Joshua 17 - Ohiatonhseratokénti

Tsi Iaʼtewatséntos Nokwá꞉ti Ne Manasseh

¹ Ostónha nohóntsa ne tsi iaʼtewatséntos nokwá꞉ti ne Jordan ne thonwaná꞉wi ne tó꞉kara nihatiwatsirá꞉kes ne tsi nitotwatsirí꞉nonh ne Só꞉se roiénha thakowá꞉nen Manasseh. Machir, ne roiénha ne Gilead, ne totsténhakwe ne Manasseh roiénha tánon né꞉ne é꞉tsinn í꞉ken ne tsi waterí꞉io, káti ne Gilead ó꞉ni ne Bashan, ne tsitkarahkwí꞉nekens nokwá꞉ti ne Jordan, raónha thonwá꞉wi.

² Ne ionhontsá꞉ien ne tsi iaʼtewatséntos nokwá꞉ti ne Jordan né꞉ne thonwaná꞉wi ne ronátiaʼkes rahowá꞉tsires ne Manasseh: né꞉ne Abiezer, Helek, Asriel, Shechem, Hepher, tánon ne Shemida. Ne kí꞉ken ne rotiskenrakéhtes tsi rawatsirathátie ne Manasseh né꞉ne Só꞉se roiénha, ronónha ohén꞉ton rónhnete tsi rathiwatsí꞉raiens.

³ Zelophehad né꞉ne roiénha ne Hepher, né꞉ne roiénha ne Gilead, néʼne roienha ne Machir, ne ne roienha ne Manasseh, iah ne othé꞉nen tehonekenteronhtseraiénthakwe, ók tionhnatʼthonwísens rowiraiéntakwe. Tsi nihiotisenhnoténhsons né꞉ne Mahlah, Noah, Hoglah, Milcah, tánon ne Tirzah.

⁴ Rokhá꞉res Eleazar wahonwatkénhsera tánon ne Joshua né꞉ne roʼní꞉ha ne Nun tánon ne sakotihenténhse, wakonhní꞉ron, “Ne Roiá꞉ner roró꞉ri ne Mahís nahonthashón꞉tion, kwáh ki tsi ní꞉ioht ne iakwahthaténon rotiskenrakéhte, ostónha nohóntsas nahionkwawenhkón꞉weke.” Káti, tsi nihotenhnàhon ne Roiá꞉ner, thakonhwanawí꞉hon nonhóntsas tsi ki ní꞉ioht ne ronátiaʼkes ne rotiskenhrakéhte ronhthatenónhkwes.

⁵ Ne ki aorì꞉wa ne Manasseh oieri nihiorihwà꞉ke sénha wé꞉so wahaié꞉na tsi ní꞉ioht ne Gilead ó꞉ni ne Bashan né꞉ne tsitkarahkwí꞉nekens nokwá꞉ti ne Jordan,

⁶ tiorì꞉wa ne tionaʼthonwí꞉sen tsi nitionatwatsirí꞉nons ne ó꞉ni shá꞉ka ne rotiskenrakéhte tsi nitonatwatsirí꞉nons tonhwanawí꞉hon nonhóntsas. Ne tsi iohontsá꞉ien ne Gilead nón꞉we ne thonwaná꞉wi ne tsi nitotwatsirí꞉non ne Manasseh.

⁷ Ne raotinakeráhseras ne Manasseh ié꞉was ne Asher tsi nió꞉re ne Micmethath, né꞉ne tsitkarahkwí꞉nekens nokwá꞉ti ne Shechem. Ne tsi karisthatátie thóh nietsawé꞉non nentiè꞉ne nokwá꞉ti né꞉ne iahiakokwékte nonhkweshón꞉as ne Entappuah.

⁸ Ne ionhontsá꞉ien nakthónties ne Tappuah né꞉ne rahoná꞉wenk ne Manasseh, ók ne tsi kaná꞉taien ne Tappuah, ne kwáh tsi karisthatátie, né꞉ne rahoná꞉kwenk tsi ratiwatsiratátie ne Ephraim.

⁹ Ne tsi karisthatátie thóh ietionhnonhtatsnénton tsi kahionhatátie ne Kanah. Ne tsi kanatowá꞉nens nentieʼné꞉sons ne tsi kahionhatátie né꞉ne rahoná꞉wenk ne Ephraim, iawerohátien tsi thóh rónhnes ne rahotinakerahserá꞉kon ne Manasseh. Ne tsi ronateristatátie ne Manasseh thóh nietsawé꞉non iotsakʼthó꞉seron ne othoreké꞉sons nokwahtí꞉sons tsi kahionhatátie tánon thóh iatehiothàhon ne Mediterranean Kaniatarakeʼkó꞉wa.

¹⁰ Ne Ephraim entiè꞉ne ne nokwá꞉ti í꞉ken, tánon ne Manasseh othorè꞉ke ne nokwá꞉ti í꞉ken, ók ne Mediterranean Kaniatarakeʼkó꞉wa ne nénhne ne iaʼtewatséntos karisthatátie. Ne Asher ne nénhne ne othorè꞉ke nokwá꞉ti ne tsi iaʼtewatsénhtos, tánon ne Issachar ne nénhne ne tsitkarahkwí꞉nekens othorè꞉ke nokwá꞉ti í꞉ken.

¹¹ Ne nón꞉we ne tsi kanakerahserá꞉ien ne Issachar ó꞉ni ne Asher, Manasseh ronatienawátston ne Beth Shan ó꞉ni ne Ibleam, skátke ne aktónhties kanathaiéntons, tánon ó꞉ni ne Dor (né nénhne ne tsitkawenò꞉te nón꞉we ítken), né Endor, Taanach, Megiddo, tánon nakthatieʼshón꞉as kanataiéntons.

¹² Nonhkweshón꞉as ne Manasseh nón꞉we, ethosà꞉ne, iáh tehothikwé꞉nion nahonwatihiaʼtinekén꞉en nonhkweshón꞉as ne ratinákere kí꞉ken ne tsi kanatowá꞉nens, káti ne Canaanites iahontkónhthakwe tsi thóh rathinákereʼkwe.

¹³ Ethosà꞉ne nó꞉nen ne Israerʼró꞉nons sahatishátstenhne iáh ki teshakotihiaʼtinekén꞉en ratikwé꞉kon ne Canaanites, ók ki wahonwenhnónhnien ne ronónha ahonwatihiò꞉tenhse.

Ne Ephraim Tánon Ne Tsi Iaʼtewatséntos Nokwá꞉ti Ne Manasseh Shé꞉kon Sahatirihwanónhton Nonhóntsa

¹⁴ Tsi nitonatwasirí꞉non ne Só꞉se wahónwenhse ne Joshua, “Onhnihiotié꞉ren tsi énskska khók iokwénhrare tsi nón꞉we nistsionhontsá꞉wi nahionkwawenhkónhweke? Kwáh í꞉ken tsi hionkwentiohkowá꞉nen ne tiorì꞉wa ne Roiá꞉ner tsi nisonhkwahiaʼthateríston.”

¹⁵ Ne Joshua watarihwaʼserá꞉ko, “Tó꞉ka thóh nió꞉re tsi sewenhtiohkowá꞉nen tánon ne tsi ionhniarónhnions kahetà꞉kes ne Ephraimke soh tsi niahà꞉ne sewarihwà꞉ke, ki karákon niahásewe tá꞉non sehwathathonhontsaserónhnien ne tsi ionhontsá꞉ien ne Perizró꞉nons ó꞉ni ne Ephraimke.”

¹⁶ Wathatirihwaʼsehrá꞉ko, “Ne tsi ionhniarónhnions ne kaheʼthá꞉kes iáh tsiaʼtekaié꞉ri tsi nahónske nonhkwarihwà꞉ke, Ók ki ne Canaanites ne tsi ionhtonhontsakwaríhshions ó꞉ni nahonrahkwakónsons nón꞉we nihatiʼterónhtons. Tánon kwáh ratikwé꞉kon rotisehrethaiéntons ne konhterí꞉ios otsónhkwas karísthatis ionhniáton. Tsi nihá꞉ti ne tsi kanatowá꞉nens ratiʼterón꞉tons ne Beth Shan tánon ne aktatieʼshón꞉as kanataién꞉tons, tánon tsi niháti ne ahonráhkwakon ne Jezreel ratiʼterón꞉tons kwáh ratikwé꞉kon rotiserehthaién꞉tons ne konhterí꞉ios otsónhkwas.”

¹⁷ Ne Joshua washakawénhase ne kentióhkwas ne Ephraimke ó꞉ni ne tsi iʼtewatséntos nokwá꞉ti ne Manasseh, “Kwáh kí꞉ken tsi sewentiohkowá꞉nen, tánon kwáh tokén꞉en tsi sewaʼshátste. Ó꞉nenk ki tsi sénha wé꞉so ensewaié꞉na tsi ní꞉ioht ne énska khók tsi nahónske.

¹⁸ Ne tsi iononhtaʼrónhnions kananeráhseras í꞉se ensewahiataʼkwení꞉ioke. Iawerohátien tsi kará꞉kon í꞉ken, ensewathonhontsaserón꞉ni tánon ensewatiaʼthakwehní꞉ioste énska tsi nón꞉we entewatáshawen tsi nió꞉re iaʼtenhiókten nó꞉ia. Ók ne Canaanró꞉nons, í꞉se ki nénhʼne enietsihiaʼtí꞉nekenhwe, iawerohátien tsi rotisehretaiéntons ne karístatsis ioniátons ne otsónhkwas tánon kwáh í꞉ken tsi ratiʼshátstes.”