Joshua 4 - Ohiatonhseratokénti

Nonhkweshón꞉as Nisraerʼró꞉nonske Wahatinenhiotónhnion Tékeni Iawénhre Nikanénhiakes Iahiakawehiaráhkwen Tsi Nihoié꞉ren Ne Roiá꞉ner

¹ Nó꞉nen kanenhrakwé꞉kon sathatihiáiake ne Jordan, ne Roiá꞉ner wahawénhase ne Joshua,

² “Tékeni iawénhre niháti sehiataráko, satihiataʼtsions tsi nihothiʼtaró꞉tens,

³ Sehrihónten tékeni iawénhre nikanénhiakes iehatíko ne satekaniataríhen ne Jordan, kwáh tsi nónhwe nihátakwe ne rokhá꞉res. Sehró꞉ri iehatíhaf ki onénhias tánon thóh nón꞉we iehatí꞉ie tsi nónhwe nenhsewaná꞉taien nenhiò꞉karawe.”

⁴ Ethò꞉ne ne Joshua iashakonónhke ne tékeni iawénhre niháti ne shakohiaʼtharákwen,

⁵ tánon washakohró꞉ri, “Wás Jordan niahásewe ahohénton ne Aterihwaʼseronhniá꞉tshera ne Roiá꞉ner Sewaní꞉io Raoneró꞉kwa. Tsi sewahiatatʼtsions tesehwanénnienhiaf taʼsewanenhshà꞉ren, né꞉ne skatʼtions tsi nikenhtarákes ne Israerʼró꞉nonke.

⁶ Kí꞉ken onénhias ne enhiakawehiarakwenhní꞉hake nonhkweshón꞉as tsi nihoié꞉ren ne Roiá꞉ner. Ishiʼnonhwéha, ne ieʼtsiienhokón꞉as enhatirihwanón꞉ton ki onénhias nahó꞉ten kénhtons ne sharihwá꞉ke,

⁷ tánon kwáh ensehró꞉ri né꞉tho kaniataratátie ne Jordan wakká꞉taʼne tsi watnekí꞉ne ne nó꞉nen ne Roiá꞉ner Roneró꞉kwa Naterihwaʼseronhniá꞉tshera thóh í꞉wah watkaniaʼtarihiáke. Kí꞉ken onenhiaʼsón꞉as kwáh tió꞉konte tsi enhiakawehiarakweníheke nonhkweshón꞉as Nisraerʼró꞉nonhke tsi nihiawénhen ne ken nón꞉we.”

⁸ Ne ronhnónkwe wahatísehre tsi nishakonáhon ne Joshua. Kwáh ki tsi nihorihónte ne Roiá꞉ner ne Joshua, tékeni iawénhre nikanénhiakes iahatíko ne satekaniatharíhen ne Jordan, né꞉ne skanenhiátsons ne shothitarátsons rahotirihwà꞉ke ne Israerʼró꞉nonke, iahatíhawe tsi nón꞉we thóh naná꞉taien, tánon thóh nón꞉we nahatikéron.

⁹ Ne Joshua tékeni nónhne iawénhre nikanénhiakes wahanenhiotónhnion ne satekaniataríhen ne Jordan, tsi nón꞉we niháthakwe ne rokhá꞉res ne rahawákwe Nateriwaʼseronhniá꞉tshera Oʼneró꞉kwa. (Nonenhiasónhas shé꞉kon thóh khakè꞉rons.)

¹⁰ Ne rokhá꞉res thóh ratà꞉kwe ne satekaniataríhen ne Jordan tsi nió꞉re akwé꞉kon é꞉tho naháwenhne tsi ki nihorihónte ne Roiá꞉ner ne Joshua nashakohró꞉ri nonhkweshón꞉as tsi nahatí꞉iere. Ne kí꞉ken tsi nihotenhnàhon ne Mahís. Nonhkweshón꞉as watotisteríhen wathatiniatarihiáke.

¹¹ Nónen ratikwé꞉kon í꞉se nakaniatharáti shehón꞉nes, ne rokháres ne raháwe ne Roiá꞉ner Raoneró꞉kwa nateriwaʼseronhniá꞉tshera thóh í꞉wah rahotihénton nonhkweshón꞉a niaháhe.

¹² Ne ronhnónkwe ne Reuben rahotiʼtá꞉rakon nón꞉we nihatihiátare ó꞉ni ne Gad tánon ne saʼtekanenrí꞉hen ne rahotitióhkwa ne Manasseh, ronatateweienhnenhtàhon nahonterí꞉io, iathatihiáiake hohénton nonhkweshón꞉as, tsi ki nishakohró꞉ri ne Mahís tsi nahatí꞉iere.

¹³ Rahohénton ne Roiá꞉ner kák nónhne kaiéri niwenhniawehetseráhsen niháti ronatateweienhnenhtàhon nahonterí꞉io iathatihiáiake ne tsi tiohontsakwénhthare ákta ne Jericho.

¹⁴ Tsi nahá꞉iere ne Roiá꞉ner ne wenhniserá꞉theʼkwe wahonónhnien nonhkweshón꞉as Nisraerró꞉konhke tahiatihiató꞉rethe ne Joshua tsi nironhkweʼtowá꞉nen. Kwáh tsi nirónhnheskwe tsi ronhwakweniénsthakwe, kwáh ki tsi nihonwakweniénsthakwe ne Mahís.

¹⁵ Ethò꞉ne ne Roiá꞉ner wahoró꞉ri ne Joshua

¹⁶ nahoró꞉ri ne rokhá꞉res ne ranorokwénhawe naterihwaʼseronhniá꞉tshera né꞉tho í꞉wah nahonthaharáthen ne Jordan.

¹⁷ Ne Joshua thóh ki nahá꞉iere,

¹⁸ tánon nó꞉nen ne rokhá꞉res shahárawe natsaʼtáktha, ne kaniataráke thontontáshawen sontnekaténhti tánon shé꞉kon sahennhóton natsakthóntie.

¹⁹ Nonhkweshón꞉as wathatiniatharihiáke ne Jordan né꞉ne oieríhaton siwenhniserá꞉te ne tiotierénhton wenhnítare tánon Gilgal nón꞉we iahontená꞉taien, né꞉ne nà꞉kon nokwá꞉ti ne Jericho.

²⁰ Thóh nón꞉we ne Joshua wahanenhiothónhnion ne tékeni iawénhre nikanénhiakes né꞉ne Jordan kaniataráke nón꞉we nithotinenhiénha.

²¹ Tánon washakawénhase nonhkweshón꞉as ne Israerʼró꞉nonke, “Ne kén꞉en enhiotieʼthe, nó꞉nen ne ietsihioʼokón꞉as enhatirihwanónhton nahó꞉ten kí꞉ken onenhiaʼsón꞉as kéntons ne sarihwà꞉ke,

²² kwák ki enieʼtsiró꞉ri nó꞉nen ne Israerʼró꞉nons shiathatiniatarihiáke ne Jordan kwáh ki iostaʼténhen nonhóntsa.

²³ Ieʼtsiró꞉ri né꞉tho Roiá꞉ner Sewaní꞉io wahastatháte ne Jordan tsi kanékoʼkwe ní꞉se sewarihwá꞉ke tsi nió꞉re iatisewahiáiake, kwáh ki tsi nihostatʼthaton ne Red Sea nonhkwarihwá꞉ke.

²⁴ Ne aorì꞉wa kí꞉ken kwáh onhkweʼtakwé꞉kon nonhontsá꞉ke kwáh enhiakoterienʼtaráne tsi naʼtehiotenonhianì꞉ton ne Roiá꞉ner Raoshatsténhsera, tánon kwáh enskwéniensthe ne Roiá꞉ner Sewaní꞉io ne tsi nénhwe.”