Joshua 16 - Ohiatonhseratokénti

Ne Kanakeráhsera Tonhwaná꞉wi Ne Ephraim Tánon Ne Tsi Iaʼtewatséntos Nokwá꞉ti Ne Manasseh

¹ Nentiè꞉ne nokwá꞉ti wasehriiethatátie ne tsi ionhontsá꞉ien ne tonhwaná꞉wi ne tsi tahawatsirathátie ne Só꞉se thóh tiotásawe ne Jordan ákta ne Jericho, ne tsi iehiotʼthe ne tsitkarahkwí꞉nekens nokwá꞉ti ioná꞉werote ne Jericho, tánon iahonwentsathénhke nieiawé꞉non. Thóh nitsawé꞉non ne Jericho tánon iehiononhtharàhon ne tsi hionhniarónhnions kanakerahserá꞉iens tsi nió꞉re ne Bethel.

² Bethel nitsawé꞉non eʼnietsawé꞉non né꞉ne Luz, iehiotohétston ne Ataroth Addar, thóh nón꞉we ne Archró꞉nons nihatiʼterónhthakwe.

³ Ethò꞉ne ki tsitkarahkwí꞉nekens nokwá꞉ti nietsawé꞉non ne tsi tiokwénhnare ne Japhletites, tsi nió꞉re ne tsi tiokwénhrare ne entiè꞉ne nokwá꞉ti ne Beth Horon. Eʼnietioténhtion né꞉ne Gezer nieiawé꞉non tánon né꞉ne Mediterranean Kaniatarakeʼkó꞉wa iaʼtehiotà꞉on.

⁴ Tsi tahawatsiratátie ne Só꞉se, ne rahotitióhkwas ne Ephraim tánon tsi iaʼtewatsénhtos ne Manasseh, wahatiié꞉na kí꞉ken ohóntsa tsi ahonakwenhkón꞉weke.

Ephraim

⁵ Ne kí꞉ken ne rahotinakeráhsera ne Ephraimró꞉nons kahwá꞉tsires: ne tsi ronateristhatátie thóh natetsawé꞉non ne Ataroth Addar tsitkarahkwí꞉nekens nokwahtí꞉sons nenhtieʼné꞉sons ne Beth Horon,

⁶ tánon thóh naʼtetiawé꞉non né꞉ne Mediterranean Kaniatarakeʼkó꞉wa. Michmethath nothorè꞉ke nokwá꞉ti iotohétston. Tsitkarahkwí꞉nekens nokwá꞉ti ne tsi karisthatátie eʼiehiokarenhrákwen ne Taanath Shiloh nón꞉we tánon tsi iaʼtewatsenhtos iotohétston né꞉ne Janoah.

⁷ Ethò꞉ne ietiotsnénhton ne Janoah tánon Ataroth tánon ne Naarah nietsawé꞉non, iéhio ne Jericho tánon thóh nón꞉we iatehiothàhon ne Jordan.

⁸ Ne tsi karisthatátie tsi iaʼtewatséntos nokwá꞉ti nietsawé꞉non né꞉ne Tappuah nón꞉we tioténtion tánon waʼkahionhó꞉sere ne Kanah tánon thóh iatehiothàhon ne Mediterranean Kaniatarakeʼkó꞉wa. Ne kí꞉ken iohontsá꞉ien thonhwaná꞉wi ne kahwá꞉tsires ne tsi ratitióhkwaien ne Ephraim nahonawenhkón꞉weke,

⁹ skátke ne kanataiéntons ó꞉ni ne ionathakwénhrarons né꞉ne thóh konhtihià꞉ti ne tsi karisthatátie ne Manasseh, ók ki Ephraimró꞉nons thonwaná꞉wi.

¹⁰ Ók iáh ki tehonwananakerakwáhton ne Canaanites rononha thóh nonhwe nihatinakere ne Gezer. Kati ne Canaanites ne skátke ratinákeres ne Ephraimró꞉nons shé꞉kon nón꞉wa wenhniserá꞉te, ók ki thonwananonhthón꞉ni nahothihiò꞉ten tsi ní꞉ioht ne ratináskwa.