Joshua 2 - Ohiatonhseratokénti

Ne Joshua Ronhteriwathó꞉rats Iashakotóri Ne Jericho

¹ Ethò꞉ne ne Joshua teʼnihiáse iashakotóri né꞉ne tsi thonataʼtóserote ne Acacia nonhthá꞉ne ronhwatináhon ne iáhne tánon akariwasèhtonhke tsi ianirihwíshake ne tsi iohontsá꞉ien ne Canaan, sénha ne tsi kanatowanénhne ne Jericho. Shiahánewe ne tsi kanatowanénhke, thóh niahà꞉ne tánon thóh nón꞉we iahiasonhtíhiake ne tsi tionónhshothe ne iorihwahiataʼtónhon né꞉ne Rahab konwáiats.

² Ne ronhnonhtí꞉io ne Jericho waharihwà꞉ronke khatenihiató꞉ten Israerʼró꞉nons tsi niwasónhtes ró꞉ti ne nahiaterihwató꞉rahthe ne tsi kanakerahserá꞉ien,

³ sók ki iahaterihwaniénhthase ne Rahab: “Ne tenónhkwe ne tsi sanónhshothe ronathawehiáton ró꞉ti nahiateriwató꞉rahthe ne kanakerahserakwé꞉kon! Tasehiaʼtínekenf!”

^4-6 “Tó꞉kara nihá꞉ti ne ronhnónkwe ró꞉ti tsi wakenónhshote,” tsi watkariwaʼsehrá꞉ko, “ók iáh ki tewakaterièn꞉thare kaʼnón꞉we nithoné꞉non. Siaʼkaráhkwenhne sohnaténhtion nohénton ne tsi kanatowá꞉nen iotenhenrakà꞉ronte shonthenóton. Iáh tewakeriwaʼtsénhrion kaniahonenonhátie, ók tó꞉ka tenhsasterí꞉hen naséhsere, enskwé꞉ni nasehié꞉na.” (Nón꞉wa ne Rahab iehiakohiaʼténha ki teʼnihiáse iaterihwató꞉rats tsi karonhkweʼnáhere ne tsi ionónhshote tánon thóh iehiakohiathaséhton ne tsi kakérons ne ieienthótha ohská꞉re ne ehiehioké꞉rons.)

⁷ Ne ronhnonhtí꞉io rahonkweʼtashón꞉as wahonhtén꞉ti ne tsi kanatowanénhke, ethò꞉ne ne tsi iotenhenrakà꞉ronhte onhtenhó꞉ton. Ronhwatihiaʼtisákhon ki teʼnihiáse Israerʼró꞉nons iaterihwató꞉rats tsi nió꞉re ne tsi tetshiaʼthaháhsere ne Jordan.

⁸ Nohén꞉ton ne iaterihwató꞉rats nahiathatewehienénhthaʼne nahothì꞉tawe noʼkarasné꞉ha, ne Rahab hiakarà꞉then ne karonhkweʼnà꞉ke

⁹ tánon wahakawénhase, “Wakaterièn꞉tare né꞉tho Roiá꞉ner tsi thetsisewá꞉wi ki kén꞉en ionhontsá꞉ien. Kwáh onhkweʼtakwé꞉kon ne kén꞉en kanakerahserá꞉kon tsi ietsiʼtshiánis.

¹⁰ Hionkwariwarón꞉ken tsi ní꞉ioht tsi roniatarásthaton ne kaniatarakeʼkowáhne ne Roiá꞉ner ne sewahénton ne shathontesewahténhti ne Egypt. Hionkwarihwarónhken ó꞉ni tsi ietsinonhwarià꞉kon ne Sihon tánon ne Og, ne teʼnihiáse Amorʼró꞉nons shakothinonhtí꞉iokwe ne nà꞉kon nòkwah ne Jordan.

¹¹ Hionkwáteronskwe tsi nihiostó꞉re sahakwarihwà꞉ronhke; hiakwakwé꞉kon wahakwaʼnikonhrókten tsi í꞉se sewaríhwa. Ne Roiá꞉ner Sewaní꞉io ne karonhià꞉ke ténhteron ó꞉ni ne kén꞉en ohontsà꞉ke.

¹² Káti ó꞉nen rahohénton sewarihwaní꞉rat tsi entietsihiateweienhtónhase nakhwá꞉tsires tsi ní꞉i natkwarihwasniése, tánon knahò꞉tenk thakwanaʼtónhas nahónton ahontakwè꞉takwe.

¹³ Thakwararátsten tsi entsisewanónsthathe ne rakeʼní꞉ha ó꞉ni nakeʼnisténha, iakwathatekeʼokón꞉as ó꞉ni ne iakwatenosohokón꞉as, ó꞉ni akwé꞉kon ne rahothiwá꞉tsires! Tó꞉sa tsaʼthóntat nahionkinonhwarià꞉kon!”

¹⁴ Ne tenónhkwe wakonhwénhase, “Aiá꞉wens ne Rawenni꞉io ieháhaf ne tsi iakenónhne tó꞉ka thóh nenhiakení꞉hiere tsi nenhiakení꞉ron! Tó꞉ka iáh ónhka thaieʼtsirohriáhne tsi nihiatiatiérahkwe, kwáh ki entsiarahrátsten nó꞉nen ne Roiá꞉ner enteshón꞉tion kí꞉ken ionhontsá꞉ien, kwáh ki enhioianeréhake tsi tenhkwarihwasniése.”

¹⁵ Ne Rahab thóh nón꞉we nikenʼterónhthakwe ne kanónhsa iekakwékton tsi kanonhsónhni ne tsi tekensténrote ne watenhèn꞉rote ne tsi kanatowáne, káti ki tenónhkwe tsi iononsthonkwaráronhte tahiakosnénhthakwe asehríhie wáhiasthe.

¹⁶ “Wás tsi tiononhtaʼrón꞉nions niahà꞉sene,” waʼkèn꞉ron, “nonhtié꞉renk ne ronhnonhtí꞉io rahonkweʼtashón꞉ʼas enieʼtsihiataʼtshénhri. Thóh nón꞉we áhsen nón꞉ta nikarì꞉wes iatsatháset ne tsi nió꞉re tenʼthónhne. Nenhwató꞉hetste, thó꞉ne tsatsaʼtén꞉ti.”

¹⁷ Ne thenón꞉we wakonhwénhase, “Enhiatsiatʼtháwa narahrá꞉tshera ne waskhenón꞉nien nahontakénon.

¹⁸ Ó꞉nenk tsi kenhnénshere. Ne sahakwanenhrénthe ne tsonhontsáke, swánerenk ki onekwénhthara asehríhie ne tsi iononhsthonkwakà꞉ronte tsi nón꞉we nonhtastiatsʼnenhthákwen. Iashé꞉nonhk ne iaʼní꞉ha ó꞉ni ne saʼnisténha, sewathatekenhokón꞉as, tánon ratikwé꞉kon ne iaʼní꞉ha rahowá꞉tsire skátke rónhton ne tsi shanónhsote.

¹⁹ Tó꞉ka ónhka tsi niháti ne iahatihiá꞉kenʼne, nenhrenhéie raónha ki rahorì꞉wa, tánon iáh í꞉i thahionhtiaʼterihwahésten; ók tó꞉ka ónhka ne sewakwé꞉kon ahotikaré꞉wathe, ethò꞉ne ki í꞉i enhiontiaʼterihwáhesthe.

²⁰ Ók ki tó꞉kaʼa, ónhkak aieʼtsiró꞉ri tsi nihiontsiatiéren, ethò꞉ne ki iáh thatehiotonhontsóhon nahiatsiatié꞉nawatste nonhtsiarahrátshera ne waskenónhnien nahonthakè꞉non.”

²¹ Wakarihwanónhweʼne tánon sahiakotékwahte. Nó꞉nen shisohnaténtion, wakawanérenhke nonekwénhtara niwasehrihetó꞉ten ne tsi iononsthonkwakà꞉ronhte.

²² Ne iaterihwató꞉rats tsi tiononhthaʼrón꞉nion niaháne tánon wahiathásehte. Ne ronhnonhtí꞉io rahonkweʼtashón꞉as washakotihiaʼthísake né꞉ne áhsen nónhta nikarì꞉wes, ók iáh ki teonwathihiataʼtshénrion, sók ki Jericho nionsahón꞉ne.

²³ Ne teʼniháse iaterihwató꞉rats thontahianonhtatsnénhthe, thon shaniniatarí꞉hiaʼke, tánon Joshua tsítres nionhshà꞉ne. Wahonwahró꞉ri akwé꞉kon tsi nahá꞉wenhne,

²⁴ tánon ethò꞉ne waní꞉ron, “Orihwí꞉io onhkenónhni ne Roiá꞉ner tsi teshonkwá꞉wi kí꞉ken kanakerahserakwé꞉kon. Ratikwé꞉kon ne nón꞉we nonhkweshón꞉as kwáh hionkhitsà꞉nis.”