Leviticus 15 - Ohiatonhseratokénti

Ne Iáh Tehonaterihwatʼkwéniens Ronhnónhkwe

¹ Ne Roiá꞉nertashakáwen ne Mahís tánon ne Aaron ne tehioterihwasonhterónhnions kaianerénhseras

² nonhkweshón꞉as Nisraerronónhke. Nónen nónhka ne rónhkwe tenhoskénhniaʼse ne rahiéronhke, tánon ne tehoskénhniaʼse iatehiotkwéniens,

³ Tánon né kí꞉ken ne kaianerénhsera tsi iáh tehotkwéniens tsi watoskénhniaʼse: tó꞉ka kén ne rahiéronhke watkanawénhte tsi watoskénhniaʼse, tó꞉ka ó꞉ni kén ne rahiéronhke waʼka:khásʼte tsi watoskénhniaʼse, iáh kíʼ tehotkwéniens ne rahonháke.

⁴ Kwáh tsík nikanatʼtóten tsi nónhwe nenhátsien tó꞉ka ó꞉ni nahá꞉rathe tsi iáh tehotkwéniens.

⁵ Nónhka iahieiéna ne rahonák꞉te

⁶ tó꞉ka ó꞉ni thóh ahiónhtsien nètho rónhkwe tsi nónhwe nihentskwáhraʼkwe ónenk tsi entienó꞉hare nakotsherónhnia tánon entionhtáwen, tánon kíʼ tehiakohiathatiónhake tsi nióre ienhiókaraʼwe.

⁷ Nónhka iahonhwaiénhna kíʼ rónhkwe tsi tehoskénhniaʼse ónenk kíʼ tsi entienó꞉hare nakotsherónhnia tánon entionhtáwen, tánon kíʼ tehiakohiathátionhke tsi nióre ienhiókaraʼwe.

⁸ Tó꞉ka ne rónhkwe ne tehoskénhniaʼse ónhkak ashakoniskeró꞉seraʼwe né꞉ne kwáh iakotʼkwéniens, nètho ónhkwe ónenk kíʼ tsi enhtienó꞉hare nakotsherónhnia tánon entionhtáwen, tánon kíʼ thenhiakohiatátionhke tsi nióre ienhiokaraʼwe.

⁹ Tsík ní꞉ioht ne iakoshatensthákwah tó꞉ka ó꞉ni naniskwáhra akénhake né꞉ne rónhkwe tehoskénhniase thóh enhátsien iáh kíʼ thaʼhiotkweniensthónhake.

¹⁰ Nónhka iahieiéna tsík nahó꞉ten akénhake nètho rónhkwe renskwáhrakwe iáh kíʼ tehiotkwéniens tèken kwáh tsi nióre iehiókarahwe. Nónhka ahéhawe tsi nahó꞉ten akénhake nètho rónhkwe renskwáhrakwe ónenk tsi enskanoharénionke ne rahotserónhnia tánon enshatáwen, tánon kíʼ tehohiathationhthónhake tsi nióre ienhiókaraʼwe.

¹¹ Tó꞉ka ne rónhkwe tehoskénhniaʼse ónhkak tsi nítsion ne iáh tethotierénhton tehotsóhare, ónenk kíʼ tsi ensehsenó꞉hare ne satsherónhnia tánon enshatáhwen, tánon kíʼ tenshahiathationʼtónhake tsi nióre ienhiókarawe.

¹² Kwáh tsík nikatsetó꞉ten notára nètho rónhkwe ienhaiéna ónenk tsi tenhkaríhthonke, tánon kwáh tsík nikatshóten ne óiente nahó꞉ten nètho rónhkwe ienhaiéna ónenk tsi enskanoharéhaʼke.

¹³ Nónen ne rónhkwe shoiewenhtáhon tsi tehoskénhniaʼse, ónenk tsi tsáta nónhta enhaterá꞉rate tánon ethòne enshanoharénion ne rahotsherónhnia tánon enshatáwen né꞉ne ionékano ionewerothakéha onékanos énrasthe, tánon kwáh kíʼ enshotkweniensthónhake.

¹⁴ Ne satekónhha:ton niwenhniserakéhaton tekatsitenhseráke tó꞉ka ó꞉ni tekeniʼiáse oríhte ienshakohiaténhawe tsi iehionhthawehiatákwah natohsehrákon tsi nónhwe nihénteron ne Roiá꞉ner tánon ratsihénstatsi entʼtháwen.

¹⁵ Ne ratsihénstatsi skaiáta ienhá꞉thaʼte né꞉ne karihwáneren aorihwáke tánon ne skaiáta né nènhne ne nahonteskónhthake aohorihwáke. Tó꞉ki ní꞉ioht tsi enhaterihwaténtsiate ne orihwakahionhnéha atonhnakanonhnítshera ne rónhkwe rahorihwake.

¹⁶ Nónen ne rónhkwe ienhatatátkaʼwe, ónenk tsi kwáh rahiathakwékon tsi enshá꞉thawen, tánon kíʼ tenhohiathationtónhake tsi nióre ienhiókarawe.

¹⁷ Tsi nahó꞉ten noniatará꞉a hionhniáton tó꞉ka ó꞉ni nó꞉na né thóh ienhkárane ne iehothatatkáwenh ne rónhkwe ónenk tsi enskanoharéhake, tánon kíʼ tenhiotionthónhake tsi nióre ienhiókaraʼwe.

¹⁸ Nó꞉nen ne rónhkwe tánon ne iónhkwe skát꞉ke rohnarátonhne ónenk tsi enshiátawenh, tánon kíʼ tenhothihiatationthónhake tsi nióre ienhiókaraʼwe.

¹⁹ Nónen ne iónhkwe iotenhnitaráni, iáh kíʼ tahiotkwenienstónhake né꞉ne tsáta nónhta nikaríhwes. Nónhka iakonhwaiéna iáh kíʼ tahiakotʼkwenienstónhake tsi nióre ienhiókarawe.

²⁰ Kwáh tsík nahó꞉ten ne kaʼnónhwe nahóntsien tó꞉ka ó꞉ni nahónrate tsi nikaríhwes iotenhnitaráni tsi iáh kíʼ tehiotkwéniens.

^21-23 Nónhka iahieiéna nahonákʼte tó꞉ka ó꞉ni tsi nónhwe niwátsiens ónenk kíʼ tsi entienó꞉hare nakotsherónhnia tánon entionhtáwenh, tánon kwáh tehiakohiathationhthónhake tsi nióre ienhiókaraʼwe.

²⁴ Tó꞉ka ne rónhkwe skát꞉ke enhiáraʼte tsi nikaríwes iotenhnitaráni, né kíʼ enhonwathennhráro tsi iáh tehiakotʼkwéniens tánon kíʼ iáh tahotkwenienstónhake né꞉ne tsáta nón꞉ta nikaríhwes, tánon ne kwáh tsík nikanattó꞉ken tsi nónhwe nenhárate tsi iáh tahiotkweniensthónhake.

²⁵ Tó꞉ka ne tsiotʼthonwísen karíhwes tsi enhiotenhnítaraʼse ienhiokonhthákwenh kíʼ tsi iáh tahiotkweniensthónhake tsi nikaríhwes hiotenhnitaráni, kwáh kíʼ tsi ní꞉ioht nó꞉nen ne iorihwató꞉ken tsi hiotenhnitaráni.

²⁶ Kwáh tsík nikanakʼthóten tsi nónhwe nahónraʼte tánon nahóntsien tsi iáh kíʼ tahiotkweniensthónhake né nikaríhwes.

²⁷ Nónhka ienhieiéna iáh kíʼ tehiotkwéniens tánon ónenk tsi enhtienó꞉hare nakotserónhnia tánon enhtionhtháwen; ienkakónhthaʼkwe tsi nióre ienhiókaraʼwe.

²⁸ Nónenh tenhkátana tsi hiotenhnitaráni, ónenk tsi tsáta nónhta nikaríhwes enwateráhraʼte, tánon thó꞉ne kíʼ kwáh entsiotkweniensthónhake.

²⁹ Ne shatekónhaton niwenhniserakéhaton ónenk tsi tenihiáse otsiténha tó꞉ka ó꞉ni oríhte ienhiakoiaténhaʼwe ratsihenstaʼtsíne né tsi iehionhthawehiatákwa natohserákon tsi nónhwe nihéntenhron ne Roiá꞉ner.

³⁰ Ne ratsihénstatsi né ienhá꞉thaʼte ne karihwáneren aorihwáke tánon nó꞉ia né nènhne ne watéskonhte aorihwáke, tánon thóh kíʼ ní꞉ioht tsi enhaterihwaténhtsiate norihwakáion tsionhtonhnakanonhnitákwa nahorihwáke.

³¹ Ne Roiá꞉ner wahoró꞉ri ne Mahís nashakoronhkáten nonhkweshónhas Nisraerʼró꞉nonhke tsi nòkwah tsi iáh tehonatʼkwéniens, ne káti ne tó꞉sa tahatítsionsʼte tsi nónhwe nihenténhron, né꞉ne kwáh asénhnonh nónhwe tsi ronatenáthaien. Tó꞉ka tohnenhatí꞉iere, kwáh kíʼ enhonwatinonhwariákon.

³² Né kí꞉ken ne kaianerénhseras tsi nòkwah ne rónhkwe né tehoskénhniaʼse tó꞉ka ó꞉ni ne rohiakénhen ne rahiátakon,

³³ né tsiotonhwísen nó꞉nen iotenhnitaráni, tó꞉ka ó꞉ni ne rónhkwe skát꞉ke ronahráthonʼne né tsiotonhwísenh ne shiʼhiorihwakáion iáh tehiotkwéniens.