Leviticus 17 - Ohiatonhseratokénti

Ne Onekwensatokenti

¹ Ne Roiá꞉ner wahorihónten ne Mahís

² nahonthahá꞉wenh ne Aaron tánon ne sakohiohokónhas tánon kanenhrakwékon ne Israerʼró꞉nonhke ne tehioterihwasónhteres.

^3-4 Nónhka Nisraerʼró꞉nons akonhwanonhwariákon ne tsionónskwaron tó꞉ka ó꞉ni teiotinakaronhtónʼa tó꞉ka ó꞉ni kaiatákeras né꞉ne ahonwátatʼtse ne Roiá꞉ner ne kwák tsiknónhwe nakénhake ók iáh kíʼ ne tsi iehionthawehiathákwa natohsehrákon tsi nónhwe nihénteron ne Roiá꞉ner waʼtewátiaʼke kíʼ ne kaianerénhsera. Wahatinékwahte tánon iáh kíʼ ónen ne tahonsahiakotená꞉thonkwe Rawenni꞉io rahonkwéta akénhake.

⁵ Tsi nikéntons tsi niwatró꞉ris kí꞉ken nètho nonhkweshón꞉as ne Israerʼró꞉nonhke ónenk tsi enthonwahawíten ne Roiá꞉ner konhtitshénens né tsi nikonwatinonhwariákhonsʼkwe ne kahentáke nónhwe. Ónenk tsi entʼkonhwatihiaténhaʼwe rahohénton ne ratsihénstatsi ne tsi iehiontawehiathákwa natohsehrákon tánon enhkonhwatinonhwariákon né꞉ne skaríhwa aorihwáke.

⁶ Ne ratsihénstatsi ónenk tsi ienhonekwenhsónhti aktónhtsie ne ietsienharákwahke né꞉ne tsi iehiontawehiathákwah tsi nonhnikáien natohsehrákon tánon enhóntʼtsahaʼte ne iorénhsens ne nahonsehró꞉ten tsi ahawerienhtí꞉ioste ne Roiá꞉ner.

⁷ Nonhkweshón꞉as Nisraerʼró꞉nonhke iáh ónenh tetsówenhk ne iáh tahotirihwatokénhake rahonháke ne Roiá꞉ner ne tsi akonhwatinonhwariákon ne rahotitsenenhókons ne kahentákes tsi ahonwateskónhtʼthaʼse ne kaiatákeras ótkon teskaierontare. Nonhkweshón꞉as Nisraerʼró꞉nonke ónenk tsi enhontewehiénton kí꞉ken kaianerénhseras né꞉ne tsi nénhwe.

⁸ Ne tsikʼhónka Nisraerʼró꞉nons tó꞉ka ó꞉ni ne tihononhontsátes ne kanakeraserákon ratinákere ne ronhnónha ienhatíthaʼte ne watéskonhte tó꞉ka ó꞉ni nó꞉ia nahiotónhake ne karihwihioserihokónhas

⁹ ne iahonwátatʼtse ne Roiá꞉ner ne tsikʼnónhwe ók iáh kíʼ ne tsi iehiontawehiathákwah natohserákon iáh kíʼ ne tahonsahiakotenathónkwen Rawenni꞉io rahonkwéta akénhake.

¹⁰ Tó꞉ka ónhka Nisraerʼró꞉nonhs tó꞉ka ó꞉ni ne tehononhontsátes ne skátʼne ratinákere enhatiwáraʼke ne shé꞉kon iotenekwénsa, ne Roiá꞉ner enshaʼkhók karathéni kíʼ tánon iáh kíʼ shé꞉kon Rawenni꞉io rahonkwéta tahonsahonatenathónkwen.

¹¹ Ne tsi konhnónhnhe ne kwáh tsikʼniatekónhti onekwenhsáke nónhwe nikonhnónhnhe, tánon né kíʼ ahoríhwa ne Roiá꞉ner rotenhnáhon kwáh akwékon nonekwénhsa ietsienharákwahke ahonthonwerónhtake né nahéren ahonsakahawíthonke nonhkweshón꞉as akorihwanerahák꞉tsheras. Nonekwénhsa, né natónhnets, é꞉ren kahawítha ne karihwánerens.

¹² Né kíʼ ahoríhwa ne Roiá꞉ner washakoró꞉ri nonhkweshón꞉as ne Israerʼró꞉nonhke né꞉ne ronónha khés ne tihononhontsátes né skátʼke ratinákeres tsi iáh tehiówenhk né thènen ahathiwárahke ne shé꞉kon iotenekwénhsa.

¹³ Tó꞉ka nónhka Nisraerʼró꞉nons khés né tihononhontsátes ne skátʼke rathinákere nakonhwaiéna ne katshénen khés notsiténha né꞉ne kwáh iotkwéniens, ónenk kíʼ tsi enhkonhwanekwenhsí꞉nekenhwe tánon ohontsáke enhonwéron tánon okénhra enhathiró꞉rohke.

¹⁴ Ne tsi konhnónhnhe ne kwaʼtsitnikonhtiʼhiató꞉tens tsi onekwenhsáke nónhwe nikonhnónhnhe, tánon né kíʼ aoríhwa ne Roiá꞉ner washakoró꞉ri nonhkweshón꞉as Nisraerʼró꞉nonhke nónhwe tsi iáh thahatiwáraʼke né shé꞉kon iotenekwénhsa tánon tó꞉ka ónhka thóh nenhiéhiere iáh kíʼ shé꞉kon Rawenni꞉io rahonkwéta tahonsahiakonathathónkwen.

¹⁵ Ónhka nónhkwe akénhake, Israerʼró꞉nons khés ne tihononhontsátes, nónhka ahiewáraʼke né katshénen ne thiʼkawenhní꞉io iawehéion khés né꞉ne konhtírio konhwanonhwariákon ónenk tsi enshatinóhare ne rahonatʼtserónhnia, enshontáwen ó꞉ni, tánon enhonteráraʼthe tsi nióre ienhiókaraʼwe ne kwáh ahonshahonatkweʼniensthónhake.

¹⁶ Tó꞉ka iáh toʼtahatí꞉iere, ónenk kíʼ tsi ne tenhontkáneren tsi nienhiáwenhne ne tsi iehiotók꞉te.