Joshua 19 - Ohiatonhseratokénti

Ne Kanakeráhseras Thonwanawí꞉hon Ne Simeon

¹ Ne tekeníhaton iesewatká꞉wen ne kanakeráhseras né꞉ne tsi rathiwatsí꞉raiens ne rahotitióhkwakons ne Simeon. Ne rahotinakeráhseras iekárathe ne Judah rahótinakerahserá꞉kon né꞉ne thonwaná꞉wi ne tsi ratitióhkwaien ne Judah.

² Thóh í꞉kare ne Beersheba, Sheba, Moladah,

³ Hazar Shual, Balah, Ezem,

⁴ Eltolad, Bethul, Hormah,

⁵ Ziklag, Beth Marcaboth, Hazar Susah,

⁶ Beth Lebaoth, tánon ne Sharuhen: áhsen-iawénhre nikaná꞉takes, kontikwé꞉kon ne akthatieʼshón꞉as kanataién꞉tons.

⁷ Tánon ó꞉ni thóh í꞉kare ne Ain, Rimmon, Ether, ó꞉ni ne Ashan: kaié꞉ri nikaná꞉thakes, kontikwé꞉kon ne akthatieʼshón꞉as kanataién꞉tons.

⁸ Akwé꞉kon kí꞉ken thóh í꞉kare ne akthatieʼshón꞉as kanataién꞉tons kwáh tsi nió꞉re ne Baalath (tó꞉ka ó꞉ni né꞉ne Ramah), né꞉ne entiè꞉ne nón꞉we. Ne kí꞉ken nonhóntsa ne tsi rathiwatsí꞉raien ne rahotitióhkwakons ne Simeon rotiienàhon nahonawenhkónhweke.

⁹ Tsi nithonwaná꞉wi ne Judah sénha ne ronatenatowá꞉nens tsi natehonathonhontsó꞉ni, ostónha ne rahotinakeráhseras né꞉ne tsi ratitióhkwaiens ne Simeon tethonwaná꞉wi.

Ne Kanakeráhseras Thonwaná꞉wi Ne Zebulun

¹⁰ Ne kí꞉ken nasénhaton iesewatkà꞉wen né꞉ne tsi ratiwatsí꞉raiens ne rahotitióhkwakons ne Zebulun. Nonhóntsa ne rotiienàhon ié꞉was kwáh tsi nió꞉re ne Sarid.

¹¹ Thóh ietsioténhtion ne tsi karisthatátie tsi iaʼtewatséntos nietsawé꞉non né꞉ne Mareal nón꞉we, iehioienàhon ne Dabbesheth ó꞉ni ne tsi kahionhatátie ne tsitkarahkwí꞉nekens nokwá꞉ti ne Jokneam.

¹² Ne í꞉se nokwá꞉ti ne Sarid tsitkarahkwí꞉nekens nokwá꞉ti nietsawé꞉non ne tsitkaristhatátie ne Chisloth Tabor, ethò꞉ne Daberath nietsawénhnon tsi nió꞉re ne Japhia.

¹³ Iehiokonhthákwen tsitkarahkwí꞉nekens nokwá꞉ti niahawenonhá꞉tie thóh ietsoténtion né꞉ne Gath Hepher tánon ne Ethkazin nietsawé꞉non, iaʼtehiokwatá꞉se tsi nieiawé꞉non ne Neah tsi wahohatátie ne Rimmon.

¹⁴ Nothorè꞉ke nón꞉we ne tsi karisthatátie iaʼtehiokwatá꞉se Hannathon, eʼiatehiothàhon ne Iphtahel Ahonráhkwakon.

¹⁵ Thóh í꞉kare ne Kattath, Nahalal, Shimron, Idalah, ó꞉ni ne Bethlehem: tékeni-iawénhre nikaná꞉thakes ne kanatowá꞉nens, konhtikwé꞉kons ne akthatieʼshón꞉as kanataién꞉tons.

¹⁶ Kí꞉ken kanatowá꞉nens ó꞉ni ne kanataién꞉tons né꞉ne thóh ionhontsá꞉ien né꞉ne tsi rathiwatsí꞉raiens ne rahotitióhkwakons ne Zebulun rotiienà꞉serons nahonawenhkhónweke.

Ne Kanakeráhseras Thonwaná꞉wi Ne Issachar

¹⁷ Ne kí꞉ken ne kaieríhaton iesewatkà꞉wen tsi nithonwaná꞉wi ne tsi rathiwatsí꞉raiens ne rahotitióhkwakons ne Issachar.

¹⁸ Ne rahononhóntsas thóh í꞉kare ne Jezreel, Chesulloth, Shunem,

¹⁹ Hapharaim, Shion, Anaharath,

²⁰ Rabbith, Kishion, Ebez,

²¹ Remeth, Engannim, Enhaddah, ó꞉ni ne Bethpazzez.

²² Ne tsi karisthatátie iehioienawà꞉kon ne Tabor, Shahazumah, ó꞉ni ne Beth Shemesh, eʼiatehiothàhon ne Jordan. Thóh í꞉kare ne iá꞉iak-iawénhre kanatowá꞉nens konhtikwé꞉kons ne kanataién꞉tons akthatieʼshón꞉as.

²³ Kí꞉ken kanatowá꞉nens tánon ne kenʼnikanatà꞉sas ahotinathashón꞉as thóh kanataién꞉tons ne tsi ionhontsá꞉ien ne kahwá꞉tsires ne rahotitióhkwakons ne Issachar rotiienà꞉sehrons nahonawenhkónhweke.

Ne Kanakeráhseras Thonwanawí꞉hon Ne Asher

²⁴ Né꞉ne wískhaton iewatkawánion né꞉ne tsi ratiwatsí꞉raien ne rahotitióhkwakons ne Asher.

²⁵ Nahotenátha eʼí꞉kare ne Helkath, Hali, Beten, Achshaph,

²⁶ Allam Melech, Amad, tánon ne Mishal. Ne tsi iaʼtewatséntos nòkwah iekaié꞉nas ne Carmel ó꞉ni ne Shihor Libnath.

²⁷ Tsi iotsokarenhrákwen tsitkarahkwí꞉nekens nòkwah ietsawé꞉non, ne karisthatátie eʼnieiawé꞉non né꞉ne Bethdagon nón꞉we, iehioiénen ne Zebulun ó꞉ni ne Iphtahel Ahonráhkwakon tsi ieiawé꞉non nothorè꞉ke né꞉ne Bethemek ó꞉ni ne Neiel. Iehiothasónhtere Cabul nieiawé꞉non,

²⁸ Ebron, Rehob, Hammon, tánon ne Kanah, tsi nió꞉re ne Sidon.

²⁹ Ne tsi karisthatátie ethò꞉ne ietsokarenhrákwen né꞉ne Ramah nieiawé꞉non, iehioniharàhon ne tekanathanákton ne kanatowanénhke ne Tyre; ethò꞉ne iaʼtetsohió꞉saien Hosah ietsawé꞉non tánon thóh iatehiothàhon ne Mediterranean Kaniatarakeʼkó꞉wa. Eʼí꞉kare ne Mahalab, Achzib,

³⁰ Ummah, Aphek, ó꞉ni ne Rehob: tewáhsen-tékeni nikaná꞉thakes nakwé꞉kon, kontikwé꞉kon ne kenʼnikanatà꞉sas aktónties.

³¹ Kí꞉ken kanatowá꞉nens ó꞉ni ne kenʼnikanatà꞉sas thóh tsi iohontsá꞉ien nón꞉we nikanathaién꞉tons né꞉ne tsi ratiwatsí꞉raiens ne rahotitióhkwakons ne Asher rotiienà꞉seron nahonawenhkónweke.

Ne Kanakeráhseras Thonwanawí꞉hons Ne Naphtali

³² Né꞉ne iaiákhaton iewatkháwen né꞉ne tsi ratiwatsí꞉raiens ne rohotitióhkwakons ne Naphtali.

³³ Nothorè꞉ke nòkwah karisthatátie né꞉ne rahotinakerahserá꞉kon nón꞉we thóh tsioténtion ne tsi kaná꞉thaien ne Heleph thóh ietsawè꞉non ne okarátsi ákta ne tsi kaná꞉thaien ne Zaanannim, thóh nón꞉we nietsawé꞉non né꞉ne Adaminekeb tánon ne Jamnia, tsi nió꞉re ne Lakkum, tánon thóh iatehiothà꞉hon ne Jordan nón꞉we.

³⁴ Thóh nón꞉we ne tsi karisthatátie iotsokarenhrákwen tsi iaʼtewatséntos nòkwah nietsawè꞉non né꞉ne Aznoth Tabor nón꞉we, thóh ietsioténtsion Hukkok nietsawé꞉non, iehioienahon ne Zebulun ne nenhtiè꞉ne nòkwah, Asher ne nénhne ne tsi iaʼtewatséntos nòkwah í꞉ken, tánon ne Jordan ne nénhne ne tsitkarahkwí꞉nekens nòkwah í꞉ken.

³⁵ Ne watenhénrothes ne tekanathanáktons ne tsi kanathaién꞉tons ne kanatowá꞉nens né꞉ne Ziddim, Zer, Hammath, Rakkath, Chinnereth,

³⁶ Adamah, Ramah, Hazor,

³⁷ Kedesh, Edrei, Enhazor,

³⁸ Yiron, Migdalel, Horem, Bethanath, tánon ne Beth Shemesh: tióhton-iawénre nikaná꞉takes nakwé꞉kon, konhtikwé꞉kon ne kenʼnikanatà꞉sas aktónties kanataién꞉tons.

³⁹ Kí꞉ken kanatowá꞉nens ó꞉ni ne kenʼnikanatà꞉sas thóh tsi ionhontsá꞉ien né꞉ne tsi ratiwatsí꞉raiens ne rahotitióhkwakons ne Naphtali rotiienàhon nahonawenhkónhweke.

Ne Kanakeráhseras Thonhwanawí꞉hons Ne Dan

⁴⁰ Ne tsatákhaton niwatká꞉wen né꞉ne tsi ratiwatsí꞉raiens ne rahotitióhkwakons ne Dan.

⁴¹ Tsi niwatenáskwa thóh í꞉kare ne Zorah, Eshtaol, Irshemesh,

⁴² Shaalbim, Aijalon, Ithlah,

⁴³ Elon, Timnah, Ekron,

⁴⁴ Eltekeh, Gibbethon, Baalath,

⁴⁵ Jehud, Beneberak, Gathrimmon,

⁴⁶ Mejarkon, tánon ne Rakkon, tánon ó꞉ni ne kanakeráhseras naktónties ne Joppa.

⁴⁷ Nó꞉nen nonhkweshón꞉as ne Dan nón꞉we sahonwenhnonhontsákwa, tsit kanatowá꞉nen ne Laish niahónhne tánon iakonhwatiaʼtón꞉ti. Wahatiié꞉na, washakotinonhwariaʼkónhnion nahonkweʼtashón꞉as, tánon ronhnónha sahontiaʼthakwehní꞉ioste. Thóh wahontená꞉thaien tánon wathatitsenhnaté꞉ni tsi nihiosenhnó꞉ten ne kanatowá꞉nen ne konwá꞉iatskwe ne Laish ók Dan sakonhwasénhnon, ne sahatiná꞉thonkwe ne ronhwasotkén꞉en Dan rahosenhnakén꞉en.

⁴⁸ Kí꞉ken kanatowá꞉nens ó꞉ni ne kenʼnikanatà꞉sas thóh tsi ionhontsá꞉ien né꞉ne tsi ratiwatsí꞉raiens ne rahotitióhkwakons ne Dan rotiienàhon nahonawenhkónhweke.

Ne Nonaʼkénkha Sewatkháwen Nohóntsa

⁴⁹ Nó꞉nen Israerʼró꞉nons shahatísa tsi wathatiná꞉rithe nonhóntsas, tahónhion ne Joshua roiénha Nun énska iokwènhratre nonhóntsa nahowenhkónhweke.

⁵⁰ Kwáh ki tsi nihorihwí꞉son ne Roiá꞉ner, tahónhion ne kanatowá꞉nen tsi nihorihwanónhton: Né꞉ne Timnah Serah, né꞉ne tsi ionhniarónhnions tsi kanakerahserá꞉ien ne Ephraim. Sahatenatón꞉ni ne kanatowá꞉nen tánon thóh nón꞉we nahatená꞉taien.

⁵¹ Onhkweʼtakwé꞉kon ne Israerʼró꞉nonhke wahonteró꞉roke ahohénton ne Aterihwaʼseronhniá꞉tshera Wató꞉serothe né꞉ Shiloh nón꞉we. Thóh nón꞉we nahonteró꞉roke ne káti ne rokhá꞉res Eleazar, tánon ne Joshua, ó꞉ni ne sakotihenténhse ne rahotitióhkwas nahónton thasakotihià꞉konhase nonhóntsas ne tsi iaʼtewatséntos nòkwah ne Jordan Kaniataratátie. Wahatiwasthó꞉tsi ne nahatirihwaʼtshén꞉ri onh ní꞉ioht tsi tehotonhontsó꞉ni ne Roiá꞉ner tsi takahià꞉konhke nonhóntsas.