Leviticus 1 - Ohiatonhseratokénti

Né꞉ne Kontihiataʼkwé꞉kon Tsi Akonwanateskónhten Katʼtshénens

¹ Ne Roiá꞉ner atohsehrákon tahawenhnhínekenʼne tsi nónhwe nihénteron, Mahís iahó꞉nonhke tánon tahá꞉wenh ne tekontahsonhterónh꞉nions kaianerénhseras

² né꞉ne Israerʼró꞉nons nahatiʼkwéniensʼthe nónen henthatíʼiesthe ne karihwiʼiosehokónhas. Nónen enthésesʼthe ne katshénen akonwateskónhten, tó꞉ka nónh꞉wa kaknikáien tsi nikónhti ne senáskwahiens tó꞉ka ó꞉ni kakʼnikáien ne satshénens teiotinakaronhtón꞉a tó꞉ka ó꞉ni kahiatákeras.

³ Tó꞉ka kák tsi níkonh ne shanáskwahiens enthésesʼthe nakonhwaʼteskónhten, ónenk tsi né꞉ne rátsinn tsionónskwahron enthetsiaténhawe né꞉ne kwáh iáh othènen tehotsihiótare. Ónenk tsi thóh nónhwe nahthéntsʼtastshe ne tsi iehiontawehiatákwa ne rahotohsehrákon ne Roiá꞉ner tsi nónhwe nihéntheron ne káti nahónhton nètho Roiá꞉ner nahoiéna.

⁴ Ónenk tsi ranonhtsíne tentsiaʼnisnonʼsháren, tánon káti kwáh enhonhwaiéna nahonwateskónhten né nahonsakarakéwenhke ne sarihwaneraháktsheras.

⁵ Tánon thóh nónhwe nenhtienonwariákon ne tsionónskwahron rátsinn, tánon ne Aaronite ratsihénsthatsi ienhótatʼtse nonekwénhsa ne Roiá꞉ner tánon ethóhʼne thóh ienhó꞉ti ne kaiéri natekahiosaiens ne ientsienharakwahke né thóh nónhwe nikáien tsi iehionthawehiathakwah nató꞉sera.

⁶ Ethò꞉ne entsiénsehron ne katshénen tánon entsiasó꞉we,

⁷ tánon ne ratsihénsthaʼtsi enhaientharónhnion ne ietsienharákwahke tánon enhatsiró꞉ten.

⁸ Enhatiʼtsiró꞉ten ne tekonhwahiatsiakhónnion ne katshénen, ehíkare nonónhtsi tánon ne iorèsenhs.

⁹ Ónenk tsi ensehnó꞉hare ne kahiathaʼkónsons tánon ne onàken kashinaʼkésons, tánon ne roʼterihwatsʼteríston ratsihénsthatsi kahiathakwékon tsi enhateskónhten ne ietsienharákwahke. Tsi tewenhserateʼníhons kí꞉ken kákhwa ne tkaiéston né rawerientiʼióstha ne Roiá꞉ner.

¹⁰ Tó꞉ka teséstha énska ne shaʼtshenenhókons teiotinakaronhtónha tó꞉ka ó꞉ni kahiatákeras, ónenk tsi rátsinn enkénhake né꞉ne iáh othènen tehotsihiótaʼre.

¹¹ Ónenk tsi othoréke nokwàhti ne ietsienharákwa nónhwe nenhtsenonhwariákon, tánon ne ratsihénsthatsi ne kaiéri naʼtekahiosakérons ne ietsienharáhkwa ienhonekwenhsónhti.

¹² Nónen tshiaʼtsóhon, ne roʼterihwatsteríston ratsihénsthatsi enhatsiró꞉ten akwáhkon ne waʼtsóhons, thóh enkárake noʼnónhtsi ó꞉ni ne iorèsens.

¹³ Ónenk tsi ensenó꞉hare ne kahiathaʼkónsons ó꞉ni nonàken kashinakésons, tánon ne ratsihénsthatsi enhotátʼtse ne Roiá꞉ner nahonteskónhthake tánon akwékon enwatʼtsahatónhaʼke ne ietsienharákwahke. Ne tewenhseratheníhons ne tkaiéston kákhwa ne rawerientiʼióstha ne Roiá꞉ner.

¹⁴ Tó꞉ka shí꞉ken otsiténha tisaiéston nahonteskónhthake, ónenk tsi oríhthe enkénhake.

¹⁵ Ne ratsihénsthatsi ónenk tsi ienháthaʼte tsi ietsienharákwahke, tenhoniaratháʼse, tánon enhátsahathe noʼnónhtsi ne ietsienharákwahke. Ne rahonekwénhsa enkanonwaʼkénston ákta ne ietsienharákwahke.

¹⁶ Éhren enhaháwiʼte ne tsi rahkwahrákwah tánon nó꞉tsiakes nahoténsons tánon thóh ienhó꞉ti ne nàkon nokwáhti ne ietsienharáhkwah tsi nónhwe ne wakenronthákwen iehiakóties.

¹⁷ Enhaiéna ne rahonerahónhtsas tánon enharáhtions ne rahoierónhta tsi tenhakháshion, iáh thaʼharáhtion ne rahowèhia, tánon ethóhʼne rahiathaʼkwékon tsi enhátʼtsahathe ne ietsienharáhkwahke. Ne tsi tewenhseratheníhons ne rawenhrientiʼióstha ne Roiá꞉ner.