Leviticus 22 - Ohiatonhseratokénti

Ne Iotokéntis Ne Iewatkawánion

¹ Ne Roiá꞉ner wahorihónten ne Mahís

² nahoró꞉ri ne Aaron ó꞉ni ne sakohiohokónhas, “Iáh tehiówenk nahonthásaʼwe naksénhnakon ne ioterihwatéhat, káti teserihwásniek né꞉ne kakweniensthátshera ne iotokénti iewatkáwen nètho nonhkweshón꞉as Nisraerʼró꞉nonke iakorihwatokénston nakerihwáke. Í꞉i ne Watiá꞉ner.

³ Tó꞉ka ónhka tsi niensatwatsiríhne, tsi nikaríwes kwáh íken tsi tehohiathátsion, ákta nénhtre ne iotokéntis iewatkáwen né꞉ne nonhkweshón꞉as Nisraerʼró꞉nonhke iakorihwatokentíston nakerihwáke, iáh kíʼ shé꞉kon nonhwénhton thahonsahohióten ne tsi ietsienharákwahke. Thóh kí꞉ken nenhiotónhake né꞉ne tsi nénhwe. Í꞉i ne Watiá꞉ner.

⁴ “Iáh ónhka tsi nienhatwatsiríhne ne Aaron ne rahonéhonkne róhn꞉rare tó꞉ka ó꞉ni ne tehoskénhniaʼse thahónton ná꞉rahke ne thènen iotokénti iewatkáwen tsi nióre ne kwáh iensotkwenienstónhake. Tsík ónhka ne ratsihénstatsi tenhohiathátsionsʼte tó꞉ka ienhaiéna nahó꞉ten ne iáh tehiotkwéniens né꞉ne iahaiéna noierónhta khés ne tsi tehoskénhniaʼse

⁵ khés né ienhaiéna ne iáh tehiotkwéniens katʼtshénen khés ne ónhkwe.

⁶ Ónhka ne ratsihénstatsi tenhohiathátionhne tenhohiathationhtónhake kíʼ tsi nióre ienhiókaraʼwe, tánon iehióhe iáh thaʼhónton ná꞉rahke ne thènen iotokénti iewatkáwen tsi nióre ienhshá꞉thawen.

⁷ Tsík ienkará꞉kwenhne thóh né khók enshotkwenienstónhake, tánon ethòne kíʼ enwáton nahonshá꞉raʼke ne iotokénti iewatʼkáwen, né꞉ne rahónʼa rahó꞉khwa íken.

⁸ Iáh tehiówenk ne thènen ahawáraʼke ne konhtitshénen né thikénhak tsi ní꞉ioht tsi ionenhéion khés ne konhtírhio konhwanawénhthon; né enhkarihónhni tehohiathátionsthe. Í꞉i ne Watiá꞉ner.

⁹ “Ratikwékon ne ratitsihénstatsis tsi enhontewénhnarakwe kí꞉ken kaianerénseras iewakatkáwen. Ne kíʼ, enkarihónhni enhotínike tánon enhonnhíheie, tsioríhwa iáh tehonatewenhnarákwen ne iotokénti kaianerénhseras. Í꞉i ne Watiá꞉ner tánon Í꞉i khehionhniénʼnis nahotiʼtokenhtíke.

¹⁰ “Ne khók ne ratsihénstatsi rahowátsire enwáton ne thènen ahónneke ne iotokéntis iewatkáwen; iáh kíʼ ónhka nakórenh thahónton ne thènen ahónhneke—iekaníhare nónhkak skát꞉ke ahatiterónhtake tó꞉ka ó꞉ni ne rahónha ronhwahiótenhse.

¹¹ Ók kíʼ ne ratsihénstatsi ronhwahiótenhse, né kwáh rahónha rahowístha sakohiathaninónhton tó꞉ka ó꞉ni ne rahonónskon ronahnakeráton, enwá꞉ton nahónhneke neká꞉khwas ne ratsihénstatsi roienáhon.

¹² Ne ratsihénstatsi sakoiénha tó꞉ka ónhkak wahotíniaʼke tánon iáh tehatsihénstatsi iáh kíʼ né thahónton ne thènen áraʼke ne iotokénti iewatkáwens.

¹³ Ók kíʼ ne ioteréhons tó꞉ka ó꞉ni ne tehiotetkháshion sakoiénha ne iáh othènen tehiakowíraien tánon ronwaninéha sahiónhtsien né rahónha tahonshaʼsakósnieʼne enwá꞉ton kíʼ ná꞉ieke ne ká꞉khwa ne ronwaníha roiená꞉hon tsi ratsihénstatsi íken. Ne khók ne ratsihénstatsi rahowátsire enwáton ne thènen ahónhneke.

¹⁴ “Tó꞉ka nónhkak ne iáh ratsihénstatsi tehowátsire náieke nahó꞉ten ne iotokénti iewatkáwen ne iáh tehiakonikonhrón꞉hni, ónenk tsi kwáh kanánon tsi enshonkwakáriaʼse ne ratsihénstatsi tánon 20-wáhsen iosénhtseronte ienhonwénhthaʼte.

¹⁵ Ne ratsihénstatsi iáh kíʼ tahenták꞉saʼte ne iotokéntis iewatkáwen

¹⁶ nashakoríhon ne iáh othènen tehiakoríhwaien né thènen áhieke; né kí꞉ken enhiakonhítsheron tánon enhiakoréwaʼte nètho nonhkweshón꞉ʼas. Í꞉i ne Watiá꞉ner tánon Í꞉i kónhnis nahiotokenhtíne ne iewatkáwens.”

¹⁷ Ne Roiá꞉ner wahorihónten ne Mahís

¹⁸ nahonthaháwen ne Aaron ó꞉ni ne sakohiohokónhas tánon nonhkwethakwékon Nisraerʼró꞉nonke ne tehioterihwasónhteres kaianerénhseras. Nónen nónhka Nisraerʼró꞉nons tó꞉ka ó꞉ni ne tihononhontsátes ne Israerʼró꞉nonhke ratiná꞉kere enhonterihwathénhtsiaʼte nahonteskónhten, tó꞉ka kén ne nahatirihwaiériʼte ne wararátstons khés ne kwáh thóh nihotinikonhró꞉ten ne iahóntkaʼwe, ne katshénen kwáh kíʼ iáh othènen tahiotsihiótarake.

¹⁹ Ne ahonwaié꞉na, ónenk tsi rátsinn enkénhake né kwáh iáh othènen tehiotsihiótare.

²⁰ Tó꞉ka thènen ne katshénen iatsiátkaʼwe né rotsihiótare, ne Roiá꞉ner iáh kíʼ tahaiéna.

²¹ Nónen nónhkak iahiónkatkwe ne skaríhwa aorihwáke íken rahonháke ne Roiá꞉ner, né꞉ne akananónhtʼthonke ne wararátston khés ne kwáh thóh nihiakonikonhró꞉ten tsi hiahóntkaʼwe, ne katshénen kwáh kíʼ iáh othènen tahotsihióhake tó꞉ka ne ahiakónhniaʼte nahonwaiéna.

²² Tó꞉sa othènen né iaháts꞉tats ne Roiá꞉ner ne katshénen ne teharonhwékonke khés ne rohiathakenhéion khés ne ahonwasiniákon, khés nahohiathanonhwát꞉sehke khés ne rostharónhnions ne rahonéhonkne. Kwáh kíʼ tó꞉sa iatsiátkaf nètho katshénen ne ietsienharákwahke ne ká꞉khwa ahonónhniaʼte.

²³ Tsi thóh nihiakonikonhró꞉ten tsi iahióntkaʼwe enwáton ne katshénen iatsiátkaʼwe né iáh tiehahiataiéri khés ne arèkho tehiotenaskwíson, ók iáh kíʼ thahónton nahonwaiéna ne ahónstonke nakananónkthonke wararátston íken.

²⁴ Tó꞉sa ne iástʼstatʼtse ne Roiá꞉ner ne katshénen kanaskwahsehrónhni. Iáh kíʼ thóh tekaianerensehró꞉ten ne tionhontsáke.

²⁵ Tó꞉sa ne iasehwát꞉kaf ne ká꞉khwa ahiotenathónhkwen ne katshénen ne tihononhontsáte nónhwe nithitsisehwahiaténha. Né nikanaskóten ne rotenathónkwen iáh tsehahiataiéri tánon iáh thahónton nahonwaiéna.

^26-27 Nó꞉nen ne tsionónskwaron owíra khés ne teiotinakaronhtón꞉a khés ne kaiatákeras enhonhnákerate, tó꞉sa teietʼtsikháshion ne ronisténha né꞉ne tsáta nónhta nikaríwes, ók thóh ne kíʼ enwáton ne iahisewáthate tánon enhonwaiéna ne ká꞉khwa ahiakónhniate.

²⁸ Tó꞉sa né꞉ne sahenhnísera ietsihiateskónhten ne tsionónskwaron tánon ne roiénha khés ne teiotinakaronhtónha tánon ne roiénha khés ne kaiatákeras tánon roiénha.

²⁹ Nónen né enshateriwathénhtiaʼte natsateskónhtatʼtse ne thatsenonhweráton ne Roiá꞉ner, ít꞉tser ne kaianerénhsera ne nahónton aieshaterihwathénhtsiaʼse;

³⁰ né sahenhnísera í꞉set tánon tó꞉sa othènen ne thènen ahí꞉senhre tsi nióre nóia ienhtsiórenhne.

³¹ Ne Roiá꞉ner ráton, “sewatewénhnarak nakerihwatátʼtsheras; Í꞉i ne Watiá꞉ner.

³² Tó꞉sa tasewáhaf natehénsera natsenhnatokenhtíke; onhkwetaʼkwékon Nisraerʼró꞉nonhke ónenk tsi enhionhkeriwaníratʼtse tsi watiatatokénti. Í꞉i ne Watiá꞉ner tánon Í꞉i konhionhniénhnis naisahiatatokénhtike;

³³ tánon Í꞉i tetkwahiatinekénhʼen ne Egypt né꞉ne Sewaní꞉io akénhake. Í꞉i ne Watiá꞉ner.”