Joshua 15 - Ohiatonhseratokénti

Ne Kanakeráhsera Ne Thonwaná꞉wi Ne Judah

¹ Ne kahwá꞉tsires ne rahotitióhkwakons ne Judah wahatiié꞉na ostónha nonhóntsas ken kahiatónhnion tsi nonhwésons: Nohóntsa ié꞉was nentiè꞉ne nón꞉we nentieʼnésons nokwahtí꞉son ne tsi ieiotʼthe ne kará꞉kons ne Zin, né꞉ne tsi tkaristatátie ne Edom.

² Kí꞉ken entieʼné꞉sons karistatátie tiotohétston nentiè꞉ne nokwá꞉ti ne tsi iehiotʼthe ne Dead Sea,

³ entiè꞉ne nokwá꞉ti nietsawé꞉non iehiotohétston ne Akrabbim nòkwah nieiawé꞉non tánon ne Zin nòkwah nietsawé꞉non. Entiè꞉ne nokwá꞉ti ne Kadesh Barnea nietsawé꞉non, iehiotohétston ne Hezron tánon Addar nietsawé꞉non, iatehiokwáhthase ne Karka nietsawé꞉non,

⁴ né꞉ne Azmon nietsawé꞉non, tánon ióhseron ne kahionhatátie ne tsi karistatátie ne Egypt tó꞉nietsawé꞉non ne Mediterranean kaniatarakeʼkó꞉wa, thóh nón꞉we ne karistatátie iatehiothàhon. Ne nentiè꞉ne nokwá꞉ti karistatátie ne Judah.

⁵ Ne tsitkarahkwí꞉nekens nokwá꞉ti karistatátie ne Dead Sea, kwáh tho nió꞉re nietsawé꞉non tsi nón꞉we tionhontsá꞉ien ne Jordan iatehiótokenton ne Dead Sea. Nothorè꞉ke nokwá꞉ti karistatátie thóh nón꞉we tiothásawe.

⁶ Iekaʼní꞉hare tsi nió꞉re ne Beth Hoglah, tánon othorè꞉ke nietsawé꞉non ne tsi iehiotewenokwáhthe iaʼtekaká꞉nere ne ahonráhkwakon ne Jordan. Ethò꞉ne thóh nietsawé꞉non ne tsi tkanénhiote ne Bohan (Bohan ne roienkénhen ne Reuben),

⁷ Thóh tetsioténhtion nenahonráhkwakon ne tekaʼnikónhrare tánon Debir nietsawé꞉non, tánon ethò꞉ne iatehiokwáhthase nothorè꞉ke nietsawé꞉non ne Gilgal nón꞉we, né꞉ne ahohénton ne Adummim iatehiokwáhthase ne entiè꞉ne nokwá꞉ti nahonráhkwakon. Ethò꞉ne eʼnietsawé꞉non ne tsi tioná꞉werote ne Enshemesh, ietsiohiakén꞉en Enrogel nietsawé꞉non,

⁸ tánon thóh nietsawé꞉non iehiotohétston ne Hinnom Ahonráhkwakon né꞉ne entiè꞉ne nokwá꞉ti ne tsi hionhniarónhnion tsi nón꞉we ne Jebusite rahotinatowá꞉nenhke ne Jerusalem nikaná꞉taien. Ne tsi karistatá꞉tie iehiothasónhtere nononhtoharà꞉ke nietsawé꞉non né꞉ne tsi iaʼtewatséntos nokwá꞉ti ne Hinnom Ahonráhkwakon, né꞉ne tsi iehiotókthe ne othorè꞉ke nokwá꞉ti ne Rephaim Ahonráhkwakon.

⁹ Thóh tetsioténhtion ehnietsawé꞉non ne tsi tsionáwerothe ne Nephtoah tánon ietsiohiakén꞉en ne tsi kanatowanénhkes ákta ne tsi Ionónhthe ne Ephron. Thóh nón꞉we iaʼtehiokwáhtase Baalah nietsawé꞉non (tó꞉ka ó꞉ni Kiriath Jearim),

¹⁰ Tsi nón꞉we iehiokakwénhtaien tsi iaʼtewatsénhtos nokwá꞉ti ne Baalah eʼnietsawé꞉non tsi tsionhniarónhnions ne tsi kanakerahserá꞉ien ne Edom, iehiothasónhtere ne othorè꞉ke nokwá꞉ti ne tsi Tionhnónhte ne Jearim (tó꞉ka ó꞉ni né꞉ne Chesalon), ietsiononhtatsnénhton ne Beth Shemesh, tánon thóh ietiotohétston ne Timnah.

¹¹ Ne tsi karistatátie thóh nionhsáwe tsi ionhniarónhnion ne othorè꞉ke nokwá꞉ti ne Ekron, hiatkahiósaien ne Shikkeron, hiahontó꞉hetste ne tsi Ionónhte ne Baalah, thóh nionhsáwe Jamnia. Iat꞉taʼne ne Mediterranean Kaniatarakeʼkó꞉wa,

¹² ne onhtenà꞉thonkwe ne tsi iaʼtewatséntos karistatátie. Ne tsi nón꞉we nikaristatátie ratiʼterónhthakwe nonhkweshón꞉ʼas né꞉ne rahothiwá꞉tsires ne Judah.

Ne Caleb Washakoshén꞉ni Ne Hebron ó꞉ni Ne Debir

¹³ Kwáh ne Roiá꞉ner tsi nihorihón꞉te ne Joshua, ostónha ne tsi kanakerahserá꞉ien ne Judah Caleb thonwá꞉wi ne roiénha ne Jephunneh, thóh nithawé꞉non ne rahotitióhkwakon ne Judah. Wahaié꞉na ne Hebron, ne kanatowá꞉nen né꞉ne rahotinathakén꞉en ne Arba, ne kaʼní꞉sera í꞉ken ne Anak.

¹⁴ Ne Caleb washakorekwáhthe tsi rathiwatsiratátie ne Anak ne tsi kanatowanénhke—tsi ratiʼtharaién꞉tons ne Sheshai, Ahiman, tánon ne Talmai.

¹⁵ Thóh hionsahatén꞉ti iasakotiaʼtón꞉ti nonhkweshón꞉as ne Debir ratiʼterónhtakwe. (Kí꞉ken kanatowakénke ne konwáiatskwe ne Kiriath Sepher.)

¹⁶ Ne Caleb wahèn꞉ron, “Ienkhehiátkaʼwe ne kheiénha Achsah nahotí꞉hiake ne rónhkwe tsi niká꞉ien nenhákweni nahaié꞉na ne Kiriath Sepher.”

¹⁷ Othniel, ne roiénha ne Caleb iathateʼkénha Kenaz, wahaié꞉na ne kanatowá꞉nen, sók ki ne Caleb iasakótkaʼwe ne sakoiénha Achsah nahiakóniake.

¹⁸ Ne wenhniserá꞉te ne watèn꞉niote ne Othniel washakóreke nahonwarihwanóntonhse ne ronhwaʼní꞉ha nashakohé꞉ton. Wahónsnenhthe tsi iakoshaténhtiene ne tewahòn꞉tes, tánon ne Caleb washakorihwanóntonhse nahó꞉ten tehiakotonhontsó꞉ni.

¹⁹ Waʼkharihwaʼserá꞉ko, “Oná꞉weras tewakatonhontsó꞉ni. Ne takonhontsá꞉wi né꞉ne tsi iahonhontsathénhke nón꞉we.” Káti ne Caleb né꞉ne othorè꞉ke nokwá꞉ti tánon nentiè꞉ne nokwá꞉ti ionaweró꞉tons washaká꞉wen.

Ne Kí꞉ken Konhtisenhnarónhnions Ne Tsi Kanatowá꞉nens Ne Joshua Teshakó꞉wi Tsi Rathitióhkwaiens Ne Judah

²⁰ Ne kí꞉ken ne iohontsá꞉iens né꞉tho kahwá꞉tsires ne rahothitióhkwas ne Judah rotiienà꞉seron nahontiaʼthakwehní꞉ioste.

²¹ Ne kwáh ahí꞉non nió꞉re tkaná꞉taien nenhtiè꞉ne nón꞉we ronónha rahonákwenk, tsi niká꞉ien ne ákta tsi karistatátie ne Edom, tánon ne Kabzeel, Eder, Jagur,

²² Kinah, Dimonah, Adadah,

²³ Kedesh, Hazor, Ithnan,

²⁴ Ziph, Telem, Bealoth,

²⁵ Hazor Hadattah, Kerioth Hezron,

²⁶ Amam, Shema, Moladah,

²⁷ Hazar Gaddah, Heshmon, Bethpelet,

²⁸ Hazar Shual, Beersheba, Biziothiah,

²⁹ Baalah, Iim, Ezem,

³⁰ Eltolad, Chesil, Hormah,

³¹ Ziklag, Madmannah, Sansannah,

³² Lebaoth, Shilhim, Ain, tánon ne Rimmon: tewáhsen-tióhton nikaná꞉thakes norihwakwé꞉kon, konhtikwé꞉kon akthatieʼshón꞉as kanathaién꞉tons.

³³ Ne kanatowá꞉nens ne tsi iehiononhthaientháserons né꞉ne Eshtaol, Zorah, Ashnah,

³⁴ Zanoah, Engannim, Tappuah, Enam,

³⁵ Jarmuth, Adullam, Socoh, Azekah,

³⁶ Shaaraim, Adithaim, Gederah, tánon ne Gederothaim: kaié꞉ri-iawénhre nikaná꞉thakes, konhtikwé꞉kon ne tsi kanataién꞉tons nakthatieʼshón꞉as.

³⁷ Tánon ó꞉ni ne Zenan, Hadashah, Migdalgad,

³⁸ Dilean, Mizpah, Joktheel,

³⁹ Lachish, Bozkath, Eglon,

⁴⁰ Cabbon, Lahmam, Chitlish,

⁴¹ Gederoth, Bethdagon, Naamah, tánon ne Makkedah: iá꞉iak-iawénhre nikaná꞉thakes, konhtikwé꞉kon ne kanataién꞉tons nakthatieʼshón꞉as.

⁴² Né ó꞉ni kí꞉ken ne Libnah, Ether, Ashan,

⁴³ Iphtah, Ashnah, Nezib,

⁴⁴ Keilah, Achzib, tánon ne Mareshah: tióhton nikaná꞉thakes, konhtikwé꞉kon nakthatieʼshón꞉as kanataién꞉tons.

⁴⁵ Ne ó꞉ni ne Ekron nahonataʼshón꞉as tánon ne kenʼnikanatà꞉sas,

⁴⁶ tánon akwé꞉kon ne kanatowá꞉nens ó꞉ni nikanatà꞉sas ne ákta ne Ashdod, né꞉ne Ekron tiothásawe tsi nió꞉re ne Mediterranean kaniatarakeʼkó꞉wa.

⁴⁷ Tánon ó꞉ni ne Ashdod ó꞉ni ne Gaza, kontikwé꞉kon nahonathaʼshón꞉as ó꞉ni ne kenʼnikanatà꞉sas, iéhio ne tsi kahionhatátie thóh tsi karistatátie ne Egypt tánon ne kaniatarakthóntie ne Mediterranean Kaniatarakeʼkó꞉wa.

⁴⁸ Ne tsi ionhniarónhnion kanakerahserá꞉iens né꞉ne Shamir, Jattir, Socoh,

⁴⁹ Dannah, Kiriath Sepher (tó꞉ka ó꞉ni né꞉ne Debir),

⁵⁰ Anab, Eshtemoa, Anim,

⁵¹ Goshen, Holon, tánon ne Giloh: énska-iawénhre nikanatowá꞉nens, kontikwé꞉kon ne kanataién꞉tons ó꞉ni ne kenʼnikanatà꞉sas.

⁵² Tánon ó꞉ni ne Arab, Dumah, Eshan,

⁵³ Janim, Beth, Tappuah, Aphekah,

⁵⁴ Humtah, Hebron, tánon ne Zior: tióhton ní꞉kon ne kanatowá꞉nens, konhtikwé꞉kon ne kanataién꞉tons ó꞉ni ne kenʼnikanatà꞉sas.

⁵⁵ Tánon ó꞉ni ne Maon, Carmel, Ziph, Juttah,

⁵⁶ Jezreel, Jokdeam, Zanoah,

⁵⁷ Kain, Gibeah, tánon ne Timnah; oié꞉ri ní꞉kon ne kanatowá꞉nens kontikwé꞉kon ne kanataién꞉tons ó꞉ni ne kenʼnikanatà꞉sas.

⁵⁸ Tánon ó꞉ni ne Halhul, Bethzur, Gedor,

⁵⁹ Maarath, Bethanoth, tánon ne Eltekon: iá꞉iak ní꞉kon ne kanatowá꞉nens konhtikwé꞉kon ne kanataién꞉tons ó꞉ni ne kenʼnikanatà꞉sas.

⁶⁰ Tánon ó꞉ni ne Kiriath Baal (tó꞉ka nihó꞉ni né꞉ne Kiriath Jearim) tánon ne Rabbah: tekaná꞉thakes ne kanatowá꞉nens, kontikwé꞉kon ne kanataién꞉tons ó꞉ni ne kenʼnikanatà꞉sas.

⁶¹ Ne iahontsathèn꞉ke nón꞉we ne nénhne ne Beth Arabah, Middin, Secacah,

⁶² Nibshan, Salt City, tánon ne Engedi: iá꞉iak nikaná꞉thakes ne kanatowá꞉nens, kontikwé꞉kon ne kanataién꞉tons ó꞉ni ne kenʼnikanatà꞉sas.

⁶³ Ók kí꞉ken nonhkweshón꞉as ne Judah nón꞉we iáh tehothikwé꞉nion nashakotihiaʼtinekén꞉en ne Jebusites, ne Jerusalem nón꞉we nihatiʼterónhthakwe. Ne Jebusites shé꞉kon thóh ratì꞉teron skátke nonhkweshón꞉as ne Judah nón꞉we.