Joshua 3 - Ohiatonhseratokénti

Nonhkweshón꞉a Ne Israerʼró꞉nonke Wathatihiáiake Ne Jordan

¹ Nó꞉ia sahioʼrénhne Joshua tánon ratikwé꞉kon nonhkweshón꞉a Nisraerʼró꞉nonke oronhkéstsi wahontkétsko, sahontoserothakwenháton ne Acacia nón꞉we, tánon ákta ne Jordan niahónhne, thóh nón꞉we ionsahontaʼtohseró꞉ten tsi karí꞉wes rothiráhrekwe ne tahatihiáiake.

² Ásenhnonta onakèn꞉ke ne shakotihéntenhse waʼthontawénrie tsi watohseró꞉tons

³ tánon washakotiró꞉ri nonhkweshón꞉as, “Ne nó꞉nen entsisewá꞉ken ne rokhá꞉res ranorokwenhá꞉wi ne Ateriwaʼseronhniá꞉tshera né꞉ne Roiá꞉ner Sewaní꞉io Rahoneró꞉kwa, shasewatoʼserotakwenhá꞉ton tánon tsi sewáser.

⁴ Iáh nonhwénton kén꞉en tethisewénon, káti ronónha henietsinaʼtónhase tsi nienhénsewe. Ók tó꞉sa ki ákta í꞉sewet Naterihwaʼseronhniá꞉tshera Oneró꞉kwa; tó꞉ka asénhnon ne tsi nihióhase nió꞉re oná꞉ken sewahténti.”

⁵ Ne Joshua wasakohró꞉ri nonhkweshón꞉a, “Sasewatonhnakanonhni, asèken enhiorenhne ne Roiá꞉ner ioriwanerahkwat tsi nenhá꞉iere ne sewahenton.”

⁶ Ethò꞉ne wahohró꞉ri ne rokhá꞉res ieháhaf Nateriwaʼseronhniá꞉tshera Oneró꞉kwa tánon rahotihén꞉ton nonhkweshón꞉as niére. Tó꞉ki nahá꞉iere tsi nahénron.

⁷ Ne Roiá꞉ner wahawénhase ne Joshua, “Tsi nenhtiére nón꞉wa wenhniserá꞉te ratikwé꞉kon nonhkweshón꞉as ne Israerʼró꞉nonhke enieshakwénienste tsi nitisaʼtshénhnathe, tánon enhonktó꞉ke tsi tenikwé꞉kon kwáh ki tsi nihiotónhne ne Mahís.

⁸ Sró꞉ri ne rokhá꞉res ne Ranorokwenhá꞉wi Nateriwaʼseronhniá꞉tshera nó꞉nen ienhón꞉newe ne kaniataráktha, ó꞉nenk tsi awénhke nienhónhne tánon atsatáktha tehatítann.”

⁹ Ethò꞉ne ne Joshua washakohró꞉ri nonhkweshón꞉a, “Kén꞉en nonhtásehwe tánon sewatahónsatat tsi nahó꞉ten ne Roiá꞉ner Onhkwaní꞉io ró꞉ien nahèn꞉ron.

¹⁰ Tsi iensewahténhti, kwáh oriwihiohón꞉we tsi enshakotekwáhthe ne Canaanites, ne Hitró꞉nons, ne Hivró꞉nons, ne Perizró꞉nons, ne Girgashró꞉nons, ne Amorʼró꞉nons, ó꞉ni ne Jebusites. Kwáh ki ensewaterienʼtará꞉ne ne ronhnhehón꞉we Ní꞉io tsi kén꞉en í꞉res tewahiataʼtónhtie

¹¹ nó꞉nen ne Roiá꞉ner Rahoneró꞉kwa ne Aterihwaʼseronhniá꞉tshera ne nonhontsakwé꞉kon aoriwà꞉ke iatenhkaiá꞉iake ohénton tsi ní꞉se ní꞉ioht.

¹² Ó꞉nen ki tékeni iawénhre niháti ietsihiatará꞉ko, shatihiataʼtsions ne tékeni iawénhre nihothiʼthárakes ne Israerʼró꞉nonke.

¹³ Nó꞉nen ne rokhá꞉res ne ranorokwenhá꞉wi nateriwaʼseronhniá꞉tshera né Roiá꞉ner rahoneró꞉kwa né꞉ne ohontsakwé꞉kon akoriʼwá꞉ke iatenhonrashì꞉towe nawénhke, ne Jordan enwátkaʼwe tsi watnekí꞉ne, tánon noné꞉kanos ne tsi nonthahiotnekinónhatie kwáh enskakʼkok tsi nón꞉we nakaniátoʼne.”

^14-15 Tánon ó꞉nen tsi nihieientwákwas, tánon ne kaniataratátie iawenhó꞉ton. Nonhkweshón꞉as wahontén꞉ti tsi nón꞉we nihonahtenataiéntakwe né꞉ne iatahatiniatarihiáke ne Jordan, tánon ne rokhá꞉res rahotihén꞉ton niahá꞉re ranerokwenhá꞉wi naterihwaʼseronhniá꞉tshera í꞉wah. Né꞉ne kokwitè꞉ne shikahá꞉wi, eʼnikahá꞉wi ne Jordan kaniataratátie kawenhó꞉tons natsaktóntie. Kwáh tsi niiostó꞉re ne rokhá꞉res iatharashitó꞉we nawénhke,

¹⁶ nonékanos ontkà꞉we tsi watnekí꞉ne tánon waʼkaweʼnhó꞉ton, kwáh tsi nió꞉re ne Á꞉tonion꞉ke, né꞉ne kanatowanèn꞉ke ákta ne Zarethan. Ne tsi niehiotnekí꞉non ne Dead Sea kwáh nénhne hiotnekénston, tánon nonhkweshón꞉a ónhton watahathihiáiake ákta ne Jericho.

¹⁷ Tsi nikarì꞉wes nonhkweshón꞉as thakéson rónhne tehothihiaiakonhátie iahontsiaʼténhen, ne rokhá꞉res ne rahá꞉wi ne Roiá꞉ner Rahoneró꞉kwa Naterihwaʼseronhniá꞉tshera tho í꞉wah iahontsiát꞉ten tsi nón꞉we niráthe né꞉ne shatekaniatharíhen ne Jordan kwáh tsi nió꞉re ratikwé꞉kon wathatihiá꞉iake.