Joshua 5 - Ohiatonhseratokénti

¹ Ratikwé꞉kon ne Amorʼró꞉nons ronhtinonhtí꞉ios né꞉ne entiè꞉ne nokwáhti iotiéton ne Jordan ó꞉ni ratikwé꞉kon ne Cannanites ronhtinonhtí꞉ios ne aktónhtie ne Mediterranean Kaniatarakeʼkó꞉wa wahatiriwarónhke né꞉tho Roiá꞉ner tsi rostatʼtháton ne Jordan kaniataratátie tsi nió꞉re nonhkweshón꞉ʼas Nisraerʼró꞉nonke iathatihiá꞉iake. Wahonateronhiénten ó꞉ni wahonnikonhrókten né꞉ne Israerʼró꞉nons rahotiríhwa.

Ne Ronhwatiwarahkwè꞉taron Ne Gilgal Nónhwe

² Ethò꞉ne ne Roiá꞉ner wahoró꞉ri ne Joshua, “Shathasaronhniánion né꞉ne onénhia nahó꞉ten tánon sewarahkwè꞉taron ne Israerʼró꞉nons.”

³ Káti ne Joshua thóh ki naháiere tsi nahorihónten ne Roiá꞉ner, tánon washakowarahkweʼtarónhko Israerʼró꞉nons ne tsi ionónhthe né꞉ne konhwanaʼtónhkwa Ionhthatewarahkwetharónhtha iononhtháhere.

^4-6 Nó꞉nen nonhkweshón꞉ʼas sathonthahonténhti ne Egypt, ratikwé꞉kon ne rotiskenrakéhte shihonwatiwarahkwétharon. Ethosà꞉ne, tsi nikarí꞉wes ne kaiéri niwáhsen nihioserá꞉ke nonhkweshón꞉as ne rothiriwahiò꞉te ne tahonhnonhontsihià꞉ke ne iahonwenhtsathènhke, iáh ne sahiátha ne rakshà꞉a tehonwawahrakwè꞉tharon. Káti ó꞉ni, tsi iahontókten ne thó꞉ne ratikwé꞉kon ne ronhnónhkwe né꞉ne iaʼtekaiéri tsi tiʼthotíhion nahontshotaʼrón꞉ni ne sathonthahonténhti ne Egypt wahonhníheie tiorì꞉wa tsi iáh tehonwawenhnaráhkwen ne Roiá꞉ner. Kwáh ki tsi nihorahrátston, iáh tehonwatirihwá꞉wi nahonatkátonhke ne ióskats ó꞉ni iohontsí꞉io né꞉tho tsi shakorahratsténhni ne sakotisoʼthonkonhkén꞉en.

⁷ Ne ronhwatihiohokónhas né꞉tho ronhnónhkwe iáh nonhwénhton tehonwatiwarahkwè꞉taron, tánon ne kí꞉ken nonenhrahse ratinekwenhsatátie né꞉tho Joshua washakowarahkwè꞉tharon.

⁸ Ne shahonwatiwarahkwè꞉tharon ne sonhtésha, kwáh kanenhrahkwé꞉kon wahóntien tsi nónhwe nihonatenataiéntakwe tsi nió꞉re hionshahonatewirónhnien.

⁹ Ne Roiá꞉ner wahawénhase ne Joshua, “Nónhwa wenhniserá꞉te kwáh étren satkháwite natehénsera tsi nihietsinaskónhniskwe ne Egypt.” Ne ki tiorì꞉wa né꞉tho watená꞉taien ne konhwanaʼthónkwah Gilgal, Ne Hebrew ne kasénhna ne nén꞉ne kéntons “Éren kahawíton.” Né꞉tho kasénhna shé꞉kon ne konhwáiats.

¹⁰ Tsi nikarì꞉wes Nisraerʼró꞉nons ronahnathaiénthakwe ne Gilgal nónhwe ne tsi iohenthakwénhrare ákta ne Jericho, wahonteʼnikonhró꞉ri ne é꞉neken wathohesthákwa ne noʼkharasné꞉ha nohénton ne kaiéri iawénhre shiwenhniserá꞉te ne wenhnì꞉thare.

¹¹ Nó꞉ia sahiorénhne ne thontié꞉renhte wahónhneke ne kákhwa ne Canaan nónhwe nihiothonhníhon: né꞉ne kanatsakeríton tánon né꞉ne watenatharónhni ne iáh thaʼtekaiéston ne ionttenhkwátha.

¹² Thothontáshawen ne kanà꞉taro iáh thatetsiosénhen ne karonhià꞉ke, tánon Nisraerʼró꞉nons iáh ó꞉nen thé꞉nen theshotinatará꞉ien. Thothontáshawen ne wahón꞉neke ne kákhwa ne Canaan nónhwe niwathónhnis.

Ne Rateriioserakweʼní꞉io Ne Roiá꞉ner Rahonkwè꞉ta Ne Ronterí꞉ios Wahothotáshien Ne Joshua

¹³ Tsi nikarì꞉wes ne Joshua ákta ne Jericho í꞉reskwe, thonthaiawénstsi wahóken rónhkwe rahohénton í꞉rathe, waʼsarowá꞉nen raháwe. Ne Joshua rahiatákta niaháre tánon wahoriwanóntonhse, “Í꞉se ken nénska akonhkwè꞉ta ne ronhterí꞉ios, katónken thetewatà꞉tsons?”

¹⁴ “Iáh ne kakniká꞉ien akénhake,” ne rónhkwe wathariwaʼsehrá꞉ko. “Tsi kén꞉en í꞉kes í꞉i ne kenenhrakweʼní꞉io ne Roiá꞉ner rahotióhkwa ne ronhterí꞉ios.” Ne Joshua ohontsá꞉ke wahathatiaktiénenhte tsi nahokwéniensthe tánon wahèn꞉ron, “í꞉i ne shanátsera, shénshion. Nahó꞉ten teshatonhontsóni tsi nátiere?”

¹⁵ Tánon ne Roiá꞉ner rahonkwè꞉ta ne ranenrakweʼní꞉io ne ronhterí꞉ios wahoró꞉ri, “Tesharathási, ohontsatokentíke nónhwe níserate.” Tánon káti ne Joshua tonaháiere tsi ki nahonwaró꞉ri.