Joshua 22 - Ohiatonhseratokénti

Ne Joshua Washakorí꞉hon Ne Nakonhakarró꞉nons Rahotitióhkwas Nahonsahonhtén꞉ti

¹ Ethò꞉ne ne Joshua iashakonòn꞉kon nonhkweshón꞉as ne tsi ratitióhkwaiens ne Reuben, Gad, tánon ne nà꞉kon nòkwah ne Manasseh.

² Washakawénhase, “Akwé꞉kon é꞉tho nisewaiéren tsi nahó꞉tens ne Mahís né꞉ne Roiá꞉ner rahonhátshera tsi sewanhà꞉on tsi nahisewátiere, tánon akwé꞉kon sewatewenhnaráhkwen ne rahorihwataʼtsheras.

³ Kwáh thóh náhe iáh nonhwénton naieʼtsihiatewenhthétons ne ronátiaʼkes Nisraerʼró꞉nons. Kwáh sewathateʼnikonráhraʼkwe nahisewatewénhnaraʼkwe tsi nihorihwathátons ne Roiá꞉ner Sewaní꞉io.

⁴ Ó꞉nen ki, tsi ki nihorahrátstons, ne Roiá꞉ner Sewaní꞉io thashaká꞉wen ne ronátiaʼkes Nisraerʼró꞉nons ne skén꞉non. Káti wás thóh nionhsásewe ne tsi tionhontsá꞉ien tsi niká꞉ien ne sewá꞉ton í꞉se sewáwenk, ne tsi ionhontsá꞉ien ne nà꞉kon nòkwah ne Jordan, né꞉tho Mahís, ne Roiá꞉ner rahonhátshera, thetsisewá꞉wi.

⁵ Iorihwiióhak sewatewénhnarak ne kaianerénhsera né꞉tho Mahís tsi sewarihwatháti: tsi sewanorónhkwak ne Roiá꞉ner Sewaní꞉io, tatsisewaʼnikonhraié꞉rit, sewatewénhnarak ne rahorihwataʼtsheras, sewarihwatokénhak ne rahonhà꞉ke, tánon tsi sewahiò꞉tens kwáh seweriasakwé꞉kon ó꞉ni sewatonnheʼtsherakwé꞉kon.”

^6-8 Ne Joshua ionshasakotó꞉ri nahonsahonhtén꞉ti ratikwekonhátie ne rahohiathateríhtshera tánon ó꞉ni ne ratikwekonhátie ne kí꞉ken owenhnaʼshón꞉as: “Tsi tsisewathenhtiónhe kwáh í꞉ken tsi sewakwáhtse, iohnatiohkowanenhátie ne konhtiʼtshé꞉nens, kawistará꞉kens, owistanoronshón꞉as, teiotwístharon notsí꞉nekwar karísthatsi, tánon wé꞉so naʼtsherónhnias. Rotihiaʼtháhests nónhne né꞉ne sehsewahiátha tsi nahoʼténhsons ietsikwenhá꞉ton ne tesewataʼtsons.” Ethò꞉ne ó꞉nen thonsahontháhakwe sahonhtén꞉ti. Ne Mahís iehotkà꞉wen nonhóntsa ne nà꞉kon nòkwah ne Jordan né꞉ne satehothitiohkwí꞉ien ne Manasseh rahotirihwà꞉ke, ók nó꞉ia satehothitiohkwí꞉ien ne Joshua né꞉ne iehotká꞉wen ne tsi iaʼtewatséntos nòkwah ne Jordan, né꞉ne ó꞉ia kentióhkwas rahotirihwà꞉ke.

⁹ Káti nonhkweshón꞉as ne rahothitióhkwakons ne Reuben, Gad, tánon ne nà꞉kon ne Manasseh sahonhtén꞉ti. Ehʼneiehathì꞉teron ne ronátiaʼkes Nisraerʼró꞉nons thóh tsi ionhontsá꞉ien ne Canaan tánon tahonthásawen thóh nionhsahónhne tsi thóh nonhontsá꞉ien, ne꞉ne tsi tiohontsá꞉ien ne Gilead, né꞉ne ronatiaʼthakwehniióston tsi nihorihwí꞉son ne Roiá꞉ner rahonhà꞉ke ne Mahís.

Ne Kentióhkwas Ne Nà꞉kon Nòkwah Ne Jordan Kaniatharatátie Wahonhiónhnien Ne Ietsienharáhkwa Ne Roiá꞉ner

¹⁰ Nó꞉nen ne tsi kentióhkwaiens ne Reuben, Gad, tánon ne nà꞉kon nòkwah ne Manasseh iahón꞉newe ne Geliloth nón꞉we, ské꞉kon né꞉ne tsi iaʼtewatséntos nòkwah ne Jordan, kowá꞉nen wahonhnón꞉ni ne iohrá꞉se ietsienharáhkwa thóh kaniataráktha.

¹¹ Ne ronátiaʼkes Nisraerʼró꞉nons wahonwatiró꞉ri, “Sewatahónshatat! Nonhkweshón꞉as ne rahotitióhkwakons ne Reuben, Gad, tanon ne nà꞉kon nòkwah ne Manasseh ronón꞉ni ietsienharáhkwa ne Geliloth nón꞉we, ne tsi nòkwah nonhkwáhwenk ne Jordan!”

¹² Ne nó꞉nen Nisraerʼró꞉nons wahonaʼthón꞉tehne kí꞉ken, kwáh ratinakerahserakwé꞉kon wahontehró꞉roke né꞉ne Shiloh nón꞉we ne nahonterí꞉io ne nakonhà꞉ka kentióhkwas.

¹³ Ethò꞉ne Nisraerʼró꞉nons iahonwaténiethe ne Phinehas, né꞉ne roiénha ne Eleazar ne ratsihénsthatsi í꞉ken, thóh nonhkweshón꞉as tsi rathitióhkwaiens ne Reuben, Gad, tánon ne nà꞉kon nòkwah ne Manasseh né꞉ne tsi ionhontsá꞉ien ne Gilead.

¹⁴ Oié꞉ri nihá꞉ti ne sakotihenténhse wahón꞉ne ne Phinehas, shatihiaʼtà꞉tsons ne tsi iaʼtewatsénhtos nòkwah kentióhkwas tánon shatihiaʼtà꞉tsons nohén꞉ton í꞉ken tsi ratiwatsí꞉raiens ne tsi ratiʼthá꞉raiens.

¹⁵ Iahónhnewe tsi tiohontsá꞉ien ne Gilead, thóh nón꞉we nonhkweshón꞉as ne Reuben, Gad, tánon ne nà꞉kon nòkwah ne Manasseh,

¹⁶ tánon shakotiʼthará꞉nis kwáh kanenhrakwé꞉kon ne Roiá꞉ner rahonkweʼtashón꞉as, washakotiró꞉ri, “Nonhtié꞉ren tsi ki thóh nikarihwahétken tsi nesewátiere tsi nòkwah ne Sakoiá꞉ner Nisraerʼró꞉nonhke? Watsisewawenhnónhti ne Roiá꞉ner tsi wetsónhni kí꞉ken ietsienharáhkwa ne ní꞉se sewarihwà꞉ke! Iáh ó꞉nen tetsitsewanonhteráties!

¹⁷ Shasewehiá꞉rahn nonhwariwaneraháktshera ne Peor nón꞉we, ne nó꞉nen ne Roiá꞉ner washakoré꞉wathe ne rahonkweʼtashón꞉ʼas ne kannratharihnétsheras? Tánon shé꞉kon ne nihionkwaronhiaʼkéntha. Né꞉tho karihwanéren iáh ken tsiatehionkwahié꞉rise?

¹⁸ Iáh ken tahisewaʼthóntate natsisewásehre nón꞉wa? Tó꞉ka ensewatewenhnónhti tsi nòkwah ne Roiá꞉ner nón꞉wa wenhniserá꞉te, kwáh í꞉ken tsi iatehionkwè꞉thakes tsi enshakonákwahse Nisraerʼró꞉nonhke nenhió꞉renhne.

¹⁹ Ethosà꞉ne, tó꞉ka ne tsi tionhontsá꞉ien iáh tehió꞉wenk ne nón꞉we nahionterénhnaien, ken nòkwah nonhthásewe tsi rothonhontsá꞉ien ne Roiá꞉ner, ne tsi nón꞉we nihotaʼtóhserote. Sewathonhontsará꞉ko tsi nón꞉we nihiákwes. Ók tó꞉sa ki tsisewanowénhten ne Roiá꞉ner ók tó꞉sa ki thakwaʼnikonhráten ne nahitsón꞉ni ne ietsienharáhkwa tánon ne iahisewawénhtate shé꞉kon ó꞉ia ne ietsienharáhkwa ahitsón꞉ni ne Roiá꞉ner Onhkwaní꞉io rahorihwà꞉ke.

²⁰ Shasewehiá꞉rahn tsi ní꞉ioht ne Achan ne roiénha ne Zerah iáh tehotewenhnaráhkwen tsi nikarihwatháton tsi nòkwah ne watkénston karihwaieshá꞉tsheras; kwáh kanenhrakwé꞉kon ne Israerʼró꞉nonke tsi wahotré꞉waʼthe ne wakarihón꞉ni. Ne Achan iáh rahonhá꞉kok tè꞉ken tsi rawenhé꞉ion ne iorihón꞉ni ne rahorihwaneraháktshera.”

²¹ Nonhkweshón꞉ás ne tsi kentióhkwaien ne Reuben, Gad, tánon ne nà꞉kon nòkwah ne Manasseh wathatirihwaʼsehrá꞉ko ne ononhtsikowaʼtsons ne tsi rathiwatsí꞉raiens ne iaʼtewatséntos nòkwah rathitióhkwaiens:

²² “Ne Roshatstenhserowá꞉nen né꞉ne Ní꞉io! Raónha ne Roiá꞉ner! Ne Roshatstenhserowá꞉nen né꞉ne Ní꞉io! Raónha ne Roiá꞉ner! Raónha roterièn꞉thare nonhtié꞉ren ki tsi thóh nahá꞉iere, tánon ó꞉ni tehionkwahtonhontsó꞉ni ní꞉se naisewaterienʼtharáne! Tó꞉ka iáh tahitewatewénhnaraʼkwe tánon iáh tahionkwahrihwatokénhake rahonhà꞉ke ne Roiá꞉ner, tó꞉sa ki saʼthóntat ne shé꞉kon ahiatsiónhnheke!

²³ Tó꞉ka iáh thasakwahwénhnarahkwe ne Roiá꞉ner tánon enhiakwahthathónhnien ne ietsienharáhkwa né꞉tho ahiakihiaʼteskónhtkhake tó꞉ka ó꞉ni ne ahiákwatsthe ne onátsa tsi tahiakwahtenonhwerá꞉ton tó꞉ka ó꞉ni ne skarì꞉wa akénhake tsi tahiakwahtenonhwerá꞉ton, ki iatehahiáti ne Roiá꞉ner sonhkwahréwat.

²⁴ Iáh! Thóh nahakwá꞉iere tiorì꞉wa tsi iakwahtsà꞉nis ne tsi niahawenonhátie tsi niensewatwatsí꞉rihne enshakonénhase nonhkwahwá꞉tsires, ‘Nahó꞉ten tesewaterihwasónhtere ne Roiá꞉ner, ne Sakoní꞉io Nisraerʼró꞉nonke?

²⁵ Ró꞉shon ne Jordan tsi karisthatátie ne tsi naʼtetewá꞉tere tánon ó꞉ni ní꞉se tsónhkwes ne Reuben ó꞉ni ne Gad nón꞉we. Iáh othé꞉nen thatesewatherihwasónhtere ne Roiá꞉ner.’ Ethò꞉ne ne tsi wesewawatsirahtátie nonhtié꞉renk tensakotí꞉tasthe nonhkwahwá꞉tsires tsi ronhwasénhnaiens ne Roiá꞉ner.

²⁶ Káti wahatsón꞉ni ne ietsienharáhkwa, iáh né꞉ne tó꞉ka ken ahiakihiaʼteskónhtkhake tó꞉ka ó꞉ni nahonthaiakwáhiesthe,

²⁷ ók khé꞉kok, ne naiakhiiénesthe nonhtsonhkweʼtashón꞉as ó꞉ni ní꞉se tsonhkweʼtashón꞉ʼas, tánon ó꞉ni noná꞉ken takawatsiratátie, ne tsi kwáh í꞉ken tsi shakwahsénhnaiens ne Roiá꞉ner nohén꞉ton tsi rotható꞉sehrothe ne tionhkwahiéston nahontsahatónhake skátke ne watéskonhte ó꞉ni ne skarì꞉wa í꞉ken tsi ionkwahró꞉ron. Ne kí꞉ken nahotískweke tsi niensewatwatsí꞉rihne tsi nasakonénhase nonhkwahwá꞉tsires tsi iáh othé꞉nen tatesewaterihwaʼsónhtere ne Roiá꞉ner.

²⁸ Í꞉i kí꞉ken tsionkwahrihotháshion, tó꞉ka shí꞉ken kátkek thóh naiá꞉wenhne, tsi nienhiakwatwatsí꞉rihne ahónhton nahonhní꞉ron, ‘Sewatkátho! Ne iakisoʼthonkonhkén꞉en ronón꞉ni ne ietsienharáhkwa kwáh ki tsi ní꞉ioht ne Roiá꞉ner rahówenk ietsienharáhkwa. Iáh ne tè꞉ken nakonwanateskónthake tó꞉ka ó꞉ni ne karihwiioseʼokónhas, ók ne ki nahonwenenésten nonhtionhkweʼtashón꞉ʼas tsi í꞉i ó꞉ni Roiá꞉ner rahonkweʼtashón꞉ʼa í꞉ken.’

²⁹ Orihwihiohón꞉we tsi iáh tathasakwanenhraríhten ne Roiá꞉ner iáh ó꞉ni thahiakwatʼkawe tsi shakwanonhteráties nón꞉wa tsi enhiatsónhni ne ietsienharáhkwa ne nakonhwanateskón꞉thake ne konhtiʼtshé꞉nens tó꞉ka ó꞉ni tsi tsiakwahéstas nonátsas tó꞉ka ó꞉ni ne karihwiiosehokónhas. Iáh ne teiorì꞉wa tsi enhiatsón꞉ni ne ietsenharáhkwa tó꞉ka ken ne tahonsahionatʼthákwen ne Roiá꞉ner Sonkwawenhní꞉io rahówenk ietsenharáhkwa ne ohén꞉ton í꞉kate ne tsi watóhserote tsi nón꞉we nihèn꞉teron.”

³⁰ Ne Phinehas ne Ratsihénsthatsi tánon noié꞉ri niháti ne sakotihenténhse ronhnónkwe ne tsi kanakerahserá꞉ien ne ronhwahiaʼthanonhnátie, nononhtsikowaʼtsons tsi kahwatsí꞉raiens ne iaʼtewatséntos nòkwah rathitióhkwaiens ne Reuben, Gad, tánon ne nà꞉kon nòkwah ne Manasseh wahonhní꞉ron, tánon tsi rohnerientí꞉ios.

³¹ Ne Phinehas, ne roiénha ne Eleazar né꞉ne ratsihénsthatsi, washakawénhase, “Ó꞉nen wahonkwaterienʼtharáne né꞉tho Roiá꞉ner tsi tewakwé꞉kon. Iáh thatetsishekwahnenrarihténhni, tánon káti wahitsinonhstháthe nonhkweshón꞉ʼas Nisraerʼró꞉nonhke tsi iáh thashakoré꞉waʼthe ne Roiá꞉ner.”

³² Ethò꞉ne ne Phinehas tánon ne shakotihenténhse thonsahontetkháshion nonhkweshón꞉as ne Reuben ó꞉ni ne Gad ne tsi wathonhontsá꞉ien ne Gilead tánon sahonténhti Canaan nionsahónhne, tsi thatì꞉terons nonhkweshón꞉as Nisraerʼró꞉nonhke, tánon ionsahonwatikaraʼthónhase.

³³ Nisraerʼró꞉nons wahonerienhtí꞉io tánon wathonwanonhwerá꞉ton ne Rawenni꞉io. Iáh ó꞉nen ne tahonsahathiʼthárakwe nahatikarónhni nonhóntsa tsi nón꞉we ne Reuben tánon ne Gad nihonatená꞉taiens.

³⁴ Nonhkweshón꞉as ne Reuben tánon ne Gad wahonhní꞉ron, “Kí꞉ken ietsienharáhkwa ne tewakwé꞉kon ionkwarihwaní꞉ratis né꞉tho Roiá꞉ner tsi raónha nonhkwáh Ní꞉io í꞉ken.” Tánon káti ne wahatinà꞉tonhkwe “Karihwaní꞉rats.”