Joshua 8 - Ohiatonhseratokénti

Tsi Wahatiié꞉na ó꞉ni Wahatirihwénhtho Ne Kanatowá꞉nen Ai

¹ Ne Roiá꞉ner wahawénhase ne Joshua, “Ratikwé꞉kon ne ronhterí꞉ios iasehiaʼténhaf tánon Ai niahásewe. Tó꞉sa sewáteron tó꞉sa ó꞉ni sewaʼnikonhrók꞉ten. Enʼtsion natesenhniéntshera tsi nòkwah ne Ai ronhnonhtí꞉io; ne rahonkweʼtashón꞉as, ne rahonatowá꞉nen, tánon nonhóntsa Í꞉se sewáwenk enhwáton.

² Thóh naʼsewaiéras ne Ai ó꞉ni ne aohnonhtihiótshera tsi ki nisehwaiérahse ne Jericho tánon ne ahonhnonhtiiótshera, ók ki nónhwa enwáton nahisewatié꞉nawatste nahoienthátsheras ó꞉ni nahotsenenhó꞉kons. Sewathateweienénhtan niahisewatiaʼtónhti ne kanatowá꞉nen tasewatonhnékten tasehwaswaténi.”

³ Sók ki ne Joshua wahathatewehienénhthaʼne ne Ai niáre skátke ne rahonkweʼtashón꞉as ronhterí꞉ios. Áhsen niwáhsen niwenhniaweheʼtseráhsen niháti washakohiaʼtharáko né꞉ne kwáh thahonkweʼtí꞉ios tánon satetsiókaras shiasakotó꞉ri

⁴ tsi nikarihò꞉ten kí꞉ken: “Í꞉se naʼkaná꞉tati thasehwatáset, ók tó꞉sa sóhtsi ahí꞉nonh tkénhak; sewathateweienénhtan niahisewatiaʼtón꞉ti.

⁵ Nakonhkweʼtashón꞉as tánon ní꞉i ienhiákwe ne tsi kanatowá꞉nen. Nó꞉nen ne ronhnónhkwe ne Ai enhtsionkihiatiaʼtón꞉ti, tenhtsiakwatkaraténi tánon enhiakwatè꞉ko, kwáh ki tsi nihionkwaiéren ne tiotierénhton.

⁶ Kwáh ki enhionkísere tsi nió꞉re ne kwáh iakihiaʼtinekén꞉en ne tsi kanatowanénhke. Enhonnonhtónhnionwe ronónha ki wahakihiaʼtekwáhse, tsi ki nihionkwaiéren ne tiotierénhton.

⁷ Ethò꞉ne enhshewatotháshion tsi sehwathasehthónhne tánon ensehwaiéna ne kanatowá꞉nen. Ne Roiá꞉ner Sewaní꞉io enhthetsítsion.

⁸ Ne nó꞉nen ensewaiéna ne kanatowá꞉nen, sewatenaténhtaf, kwáh ki tsi nihotró꞉ri ne Roiá꞉ner. Ne kí꞉ken tsi niietʼtsinàhon.”

⁹ Káti ne Joshua iashakoténiethe, tánon thóh niahón꞉ne wahontasehtà꞉na tánon thóh nón꞉we iahonterá꞉rate, tsi iaʼtewatshénthos nokwá꞉ti ne Ai ó꞉ni ne Bethel. Ne Joshua tsi ne nón꞉we nahonhná꞉taien thóh wahasonhtíhiake.

¹⁰ Sihioronhkéstsi ne Joshua wahatkétsko tánon iashakò꞉nonhke ne ronhterí꞉ios. Ethò꞉ne ne raónha ó꞉ni ne shakotihenténhse Nisraerʼró꞉nons iashakotihéntense Ai niahón꞉ne.

¹¹ Rathikwekonhátie ne ronhterí꞉ios iahontakwaríshiate ne kanohakwehní꞉ioke tsi iehionthawehiathákwa ne kanatowá꞉nen tánon wahonthatoserothónhnion né꞉ne othorè꞉ke nokwá꞉ti, né꞉ne tsi naʼtetiá꞉tere nahonráhkwakon tánon ne Ai.

¹² Kák nónhne wísk niwenhniaweheʼtseráhsen nihá꞉ti iashakohiaʼténhawe tánon washakohiatásehthe ne tsi iaʼtewatshénthos nokwá꞉ti ne kanatowanèn꞉ke, tsi naʼtetiátere ne Ai tánon ne Bethel.

¹³ Ne ronhterí꞉ios ronathateweienenhtàhon nahonterí꞉io ne kwáh rahthinenhrakweʼní꞉io né꞉ne othorè꞉ke nokwá꞉ti ne kanatowanèn꞉ke kanènhraien tánon ne ronátiaʼkes ne nénhne tsi iaʼtewatshénthos nokwá꞉ti kanènhraien. Ne Joshua ahonráhkwakon ne nón꞉we nahasonhtíhiake.

¹⁴ Nó꞉nen ne ronhnonhtí꞉io ne Ai washakó꞉ken ne Joshua rahonkweʼtashón꞉as, iostó꞉re tsi wahatorhiáneron. Raónha tánon ne rahonkweʼtashón꞉as ahonráhkwakon ne Jordan niahón꞉ne nahonterí꞉io Nisraerʼró꞉nons kwáh né sahokwénhra ne tiotierénhton, iáh tehotheriènh꞉tare tsi ó꞉nenh thó꞉wa rashón꞉ne ahonthahonwatiaʼtón꞉ti.

¹⁵ Ne Joshua tánon ne rahonkweʼtashón꞉as akénhake oná꞉ken sahónhneʼte, tánon shahontè꞉ko tsi nón꞉we ne iáh othé꞉nen tekaiénthakwe ne kanakerahserá꞉kon.

¹⁶ Ratikwé꞉kon ne ronhnónhkwe ne tsi kanatowanèn꞉ke ratikwé꞉kon skátke iehonwatinónhkon nahonwatísehre, tánon tsi nahonwásehre ne Joshua, kwáh sénha í꞉non nió꞉re tahonhtónhsehre ne kanatowanèn꞉ke.

¹⁷ Iaʼtehionkwè꞉takes ne Ai nónhwe wahonwatísehre ne Israerʼró꞉nons, tánon ne kanatowanèn꞉ke tshiaʼtekaniononhóntson, iáh ónhka takonwaterí꞉iose.

¹⁸ Ethò꞉ne ne Roiá꞉ner wahawénhase ne Joshua, “Iatesó꞉hiak ne shasíkwara ne Ai nón꞉we; í꞉se thonhiawì꞉re.” Ne Joshua thóh naháiere tsi ki nahonwahró꞉ri,

¹⁹ tánon kwáh tsi nihiostó꞉re wahanenʼtsakétsko, ne ronhnónhkwe ne ronathaséhtons iostó꞉re tsi wathatítane, tsi kanatowanènhke niahathítatke tánon wahontiaʼtakwehní꞉ioste. Kwáh óksak wahatitsiró꞉ten ne kanatowanènhke.

²⁰ Nó꞉nen ne ronhnónhkwe ne Ai nón꞉we oná꞉ken ionsahathikenhénhion, wahontká꞉tho tsioienkwahrakéthote tsi karonhiá꞉te niehiotsenhkwarí꞉non. Kwáh iáh othé꞉nen thetsóien ne ahonsahatiniákenhne, tiorì꞉wa ne Israerʼró꞉nons tsi niká꞉ien ne tsi tsiohenthakwénhrare niehothitatkhé꞉non ó꞉nen thonshahonkarahténi niahonwanatiaʼtón꞉ti.

²¹ Nó꞉nen ne Joshua tánon ne rahonkweʼtashón꞉as wahontká꞉tho ne ronátiaʼkes iekonhwatiaʼthóntion ne kanatowanèn꞉ke tánon ionathaté꞉kha, thonshahontkaraté꞉ni tánon tahontháshawenh washakotinonhwariaʼkhón꞉nion ne ronhnónhkwe ne Ai nón꞉we.

²² Ne Israerʼró꞉nons ne kanatowanèn꞉ke rathiʼterónhtakwe tahón꞉ne tánon wahontià꞉taren ne tsi waterí꞉io. Káti ne ronhnónhkwe ne Ai wahóntoke tsi kwáh í꞉ken tsi tehonwatihonwarón꞉ni ne Israerʼró꞉nons, tánon ratikwé꞉kon ronhwatinonhwariaʼkhón꞉nion. Iáh ónhka tetsoniakén꞉en, tánon iáh ónhka ne nón꞉we nahonhnónhnheke

²³ nékok ne ronhnonhtí꞉io ne Ai. Ronhwaiénen nenhnè꞉e tánon Joshua tsítres niehonwahiaʼténha.

²⁴ Ne Israerʼró꞉nons kwáh onhkweʼtakwé꞉kon shakotinonhwariaʼkhón꞉nion ne tehontaʼtsons ne tsi ionhontsakwénhrare ne kanakerahserá꞉kon tsi nón꞉we niahonwatísehre. Ethò꞉ne Ai nonhshahónhne tánon kwáh kanenrakwénhkon tsi washakotinonhwariaʼkhón꞉nion ne nón꞉we.

^25-26 Ne Joshua iehokonhthákwen Ai nón꞉we iatehahó꞉ien ne rahosíkwara tánon iáh eʼtà꞉ke tehó꞉ien tsi nió꞉re kwáh niatehionkwè꞉thake ronhwatinonhwariaʼkhón꞉nion. Kwáh kanenhrakwé꞉kon ne Ai nónhwe tsi ronhwatinonhwariaʼkhón꞉nion ne wenhniserátekwe—tékeni-iawénhre tewenhniaweheʼtseráhsen ronhnónhkwe ó꞉ni konhnónhkwe.

²⁷ Ne Israerʼró꞉nons wahontenaskwarakwenháton ó꞉ni natenhninónhseras ne rotiienàhon ne tsi kanatowanènhke, tsi ki nihoró꞉ri ne Roiá꞉ner ne Joshua.

²⁸ Ne Joshua wahatenonhkwatekthánion ne Ai tánon ne iatioʼtá꞉tere ne ioriwaieshá꞉hons. Tánon shé꞉kon nón꞉wa wenhniserá꞉te thóh ní꞉ioht.

²⁹ Wahonwanonhwarià꞉khon ne ronhnonhtí꞉io ne Ai tánon karonhtà꞉ke wahonwahiaʼtiháren tsi nió꞉re iahokárawe. Ne shiakarahkwénhne ne Joshua washakò꞉nahne ne rahoierónhta nahonshahatinihiontá꞉ko ne karonhtà꞉ke, tánon thóh nón꞉we iahonáhti ne tsi iehionthawehiaʼthákwa ne kaná꞉takon iotenhenrahkáronhthe. Ne wahatiroróksthe ne tehiotenonhianì꞉ton onénhia wahatitsthokó꞉ten, ki nón꞉wa nikahá꞉wi shé꞉kon é꞉tho ní꞉ioht tsi wè꞉ne.

Ne Joshua Wasakowennhanót꞉thase Ne Rawenni꞉io Raoianerénhsera Nonhkweshón꞉a Ne Israerʼró꞉nonke Ne Tsi Ionónhthe Ne Ebal

³⁰ Ethò꞉ne ne Joshua thóh tsi Ionónhthe ne Ebal wahahón꞉hnien ne Rawenni꞉io ne Ietsienharáhkwa, né꞉ne Sakoní꞉io ne Israerʼró꞉nonke.

³¹ Onahkénhke ne Joshua tánon nonhkweshón꞉as Nisraerʼró꞉nonke tsi Ionónhthe ne Ebal niahón꞉ne. Shiahónhnewe, Joshua toká꞉ra nihá꞉ti ne ronhnónhkwe wasakoró꞉ri, “Tsónhni ietsienharáhkwa ne Roiá꞉ner Onhkwa ní꞉io rahoriwà꞉ke. Thóh ní꞉ioht tsi tsiónhni tsi niwatró꞉ris ne Mahís Raohianerenhserá꞉kon. Mahís, né꞉ne Roiá꞉ner rahonátshera, ráhwen onénhia nahó꞉ten tsiónhniát ne ietsienharáhkwa né꞉ne iáh thahó꞉ten ne tekakweʼtaron ne karístatsi hionsthasónhas.” Sók ki ne ronhnónhkwe wahonhnón꞉ni ne ietsienharáhkwa. Ethò꞉ne onhkweʼtakwé꞉kon wahonwateskónthase ne Roiá꞉ner, tánon ó꞉ni wahonwatátse tsi niká꞉ien ne wateskónthe nahónton ahón꞉neke.

³² Thóh nón꞉we, rahotihénton Nisraerʼró꞉nons, ne Joshua thóh onenhià꞉kes wahahiathónhnion tsi wathananetháko ne Mahís raoianerénhseras tsi ki nihohiathónhnion ne Mahís.

³³ Nisraerʼró꞉nons, skátke ne shakothihentènhses, ne ronaterihóntons, ó꞉ni ne ratiriwénhthas, ó꞉ni ne tihononhontsá꞉tes ne skátke ratinákeres, skatísons nokwá꞉ti wathatí꞉taʼne ne Roiá꞉ner Raoteriwaseronhniá꞉tshera í꞉wa kaneró꞉kwahkon, tehontatkonhshakánere ne Levitical rotikhá꞉res tsi niká꞉ien ne thothí꞉ha. Satekanenhrí꞉hen nonhkweshón꞉as ronatswathénion tsi Tionónhte ne Gerizim niehonatieráton tánon nó꞉ia ne satekanenhríhen ronaswathénion nonhné꞉e tsi tionónhte Ebal nénhne iatehatikà꞉nere. Né꞉ne Roiá꞉ner raonátshera Mahís thóh ní꞉ioht tsi rotró꞉ri thóh nahatí꞉iere nó꞉nen ienhkáhewe nahatiiéna ne kaiathaterítshera.

³⁴ Ethò꞉ne ne Joshua kwáh rowénhthe tsi kahianerenserakwé꞉kon wahawenhnanó꞉ten, skátke ne kaiataterítsheras ó꞉ni ne karewathátsheras, kwáh ki tsi nikahiatónhnions ne kahiatonhserá꞉kon ne kaianerénhsera.

³⁵ Kwáh orihwakwé꞉kon ne rahotsawenhrátsheras ne Mahís tsi washakowenhnanóthase ne Joshua ne kanenhrakwé꞉kon ne iakonhitiokwaró꞉ronhne, thóh konhtihiáthare ne konhnónhkwe ó꞉ni ne ratitsaokónhas, ó꞉ni ne tihononhontsá꞉tes ne skátke ratinákeres.