Joshua 23 - Ohiatonhseratokénti

Joshua Thonshasakononhwerá꞉ton Tsi Washakothárase

¹ Wé꞉so onakénhkhe ne Roiá꞉ner thasaká꞉wen Nisraerʼró꞉nons ne kahiathanonstaʼtsheras tsi nòkwah ne tehontaʼtsons ne ratihiataʼthóntie. Ne thóh shikahá꞉wi ne Joshua kwáh í꞉ken tsi roksténhakwe,

² káti kanenhrakwé꞉kon iashakò꞉nonhke Nisraerʼró꞉nonke, ne thotí꞉ions, ne shakotihenténhse, ne ratirihwénhthas, tánon ne ronaterihón꞉tons nonhkwè꞉ne, tánon wahèn꞉ron, “Ó꞉nen kwáh í꞉ken tsi wakeksténha.

³ Sewatkató꞉sehrons orihwakwé꞉kons né꞉tho Roiá꞉ner Sewaní꞉io tsi nishakoié꞉raʼse ratikwé꞉kon kí꞉ken onhkweshón꞉as ní꞉se sewarihwà꞉ke. Ne Roiá꞉ner Sewaní꞉io tsi sewaterí꞉iose.

⁴ Tkwá꞉wi ne senhwenhtióhkwas akwé꞉kon ne tsi ionhontsá꞉iens né꞉ne Jordan Kaniatarathátie tiothásawe né꞉ne nà꞉kon nòkwah ne Mediterranean Kaniatarakeʼkowáhne né꞉ne tsi iaʼtewatséntos nòkwah. Tkwawí꞉hon akwé꞉kon nohóntsas ne ratikwé꞉kon né꞉tho nonhkweshón꞉a iethisénhnion, tánon ó꞉ni nonhóntsas né꞉tho nonhkweshón꞉as naré꞉kho teieʼthisénhnion.

⁵ Ne Roiá꞉ner Sewaní꞉io enshakahónhnien nahonshahónkhete tsi nón꞉we ní꞉sewes, tánon enshakothékwathe tsi nienhénsewe. Ensewaié꞉na ne rahononhóntsas, tsi ki nitsisewarahratsténhni ne Roiá꞉ner Sewaní꞉io.

⁶ Káti sewathateʼnikónhrarak sewatewénhnarak tánon orihwakwé꞉kon thóh naʼsewáier tsi nikaiáton ne kahiatonhserá꞉kon ne Mahís rahoianerénhsera. Tó꞉sa othé꞉nen sewakénron ne thé꞉nnen akénhake,

⁷ tánon ethò꞉ne iáh othé꞉nen tathaisewateriwahsónhteren kí꞉ken onhkweshón꞉ʼas ne iatehonathaténron tsi nón꞉we nisewénhterons tó꞉sa ó꞉ni ietsinaʼthónsek ne rahotiní꞉ios tó꞉ka ó꞉ni nahí꞉sewatste thí꞉ken kasénhnas nahisewarihwaní꞉ratsthe tó꞉ka ó꞉ni nahisewasénhnaien thí꞉ken niiohokónhas tó꞉ka ó꞉ni ne tahisewatsatʼkhéthe nahothihéntons.

⁸ Khé꞉kok, sewarihwatokénhak rahonhà꞉ke ne Roiá꞉ner, tsi niiohʼthonhátie tsi nió꞉re nón꞉wa.

⁹ Ne Roiá꞉ner shakohiaʼtinekén꞉en ne tehonatenonhianí꞉tons ó꞉ni ratiʼshátstes tsi niesewé꞉non, tánon iáh nonhwénton nónhka tehiothikwénion ne iaieʼtsihiatsiathóntion.

¹⁰ Kwáh tsikʼónhka ne tsi nítson ensewakwé꞉ni ne énska tewenhniaweheʼtseráhsen niháti nahonhté꞉ko, tiorì꞉wa ne Roiá꞉ner Sewaní꞉io raónha tsi sewaterí꞉iose, kwáh ki tsi nihorahrátston.

¹¹ Sewaʼnikónhrarak, káti, tsi sewanó꞉ronk ne Roiá꞉ner Sewaní꞉io.

¹² Tó꞉ka iáh tahisewarihwatokénhake tánon ne aieʼtsiiatsiathárase nonhkweshón꞉as ne shé꞉kon skátke sewanákere tánon né꞉ne tahisewathateniátʼten,

¹³ kwáh sewaterièn꞉tharak né꞉tho Roiá꞉ner tsi iáh shé꞉kon tahonshasakohiaʼtí꞉nekenhwe tsi nienhénsewe. Khé꞉kok, kwáh eʼnenhonnonhkweʼtahetkénhthake ne sarihwà꞉ke tsi ní꞉ioht ne waterísthaien tó꞉ka ó꞉ni ne kasonhiónhni tánon thóh nihiononhwákthe tsi ní꞉ioht ne ó꞉kwire tsiónhne aieshanonhwá꞉reke tó꞉ka ó꞉ni ne oniónhwara shakaríhsen. Tánon thóh ki nió꞉re nenhénwe tsi ki nió꞉re ne iáh ónhka tsi nítson tsiaʼthahonsahiakothaténronhke ki kén꞉en ionhontsí꞉io né꞉ne Roiá꞉ner Sewaní꞉io tetsisewá꞉wi.

¹⁴ “Nón꞉wa ó꞉nen hiaʼkáhewe nakí꞉heie. Kwáh tsi niatétion sewaterièn꞉thare ne sewerianésons ó꞉ni ne tsi tsónnhe né꞉tho Roiá꞉ner Sewaní꞉io orihwakwé꞉kon thetsisewá꞉wi ne ioiáneres né꞉tho rohraratsthánion. Kwáh tsi nahoʼténhsons rorahratsthánion tsi akwé꞉kon thóh nihiawéhen; iáh nénhska tehiosénhse.

¹⁵ Kwáh ki tsi nihorihwaié꞉rihtons akwé꞉kon tsi nitsisewarahratstén꞉ni, káti akwé꞉kon é꞉tho nenháiere tsi nitsisewaronhkatén꞉ni.

¹⁶ Tó꞉ka káti iáh tahisewatié꞉nawatste nateriwaʼseronhniá꞉tsheras né꞉ne Roiá꞉ner Sewaní꞉io tsi sewarihón꞉te nahisewatié꞉nawatste tánon tó꞉ka tenieʼtsiriwásniese ó꞉ni ensewasénhnaien nó꞉ia niiohokónhas, ethò꞉ne ki rahonakwahtserá꞉kon tsi entsisewaréwathe, tánon iostó꞉re iáh ónhka tsi nítson tsiatahonsehsewathaténhronhke kí꞉ken iohontsí꞉io né꞉tho tetsisewá꞉wi.”