Joshua 7 - Ohiatonhseratokénti

Ne Achan Wahatatié꞉nawaʼse Tsi Nahoʼténhsons Kaiénthakwe Ne Jericho

¹ Ne Roiá꞉ner washakoʼtiawénhratse Nisraerʼró꞉nonke ne tó꞉sa othé꞉nen iehatíhaf ne Jericho akaiénthake né꞉ne akariwathóntonhke tánon iáh tehonatewenhnarákwen. Rónhkwe né꞉ne Achan ronhwáiats iáh tehotewenhnaráhkwen tsi nihonhwaró꞉ri, tánon káti ne Roiá꞉ner wahotenaʼkwawénhratse tsi nòkwah ne Israerʼró꞉nons. (Ne Achan ne roiénha ne Carmi tánon ne rotheréha ne Zabdi, tánon thóh nónhwe nihahià꞉tare ne Zerah rahotiʼthá꞉rakon, né꞉ne nihiorihwáha né꞉ne Judah rahotitióhkwa.)

² Ne Joshua kenhnihatíha ronhnónhkwe iashakothéniete ne Jericho nonhtahónhne tánon Ai niahónhne, né꞉ne kanatowanénhke nakon nokwahti ne Bethel, ákta ne Bethaven, wahonwatì꞉nahne nahontonhontsatʼkénhsera. Nó꞉nen shihonatenhtion,

³ sahonwaró꞉ri ne Joshua: “Iáh othé꞉nen tekariwástha nónhka iakonhwatiaʼtónti ne Ai. Tó꞉ka tékeni tó꞉ka ó꞉ni áhsen niwenhniaweheʼtseráhsen nihionkwè꞉thake iasehiaténiet. Tó꞉sa kenhnenhrakwé꞉kon ne ronhterí꞉ios iasehiathéniet nahonteriiósehra; iáh tekanatowá꞉nen.”

⁴ Káti kaknónhwe ne áhsen niwenhniaweheʼtseráhsen niháti Israerʼró꞉nons iashakonatiaʼtónhti, ók wahonwenhnónhnien nahonsahónkete.

⁵ Ne ronhnónhkwe ne Ai nónhwe sahonwanatekwáthe ne tsi iotenhenrahkà꞉ronhte ne tsi kanatowá꞉nen kwáh tsi nió꞉re ne tsi thatinenhiokwátstha tánon kák non ne áhsen-niwáhsen-iá꞉iak niháti wahonwatinonhwarià꞉kon tsi hionsahonanonhtatsnenhtonhátie. Ethò꞉ne ó꞉nen ne Israerʼró꞉nons wahonhnikonhrókten tánon wahotiʼterónhne.

⁶ Ne Joshua tánon ne shakotihenténhse Israerʼró꞉nons wahatiratiónhko ne rahonatʼtserónhniat tsi nihotiʼnikonhráksenhs, ohontsà꞉ke wahonthatiaʼtónhti hohénton ne Roiá꞉ner Raoneró꞉kwah ne ateriwaʼsehronhniá꞉tshera í꞉wa, tánon tsiahó꞉karahwe tsi thóh ratihiaʼtáien, ronahkèn꞉rare ne ratinonhtsí꞉ne nahonhnénesthe tsi rotiʼnikonhráksens.

⁷ Tánon ne Joshua wahèn꞉ron, “Sanonhtí꞉io Saiá꞉ner nonhtié꞉ren tsi kwáh teskwahiaiákton ne Jordan? Né꞉ne iaskwatsakwarí꞉si tsi nòkwah ne Amorʼró꞉nons? Ne nahionkihià꞉tonhte? Onhnonhtié꞉ren tsi iáh í꞉se naʼkaniatharáti ne Jordan teteskwénhteron?

⁸ Nahó꞉ten aʼkí꞉ron, O Saiá꞉ner, ó꞉nen ne Israerʼró꞉nons shonákthon tsi nónhwe nihón꞉nes ne tehontaʼtsions?

⁹ Ne Canaanites ó꞉ni onhkweʼtakwé꞉kon ne tsi kanakerahserá꞉ien enhatirihwà꞉ronhke. Kwáh tenhionkiwá꞉nake tánon kwáh iakwahkwé꞉kon enhionkinonhwarià꞉kon! Tánon ethò꞉ne onhónenh nenhséhshiere nahontásehne ne sharenhsarónhtsera?”

¹⁰ Ne Roiá꞉ner wahawénhase ne Joshua, “Satkétsko! Onhʼnonhtié꞉ren thóh ní꞉ioht tsi ohontsà꞉ke shatsiónhni?

¹¹ Israerʼró꞉nons wahatirihwanérahke! Wathatíhiake naterihwaʼsehronhniá꞉tshera nakonhà꞉ke né꞉tho kheró꞉ri nahontié꞉nawatste. Iehothíha tsi nahoʼténhsons ne watstháshion nakarihwaieshá꞉ton. Wahatinénsko, wahonʼnó꞉wenhthe, tánon rahonawenhsónhas iathatí꞉iesthe.

¹² Ne ki aorì꞉wa ne Israerʼró꞉nons iáh thahathikwé꞉ni nahonterí꞉io ne tehontaʼtsions. Sahónkete ne tsi rónhnes tiorì꞉wa ronónha ó꞉ni ronhwanatstháshion nahatirihwaiésa! Iáh ské꞉kon skátke tahonsetenésehke nék kók tó꞉kaʼken ensehrihwathónthe tsi nahoʼténhsons ne iesharó꞉ri ne tó꞉sa iá꞉shawe!

¹³ Téstann! Shasehionnhaserón꞉ni nonhkweshón꞉ʼas tánon sehieweienhnéntan naʼkhénton nahontahónhne. Sheró꞉ri nahonathateweienhnentàhon nenhiorénhne, tiorì꞉wa tsi Í꞉i ne Watiá꞉ner Khení꞉io ne Israerá꞉ke, ken nahó꞉ten wá꞉tsien nakíron: ‘Israerʼró꞉nons sewatienawáston tsi nahoʼténhsons kwahró꞉ri ne ahisewarihwà꞉tonhte! Iáh thahisewakwé꞉ni nahisewaterí꞉io ne tesewataʼtsions tsítkwah akwé꞉kon étren entsisewaháwithe thinahorihoʼténhsons!’

¹⁴ Káti sheró꞉ri ne oronhkè꞉ne shothitioʼkwátsons ohénton nenhthonwathihiaʼténhawe, shothitharaʼtsions. Tsi nikenʼtaró꞉ten nenhkerá꞉ko ohénton nenʼthónhne, skawatsiraʼtsions. Ne kahwá꞉tsire nenhkhehiaʼtará꞉ko ohénton nenhtʼthón꞉ne, shathihiaʼtátsions.

¹⁵ Tsi niká꞉ien ne ronhwathihiaʼtará꞉kwen tánon rathí꞉hawe ne watʼkénstons kwáh enhonwanatiataʼtsáhate, skátke ne rahowá꞉tsire tánon tsi nahoʼténhsons ahoiénthake, asè꞉ken watehenserowá꞉nen wasakoiénhase ne Israerʼró꞉nonke tánon waʼthá꞉hiake nakateriwaʼsehronhniátshera.”

¹⁶ Oronhkéstsi nohiasahiorénhne ne Joshua ne Israel ákta niasakohiaʼténhawe, shothitiokwatʼtsions, tánon né꞉ne raotitióhkwa ne Judah wahonwathihiaʼtará꞉ko.

¹⁷ Iashakohiaʼténhawe ne Judah rahotitióhkwa, shothitaratʼtsions, tánon né꞉ne Zerah raotiʼtá꞉ra wahonwathihiaʼtará꞉ko. Ethò꞉ne ohénton iashakohiaʼténhawe ne Zerah nahotiʼtharó꞉ten, shathiwatsiráktsions, tánon né꞉ne Zabdi rahowá꞉tsire wahonwathihiaʼtará꞉ko.

¹⁸ Ethò꞉ne ki ne Zabdi raowá꞉tsire ákta niashakohiaʼténhawe, sathihiataʼtsions, tánon ne Achan, ne roiénha ne Carmi ó꞉ni ne roteréha ne Zabdi, ne wahonwathihiaʼtará꞉ko.

¹⁹ Ne Joshua wahawénhase, “Koniénha, orihwí꞉io satró꞉ri kén꞉en rahohénton ne Roiá꞉ner, ne Sakoní꞉io Nisraerʼró꞉nonke, tánon serihwaní꞉rat. Takró꞉ri ó꞉nenh tsi nishatié꞉ren. Tó꞉sa shatheʼniénten naskerihwasénhten.”

²⁰ “Tó꞉kenske,” ne Achan tsi wathariwaʼsehrá꞉ko. “Wakerihwanéren tsi nòkwah ne Roiá꞉ner, Israerake Sakoní꞉io, tánon ken ki niwakatié꞉ren.

²¹ Tsi nahoʼténhsons iehionkwáha wakatkátho tsi nihiohiánere Babylonihiaró꞉non tehiontewehiarákwah, tánon kák꞉non ne wísk nikakonhtserá꞉ke nihióksthe kawistará꞉ken, tánon skakonhrétʼtsa owistanó꞉ron ishiʼnónhwe ne skakónhtsera nihióksthe. Tsi nió꞉re tsi waʼtewakathonhóntsose hiahákhawe. Enseʼtshén꞉ri wakashé꞉ton nakatohserá꞉kon, kawisthará꞉ken tewakenonhkhonniáton.”

²² Sók ki ne Joshua iashakothéniethe ronhnónhkwe, iathonráthathe tsi tewatóhserote tánon wahatiʼtshén꞉ri ne watʼkénstons kwáh thóh nónhwe tó꞉kenske niwasenhtónkwe, kawisthará꞉ken thanonhkhonniátonkwe.

²³ Tahathihiá꞉kenhwe natosehrá꞉kon, Joshua tsítres niahathíhawe tánon rathikwé꞉konh ne Israerʼró꞉nons, tánon rahohénton ne Roiá꞉ner wahatí꞉ien.

²⁴ Ne Joshua, skátke nonhkweshón꞉as ne Israerʼró꞉nonhke, wahonwaié꞉na ne Achan, ne kawistará꞉ken, ne tehiontewehiarákwah, ne skakonhrét꞉tsa owistanó꞉ron, skátke ne Achan rahonekenʼteronhtieraʼshón꞉as ó꞉ni ne rahohiaʼtasehtieraʼshón꞉as, rahotienenhó꞉kons tionónskwahrons, ó꞉ni ne teiotinakaronhtónhas, rahotó꞉sehra, tánon nohiásons nahorihoténhsons shé꞉kon ahoiénthake; tánon iahonwahiaʼténhawe nahoráhwakon ne kaʼnikonhraksénhtsera.

²⁵ Tánon ne Joshua wahénron, “Onhnonhtié꞉ren tsi thóh nió꞉re tsi taskwahawíten ne thahionkwahnikónhraren? Ne Roiá꞉ner énthion ne tahisaʼnikónhraren!” Onhkweʼtakwé꞉kon káti wahonwanenhióhiake ne Achan tsi nió꞉re iaʼthatikónhten; tánon ó꞉ni wahonwatinenhióhiake ne rahowá꞉tsire tánon wahonwanatiataʼtsáhathe ó꞉ni tsi nihoientaʼtseraiénthakwe.

²⁶ Kenthonhiowá꞉nen onénhia wahatitstoʼkó꞉ten ne rahiátake, shé꞉kon nónhwa wenhniserá꞉te niwè꞉ne. Ne ki tiorì꞉wa shé꞉kon ne nónhwe ne konhwanaʼthónkwa ne kaʼnikonhrakséntshera ahonráhkwakon. Ethò꞉ne ki ne Roiá꞉ner iáh ó꞉nenh teshothenakwawenhrá꞉ti.