Leviticus 12 - Ohiatonhseratokénti

Tsi Ahonsakonhtonhnaʼkanónhni Ne Konhnónhkwe Nó꞉nen Wahotiwiraiéntaʼne

¹ Ne Roiá꞉ner tahá꞉wen ne Mahís ne tekarihwasónhteres kaianerénseras

² né꞉ne onhkweshón꞉as Nisraerʼró꞉nonke akorihwáke. Né tsáta nónhta onakènhke tsi náhe tsowiraientáhon ne roskenrakéte ne iónhkwe, kwáh kíʼ tsiontonhkwetatkwéniens ísken, tsi kíʼ ní꞉ioht ne iaʼtewenhníthake tsi iotenhnitaránis.

³ Né saʼtekonháton niwenhniserakéhaton, ne raksá꞉a ónenk tsi enhonwawarakwétaron.

⁴ Ethóhʼne shé꞉kon asenhniwáhsen-áhsen niwenhniseráke kwáh ientsiotkweniensthónhake né tsi níkon wakanékwa; kwáh iáh tehioterihwíson ne thènen iakaiéna ne iotokénti tó꞉ka ó꞉ni niahontáwehiaʼte ne iotokénti atohsehrákon tsi nióre ienkáhewe nahonsonhtonhnakaʼnónhni ienwatésha.

⁵ Né꞉ne kaiéri-iawénhre niwenhniseráke nónen ne iónhkwe ieksháʼa iowiraientáhon, kwáh kíʼ iáh tehiokwéniens, tsi kíʼ ní꞉ioht nónen iotenhnitaráni. Ethóhʼne iá꞉iak niwáhsenh-iá꞉iak niwenhniseráke nióre ientsiotkweʼniensthónhake ne tsi níkon ionekʼkwáhon.

⁶ Nó꞉nen ioteweienhnenhtáhon tsi tsiotonhnakanonhníhon, né꞉ne roskenrakéte tó꞉ka ó꞉ni ieksáha akénhake, ónenk tsi ienhionthawehiatákwa ienhohiaténhaʼwe né énska tehahoserihiákon teiotinakaronhtónʼa owíra né꞉ne ahonwateskónhten tánon oríhthe né nenhné꞉e ne karihwanerahákʼtshera aorihwáke.

⁷ Ratsihénsthatsi kwáh rahónʼa ienhá꞉ren nahothatawítshera rahohénton ne Roiá꞉ner tánon né enhaterihwathéntsaʼte tsi nihiorenhnáhon nahèren ahonsakahawítonhke tsi iáh tehiotkwéniens, tánon kwáh kíʼ entsiotkwenienstónhake. Né kí꞉ken, èhtho, nihioterihwaiénhni ne iónhkwe nónen iowiraienhtháhon.

⁸ Tó꞉ka ne iónhkwe iáh thaʼkakarakwéni ne teiotinakaronhtónha owíra akénhake, ónenk kíʼ tsi tenihiáse oríhthe enhtsakohiaténhaʼwe, ne saiátha né꞉ne ahonwateskónhten tánon ne sahiátha né nenʼnéʼe ne karihwaneraháktshera aorihwake, tánon ratsihensthatsi enhaterihwatenhtsate ne tsi nihiorenhnáhon naehren ahonsakahawitonhke tsi iáh tehiotkweniens, tánon káti kwáh entsiotkweniensthonhake.