Joshua 24 - Ohiatonhseratokénti

Joshua Wahshá꞉kotahti Nonhkweshón꞉ʼas Ne Shechem Nónhwe

¹ Joshua kahnenhrahkwekon wahshá꞉kohiatahrorohke ne Israerró꞉nonhke ne꞉ne Shechem nónhwe. Hiashá꞉kononhke ne thotiions, ne ohénton iehonʼnetons, ne rathiriwenhtas, tánon ne ronahterihontons ne Israerʼró꞉nonhke, tánon rahohénton ne Rawenni꞉io wahthathitahne.

² Ne Joshua kwáh rahthikwekon nonhkweshón꞉ʼa washá꞉kahwenhase, “Ken ki nahó꞉ten ne Roiá꞉ner, ne Rawenni꞉io ne Israerʼró꞉nonhke, rohien nahenron: ‘Wahonniseh tsi nahe tkenʼne ne ietʼtsisotʼthonkonkenʼen ihseh nahkaniatarahti ne Euphrates rahthinahkerehkwe tánon né꞉ne óia niiohokonhas rahthisennaienskwe. Ne shá꞉hiata ne kahsotʼtsera né꞉ne Terah, né roiénha ne Abraham tánon ne Nahor.

³ Ethòne Abraham iahihiatenhawe, né꞉ne tsi sewasót꞉kenʼen, né tsi tsiohontsaien iseh nakaniatarati ne Euphrates tánon wahihentenhse watʼtronhontsihiake ne Canaan. Wé꞉so wahiwatsironhnien. Isaac wahihionkweton,

⁴ ók ne Isaac Jacob né wahihionkweton tánon ne Esau. Ne Esau né thahihion ne tsi ionhniaronhnions kanakeraserakeronhs ne Edom nónhwe nahó꞉wenhkonhweke, ók ne tsi sewasot꞉kenʼen Jacob tánon ne sakohiohokonhas Egypt nenhʼne niahónhne.

⁵ Onakenke Mahís iahihiateniethe tánon Aaron, tánon wá꞉tsien ne kowá꞉nen tahonhnikonhraren ne Egypt nónhwe. Ók ki níse thonthakwahiatinekenhwe;

⁶ Thonthakhehiatinekenhwe ne ietʼtsisót꞉thonkonhkenʼen ne Egypt nónhwe, tánon ne Egyptró꞉nons wahonwatisere otsionhkwa wahonsthe tánon ne koshá꞉tens ró꞉tisehnonhtie. Ók nó꞉nen ne ietsisót꞉thonkonhkenʼen iahonhnewe ne Red Sea

⁷ akonhake iató꞉tihenrenthe nakehiathakena, tánon thakakarasthe tsi natehóntere ne ró꞉nonha tánon ne Egyptró꞉nons tánon wakheskothe. Sewaterienthare tsi niktierase ne Egypt. “‘Karíhwes iahontsiatʼthenke sewenhteronhthakwe.

⁸ Ethòne thóh nónhwe niakwahiatenhawe rahó꞉nonhontsakes ne Amorʼró꞉nons, né꞉ne nàkon nòkwah ratinakeré꞉kwe ne Jordan. Wesehwateriio, ók thakwahion natesenhnietshera tsi wahéʼtsisenhni. Wesehwatienawasthe ne rahó꞉nonhontsa, tánon wakhehiathonthe tsi niahisewe.

⁹ Ethòne ne ronhnonhtí꞉io ne Moab nónhwe, né꞉ne Balak né roiénha ne Zippor, thá꞉tsisehwatsiathonti. Iahó꞉terihwanieten ne rotó꞉kenhse Balaam né꞉ne roiénha ne Beor tánon wahó꞉rihwanonhthonse natsisehwarewathe.

¹⁰ Ók iáh né tehirihwawi ne Balaam ná꞉tsisewarewathon, sot ki watsisehwahiathateristhe, tánon thóh né ki ní꞉ioht tsi sakwahiakenthe tsi nòkwah ne Balak.

¹¹ Wathisehwaniatarí꞉hiake ne Jordan tánon iahisehwawe ne Jericho. Ne ronhnónhkwe ne Jericho nónhwe wesehwateriio, kwáh ki tsi ní꞉hothiieren ne Amorʼró꞉nons, ó꞉ni ne Perizró꞉nons, ne Canaanites, ne Hitró꞉nons, ne Girgashró꞉nons, ne Hivró꞉nons, tánon ne Jebusites. Ók ki thatsion natesenhnietshera naietʼtsisenhionhko.

¹² Tsi niahisehwe, watekhehionniaritkon né nahónton nakhehiatinekenwe thí꞉ken tehotinonhtí꞉iotserake Amorʼró꞉nons. Tánon iáh ki i꞉se tesewashaststensera ó꞉ni ne sewateriiosthakwa thóh tehiotiieren.

¹³ Thakwahion nohontsa ne iáh nonhwénhton thènen thóh tesewahiotenhen ó꞉ni ne kanató꞉wanens ne iáh nonhwénhton i꞉se tesewatenatonhni. Tánon ónenh é꞉tho nónhwe nisehwanakere sehwanenharakons né꞉ne iáh i꞉se tesewahietʼthon, tánon ne iakeniewátha karonhthasonhas iáh i꞉se tesewaronhthaietʼthon.’

¹⁴ “Káti ó꞉nen,” Joshua ionsahathasonteren, “tskwenienstat ne Roiá꞉ner tánon orihwiiohonwe ó꞉ni iorihwahtó꞉kenhak tsi tsiotens. Isehʼhiashá꞉ti ne kahiatonnishón꞉ʼas nètho sahsotʼtserahokonkenʼens rathisennaienskwe ne Mesopotamia ó꞉ni ne Egypt nónhwe, tánon rahonhatsiwa ne Roiá꞉ner tsiohtens.

¹⁵ Tó꞉ka iáh thóh teshá꞉nikonróh꞉ten nahtsiotense, iateshá꞉rihwaientas nón꞉wa wenhniserá꞉te ónhka enshé꞉hiotenhse, ne kahiá꞉tonhnisonhas ne shá꞉sotʼtserahokonkenʼen rathisennahienskwe ne Mesopotamia tó꞉ka ó꞉ni ne rahothihiatonnis ne Amorʼró꞉nons, tsi róh꞉nonha rahononhontsake nón꞉wa non nishé꞉nahkere. Ók ki ní꞉i tánon nakwahtsire, Roiá꞉ner ki enshá꞉kwahiotenhse.”

¹⁶ Nonhkweshón꞉ʼa wahthathiriwasehrahko, “Kwáh iáh nonhwénhton tsiashá꞉kwatewenhthete ne Roiá꞉ner ne thikaniiosehrathe ahshá꞉kwahiotenhse!

¹⁷ Ne Roiá꞉ner onhkwa Ní꞉io tesahkohiatenha ne iehtinihokonkenʼen ó꞉ni nonhkwatiakes tsi iáh thetionkinaskonni ne Egypt nónhwe, tánon wetewakʼkahtho ne iorihwanerahkwat tsi naháiere né nónhwe. Wahshón꞉kwahiatanonhstate kwáh tsit nonhwésons niahitewe tsi wathitewatohesthanion tsi rahthinahkerehnions nahkorensons.

¹⁸ Tsi wetewahwe ne ken nónhwe nihiohontsaien, ne Roiá꞉ner rathikwekon washá꞉kohiatinekenwe ne Amorʼró꞉nons né kenhnonwe nihathinahkerehkwe. Kwáh kahti ó꞉ni enshá꞉kwahiotense ne Roiá꞉ner; rahonʼa seh nonhkwa Ní꞉io í꞉ken.”

¹⁹ Joshua wahshá꞉kawenhase nonhkweshón꞉ʼa, “Ók tó꞉ka nón꞉wa iáh tahisehwakweni nahtsisehwahiotense ne Roiá꞉ner. Kwahseh RaʼNiiosehrató꞉kenti tánon kwáh iáh tahonshá꞉hianikonrense ne sarihwanerahaktseras. Iáh tashá꞉kotenikonriioste ne ronhwasons,

²⁰ tánon tó꞉ka entsiatewenhthete ne thikaniioserate ahonshá꞉tsotense, kwáh enhiatʼkonten tánon enhiarewahte. Kwáh enhiatonte, iawerohatien tsi nithoriwaierikwe ne shón꞉hake tsi nitsawénon.”

²¹ Nonhkweshón꞉ʼa wahonwenhase ne Joshua, “Iáh! Kwáh enshá꞉kwahiotense ne Roiá꞉ner.”

²² Joshua wahshá꞉korohri, “Isek khók thisehwathaterihwanirahtis né nahorihoten tsi wesehwataterahkwahse nahtsisehwahiotense ne Roiá꞉ner.” “Hen,” wahonniron, “iih iakwahtateriwahnirahtse.”

²³ “Kwáh káti éhren sehwahawit ti ken thí꞉kaniioserathe sehwahien,” kwáh wahshá꞉kohtótʼthakwen, “tánon kwáh iohriwahniront tsi sehwarihwató꞉kenhak rahonháke ne Roiá꞉ner, ne Sakowenní꞉io ne Israerʼró꞉nonhke.”

²⁴ Ethòne nonhkweshón꞉ʼa wahonwenhase ne Joshua, “Enshá꞉kwahiotense ne Roiá꞉ner onhkwa Ní꞉io. Enhiakwathewenhnarahkwe ne rahoriwahtatʼtseras.”

²⁵ Káti ne sahʼhennisera ne Joshua wahontianerensehronni nonhkweshón꞉ʼa, tánon eʼtho nónhwe ne Shechem thá꞉shakawenh ne kaianerensehrahs nahathisehre.

²⁶ Ne Joshua wahahiatonhnion ki ken karihwatatʼtseras kahiatonhsehrakons ne raoianerenseras ne Rawenni꞉io. Ethòne kanenhiowanen wát꞉rahkwe tánon karonhtó꞉kon ne okaratsi wahanenhioten thóh raononsató꞉kentike ne Roiá꞉ner.

²⁷ Washá꞉kawenhase nonhkweshón꞉ʼas, “Né ki ken onénhia nonhwarihwaniratʼtsera. Akwé꞉kon ionthonthehon nowenhnasonhas nètho Roiá꞉ner tsi nisonhkwatharani. Káti né enkarihwanirahthe tsi nòkwah níse, né꞉ne tó꞉sa ahisehwanikonhrahthe tsi nòkwah ne Sewaní꞉io.”

²⁸ Ethòne ne Joshua shá꞉sakorekwahthe nonhkweshón꞉ʼas, tánon ratikwékon thóh nónhwe nionhsahonne tsi nónhwe thó꞉nonhontsaientons.

Joshua Tánon Ne Eleazar Wá꞉niheie

²⁹ Sonhtó꞉hesthe, ne Roiá꞉ner rahonhátsera Joshua né roiénha ne Nun warenheie énska tewenhniáwe tánon oieri satehahosehrihiakon.

³⁰ Rahón꞉ʼa rahonhontsake nónhwe nahonwahiathata né꞉ne Timnath Serah nónhwe né꞉ne tsi iononhtharonhnions ne Ephraim otó꞉reke nòkwah ne tsi Ionónhte ne Gaash.

³¹ Tsi nahe rónhnheʼkwe ne Joshua, nonhkweshón꞉ʼas ne Israerʼró꞉nonhke nónhwe ronwahiotensehakwe ne Roiá꞉ner, tánon ne shá꞉renheie nek kik saka iahonthasonhtenren tsi nikaríwes nètho sakotihentenhse ró꞉nonhnhekwe né ró꞉nonha ronatkhaton orihwaʼkwékon ne Roiá꞉ner tsi nihohiotenhʼen ne Israel ahoriwake.

³² Ne rahó꞉ieronhtha ne Sose, né nonhkweshón꞉ʼa tethó꞉tiha ne Egypt nónhwe, Shechem né nónhwe nihonwahiathaten, né꞉ne ken nihiohonsa ne Jacob ró꞉ninon ne Hamor roiénha, né roní꞉kenʼen ne Shechem, né꞉ne énska tewenhniáwe nikawisthake kawistharaken rokarhiakon. Ki ken ohontsa né꞉ne Sose rahowatsires rotiienahon.

³³ Ne Eleazar ne roiénha ne Aaron shá꞉renheie Gibeah né nónhwe iehonwahiathaten, ne tsi kanathaien ne tsi iononhtharonhnions ne Ephraim nónhwe né꞉ne roiénha ne Phinehas.