítsera íken tahá꞉wen ne Roiá꞉ner. Mahís kí꞉ken wahaterihwatsʼtéristhe tsi nókwa ne teiotinakaronhtónha rátsinn tsi wahonwatirihwaníratʼtse. Ne Mahís orihwakwékon thóh nahá꞉iere tsi kíʼ nihorihwíson ne Roiá꞉ner.

³⁰ Ne Mahís iaharáko kénk níkon ne shaʼkoienaróstha kénhie tánon kénk níkon nonekwénhsa né thóh kahé꞉re ne ietsienharákwaʼke tánon watatstarokwathánion rahonatʼtseronhniákwahke ne Aaron tánon ne sakohiohokónhas. Thóh kíʼ ní꞉ioht tsi waharihwatokéntisʼte ne rahonatʼtserónhniat rahonháke ne Roiá꞉ner.

³¹ Ne Mahís washakawénhase ne Aaron tánon ne sakohiohokónhas, “Iashé꞉wahaf kí꞉ken owáron ne tsi iehionthawehiathákwa natóhsehra tsi nónhwe nihénteron ne Roiá꞉ner, tesewanekóntiet, tánon thóh nónhwe ná꞉sewak skátke ne kanátaro nathé꞉rakon íwah né꞉ne ronhwatiʼrihwaniʼráti aorihwáke tsi iewatkáwen, kwáh kíʼ tsi nihorihwíson ne Roiá꞉ner.

³² Sehwátʼtsahat ne thènen enhiothátere nowáron tó꞉ka ó꞉ni kanátaro.

³³ Iáh thaʼhónton ne tahontesewahiákenhne natohsehrákon né꞉ne tsáta nónhta nikaríhwes, tsi nióre tsi nikahianerenseró꞉ten tsi enietʼtsirihwaníratʼtse ienwatésa.

³⁴ Ne Roiá꞉ner sonhkwaríhonte tsi ne tewátiere nónhwa wenhniserátekwe, ne nahónton é꞉ren ahonsakahawítonhke ne sewarihwaneraháktshera.

³⁵ Ónenk tsi atohsehrákon ensewenhterónhthake né꞉ne tsi niwenhníseres ó꞉ni nokarasné꞉ha né꞉ne tsáta nónhta nikaríhwes, thóh nenhsewáiere tsi kíʼ nihorihwíson ne Roiá꞉ner. Tó꞉ka iáh thóh tahisewáiere, kwáh kíʼ ensewénheie. Thóh kíʼ ní꞉ioht tsi rakeríhonte ne Roiá꞉ner.”

³⁶ Káti ne Aaron tánon ne sakohiohokónhas akwékon thóh nahatí꞉iere tsi kíʼ nihorihwíson ne Roiá꞉ner rahonhá꞉ke ne Mahís.