Leviticus 16 - Ohiatonhseratokénti

Né Wenhniserowaʼnénhke Ne Tionhthatenikónhrenhse

¹ Ne Roiá꞉ner wahotháraʼse ne Mahís nó꞉nen sihonenhéion ne tenihiáse Aaron sakohiohokónha ronhwatinonhwariákon né tsi wahonwátatʼtse ne Roiá꞉ner nótsire ne iáh tehiotokénti.

² Wahénron, “Tsró꞉ri ne tiathatekénha Aaron thóh né khók né nó꞉nen kwáh tkariwaiéri tsi nenhkaháwiʼke nonàken tsi ioniatarénhton niá꞉re tsi nónh꞉we ne kwáh iotokénti íken, tsioríhwa tsi éhtho nónhwe tsi iotsíkerare nenhkathotási é꞉neken tsi iotenonhthékon ne Ateriwaseronhniátshera Onerókwah. Tó꞉ka enhatewenhnónhti, kwáh kíʼ enhonwanonhwariákon.

³ Enwáton niahatháwehiaʼte tsi nónhwe ne kwáh tsiotokénti thohʼnèkhok kíʼ ne nónen thohiaténha ne tèro owíra né꞉ne kariwáneren aorihwáke tánon teiotinakarontónha rátsinn né꞉ne ahonteskónhthake aorihwáke.”

⁴ Ethòne ne Roiá꞉ner tahát꞉kaʼwe ne tehioterihwasónhteres karihonhnienhnhítsheras. Nohénton ne Aaron niaʼhatháwehiaʼte ne kwáh tsiotokénti nónhwe, ónenk kíʼ tsi enhatá꞉wen tánon ne hatʼtierónhniate ne ratitsihénstatsis rahonatʼtserónhnias: Noniatará꞉a wakóses tánon ne ná꞉kontiéiens, natsathána, tánon ne tehionhtenonhwaraʼnákstha.

⁵ Ne iená꞉keres ne Israerʼró꞉nonhke ónenk tsi entʼthónhion ne Aaron tenihiáse teʼnítsinn kahiatákeras né꞉ne karihwáneren aorihwáke tánon ne teiotinakaronhtónha né nènhne nahonteskónhthake aorihwáke.

⁶ Ónenk tsi né ienhót꞉kaʼwe ne tèro nahonwatéskonhthe né nahèren ahonsakahawíthonke ne rahónʼa rahorihwanerahák꞉tsheras tánon ne rahowátsire.

⁷ Ethòne ne tenihiáse kaiatákeras ienshakohiaténhaʼwe tsi iehionhthawehiatákwah natohsehrákon tsi nónhwe nihéntheron ne Roiá꞉ner.

⁸ Éhtho nónhwe nenhró꞉tion, tekanénhiaʼke énrasthe, nénhska tsi kaieronhnítston “Roiá꞉ner rahó꞉wenk” tánon nóia “né꞉ne Azazel rahó꞉wenk.”

⁹ Ne Aaron ónenk tsi enhoteskónhten ne kaiatákeras né꞉ne Roiá꞉ner ronhwarakwénhni tánon né iewatkáwenhk ne karihwáneren aorihwáke.

¹⁰ Né kaiatákeras tsi karákwen né nènhne ne Azazel rahorihwáke ónenk tsi Roiá꞉ner entʼthónhion tsienhrónhneke tánon iahonwenhtsiaʼthénke ienshonwatóri tsi ítres ne Azazel, ne nahónton éren akahawíthonke nonhkweshón꞉a akorihwanerahák꞉tsheras.

¹¹ Nónen ne Aaron enhoteskónhten ne tèro né꞉ne rahónʼa tánon ne rahowátsire rahotirihwanerahákʼtshera aorihwáke,

¹² tènhrahkwe ne watʼtsironhthákwah ónhtak enkaná꞉nonhke ne ioswenhthaʼtékha né tsi ientsienharáhkwa nentʼtháhaʼwe tánon tewatshanáke ne kwáh otʼthésera íken ne wenhserá꞉kon ionhtsienhkwaronhniatákwa tánon thóh nienhá꞉haʼwe tsi nónhwe ne kwáh tsiotokénti ít꞉ken.

¹³ Thóh rahohénton ne Roiá꞉ner enhát꞉tsahaʼthe ne kanetanó꞉ron ionhtsienkwaronhniaʼthákwa, tánon tsi nihioiénkwaroʼthe ne kanetanó꞉ron né enwaséhthaʼkwe nahotenontékʼtha Naʼterihwaseronhniátshera Ohneró꞉kwa né káti ne tó꞉sa ahatkátho tánon narénheie.

¹⁴ Enhatʼtháwa ne tèro rahonekwénhsa tánon rasnonsáke énratsthe tsi tehatstarokwahthánion ahohénton naʼtenonhtékʼtha tánon ethóhʼne tsáta nihiorihwáke né thensatsʼtharokwahthánion ahohénton ne Aterihwaʼseronhniátshera Ohneró꞉kwa.

¹⁵ Ethóhʼne ónen, enhononhwariákon ne kaiatákeras né꞉ne karihwáneren tsi ienhá꞉thaʼte né꞉ne onkweshón꞉a akorihwáke, ienhá꞉haʼwe nonekwénhsa tsi nónhwe nakwáh tsiotokénti í꞉ken, tánon athenontékʼthaʼke tsáta nihiorihwáke tenhastarohkwahthánion tánon ethóhʼne ahohénton ne Aterihwaseronhniátshera Oneróhkwa, tsi kíʼ nihohiéren ne tèro rahonekwénhsa.

¹⁶ Tó꞉ki kíʼ ní꞉ioht tsi enhaterihwaténtiaʼte ne orihwakahionhné꞉ha tsi entionhtaterón꞉kwaʼse né tsi nónhwe ne kwáh Tsiotokénti í꞉ken ne tsi niʼiawénhʼen tsi naʼtehonathaʼtsiatatsónston Nisraerʼró꞉nons tánon tsi nitsiawénon akwékon ne rahotirihwanerahák꞉tsheras. Thóh kíʼ ní꞉ioht tsi enhaterihwathéntsiaʼte tsi nòkwah tsi watóhsehrothe, tsioríhwa tsi kwáh satewatenatíhen nónhwe niwatóhsehrothe, né nènhne ne iáh tehiotkwéniens né thóh nónhwe.

¹⁷ Tsi nikaháwi ne Aaron ienhatáwehiaʼte tsi nónhwe ne kwáh Tsiotokénti í꞉ken tsi enhaterihwathéntsiaʼte norihwakahionhnéha nahonsahionthonhnakanónhni ne tsi nióre tentʼthahiákenhne, kwáh tó꞉sa ónhka natohserákon ahiésehke. Né nónenh né enhaterihwathéntsiaʼte norihwakahionʼnéha ne hiatehahiáti aorihwáke, tánon ne rahowátsire, tánon ne kanakerasehrakwékon akorihwáke,

¹⁸ ónenk tsi ietsienharákwaʼke niénrhenre né꞉ne ronhteskonhthákwa tánon naharihwatokéntisʼte. Ónenk tsi ostónha ienháhaʼwe ne tèro rahonekwénhsa tánon ostónha ne kaiatákeras rahonekwénhsa tánon akwékon tsi iosónhtons ne tsi tekahiosakérons ne ietsienharákwa enharó꞉sehron.

¹⁹ Ethò꞉ne kwáh thenhastarokwate tsáta niioriwà꞉ke ostonha nonekwensa rasnonsake enrastetsata niioriwake, ensanoharete, tanon enhatokenstiste ne tsi nateotiiatation ne ratitsaokonhas ne Israel.

Né Hiontenakthanónhna

²⁰ Nónen ne Aaron sonsahaweienénhtaʼne norihwakahionhnéha tsi saharihwatokéntisʼte ne kwáh Tsiotokénti nónhwe, ne kén hiotsé꞉tons ne tsi watóhserote tsi nónhwe nihénteron ne Roiá꞉ner, tánon ne ietsienharákwa, ónenk tsi entháwen ne Roiá꞉ner ne rónhnhe kaiatákeras né꞉ne Azazel ronhwarakwénhni.

²¹ Ónenk tsi tetsáron ne ratshaná꞉ke tsi tenhotshaʼnáren ranonhtsíne ne kaiatákeras tánon enharihwaníraʼte akwékon ne karihwahétkens, karihwánerens, tánon tsi iáh tehontewenhnarákwa nonhkweshón꞉as Nisraerʼró꞉nonhke, káti thoʼnòkwah ienhá꞉ren rannonhtsíne ne kaiatákeras. Ethóhʼne kíʼ ne ónhkak enhionthatiataráko ne kaiatákeras ienhonwasárihne iahonwenhtsiátʼthenke niénhre.

²² Ne kaiatákeras akwékon ienháhaʼwe ne rahotirihwaneraháktsheras kakʼnónhwe né꞉ne tsi nónhwe iáh ónhka tetsenákere ne tsi ionhwenhtsáte.

²³ Ethóhʼne ne Aaron atohsehrákon nienhénre, ensharishiónhko ne ratsihénstatsi rahotserónhnias né꞉ne rotieronhniáthonhte nohénton shiahatáwehiaʼte tsi nónhwe ne kwáh tsiotokénti ít꞉ken, tánon thóh nónhwe nenháien.

²⁴ Ónenk tsi thóh nónhwe nenshatáwen tsi nónhwe ne iotokénti í꞉ken tánon né énsrastste ne rahónʼa rahotsherónhnia. Ethóhʼne, ónenk tsi ienshahiákenhne tánon ne ienháthaʼte ne wateskonhte né nahéren ahonsakahawíthonhke né꞉ne rahónʼa rahorihwanerahák꞉tsheras tánon nonhkweshón꞉as.

²⁵ Ónenk tsi ietsehará꞉kwahke enhát꞉tsahaʼte ne katshénens ahoresénhtseras né꞉ne karihwáneren aorihwáke.

²⁶ Né rónhkwe né iehohiaténha ne kaiatákeras ne iahonwenhtsiatʼthénhke ne tsítʼres ne Azazel ónenk tsi enshanóhare ne rahotsherónhnia tánon enshatáwen nohénhton tahontháre ne tsi rotenáthaien.

²⁷ Ne tèro tánon ne kaiatákeras ronáston ne karihwáneren ahorihwáke, né꞉ne rahotinekwénhsa tkahiónton ne tsi nónhwe ne kwáh Tsiotokénti né nahéren ahonsakahawíthonke ne karihwanerahák꞉tshera, ónenk tsi ástste ne tsi ronanáhthaien nienshatíhaʼwe tánon enwatsaháthonke. Kanéhonk, owáron, okarós꞉tha ónenk tsi enwatsahathónhake.

²⁸ Tsi nikáien nenhát꞉tsahate ónenk tsi enshanóhare ne rahotsherónhnia tánon enshatháwen nohénton iénsre tsi nónhwe niwatená꞉thaien.

Ne Rateriwaketats Kaiatakeras

²⁹ Ne tekarihwasonhterónhnions né nahiakonhtanóronste tsi nénhwe. Noieríhaton nenhwenhniserakéhaton Nisraerʼró꞉nons tánon ne tihononhontsátes né skat꞉ke ratinákere ónenk tsi enhonnenhthónhtsete tánon iáh tehiówenhk ne thènen ahotihióten.

³⁰ Né nenhwenhniseráteʼke norihwakahionhnéha ónenk tsi enwaterihwathentsáthonʼke nahonshahonwatiʼrónkwaʼse tsi nòkwah ne rahotirihwanerahák꞉tsheras, ne káti ne kwáh í꞉ken tsi ahonsahonatʼkweniensthónhaʼke.

³¹ Nètho enwenhniseráteke kwáh í꞉ken tsi enhiotokéntike, né nénska nenhiakentanó꞉ronhste tánon kwáh iáh othènen tahiakohióten. Kí꞉ken tehioterihwasónhteres kwáh tsiókonhte tsi enhiakentanorónsthake né꞉ne tsi nénhwe thóh nenhiothónhake.

³² Ne ratsihenstowánen, tkarihwaiéri tsi ní꞉ioht tsi ronhwariwaʼniráti tánon waterenhnaiéhni ne tahonsaonatʼthákwen ne roʼníha, né enhaterihwathéntsaʼte ne orihwakáhion tsiotonhnakanonhnithákwa. Né enhatʼtserónhniaʼte ne ratitsihénstatsi rahonatʼtserónhnias

³³ tánon enhaterihwathéntsaʼte norihwakáhion nahonsakarihwatokentísthonke ne tsi nónhwe ne kwáh Tsiotokénti í꞉ken, tánon ne iotsiéton tsi watóhsehrote tsi nónhwe nihénteron ne Roiá꞉ner, ne ietsienharákwa, ne ratsihénstatsi, tánon ne kanenhrakwékon ne kanakeraserákon.

³⁴ Kí꞉ken tehioterihwasónhteres ónenk tsi thóh ní꞉ioht tsi enwaterihwathenhtsáthonke énska ne tsiósera ne nahonsahonwatiʼrónhkwahse Nisraerʼró꞉nons ne rahotirihwaʼneraháktsheras. Káti ne Mahís akwékon thóh naháiere tsi kíʼ nihotenhnáhon ne Roiá꞉ner.