Joshua 18 - Ohiatonhseratokénti

Tsi Naʼtekakhasónhkwens Ne Ken Iotiétons Nonhontsaʼshón꞉as

¹ Nó꞉nen sahatiiéna nonhontsaʼshón꞉as, kwáh kenʼnenhrakwé꞉kon ne Israerʼró꞉nonhke wahonhnitiohkwaró꞉roke ne Shiloh nón꞉we tánon wahonthatoserothón꞉nion tsi nón꞉we ní꞉res ne Roiá꞉ner.

² Shé꞉kon tsáta nihotitióhkwakes Nisraerʼró꞉nonhke ne aré꞉kho tehotiienà꞉seron tsi natehonaténhtion nonhóntsas.

³ Sók ki ne Joshua washakawénhase nonhkweshón꞉as ne Israerʼró꞉nonhke, “Tonikarí꞉wes ensewateráhrate nohén꞉ton iaísehwe tánon sewatié꞉nawats nonhóntsas nètho Roiá꞉ner ne Sakoní꞉io ne ietsisothonkonhkén꞉en tetsisehwá꞉wi?

⁴ Thakwarí꞉hon áhsen niháti ne skenhtiohkwà꞉tsions khehiatié꞉nawats. Ienkhehiaténiethe kanakerahserakwé꞉kon nahonhnonhóntieʼrasthe ne tsi kanakerahserá꞉ien né꞉ne ahatinónhweʼne nahontié꞉nawatste. Ethò꞉ne akonhà꞉ke natenʼthónhne.

⁵ Nonhóntsa tsáta natenkahià꞉khonke; Ne Judah thóh enhonhnésehke ne rahotinakerahserá꞉kon ne nenhtiè꞉ne nón꞉we, tánon ne Só꞉se ne rahotinakerahserá꞉kon ne othorè꞉ke nón꞉we.

⁶ Ienkhehiaʼthéniethe nahatihiáton nahontrorí꞉hake ne kanakerahserakwé꞉kon tsi nón꞉we nihathinónhwes ahatiié꞉na nonhóntsas. Tenhathihiakhónhnion ne kanakeráhseras né꞉ne tsáta niiorì꞉wake tsi ní꞉ioht tsi tenhathihiakhónhnion tánon tenhtsionkhawí꞉ten norì꞉wa. Ethò꞉ne ki enkhewastó꞉tsi kaʼniká꞉ien ne Roiá꞉ner í꞉rehre ne skentiohkwà꞉tions nahatiienà꞉seron.

⁷ Ne Levites, ethosà꞉ne, iáh nénhne thé꞉nen thatehonathénhtion nahathiienà꞉seron nonhóntsas tsi ní꞉ioht ne sewatiákes, tiorì꞉wa né꞉ne tehonathéntion nahonwahiò꞉tenhse ne Roiá꞉ner tsi rotikhá꞉res akénhake. Tánon ki ó꞉ni, ne rahotitióhkwas ne Gad, Reuben, tánon ne tsitkarahkwí꞉nekens nokwá꞉ti ne Manasseh ó꞉nenk nénhne rothiienà꞉serons tsi naʼtehonathèn꞉tsons né꞉ne tsitkarahkwí꞉nekens nokwá꞉ti ne Jordan, né꞉ne Mahís, né Roiá꞉ner rahonhátshera, teshakowí꞉hon.”

⁸ Ne ronhnónkwe iahón꞉ne nahonnonhóntsarasthe ne nó꞉nen ne Joshua shisakorihónhte: “Ohontsakwé꞉kon nonhtásewet tánon tionhóntsarast, tánon thontaskwahawí꞉ten. Tánon ethosà꞉ne kén꞉en ne Shiloh kwáh enhirihwanón꞉tonhse ne Roiá꞉ner ne ní꞉se ahisewawasthóhtsi.”

⁹ Káti ne ronhnónkwe kwáh onhontsakwé꞉kon nonhthahónhnethe tánon wahóntien wahatihiaʼtónhnion tsi ní꞉ioht tsi wathatiʼná꞉rihthe ne tsáta nihiorì꞉wake, rothihiathóntie ne kanathaiéntons. Ethò꞉ne Joshua sahonwatkénhsera ne tsi totená꞉thaien ne Shiloh.

¹⁰ Ne Joshua wahawastotión꞉ko nahorihwaiénhase ne Roiá꞉ner ne rahothirihwà꞉ke, tánon nahonthasaká꞉wen ne ronathatén꞉rons ne kentióhkwas ne Israerʼró꞉nonhke ne kathokenstánions nonhóntsas.

Ne Kanakeráhseras Thonwanawí꞉hon Ne Benjamin

¹¹ Ne kanakeráhseras rahonà꞉wenk ne tsi rathiwatsí꞉raien ne rahothitióhkwas ne Benjamin ne tahatihén꞉ten tahonwénhnon nonhóntsa. Ne rahononhóntsa thóh nón꞉we nihiohontsá꞉ien tsi naʼtehón꞉tere ne Judah rahotitióhkwa tánon ne Só꞉se.

¹² Nothorè꞉ke nokwá꞉ti ne tsi ronateristhatátie Jordan nón꞉we tiotásawe tánon ethò꞉ne thóh nietsawé꞉non ne tsi tiononhtaká꞉renhne ne othorè꞉ke nokwá꞉ti ne Jericho tánon tsi iaʼtewatsénhtos ieiawé꞉non iatehiótkaʼwe ne tsi ionhniáhere kanakerahserá꞉ien tsi nió꞉re ne iahontsathèn꞉ke nón꞉we ne Bethaven.

¹³ Ne tsi karisthatátie ethò꞉ne thóh nietsawé꞉non tsi ionhnontakárenhne ne entiè꞉ne nokwá꞉ti ne Luz (ne ó꞉ni konhwanaʼthónkwa ne Bethel), ethò꞉ne ietionhnonhtatsnénhton ne Ataroth Addar nón꞉we, ne tsi iononhtáhere nenhtiè꞉ne nokwá꞉ti ne Beth Horon nón꞉we.

¹⁴ Ne tsi karisthatátie ethò꞉ne thóh nietsawé꞉non ne Kiriath Jearim, iatehiokwáhtase nenhtiè꞉ne nokwá꞉ti tsi nitsawé꞉non ne tsi iaʼtewatséntos nokwá꞉ti ne kén꞉en iononhtáhere tánon thóh nieiawé꞉non ne Kiriath Baal (khés ne Kiriath Jearim), né꞉ne rahonákwenk ne Judah rahothitióhkwas. Ne kí꞉ken ne entiè꞉ne nokwá꞉ti karisthatátie.

¹⁵ Nenhtiè꞉ne nokwá꞉ti karisthatátie thóh tiothásawe ne tsi iehiò꞉te ne Kiriath Jearim tánon thóh nietsawé꞉non tsi tioná꞉werote ne Nephtoah.

¹⁶ Ethò꞉ne ietsononhtatsnénhton ne tsi tiononhthaienthà꞉hon ne othorè꞉ke nokwá꞉ti ne Rephaim Ahonráhkwakon, tsi nón꞉we tiothásawe ne Hinnom Ahonráhkwakon. Ethò꞉ne thóh nietsawé꞉non entiè꞉ne nokwá꞉ti ne Hinnom Ahonráhkwakon, ne nenhtiè꞉ne nokwá꞉ti ne tsi Kawenothátie ne Jebusite, iaʼehiahó꞉ien ne Enrogel.

¹⁷ Ethò꞉ne ietsokwatáse othorè꞉ke nietsawé꞉non iaʼtehiahó꞉ien ne Enshemesh tánon ethò꞉ne Geliloth iaʼtehiahó꞉ien, ákte nòkwah ne Adummim iohathátie. Ne tsi karisthatátie ethò꞉ne thóh ietsononhtatsnénhton iaʼtehiahó꞉ien nonenhià꞉ke ne Bohan (ne Bohan ne roienkén꞉en ne Reuben)

¹⁸ tánon iehiotohétston nothorè꞉ke kawenotátie ahohén꞉ton ne Jordan Ahonráhkwakon. Ethò꞉ne ietsononhtatsnénhton Ahonráhkwakon niehiawé꞉non,

¹⁹ iehiotohétston nothorè꞉ke kawéhnote ne Beth Hoglah nón꞉we, tánon thóh iatehiothàhon nothorè꞉ke iohontsá꞉ien ne Dead Sea, thóh nón꞉we ne Jordan Kaniatarathátie niehiawé꞉non. Ne kí꞉ken ne entiè꞉ne nokwá꞉ti karisthatá꞉tie.

²⁰ Ne Jordan né꞉ne tsitkarahkwí꞉nekens nokwá꞉ti iotoristohétston. Ne kí꞉ken ne tsi ionateristhatá꞉tie ne ohontsaʼshón꞉as né꞉ne tsi rathiwatsí꞉raiens ne rahothitióhkwas ne Benjamin rotiienà꞉on nahonawenhkón꞉weke.

²¹ Ne tsi kanatowá꞉nens ne Jericho, né꞉ne Beth Hoglah, Emek Keziz, ne rahotinathaʼshón꞉as ne ratiwatsí꞉raiens ne rahotitióhkwas ne Benjamin,

²² ó꞉ni ne Beth Arabah, Zemaraim, Bethel,

²³ Avvim, Parah, Ophrah,

²⁴ Chepharammoni, Ophni, tánon ne Geba: tékeni-iawénre nikaná꞉thakes, skátke ne kanathaién꞉tons aktatieʼshón꞉a.

²⁵ Thóh ó꞉ni í꞉kare ne Gibeon, Ramah, Beeroth,

²⁶ Mizpah, Chephirah, Mozah,

²⁷ Rekem, Irpeel, Taralah,

²⁸ Zela, Haeleph, Jebus (tó꞉ka ó꞉ni né꞉ne Jerusalem í꞉ken), Gibeah, ó꞉ni ne Kiriath Jearim: kaiéri-iawénhre nikaná꞉thakes, konhtikwé꞉kon ne akthatieʼshón꞉as kanataiéntons. Ne kí꞉ken nonhóntsas ne tsi ratiwatsí꞉raiens ne rahothitióhkwakons ne Benjamin rotiienà꞉serons nahonawenhkón꞉weke.