Joshua 21 - Ohiatonhseratokénti

Nonkweshón꞉as Ne Israerʼró꞉nonhke Tahonwénhnon Ne Tsi Kanatowá꞉nens Ne Levites

¹ Ne sakotihenténhse tsi ratiwatsiraiéntons ne Levite wahonwatkénhsera ne ratsihénsthatsi Eleazar, tánon ne Joshua né꞉ne Nun roiénha, tánon kentiohkwakwé꞉kon ne ohénton iehonhnéton tsi ratiwatsiraiénton ne Israerʼró꞉nonhke.

² Nonhkweshón꞉as ne Israerʼró꞉nonhke ó꞉nen thóh nón꞉we nihonatená꞉taien ákta ne tsi kanatowanénhke ne Shiloh né꞉ne tsi wathonwenhtsá꞉ien ne Canaan. Tsi náhe thóh ratiʼterónhthakwe, ne sakotihenténhse ne Levites kahwá꞉tsires wahonwatkénhsera ne Eleazar ratsihénsthatsi, tánon ne Joshua, tánon ratikwé꞉kon ne tsi kentióhkwaien ne Israerró꞉nonhke, tánon wahonhní꞉ron, “Ne Roiá꞉ner ró꞉rori ne Mahís, taséhion ne Levites ne kanatowá꞉nens eʼahatiʼterónhthake, tánon taséhion ó꞉ni nahontenhenrowanénhake nakonhwatiʼteronhthákwake ne rahotiʼtshenenhó꞉kons ákta akénhake ne tsi kanatowanénhke.”

³ Káti ne tahioianénhawe tsi ki nihorihwí꞉son ne Roiá꞉ner nonhkweshón꞉as Nisraerʼró꞉nonhke tahonwénhnon ne Levites kanathatokenhá꞉ton ó꞉ni ne watenhenrowá꞉nen thóh rahothinakerahserá꞉ko nón꞉we nahatirá꞉ko.

⁴ Ne kahwá꞉tsires ne Levites né꞉ne Kohath nahothiʼtharó꞉tens ne tahontié꞉renhte tahonwénhnon ne kanatowá꞉nen. Né꞉tho kahwá꞉tsires né꞉ne Aaron né꞉ne ratsihensthatsikén꞉en nón꞉we nitonatwatsirí꞉non, áhsen-iawénhre nikaná꞉thakes tahonwaná꞉wenhon né꞉ne tsi kanakerahserá꞉ien ne Judah, Simeon, tánon ne Benjamin.

⁵ Ne ken iotiéhtons ne rahotitharasónhas ne Kohath oié꞉ri ne nikaná꞉thakes thonwanawí꞉hon né꞉ne rahotinakerahserá꞉kon ne Ephraim nón꞉we, né꞉ne Dan, tánon ne tsi iaʼtewatséntos nokwá꞉ti ne Manasseh.

⁶ Tsi ratiʼtá꞉raien ne Gershon áhsen-iawénhre nikaná꞉thakes thonwanawí꞉hons né꞉ne kahotinakerahserá꞉kon ne Issachar nón꞉we, né꞉ne Asher, Naphtali, tánon ne tsitkarahkwí꞉nekens nokwá꞉ti ne Manasseh.

⁷ Tsi ratiwatsí꞉raiens ne kentharaʼshón꞉as ne Merari nón꞉we tékeni-iawénhre nikaná꞉thakes thonwanawí꞉hon né꞉ne rahotinakerahserá꞉kon ne Reuben nón꞉we, né꞉ne Gad, tánon ne Zebulun.

⁸ Tsi wahatiwasthó꞉tsi, ne nonhkweshón꞉as ne Israerʼró꞉nonhke ronónha kí꞉ken iehonatkhá꞉wen ki kanatowá꞉nens ó꞉ni ne tsi watenhenʼrowá꞉nen nakonhwatiʼterontáhkwake ne rahotiʼtshenenhó꞉kons ne Levites nahatihiató꞉tens, tsi ki nihorihwí꞉son ne Roiá꞉ner rahonhà꞉ke ne Mahís.

⁹ Ne kí꞉ken tsi nihiotisenhnoténsons ne kanatowá꞉nens né꞉ne kanakerahserá꞉kon ne Judah tánon ne Simeon nón꞉we niwatkhà꞉wen.

¹⁰ Né꞉ne tsi rawatsiratátie ne Aaron né꞉ne Kohath nahoʼtharó꞉tenhne, né꞉ne Levi nahatihiaʼtó꞉ten nón꞉we nitsawé꞉non. Ne rotiienàhon ne tiotierénhton iotón꞉ʼon.

¹¹ Ne kanatowá꞉nens thonwanawí꞉hon né꞉ne Arba (ne Arba né꞉ne Anak roʼnikén꞉en), ne ó꞉nen skonwáiats ne Hebron, né꞉ne tsi iononhtharónhnions ne Judah nón꞉we, kenikwé꞉kon ne tsiwatenhenrowá꞉nen ne konhwatiʼteronhthákwa kaʼtshé꞉nen ne tehiowanákthon.

¹² Ethosà꞉ne, tsi kahentaiéntons ne kanatowá꞉nens, ó꞉ni ne kenʼnikanatà꞉sas, ó꞉nenk nénhne ne thonwá꞉wi ne Caleb ne roʼní꞉ha ne Jephunneh ne nahowenhkónhweke.

¹³ Iehiowénhte ne Hebron (ne nénska ne kanatowá꞉nens ne ronthasehthákwa ne sohnateriwatewá꞉tons), ne ionathawenhténions ne nénhne thonwaná꞉wi tsi rawatsiratátie ne Aaron né꞉ne rokhá꞉res í꞉ken eʼí꞉kare ne tsi watenhenrowá꞉nens ne konhwathiʼteronhthákwa rahotiʼtshenenhó꞉kons né꞉ne Libnah,

¹⁴ Jattir, Eshtemoa,

¹⁵ Holon, Debir,

¹⁶ Ain, Juttah, tánon ne Beth Shemesh, konhtikwé꞉kon ne tsi watenhenrowá꞉nens ne konhwathiʼteronhthákwa ne rahotiʼtshenenhó꞉kons: tióhton nikaná꞉takes nakwé꞉kon né꞉ne tsi rahotitióhkwas ne Judah ó꞉ni ne Simeon rahotirihwà꞉ke.

¹⁷ Ne tsi kanakerahserá꞉ien ne Benjamin kaié꞉ri nénhne nikaná꞉takes thonwaná꞉wi: né꞉ne Gibeon, Geba,

¹⁸ Anathoth, tánon ne Almon, konhtikwé꞉kon tsi watenhenrowá꞉nens.

¹⁹ Áhsen-iawénhre ne kanatowá꞉nens norihwakwé꞉kon, konhtikwé꞉kon ne tsi watenhenrowá꞉nens, ne thonwaná꞉wi ne rothikhá꞉res, né꞉ne tsi rawatsirathátie ne Aaron.

²⁰ Nó꞉ia tsi ratiwatsirathátie ne Levite né꞉ne Kohath nahothiʼtaró꞉tens kanatowá꞉nens thonwanawí꞉hon né꞉ne tsi kanakerahserá꞉ien ne Ephraim nón꞉we.

²¹ Kaié꞉ri ní꞉kons ne kanatowá꞉nens thonwanawí꞉hon: né꞉ne Shechem í꞉kare ne watenhenrowá꞉nens né꞉ne tsi iononhtharónhnions kanakerahserá꞉iens ne Ephraim nón꞉we (ne á꞉re nénska ne kanatowá꞉nen ronhthasehthákwa ne sohnaterihwatewá꞉tons), tánon ne Gezer,

²² Kibzaim, tánon ne Beth Horon, í꞉kare ne tsi watenhenrowá꞉nens.

²³ Ne tsi kanakerahserá꞉ien ne Dan kaié꞉ri nikaná꞉takes thonwanawí꞉hon: né꞉ne Eltekeh, Gibbethon,

²⁴ Aijalon, tánon ne Gathrimmon, í꞉kare ne watenhenrowá꞉nens.

²⁵ Ne tsi kanakerahserá꞉ien ne tsi iaʼtewatséntos nòkwah ne Manasseh tékeni kanatowá꞉nens thonwaná꞉wi: né꞉ne Taanach tánon ne Gathrimmon, thóh í꞉kare tsi watenhenrowá꞉nens.

²⁶ Kí꞉ken kahwá꞉tsires né꞉ne Kohath nahothiʼtaró꞉tens oié꞉ri ní꞉kons kanatowá꞉nens thonwaná꞉wi, thóh í꞉kare ne watenhenrowá꞉nens konwatiʼteronhtáhkwa ne rahotiʼtshenenhó꞉kons.

²⁷ Nó꞉ia kentióhkwas ne Levites, né꞉ne Gershon nahothiʼtaró꞉ten, tekaná꞉takes kanatowá꞉nens rotiienàhon né꞉ne tsi kanakerahserá꞉ien ne tsitkarahkwí꞉nekens nòkwah ne Manasseh: tánon ne Golan né꞉ne Bashan nón꞉we (ne ná꞉re nénska kanatowanénhke ronthasetáhkwakwe ne sohnaterihwatewá꞉tons) tánon ne Beeshterah, eʼí꞉kare ne tsi watenhenrowá꞉nens ne konwatiʼteronhtáhkwa rahotiʼtshenenhó꞉kons.

²⁸ Ne tsi kanakerahserá꞉ien ne Issachar kaié꞉ri nikaná꞉thakes ne kanatowá꞉nens rotiienàhon: né꞉ne Kishion, Daberath,

²⁹ Jarmuth, tánon ne Engannim, konhtikwé꞉kon ne tsi watenhenrowá꞉nens ne konwatiʼteronhtáhkwa rahotiʼtshenenhó꞉kons.

³⁰ Ne tsi kanakerahserá꞉ien ne Asher kaié꞉ri nikaná꞉thakes kanatowá꞉nens thonwaná꞉wi: né꞉ne Mishal, Abdon,

³¹ Helkath, tánon ne Rehob, eʼí꞉kare ne watenhenrowá꞉nens tsi ronhwatiʼteronhtáhkwa ne rahotiʼtshenenhó꞉kons.

³² Ne tsi kanakerahserá꞉ien ne Naphtali áhsen nikaná꞉thakes kanatowá꞉nens thonwaná꞉wi: né꞉ne Kedesh ne Galilee nón꞉we, eʼí꞉kare ne watenhenrowá꞉nens tsi ronhwatiʼteronhtáhkwa rahotiʼtshenenhó꞉kons (ne ná꞉re nénska ne kanatowanénhke ronhthasetháhkwakwe ne sohnaterihwatewá꞉tons), ó꞉ni ne Hammoth Dor, tánon ne Kartan, eʼí꞉kare ne watenhenrowá꞉nens tsi konhwatiʼteronhtáhkwa ne rahotiʼtshenenhó꞉kons.

³³ Ne niaʼtekawatsí꞉rakes ne tsi ratiʼthá꞉raien ne Gershon áhsen-iawénhre nikaná꞉thakes kanatowá꞉nens rotiienàhon konhtikwé꞉kon ne watenhenrowá꞉nens tsi konhwathiʼteronhthákwa ne rahotiʼtshenenhó꞉kons.

³⁴ Ne ronátiaʼkes ne Levites, né꞉ne Merari nahotiʼtharó꞉tens, né꞉ne tsi kanakerahserá꞉ien ne Zebulun nón꞉we nahatiié꞉na kaié꞉ri nikaná꞉thakes kanatowá꞉nens: né꞉ne Jokneam, Kartah,

³⁵ Dimnah, tánon ne Nahalal, konhtikwé꞉kon ne watenhenrowá꞉nens tsi konhwatiʼteronhtáhkwa rahotiʼtshenenhó꞉kons.

³⁶ Ne tsi kanakerahserá꞉ien ne Reuben kaié꞉ri nikaná꞉thakes kanatowá꞉nens wahatiié꞉na: né꞉ne Bezer, Jahaz,

³⁷ Kedemoth, tánon ne Mephaath, konhtikwé꞉kon ne watenhenrowá꞉nens tsi konhwatiʼteronhtáhkwa ne rahotiʼtshenenhó꞉kons.

³⁸ Ne tsi ratiʼtá꞉raiens ne Gad kaié꞉ri nikaná꞉thakes wahatiienà꞉seron: né꞉ne Ramoth ne Gilead nón꞉we, thóh í꞉kare ne watenhenrowá꞉nen ne tsi konhwatiʼteronhtáhkwa ne rahotiʼtshé꞉nens (ne nénskat ne kanatowá꞉nens ne ronthasetáhkwakwe ne sohnateriwatewá꞉tons), né꞉ne Mahanaim,

³⁹ Heshbon, tánon ne Jazer, konhtikwé꞉kon ne watenhenrowá꞉nen ne tsi ronhwatiʼteronhtáhkwa ne rahotiʼtshenenhó꞉kons.

⁴⁰ Káti ne tsi ratiʼthá꞉raiens ne Merari ne thonwaná꞉wi thakwékton né꞉ne tékeni-iawénhre nikaná꞉thakes kanatowá꞉nens.

^41-42 Ne tsi wathonwenhtsá꞉ien né꞉tho nonhkweshón꞉as Israerʼró꞉nonhke ronatiaʼthakwehniióston, né꞉ne tkakwétons ne kaiéri-niwáhsen-shaʼté꞉kon nikaná꞉thakes kanatowá꞉nens, konhtikwé꞉kon ne watenhenrowá꞉nens ne tsi konhwatiʼterontáhkwa ne rahotiʼtshenenhó꞉kons ne tehiokwathasèhton, ne thonwaná꞉wi ne Levites.

Nisraerʼró꞉nons Wahontiaʼthakwehní꞉ioste Nohóntsas

⁴³ Káti ne Roiá꞉ner thashaká꞉wen Nisraerʼró꞉nons akwé꞉kon nohóntsas ne kwáh rorihwanirá꞉ton tsi shakorahratstén꞉ni ne sakotisoʼthonkonhkén꞉en tsi enteshaká꞉wen. Ne nó꞉nen shihonatiaʼthakwehniióstons, thóh nón꞉we nahontená꞉taien.

⁴⁴ Ne Roiá꞉ner thashaká꞉wen ne skén꞉non kwáh tsi niwatenáskwa ne tsi ionhontsá꞉ien, kwáh ki tsi nishakorahratstén꞉ni ne shakotisoʼthonkonhkén꞉en. Iáh ne shahiátha ne tehontaʼtsons tehothikwénion nahonthahonwanatiaʼthóntion, tiorì꞉wa ne Roiá꞉ner tsi thashakáwe Nisraerʼró꞉nons natesenhnié꞉tsheras tsi nòkwah ne tehontaʼtsons.

⁴⁵ Ne Roiá꞉ner kwáh orihwakwé꞉kon waharihwaié꞉rihte tsi nishakorahratstén꞉ni nonhkweshón꞉as Nisraerʼró꞉nonhke.