Leviticus 10 - Ohiatonhseratokénti

Tsi Nihiáwens Nahiontewenhnónhti Ne Rawenni꞉io Raoʼianerénseras

¹ Ne Aaron sakohiohokónhas, né꞉ne Nadab tánon ne Abihu, snihiatátʼtshons ianíhawe watsironthákwa ónhtak, wísks niwaswénhthakes wanétaronh ne kanatsákons, tánon wanétha ó꞉ni ne ionhtsienkwaronniathákwa, tánon Roiá꞉ner wahón꞉hion. Ók kí꞉ken ótsire iáh né teiotokénti, tsioríhwa ne Roiá꞉ner tsi iáh né tehotenhnáhon né naníhiere.

² Thontaiawénstsi ne Roiá꞉ner ótsire tahathénieʼte, tánon kwáh wahakotsiatátʼtsahaʼthe tsi watʼníheie thóh rahohénton ne Roiá꞉ner.

³ Ethòne ne Mahís wahawénhase ne Aaron, “Né kí꞉ken rotharákwenhne ne Roiá꞉ner ne sahénron, ‘Ratikwékon nón꞉ka enhiontsiótenhse ónenk tsi enhatikwéniensʼthe natiathatokentítshera; kwáh enkhenésthen naʼtiatanerakwáhtshera tsi nòkwah nakonkwetaʼshón꞉a.’” Ók ne Aaron thontahakónthaʼkwe satʼthihothatónhni.

⁴ Ne Mahís iashakó꞉nonhke ne Mishael tánon ne Elzaphan, né sakohiohokónhas ne Uzziel, né꞉ne Aaron rononhwáha, tánon washawénhase, “Kenh nonthásene tánon iashenhí꞉saf ne sewarasehokónhas rahotiʼierónhtas éhren sheniháwit ne tsi iotokénti watóhseroʼthe tánon thóh iasheʼní꞉ien ástste tsi watená꞉thaien.”

⁵ Káti tá꞉ne tánon rahonatʼtserónhniaʼkwahke wanhiʼiéna ne ronenhéion rahotiʼierónhtas tánon ástste ne tsi watenáthaien nianhí꞉haʼwe, kwáh kíʼ tsi nishakoró꞉ri ne Mahís.

⁶ Ethòne ne Mahís washakawénhase Aaron tánon ne shaʼkohiohokónhas Eleazar tánon ne Ithamar, “Tó꞉sa ne iáh thaʼhisehwatkhorothíʼen tó꞉ka ó꞉ni nahisehwaʼraʼtsiónko ne sehwatʼtserónhnia nahisheʼwénestʼte nahisewatʼtsiónhnionhke. Tó꞉ka thóh nensehwá꞉iere, kwáh kíʼ enshewénheʼie, tánon ne Roiá꞉ner kwáh kanakeraserakwékon tsi enshaʼkonákwahse. Ók ratikwékon ne roná꞉tsiakes Nisraerʼró꞉nons enwáton né nahontsiónhnion tsi nòkwah kíʼ kén kenhéiat tsioríhwa tsi ótsire thóh naká꞉sa ne tsi Roiá꞉ner thotʼtsiratheniéton.

⁷ Tó꞉sa ónenk hionshaʼsewahiáken ne tsi tsionhthawehiathákwa natóhsera ashé꞉ken iótʼtheron ensewénheʼie, tsioríhwa tsi sewahiathatokentíhon tsi entsisewaienáron ne Roiá꞉ner.” Káti thóh nahatí꞉iere tsi kíʼ nashakoró꞉ri ne Mahís.

Tsi Nihotiʼhianerenseró꞉tens Ne Ratitsihénsthaʼtsis

⁸ Ne Roiá꞉ner wahawénhase ne Aaron,

⁹ “I꞉se tánon ne sanekenteronhtsheraʼsónhas tó꞉sa entisewatáwehiaʼte natohsehrákon tsi nónhwe nikíteron nónen sewanikirá꞉shon ne onenharataʼsehontserákeri tó꞉ka ó꞉ni nonentákeri, tó꞉ka thóh nensewáiere, kwáh kíʼ ensewénheʼie. Né kí꞉ken ne kaianerénsera ónenk tsi ensehwakwéniensʼthe tsi nienhsewatwatsiríne.

¹⁰ Ónenk tsi ensewaienterésthaʼkwe tsi natetsiatʼthíhen tsi nahó꞉ten ne Rawenni꞉io rahówenk tánon né thikáhionk íken, tsi naʼtetsiatthíhen ne iáh tehiotkwéniens tánon ne iotkwéniens.

¹¹ Tánon sateriwaiénhni nasherihónhnien nonhkweshón꞉as Nisraerʼró꞉nonhke akwékon ne kaianerénsehras tsi nishakothatíhon ne Roiá꞉ner ne ronónha tsi nitsawénon rahonháke ne Mahís.”

¹² Ne Mahís waʼshakawénhase ne Aaron tánon ne tenihiáse iateshonathaʼténron sakohiohokónhas, né꞉ne Eleazar tánon ne Ithamar, “Iasehwáhaf nonátsias ne tkaiéston nètho iotekhwathaténron ne ronhwáwi ne Roiá꞉ner, né sewatenatarónhniat ne iáh thaʼtekaiéstons ne watʼthenkwátha tánon thóh sewaná꞉tharat ákta ne ietsienharáhkwahke, tsioríhwa kí꞉ken tkaiesthánions kwáh íken tsi iotokénti.

¹³ Ónenk tsi thóh nónhwe nenhsewáke tsi nónhwe nihiotokénti íken; nètho né꞉ne í꞉se sáhwenhk tánon ne seiohokónhas tsi nitkháa ne ká꞉khwa ne Roiá꞉ner ronhwáwi. Thóh kíʼ ní꞉ioht ne Roiá꞉ner tsi rakeríhonte.

¹⁴ Ók níse tánon ne sawá꞉tsires enwáton naisewáke notskwèna tánon nonáken osína né꞉ne iewatkáwen tsi katokénston nathatawítshera tánon ne katokénston ronhwakariatʼthénhni ne Roiá꞉ner ne ratitsihénsthatsis rahotirihwáke. Enwáton ne ásehke kaknónhwe ne kwáh tsiotkwéniens íken. Kí꞉ken tkaʼiesthánions i꞉se ieshá꞉wi tánon ne seiohokónhas né꞉ne tsi nikáien níse shá꞉wenk tsi nitsawénon ne iewatʼkáwen tsi skaríhwa íken nonhkweshón꞉as Nisraerʼró꞉nonhke.

¹⁵ Ónenk tsi thóh nenhkaháwike enthatíhaʼwe nonàken oshí꞉na tánon notskwèna nónen ne iorèsen ienhóntkaʼwe ne ká꞉khwa akénhake tsi entʼthónhion ne Roiá꞉ner. Kíʼ nahoténsons í꞉se sáwenk tánon ne seiohokónhas ne tsi nénhwe, kwáh kíʼ tsi nihorihwíson ne Roiá꞉ner.”

¹⁶ Ne Mahís waharihwanónhton tsi nòkwah ne kaiatákeras né꞉ne karihwanerahákʼtsera aorihwáke tánon waharihwáronhke ónenk watʼtsaháton. Né wakarihónhni washakonákwahse ne Eleazar tánon ne Ithamar, tánon waharihwanón꞉hton,

¹⁷ “Onhnihiotséren tsi iáh thóh nónhwe thaʼtesewatskáhons tsi nónhwe nihiotokénti íken ne karihwáneren aorihwáke tsi iewatkáwen? Kwáh íken tsi iotokénti íken, tánon ne Roiá꞉ner í꞉se theʼtsisewáwi né nahón꞉ton né꞉ren ahonsakahawíthonhke naʼkorihwanerahaʼkʼtsheras ne ienákere kanakeraserákon.

¹⁸ Tsi iáh tetkahiónhton nonekwénhsa ne tsi iotokénti natohserákon, thóh nónhwe nihiowenhkénʼen nathahiʼsewatsʼkáhonke ne watéskonhte, tsi kíʼ niwakatʼró꞉ri.”

¹⁹ Ne Aaron watharihwasehráko, “Tó꞉ka shí꞉ken ahonkékonh ne karihwanerahákʼtshera aorihwake ne iewakʼkawen nón꞉wa wenhniserá꞉tekwe, ahó꞉rihwanonhwehon onhtèken ne Roiá꞉ner? Nonhkweshón꞉as iahóntkaʼwe ne rahotirihwanerahákʼtshera aorihwáke nónhwa wenhniseráte rahohénton ne Roiá꞉ner, tánon tahatíhaʼwe ne watéskonhtes, ók shé꞉kon kíʼ kí꞉ken tehiotenonhhiánitons tsi nonhtiatháwen nakonháke.”

²⁰ Nónen ne Mahís sahothónteʼne kí꞉ken, wahawerientí꞉io kíʼ.